E Pueblo Seyá di Dios

Lesa Revelashon 7:1-3 huntu ku 2 Pedro 3:9-14. Kiko Juan ta mira? Kuantu tempu e angelnan ta suponé di wanta e bientunan? Kiko lo pasa ora e seyamentu ser konkluí?

Den Tèstamènt Bieu, bientunan ta representá forsanan destruktivo pa medio di kua Dios ta ehekutá huisionan riba e malbadonan (Jer. 23:19, 20; Dan. 7:2). “Ora e angelnan di Dios stòp di tene e bientunan fuerte di pashonnan humano den kontròl, tur e elementonan di desunion lo ser lagá lòs."-Ellen G. White, The Great Controversy, p. 614. E forsanan destruktivo aki ta ser wantá dor di intervenshon divino miéntras e seyamentu di e pueblo di Dios ta tuma lugá.

Den tempunan antiguo, e nifikashon prinsipal di seyamentu tabata propiedat. E nifikashon di e seyamentu simbóliko den Tèstamènt Nobo ta ku “Señor konosé esnan ku ta di djE” (2 Tim. 2:19, NKJV). Dios ta rekonosé Su propio pueblo i ta seya nan ku Spiritu Santu (Efe. 1:13, 14; Efe. 4:30). Na e tempu di fin, e seyo riba e frenta ta ser duná na e pueblo fiel di Dios, ku ta warda Su mandamentunan (Rev. 14:1, 12). E no ta un marka visibel poné riba bo frenta, sino manera Ellen G. White ta deklará, e ta nifiká "establesé den e bèrdat, tantu intelektualmente komo spiritualmente, pa nan [e pueblo di Dios] no por ser mové."- Last Day Events, p. 220. Den kontraste, esnan ku finalmente apoyá e bestia ta risibí e marka di e bestia (Rev. 13:16, 17).

E fieldat di e pueblo seyá di Dios a ser di probá den kada generashon. Sinembargo, e prueba di fieldat den e krísis final lo ta e wardamentu di e mandamentunan di Dios (lesa Rev. 12:17, Rev. 14:12). En partikular, e di kuater mandamentu lo bira e prueba di obediensia na Dios (Rev. 14:7). Meskos ku e Sabat tabata e señal di e pueblo di Dios den tempunan bíbliko (Eze. 20:12, 20; Hebr. 4:9, 10), asina e lo ta e señal di Iealtat na Dios den e krísis final.

Den e tempu di e fin, e seyo ta funshoná tambe komo un señal di protekshon for di e forsanan destruktivo di e shete último plaganan (lesa Eze. 9:1-11 pa e konteksto di e simbolismo di Rev. 7:1-3). Por lo tantu, e pregunta ku a ser lansá den Revelashon 6:17 ta risibí e kontesta final: esnan ku lo ta kapas pa para protehá riba e dia di e rabia di Dios ta e pueblo seyá di Dios.

Lesa Revelashon 7:4-8. Kiko ta e kantidat di e pueblo seyá di Dios? Kiko ta e nifikashon di e kantidat spesífiko ei?

E anunsio di e kantidat di esnan ku ta seyá ta marka e kumplimentu di e seyamentu. Juan ta tende ku nan kantidat ta 144.000 for di e 12 tribunan di Israel. E referensia aki no ta na un kantidat literal sino na loke e ta nifiká. E kantidat 144.000 ta konsistí di 12 biaha 12 biaha 1.000. Diesdos ta un símbolo di e pueblo di Dios: e tribunan di Israel i e iglesia konstruí riba e fundeshi di e Diesdos apòstelnan (Efe. 2:20). Pues, e kantidat 144.000 ta para pa e totalidat di e pueblo di Dios den e tempu di fin: "Henter Israel" (Hudiunan i Paganonan) ku ta kla pa e regreso di Kristu i ku lo ser transladá sin mira morto (Rom. 11:26, 1 Kor. 15 :5 1-53 ).

E 12 tribunan registrá den Revelashon 7, opviamente, no ta literal, pasobra e 12 tribunan di Israel, ku ta abarká tantu e Reino di Nort komo di Sùit, no ta eksistí aktualmente. E 10 tribunan di e Reino di Nort a ser tumá den koutiverio durante e konkista Asiria (2 Reinan 17:6-23), kaminda nan a integrá ku otro nashonnan. Pues, e 12 tribunan no ta konstituí Hudaismo awe.

Tambe, e lista di e 12 tribunan den Revelashon 7 no parse niun otro den Skritura (kompará Num. 1:5-15; Ezek. 48:1-29). Huda ta ser registrá komo e promé tribu (Rev. 7:5), enbes di Ruben (kompará ku Num. 1:5). Tambe, e tribunan di Dan i Efraim, inkluí den e listanan di Numbernan 1 i Ezekiel 48, a ser omití for di e lista den Revelashon 7, miéntras Levi i Hosé a ser inkluí a kambio (Rev. 7:7, 8). E rason opvio pa e eksklushon di Efrain, i aparentemente Dan, for di e lista den Revelashon 7 ta ku den Tèstamènt Bieu e dos tribunan aki ta apóstata i idólatra (1 Reinan 12:29, 30; Os. 4:17).

E lista di e tribunan den Revelashon 7 no ta históriko sino spiritual. E ousensia di Dan i Efrain for di e lista ta sugerí ku e infidelidat di e dos tribunan aki lo no tin lugá entre e pueblo seyá di Dios. Tambe, e iglesia den Tèstamènt Nobo ta ser referí na dje komo e 12 tribunan di Israel (Santiago 1:1). E 12 tribunan den Revelashon 7 ta para pa henter e pueblo di Dios ku a soportá te na fin, tantu Hudiunan komo Paganonan.

Lesa Revelashon 7:9-10. Ki grupo di santunan Juan ta mira na e momentu aki? Kon nan ta ser deskribí, i for di unda nan ta bini? Kiko nan ta grita dilanti di e trono di Dios?

Juan ta mira un “gran multitut, kua niun hende por a konta”, ku a sali “for di e gran tribulashon, i a laba nan pañanan i a hasi nan blanku den e sanger di e Lamchi” (Rev. 7:14, NKJV). Es desir, nan ta un grupo spesial di hende ku, apesar di kual sea tribulashon nan a pasa aden, a permanesé fiel na Hesus, un fieldat simbolisá dor di nan siendo kubrí den e pañanan di Su hustisia perfekto. E palabra "tribulashon" ta ser uzá masha frekuente den Beibel pa referí na e kosnan ku kreyentenan ta sufri pa nan fe (lesa por ehèmpel Eks. 4:31, Salmo 9:9, Mat. 24:9, Juan 16:33, Rom 5:3). Pa e motibu ei, ounke algun intérprete Atventista ta mira e grupo aki komo un otro representashon di e 144.000, nos lo por a komprondé e "gran multitut" komo un referensia na tur esnan redimí ku a sufri pa nan fe a lo largu di siglonan.

Aki tambe, den e deskripshon di Juan di e "gran multitut, kua niun hende por a konta", nos ta mira, manera nos ta hasi den henter Beibel, e gran tema di salbashon pa medio di grasia. E úniko derecho di esnan redimí na salbashon, na bida eterno, na e shelunan nobo i e tera nobo, ta e hustisia di Kristu kua ta ser duná na nan pa grasia.

"Mas serka di e trono tin esnan ku un tempu tabata zeloso den e kousa di Satanas, pero ku, saká manera takinan for di kandela, a sigui nan Salbador ku deboshon profundo i intenso. Despues tin esnan ku a perfekshoná karakternan Kristian meimei di falsedat i infidelidat, esnan ku a honra e lei di Dios ora e mundu Kristian a deklar’é abolí, i e miónes, di tur siglo, ku a ser martirisá pa nan fe. I mas aya tin e ‘gran multitut, kua ningun hende por a konta, di tur nashon, i tribu, i pueblo, i lenga, ... dilanti di e trono, i dilanti di e Lamchi, bistí ku pañanan blanku, i palmanan den nan mannan’. Revelashon 7:9. Nan guera a terminá, nan viktoria ganá. Nan a kore e kareda i a alkansá e premio. E rama di palma den nan mannan ta un símbolo di nan triunfo, e paña blanku un emblema di e hustisia inmakulá di Kristu ku awor ta di nan”.- Ellen G. White, The Great Controversy, p. 665.

Lesa Revelashon 14:1-5. Kiko ta e tres karakterístikanan prinsipal di e 144.000 santunan? Kon e karakterístikanan aki ta relashoná ku e deskripshon di e santunan di tempu di fin den Revelashon 14:12?

Revelashon 14:4, 5 ta un deskripshon di e 144.000 ku ta aliniá ku e pueblo di Dios di e último dianan ku "ta warda e mandamentunan di Dios, i e fe di Hesus" (Rev. 14:12). Ounke nan a eksperensiá e plenitut di e furia di Satanas den e krísis final, nan a permanesé firme pa motibu di nan relashon estrecho ku Hesus.

Den lus di Revelashon 17:5, den ki sentido e 144.000 no a kontaminá nan mes ku muhé? Kon e puresa di nan karakter ta relashoná ku e echo ku nan ta redimí for di e tera komo e "promé frutanan pa Dios" (Rev. 14:4, NKJV)?/span>

Inmoralidat seksual ta un símbolo di infidelidat na Dios. Revelashon 17:5 ta papia tokante e prostituta di tempu di fin, Babilonia i su yunan muhé, ku ken tur hende di mundu lo kometé fornikashon (lesa tambe Rev. 18:3).

Sinembargo, e 144.000 lo permanesé leal na Kristu i resistí e relashonnan kontaminá ku Babilonia i e iglesianan apóstata. E 144.000 "ta sigui e Lamchi na unda ku E bai" (Rev. 14:4, NKJV).

E 144.000 ta ser deskribí mas aleu komo esnan ku a ser "redimí for di entre hende" komo "promé frutanan pa Dios i pa e Lamchi" (Rev. 14:4, NKJV). Den Israel antiguo, e promé frutanan tabata e mihó frutanan di e kosecha ofresé na Dios (Num. 18:12). E palabra "promé frutanan" por referí na hendenan salbá komo distinto for di esnan den mundu (Santiago 1:18), pero den Revelashon e 144.000 ta klaramente un grupo spesial pasombra nan lo ser trasladá sin mira morto (1 Kor. 15:50-52). Por lo tantu, nan ta e promé frutanan di e kosecha mas grandi di e esnan salbá atraves di tur siglo (Rev. 14:14-16).

Lesa Revelashon 14:5 huntu ku 2 Pedro 3:14 i Hudas 24, 25. Revelashon ta deskribí e pueblo di Dios di tempu di fin komo "sin kulpa." Kon e estado aki por ser lográ?

E karakterístika final di e 144.000 ta ku "den nan boka no a ser hañá mentira: pasobra nan ta sin kulpa dilanti e trono di Dios" (Rev. 14:5). Miéntras e hendenan di mundu ta skohe pa kere e engañonan di Satanas, e pueblo di Dios di e tempu di fin, ku ta sin engaño den palabra òf kondukta, lo risibí e amor di e bèrdat pa ser salbá (2 Tes. 2:10, 11).

"Sin kulpa" (Griego amomos, "perfekto") ta referí na e fidelidat di e 144.000 na Kristu. Den Beibel, e pueblo di Dios ta ser yamá pa ta santu (Lev. 19:2; 1 Pedro 2:9). Abraham (Gen. 17:1 ) i Job (Job 1:1) tabata sin mancha. Kristiannan ta ser yamá pa ta santu i sin mancha dilanti di Dios (Ef. 5:27, Fil. 2:15).

Lesa Romanonan 3:19-24. Dikon nos mester mantené e bèrdat krusial aki semper nos dilanti?

Den e último dianan di historia di e mundu aki, e 144.000 lo reflehá e karakter di Kristu. Nan salbashon lo reflehá loke Kristu a hasi pa nan i den nan mas bien ku nan propio santidat i obranan (Efe. 2:8-10). E 144.000 a laba nan pañanan i a hasi nan blanku den e sanger di e Lamchi (Rev. 7:14) i, komo tal, a ser hañá "sin mancha i sin kulpa" dilanti di Dios (2 Pe. 3:14, NASB).

"Nos mester ser refiná, limpiá di tur kos mundano, te ora nos reflehá e imágen di nos Salbador, i bira 'partisipantenan di e naturalesa divino'. ...

"Ora e konflikto di bida terminá, ora e armadura ser poné na pia di Hesus, ora e santunan di Dios ser glorifiká, e ora ei, i solamente e ora ei, lo ta sigur pa afirmá ku nos ta salbá, i sin piká". -Ellen G. White, Selected Messages, buki 3, p. 355, 356.

Lesa Ellen G. White, “Sinlessness and Salvation”, p. 353-357, den Selected Messages, buki 3.

E identidat di e 144.000 ta un tema hopi debatí. Loke ta parse evidente den Revelashon ta ku e 144.000 ta e último generashon di e pueblo di Dios den e último dianan di historia di e tera aki. Nos sa ku nan lo pasa dor di e tempu di angustia i ser protehá for di e shete último plaganan (Salmo 91:7-16, Rev. 7:15-17) i ku nan lealtat lo ser probá manera niun otro generashon den pasado.

Eksaktamente ken lo ta den e grupo ei no a ser revelá na nos. Nan identidat ta un di e sekretonan ku Dios a tene pa Su Mes (Deut. 29:29). Solamente futuro lo revelá ken lo ta parti di e grupo aki di santunan salbá. Enkuanto di e misterio aki, nos a ser duná un spièrtamentu:

"Kristu ta bisa ku lo tin esnan den e iglesia ku lo presentá fábulanan i suposishonnan, ora ku Dios a duna bèrdatnan grandi, elevador, ku ta eksaltá kua mester ser preservá semper den e tesoreria di e mente. Ora hende rekohé e teoria aki i e teoria aya, ora nan ta kurioso pa sa algu ku no ta nesesario pa nan sa, Dios no ta guiando nan. No ta Su plan pa Su pueblo presentá algu ku nan mester suponé, kua no ta ser siñá den e Palabra. No ta Su boluntat pa nan drenta den kontroversia riba kuestionnan kua lo no yuda nan spiritualmente, manera, Ken tin ku komponé e shentikuarentikuater mil? Sin niun duda, esnan ku ta e skohínan di Dios lo sa esaki den un korto tempu".-Ellen G. White, Selected Messages, buki 1, p. 174.