Satanas, un Enemigu Derotá

Lesa Revelashon 12:1-5. Den vishon Juan ta mira dos gran señal. E promé ta un muhé na estado di un Yu, i e di dos ta un dragon. Kiko e señalnan (òf símbolonan) aki ta representá, i kiko e versíkulonan aki ta siña?

Un muhé den Beibel ta ser usá komo un símbolo pa e pueblo di Dios (2 Kor. 11:2): un muhé puru ta para pa kreyentenan fiel, miéntras un prostituta ta para pa Kristiannan apóstata. E muhé den Revelashon 12 promé ta simbolisá Israel, na ken e Mesias a bini (Rev. 12:1-5); den versíkulonan 13-17 e ta para pa e iglesia berdadero ku ta duna lus na e remanente.

E muhé aki ta ser deskribí komo bistí ku solo i ku luna bou di su pianan. E solo ta representá e gloria di e karakter di Kristu, Su hustisia (Mal. 4:2). E ta "e lus di mundu" (Juan 8:12), i Su pueblo mester reflehá e lus di Dios Su karakter amoroso na e mundu (Mat. 5:14-16). E luna, komo "e lus mas chikitu" (Gen. 1:16), ta mustra na e promesanan di Tèstamènt Bieu ku ta mustra padilanti e obra di Kristu den e era di evangelio.

E siguiente kos ku Juan ta mira den e vishon tabata un “dragon kòrá feros ku tin shete kabes i dies kachu” (Rev. 12:3, NKJV). E dragon ta ser identifiká despues komo Satanas (Rev. 12:9 ). Su “rabu”, ku ta simbolisá e medio uzá pa engañá (Isa. 9:14, 15; Rev. 9:10) a lastra un terser parti di e streanan for di shelu pa tera (Rev. 12:4). E akshon aki ta mustra ku, despues di a kai for di su posishon eksaltá den shelu (Isa. 14:12-15), Satanas tabata kapas pa gaña un terser parti di e angelnan. E angelnan kaí aki ta e demoñonan ku ta asistí e diabel den oponé Dios i Su obra di salbashon (1 Tim. 4:1). Revelashon ta usa tambe e dragon, deskribí komo "teniendo shete kabes i dies kachu" komo un símbolo di e agentenan ei den e mundu uzá dor di Satanas, Roma pagano (Rev. 12:4 ) i spiritualismo (Rev. 16:13). “Ta ser bisá ku e dragon ta Satanas (Revelashon 12:9); e ta esun ku a move riba Herodes pa mata e Salbador. Pero e agente prinsipal di Satanas den hasi guera ku Kristu i Su pueblo durante e promé siglo di e Era Kristian tabata e Imperio Romano, den kua paganismo tabata e religion ku tabata prevalesé. Asina ta ku miéntras e dragon, primeramente, ta representá Satanas, e ta, den un sentido sekundario, un símbolo di Roma pagano".-Ellen G. White, The Great Controversy, p. 438.

Lesa Revelashon 12:9. Satanas ta ser yamá "e kolebra di antigwedat" (NKJV). Ki konekshon ta eksistí entre Génesis 3:15 i e intento di e dragon pa destruí e simia di e muhé "asina ku e a nase" (Rev. 12:4)?

For di prinsipio, Satanas tabata warda pa e Mesias, e Yu ku mester a nase, pa asina destruyE. Ora e Mesias finalmente a nase, Satanas a usa Roma pagano (simbolisá tambe komo e dragon den Revelashon 12:4) pa trata na destruyE (Mat. 2:13-16). Pero e Yu a ser "kohé hibá na Dios i Su trono" (Rev. 12:5, NKJV).

Lesa Revelashon 12:7-9, kua ta papia tokante un guera den shelu. Kiko tabata e naturalesa di e guera ei ku ta resultá den e ekspulshon di Satanas for di shelu?

Satanas a ser ekspulsá for di shelu na komienso di e gran kontroversia, ora e a rebeldía kontra e gobiernu di Dios. E ke a poderá di e trono den shelu i pa ta "meskos ku e Haltísimo" (Isa. 14:12-15). E a para den revolushon habrí kontra Dios pero a ser derota i eksiliá riba tera. Sinembargo, ora e a gaña Adam i Eva, Satanas a usurpá e gobièrnu di Adam riba e mundu aki (Lukas 4:6). Komo e gobernante di e mundu aki ku a proklamá su mes (Juan 12:31), Satans a reklamá e derechi pa asistí na e e konsilio selestial komo representante di e mundu (Job 1:6-12). Sinembargo, desde su derota na e krus, Satanas i su angelnan kaí a ser limitá na tera komo un prison, te ora nan risibí nan kastigu (2 Pe. 2:4, Hudas 6).

Pa medio di Su morto, Hesus a redimí loke tabata perdí, i e berdadero karakter di Satanas a ser revelá dilanti di e universo. "Satanas a mira ku su disfras a ser kitá. Su atministrashon a ser poné habrí dilanti di e angelnan ku no a kai i dilanti e universo selestial. E a revelá su mes komo un asesino. Dor di drama e sanger di e Yu di Dios, e a kita su mes for di e simpatía di e sernan selestial. For di e dia ei su obra a ser restringí". - Ellen G. White, The Desire of Ages, p. 761. Dilanti di henter universo, e gobièrnu riba e tera a ser transferí for di Satanas pa Hesus, i E a ser proklamá e gobernante legítimo riba tera (Efe. 1:20-22, Fil. 2:9-11).

Hesus a pronostiká e evento aki, bisando: "Awor tin huisio riba e mundu aki; awor e gobernante di e mundu aki lo ser tirá pafó" (Juan 12:31, NASB).

Ku e huisio aki riba Satanas, e "salbashon i fortalesa, i e reino di nos Dios, i e poder di Su Kristu a yega" (Rev. 12:10, NKJV). Satanas ainda tin poder limitá pa hasi e pueblo di Dios riba tera daño, pero e ta ku un realisashon ku “a ked'é un tempu kòrtiku" (Rev. 12:12, NKJV). Ounke su tempu ta enbèrdat "kòrtiku", e ta hasiendo tur loke e por pa kousa doló, sufrimentu, i destrukshon aki.

Lesa Revelashon 12:13-14. Despues di a ser ekskluí for di shelu, Satanas ta kontinuá su atake riba e iglesia durante e 1.260 dianan/añanan profétiko. Kon Dios tabata envolví ku e iglesia durante e periodo ei?

"E tiramentu abou di Satanas komo un akusadó di e rumannan den Shelu a ser kumplí dor di e gran obra di Kristu ora E a entregá Su bida. Apesar di e oposishon persistente di Satanas, e plan di redenshon a ser hibá a kabo. … Satanas, sabiendo ku e imperio ku e a poderá di dje al final lo a ser ranká for di dje, a determiná pa no spar niun doló pa destruí mas tantu ku ta posibel di e kriaturanan ku Dios a krea den Su imágen. E tabata odia hende pasobra Kristu a manifestá p'e tal amor ku ta pordoná i kompashon, i awor e a prepará pa práktika riba dje tur klase di engaño pa kua e por bai pèrdí; e a sigui su kurso ku mas energia pa motibu di su propio kondishon desesperá".-Ellen G. White, The Spirit of Prophecy, tomo 3, p.194, 195.

Sin duda, Satanas ta kontinuá ku su aktividatnan riba tera dor di basha su rabia kontra e gran opheto di e amor di Kristu riba tera, e iglesia. Sinembargo, e iglesia ta haña protekshon divino den e lugánan desolá i desierto di e tera durante e periodo profétiko di 1.260 dia/aña.

E periodo di e persekushon di Satanas ta ser menshoná dos biaha den Revelashon 12 den términonan di 1.260 día/aña (Rev. 12:6) i "un tempu i tempunan i mitar di un tempu" (Rev. 12:14, NKJV). Tur dos periodo ta referí na e durashon di e aktividat di persekushon di e kachu chikitu menshoná den Daniel 7:23-25. Den Beibel, dianan profétiko ta simbolisá añanan. E tempu den historia ku ta pas ku e periodo profétiko aki ta A.D. 538-1798, durante kua e iglesia Katóliko Romano, komo un poder eklesiástiko i sivil, tabata dominá e mundu Oksidental te na 1798, ora ku General di Napoleon Berthier a trese fin na e poder opresor di Roma, a lo ménos temporalmente.

Durante e periodo largu aki di persekushon, e dragon ta skupi awanan manera riu for di su boka pa destruí e muhé. Awa ta representá pueblonan i nashonnan (Rev. 17:15). Ehérsitonan i nashonnan a ser mandá dor di Roma kontra e pueblo fiel di Dios durante e tempu aki. Serka di fin di e periodo profétiko aki, un tera amistoso ta guli e awanan i ta salba e muhé, i ta proveé un haf sigur p'e. E provishon aki ta mustra na e refugio ku Merka, ku su libertat religioso, a supli (Rev. 12:16).

Lesa Revelashon 12:17. Den e tempu di fin, kontra ken Satanas ta hasi guera ku tur su forsa?

E palabra “sobrá”, òf “remanente”, ta deskribí esnan ku permanesé fiel na Dios miéntras e mayoria ta apostatá (1 Reinan 19:18, Rev. 2:24). Miéntras e mayoria di hende den mundu ta di banda di Satanas na fin di tempu, un grupo di hende ku Dios a lanta despues di 1798 lo permanesé fiel na Kristu dilanti di e furia total di Satanas.

Kiko ta e dos karakterístikanan di e remanente den Revelashon 12:17? Kon un hende por ta sigur ku e ta pertenesé na e remanente di Dios di tempu di fin?

E remanente di tempu di fin ta warda e mandamentunan di Dios. Revelashon 13 ta mustra ku e promé tabla di e Dekálogo lo ta sentral den e konflikto di tempu di fin. E komponente klave di e promé kuater mandamentunan ta adorashon. E asuntu prinsipal den e krísis final ta ken mester ser adorá. Miéntras ku e hendenan den mundu lo skohe pa adorá e imágen di e bestia, e remanente lo adorá Dios e Kreador (Rev. 14:7). E di kuater mandamentu, e Sabat, ta mustra spesífikamente na Dios komo nos Kreador, kua ta un rason ku e lo hunga un ròl fundamental den e krísis final na final.

Tambe, e di dos karakterístika di e remanente di e tempu di fin ta ku nan "tin e testimonio di Hesukristu”, kua Revelashon 19:10 (NKJV) ta splika ta "e spiritu di profesia”. Ora nos kompará e versíkulo aki ku Revelashon 22:9, nos ta mira ku e "rumannan" di Juan ku tin e testimonio di Hesus ta profetanan. P’esei, “e testimonio di Hesus” ta referí na Hesus testifikando na e bèrdat atraves di Su profetanan, meskos ku E a hasi atraves di Juan (Rev. 1:2). Revelashon ta mustra ku den e tempu di fin, e pueblo di Dios lo tin e "spiritu di profesia" meimei di nan, pa guia nan atraves di e tempunan difísil ei, ya ku Satanas lo hasi tur esfuerso pa gaña i destruí nan. Komo Atventistanan, nos a ser duná e don ei di vishon profétiko den e ministerio i eskritonan di Ellen G. White.

Revelashon 12:17 ta marka un kambio den e strategia di Satanas segun ku e ta trata na gana e hendenan di e mundu, i asta e ta trata na gaña e fiel siguidónan di Kristu. A lo largu di henter historia Kristian Satanas a oponé e obra di salbashon di Dios, prinsipalmente pa medio di kompromiso sutil denter di e iglesia, i atraves di fòrsamentu i persekushon for di pafó. Historia ta mustra ku, miéntras e tabata eksitoso pa hopi siglo, e strategia aki a ser kontrarestá dor di e Reforma i e deskubrimentu di nobo gradual di bèrdat di Beibel dor di e pueblo di Dios. Sinembargo, komo ku Satanas ta realisá ku su tempu ta kabando, e ta intensifiká su esfuersonan i ta bai "pa hasi guera" kontra e remanente di Dios di fin di tempu (Rev. 12:17, MEV). Su atakenan riba e remanente lo inkluí un elemento grandi di engaño. Demoñonan ku ta obra milagernan i manifestashonnan spiritista lo ser introdusí (Rev. 16:14). E kambio den e strategia di Satanas ta korespondé ku e transishon for di un enfoke históriko na un di tempu di fin (Mat. 24:24).

Ta signifikante ku e palabra “gaña” ta ser usá regularmente den Revelashon 12-20 pa deskribí e aktividatnan di tempu di fin di Satanas. E palabra “gaña” ta kuminsá (Rev. 12:9) i ta konkluí (Rev. 20:7-10) e deskripshon di e aktividatnan di tempu di fin di Satanas den Revelashon.

Lesa 2 Tesalonisensenan 2:8-12 huntu ku Revelashon 13:13-14 i Revelashon 19:20. Kiko ta e naturalesa di e engaño di Satanas den tempu di fin?

Revelashon 12-20 ta deskribí Satanas, tratando na gaña e mundu (lesa Rev. 12:9, Rev. 13:14, Rev. 18:23, Rev. 19:20, Rev. 20:8). E ta usa, a kambio, podernan religioso i polítiko pa hasi su trabou: Roma pagano, simbolisá pa e dragon (Rev. 12:4, 5); siguí pa un poder simbolisá dor di e bestia di laman (Rev. 12:6, 15; Rev. 13:1-8); i finalmente, un poder simbolisá dor di e bestia di tera (Rev. 13:11). A lo largu di henter e sobrá di e buki, e miembronan di e triade satániko, paganismo/spiritualismo manera e ta ser simbolisá dor di e dragon; Katolisismo Romano, simbolisá dor di e bestia di laman; i Protestantismo apóstata, simbolisá dor di bestia manera un lamchi, òf bestia di tera, ta inseparablemente uní pa oponé e aktividatnan di Dios den e mundu. Nan ta traha huntu pa engañá hende, pa bira nan for di Dios i pa haña nan na banda di Satanas den e "bataya di e gran dia di Dios Todopoderoso" (Rev. 16:13, 14, NKJV). E sistemanan religioso falsu aki lo ser destruí na e Segundo Binida (Rev. 19:20), miéntras e dragon ku ta simbolisá e diabel, ku tabata obra pa medio di e podernan terenal aki (Rev. 12:9), lo ser destruí na fin di e mil añanan (Rev. 20:10). Revelashon ta mustra ku e engaño di tempu di fin lo ta asina grandi ku mayoria hende lo ser hibá pa skohe e kaminda di destrukshon (Mat. 7:13).

Lesa Ellen G. White, “Snares of Satan”, p. 518-530, den The Great Controversy.

E propósito di Revelashon 12 ta, promé ku tur kos, pa bisa e pueblo di Dios ku eventonan di tempu di fin ta un parti di e gran konflikto entre Kristu i Satanas. E buki ta spièrta e pueblo di Dios tokante kiko nan ta afrontando awe i ta na punto di konfrontá den un forma ainda mas serio den futuro, un enemigu eksperensiá i furioso. Pablo ta spièrta nos di e aktividat di tempu di fin "di Satanas, ku tur poder, señalnan i maravianan mentiroso, i ku tur engaño inhustu entre esnan ku ta peresé, pasobra nan no a risibí e amor di e bèrdat, pa nan por ser salbá" (2 Tes. 2:9, 10, NKJV).

Revelashon ta urgi nos pa tuma e futuro na serio i hasi nos dependensia riba Dios nos prioridat. Na otro banda, Revelashon ta sigurá nos ku ounke Satanas ta un enemigu fuerte i eksperensiá, e no ta fuerte sufisiente pa vense Kristu (Rev. 12:8). Pa e pueblo di Dios, speransa por ser hañá solamente den Esun ku den pasado a vense Satanas i su forsanan demoniako viktoriosamente. I E a primintí di ta ku Su siguidónan fiel "semper, te na fin di mundu" (Mat. 28:20, NKJV).