E Shete Trompètnan

Revelashon 8 ta habri ku un imágen di shete angel pará dilanti di Dios, kla pa supla nan trompètnan. Promé ku e trompètnan ser suplá, un otro esena ta ser insertá. Su propósito ta pa splika e nifikashon teológiko di e trompètnan.

Lesa Revelashon 8:3, 4 huntu ku e deskripshon di e sirbishinan diario den e tèmpel na Yerusalèm duná aki bou: Un komentario Hudiu riba Beibel ta splika ku na e sakrifisio di atardi e lamchi tabata ser poné riba e altar di ofrenda kimá, i e sanger tabata ser bashá na base di e altar. Un saserdote apuntá tabata hiba e wea pa sensia di oro den e tèmpel i tabata ofresé sensia riba e altar di oro den e Lugá Santu. Ora e saserdote sali pafó, e tabata tira e wea pa sensia abou riba flur, produsiendo un zonido duru. Na e momentu ei, shete saserdote tabata supla nan trompètnan, markando e fin di e sirbishinan di tèmpel pa e dia ei.

Bo por mira kon e lenguahe di e sirbishi di anochi ta ser uzá den Revelashon 8:3-5. Ta signifikante ku e angel ta risibí sensia na "e altar di oro ku tabata dilanti di e trono" (Rev. 8:3, NKJV). E sensia ta representá e orashonnan di e pueblo di Dios ( Rev. 5:8). Nan orashonnan awor ta ser kontestá dor di Dios.

Revelashon 8:3-5 ta proveé informashon importante enkuanto di e trompètnan den Revelashon:

• E shete trompètnan ta e huisionan di Dios riba e humanidat rebelde komo kontesta na e orashonnan di Su pueblo oprimí.
• E trompètnan ta bin despues di e morto di Hesus komo e Lamchi i ta kore konsekutivamente a lo largu di historia te na e Segundo Binida (Rev. 11:15-18 ).

Lesa Revelashon 8:5 huntu ku Ezekiel 10:2. Kon e vishon di Ezekiel di tiramentu di kandela riba Yerusalèm apóstata ta splika e naturalesa di e trompètnan den Revelashon?/span>

E angel ta yena e wea pa sensia ku kandela di e altar i ta tira esaki riba tera. Ta signifikativo ku e kandela aki ta bini for di e mes altar riba kua e orashonnan di e santunan tabata ser ofresé. E echo ku e kandela ta bin for di e mesun altar ei ta mustra ku e huisionan di e shete trompètnan ta kai riba e habitantenan di tera den kontesta riba e orashonnan di e pueblo di Dios, i tambe ku Dios lo intervení na nan fabor na Su debido tempu. E tiramentu abou di e wea pa sensia por ta tambe un spièrtamentu ku e interseshon di Kristu lo no dura pa semper. Lo tin un klousura di tempu di grasia (Rev. 22:11, 12).

Ora e ta deskribí e intervenshonnan di Dios na fabor di Su pueblo, Revelashon ta usa e imágen di trompètnan den Tèstamènt Bieu. Trompètnan tabata un parti importante di e bida diario di Israel antiguo (lesa Num. 10:8-10 i 2 Kron. 13:14-15 ). Nan zonido tabata kòrda hende riba e adorashon den tèmpel; trompètnan tabata ser suplá tambe den bataya, na tempu di kosecha, i durante festivalnan.

Supla trompèt tabata bai man den man ku orashon. Durante adorashon den e tèmpel òf durante e festivalnan, e trompètnan tabata "kòrda" Dios riba Su pakto ku Su pueblo. Tambe nan tabata kòrda hende pa ta kla pa e "dia di Señor" (Joel 2:1). Durante bataya, e zonidu di trompèt tabata duna instrukshon klave i spièrtamentunan, i tabata yama riba Dios pa salba Su pueblo. E konsepto aki ta e trasfondo pa e trompètnan den Revelashon.

Lesa Revelashon 8:13 i Revelashon 9:4, 20, 21. Ken ta e ophetonan di e huisionan di e shete trompètnan?

E eventonan provoká pa e trompètnan den Revelashon ta denotá e intervenshon di Dios den historia komo kontesta riba e orashonnan di Su pueblo. Miéntras e seyonan ta konserní prinsipalmente esnan ku ta profesá di ta e pueblo di Dios, e trompètnan ta anunsiá huisionan kontra e habitantenan di tera (Rev. 8:13). Na mes momentu, nan ta spièrtamentunan pa esnan ku ta biba riba tera pa hiba nan na arepentimentu promé ku ta muchu lat.

E shete trompètnan ta kubri e kurso di eventonan for di tempu di Juan te na e konklushon di e historia di e tera aki (Rev. 11:15-18). Nan ta ser suplá miéntras interseshon ta tuma lugá den shelu (Rev. 8:3-6) i e evangelio ta ser prediká riba tera (Rev. 10:8-11:14). E huisionan di e trompètnan ta parsial; nan ta afektá solamente un terser partí di kreashon. E di shete trompèt ta anunsiá ku e tempu a yega pa Dios asumí Su gobièrnu legítimo. E shete trompètnan ta apliká aproksimadamente na e mesun periodonan kubrí dor di e shete iglesianan i e shete seyonan:

• E promé dos trompètnan ta anunsiá huisionan riba e nashonnan ku a krusifiká Kristu i a persiguí e promé iglesia: Yerusalèm rebelde, i e Imperio Romano.
• E di tres i di kuater trompèt ta deskribí e huisio di shelu kontra e apostasia di e iglesia Kristian den e periodo medieval.
• E di sinku i di seis trompèt ta deskribí e gruponan batayando den e mundu religioso durante e periodonan na fin di edat media i periodonan despues di e Reforma. E periodonan aki ta karakterisá pa aktividat demoniako kresiente ku finalmente ta hala e mundu den e bataya di Armagedon.

E di seis tròmpet ta hiba nos na e tempu di e fin. Kiko e pueblo di Dios ta ser yamá pa hasi durante e tempu aki? Promé ku e di shete trompèt zona, un interludio ta ser insertá, splikando e tarea i eksperensia di e pueblo di Dios den e tempu di fin.

Lesa Revelashon10:1-4. Kiko ta pasando aki?

"E angel poderoso ku a instruí Juan tabata niun otro hende sino Hesukristu”. - Ellen G. White Comments, The SDA Bible Commentary, tomo 7, p. 971. E ta pone su pianan riba laman i tera, loke ta impliká Su gobièrnu universal i ku loke E tabata na punto di proklamá tin nifikashon mundial. E ta grita ku e gruñá di un leon. E gruñá di un leon ta simbolisá e bos di Dios (lesa Oseas 11:10, Rev. 5:5).

Juan no tabata permití pa skirbi loke e strena a bisa. Tin kosnan konserniente e futuro ku Dios no a revelá na nos atraves di Juan.

Lesa Revelashon 10:5-7. Kompará e pasashi aki ku Daniel 12:6-7. Ki palabranan nan tin en komun?

Ora e Angel deklará ku lo "no tin tardansa mas" (Rev. 10:6), e palabra Griego chronos ta mustra ku e ta referí na e periodo di tempu. Esaki ta mustra bèk na Daniel 12:6, 7, kaminda un angel ta deklará ku e persekushon di e santunan lo dura pa un tempu, tempunan, i mitar di un tempu, òf 1.260 aña (A.D. 538-1798) durante kua e iglesia a ser persiguí dor di e papado (kompará Dan. 7:25). Ya ku den Daniel i Revelashon un "dia" profétiko ta simbolisá un aña (Num. 14:34, Ezek. 4:6), 360 "dia" ta igual na 360 aña, i tres i mitar tempu (òf "aña") ta igualá 1.260 "dia" òf aña. Algun tempu despues di e periodo profétiko aki, e fin lo a yega.

E deklarashon ku tempu lo no ta mas ta referí na e profesianan di tempu di Daniel, partikularmente e 2300 dianan profetiko di Daniel 8:14 (457 B.C.-A.D. 1844). Despues di e periodo aki, lo no tin periodonan di tempu profétiko mas. Ellen White ta deklará: "E tempu aki, kua e angel ta deklará ku un huramentu solèm, ta ... tempu profétiko, ku lo mester presedé e binimentu di nos Señor. Es desir, hende lo no tin un otro mensahe riba un tempu definí. Despues di e periodo di tempu aki, ku ta abarká for di 1842 te 1844, no por tin un siguimentu definí di e tempu profétiko. E kálkulo di mas largu ta alkansá te e otoño di 1844". -¬ Ellen G. White Comments, The SDA Bible Commentary, tomo 7, p. 971.

Lesa Revelashon 10:8-11. Kome den Beibel ta ser uzá pa deskribí e aseptashon di un mensahe for di Dios pa proklam'é na e hendenan (lesa Ezek. 2:8-3:11, Jer. 15:16). Ora e ser risibí, e mensahe ta bon notisia; pero ora e ser proklamá, tin biaha ta resultá den amargura ya ku e ta ser resistí i rechasá dor di hopi.

E eksperensia marga-dushi di Juan ora e a kome e buki (ku ta representá e buki di Daniel) ta relashoná ku e revelashon di e profesianan di tempu di fin di Daniel. Juan ta representá aki e iglesia remanente ku ta ser mandá pa proklamá e evangelio eterno (Rev. 14:6, 7) na final di e profesia di tempu di Daniel (Dan. 7:25) òf 1.260 dia/aña.

E konteksto ta indiká ku e vishon di Juan ta mustra na un otro eksperensia marga-dushi na final di e periodo profétiko di 2.300 aña. Ora, a base di e profesianan di Daniel, e Mileritanan a pensa ku Kristu lo a regresá na 1844, e mensahe ei tabata dushi pa nan. Sinembargo, ora ku Kristu no a aparesé manera tabata ser sperá, nan a eksperensiá un desapunto amargo i a skrudiñá e Skrituranan pa un komprondementu mas kla.

E mandato di Juan pa "profetisá atrobe" na e mundu ta mustra na Atventistanan ku ta warda Sabat, ku a lanta pa proklamá e mensahe di e Segundo Binida en konekshon ku e profesianan di Daniel i Revelashon.

Lesa Revelashon 11:1-2. Kiko Juan ta ser ordená pa hasi?

E pasashi aki ta kontinuá e esena di Revelashon 10. Juan a ser ordená pa midi e tèmpel, e altar, i e adoradónan. E konsepto di midi den Beibel ta referí figurativamente na huisio (Mat. 7:2). E tèmpel ku mester a ser midí ta den shelu, kaminda Hesus ta ministrá pa nos. E referensia na e tèmpel, e altar, i e adoradónan ta mustra na e Dia di Ekspiashon (Lev. 16:16-19). E dia aki tabata un dia di "midimentu" ya ku Dios tabata husga Su pueblo. Por lo tantu, Revelashon 11:1 ta referí na e huisio ku ta tuma lugá promé ku e Segundo Binida. E huisio aki ta konserní eksklusivamente Dios Su pueblo, e adoradónan den e tèmpel.

Revelashon 11:1 ta mustra ku e mensahe di e santuario selestial ta konstituí e núkleo di e proklamashon, kua ta inkluí e vindikashon di e karakter di Dios. Komo tal, e ta duna e dimenshon kompletu di e mensahe di e evangelio respekto e obra ekspiatorio di Kristu i Su hustisia komo e úniko medio di salbashon pa sernan humano.

Lesa Revelashon 11:3-6. Den ki maneranan e dos testigunan ta reflehá Zorobabel i Josue den nan ròlnan real i saserdotal? Lesa Zak. 4:2, 3, 11-14.

E idea di dos testigu ta bini for di e sistema legal Hudiu, kua ta rekerí por lo ménos dos testigu pa establesé algu komo bèrdat (Juan 8:17). E dos testigunan ta representá e Beibel, tantu Tèstamènt Bieu komo Nobo. E dosnan no por ser separá. E pueblo di Dios ta ser yamá pa proklamá e mensahe di Beibel kompletu na e mundu, "henter e konseho di Dios" (Echonan 20:27, NKJV).

E testigunan ta ser deskribí komo profetisando den paña di saku durante e periodo profétiko di 1.260 dia/aña (A.D. 538-1798). Paña di saku ta e bistí di luto (Gen. 37:34); e ta mustra na e tempu difísil ora e bèrdatnan di Beibel a ser derá, i tapá, dor di tradishonnan humano.

Lesa Revelashon 11:7-13. Den bo mes palabranan, deskribí kiko a pasa ku e dos testigunan na fin di e 1.260 dianan/añanan profétiko.

E bestia ku ta mata e dos testigunan ta lanta for di e lugá di biba mes di Satanas. E matamentu di e testigunan ta apliká histórikamente na e atake ateista riba e Beibel i e abolishon di religion en konekshon ku e eventonan di e Revolushon Franses. E sistema anti religioso establesé na Fransia tabata poseé e degradashon moral di Sodoma, e arogansia ateista di Egipto, i e rebeldia di Yerusalèm. Loke a pasa ku Hesus den Yerusalèm awor ta sosodé ku e Beibel dor di e sistema anti religioso aki.

E resurekshon di e testigunan ta mustra na e gran reavivamentu di interes den e Beibel den e konsekuensia di e Revolushon Franses, kua a resultá den e surgimentu di e movementu di e Segundo Atvènt ku su restourashon di bèrdat di Beibel, e establesimentu di sosiedatnan di Beibel, i distribushon mundial di e Beibel.

Djis promé ku e fin, e mundu lo testiguá un proklamashon global final di Beibel (Rev. 18:1-4). E mensahe final aki lo provoká oposishon empoderá pa e entidatnan demoniako ku lo obra milagernan pa gaña e mundu i hala adoradónan di e bestia den un bataya final kontra e testigunan fiel di Dios (lesa Rev. 16:13-16, Rev. 14:12).

E di shete trompèt (Rev. 11:15-18) ta señalá e konklushon di historia di e tera aki. E ora a yega pa Dios revelá Su poder i reinado. E planeta rebelde aki, kua tabata bou di dominio di Satanas pa míles di aña, ta na punto di bini bèk bou di dominio di Dios. Tabata despues di e morto di Kristu riba e krus i Su asenshon na shelu ku Kristu a ser proklamá di ta e gobernante legítimo di e tera (Rev. 12:10, 11). Satanas ta sigui kousa tur e desaster ku e por, sabiendo ku su tempu ta kòrtiku (Rev. 12:12). E di shete trompèt ta anunsiá ku e podernan usurpadó a ser atendé kuné i ku e mundu aki finalmente a bin bou di e gobièrnu legítimo di Kristu.

E di shete trompèt ta deskribí e kontenido di e restu di e buki:

1. E nashonnan tabata rabiá: Revelashon 12-14 ta deskribí Satanas komo yená ku rabia (Rev. 12:17), ken ku su dos aliadonan, e bestia di laman i e bestia di tera, ta prepará e nashonnan di e mundu pa bringa kontra e pueblo di Dios.
2. Bo furia a yega: E kontesta di Dios riba e rabia di e nashonnan ta e shete último plaganan, kua ta ser referí na dje komo e furia di Dios (lesa Rev. 15:1).
3. E tempu pa e mortonan ser husgá ta ser deskribí den Revelashon 20:11-15.
4. I pa rekompensá e sirbidónan di Dios ta ser deskribí den Revelashon 21 i 22.
5. Destruí esnan ku ta destruí e tera: Revelashon 19:2 ta deklará ku e Babilonia di tempu di fin ta ser husgá pasobra e a destruí e tera.

E destrukshon di Satanas, su ehérsitonan, i su dos aliadonan ta e akto final den e drama di e gran konflikto (Rev. 19:11-Rev. 20:15 ).