Satanas i Su Aliadonan

Lesa Revelashon 13:1-4, 8 i Revelashon 17:8. Kiko ta e karakterístikanan di e bestia aki, i kiko ta e fasenan di su eksistensia?

Juan ta wak segun ku un bestia monstruoso ta sali for di laman. Miéntras un bestia ta representá un poder polítiko, e deskripshon di e bestia di laman ta mustra na un poder polítiko ku tin religion komo un karakterístika dominante. E laman ta simbolisá e área grandemente poblá di Europa for di kua e bestia di laman ta sali na poder despues di e kaida di e Imperio Romano (Rev. 17:15).

Juan ta deskribí e bestia segun ku e ta sali for di awa. E bestia tin shete kabes i dies kachu, meskos ku e dragon den Revelashon 12:3, 4, mustrando e konekshon será ku Roma pagano. Riba e kabesnan di e bestia tin un nòmber yen di blasfemia, i riba e kachunan tin koronanan real. E kabesnan di e bestia ta e reinonan ku Satanas a usa pa persiguí e pueblo di Dios a lo largu di historia (Rev. 17:9-11). E nòmber yen di blasfemia ta indiká e título divino ku e bestia ta reklamá. E dies kachunan ta mustra na Daniel 7:24, simbolisando e nashonnan ku a lanta for di e Imperio Romano despues di su desaparishon. E karakterístikanan aki di e bestia di laman tur ta mustra na e papado ku a sali for di e Imperio Romano.

E bestia ku ta sali for di laman ta parse un leopardo ku pianan di un ber i e boka di un leon. Komo tal, e bestia ta kombiná e karakterístikanan di e kuater bestianan (símbolonan di imperionan di mundu) den Daniel 7:2-7: Babilonia, Medopersia, Gresia, i Roma. Sinembargo, Juan ta registrá nan den órden kontrali, kua for di su perspektiva di siglo 1 ta mustra ku e bestia ku ta sali for di laman tin relashon ku e di kuater bestia di Daniel 7, e Imperio Romano.

E dragon (e Imperio Romano pagano empoderá dor di Satanas) a duna e bestia su poder, su trono, i gran outoridat. Meskos ku e Tata a duna Su trono i outoridat na Kristu (Rev. 2:27), asina Satanas ta invertí e bestia komo su ko-gobernante i representante riba tera.

Revelashon 13:5-7 ta deklará ku e periodo di e aktividatnan di persekushon di e bestia a lo largu di historia Kristian ta 42 "luna". Manera nos a mira, persekushon di e muhé puru a dura pa "un tempu i tempunan i mitar di un tempu"; esei ta tres i mei "tempu" òf "añanan" profétiko (Rev. 12:13, 14; kompará Dan. 7:25). Kuarentidos "luna" profétiko ta igual na 30 dia multipliká pa 42, òf 1.260 dia/añanan (Rev. 12:6). P'esei, "un tempu i tempunan i mitar di un tempu”, 42 "luna", i 1.260 "dia" tur ta referí na e mesun periodo di tempu di 1.260 aña. E fase aki ta terminá ora Juan mira "un di e su [di e bestia] kabesnan manera kos ku e a ser mortalmente heridá”(énfasis añadí). E kurashon ku a sigui di e “herida mortal” aki ta señalá un tempu despues di 1798 ora e bestia lo a ser rebibá i su poder restourá. E kurashon di e herida mortal ta hala atmirashon di e mundu, i nan ta adorá tantu e dragon i e bestia.

Revelashon 13:5 ta spesifiká un periodo di tempu di persekushon ku nos a papia di dje den e estudio di ayera. E 42 luna di e aktividatnan di e bestia ta e mesun periodo ku e 1.260 dia/añanan di e persekushon di e muhé/iglesia den Revelashon 12:6, 14. (Un dia profétiko ta simbolisá un aña [Num. 14:3, Ezek. 4:6]. Mira estudio di djamars den Lès 7). E aña A.D. 538 ta marka, debidamente e komienso di e periodo profétiko aki ora e iglesia Romano, ku e papa komo su kabes, establesé su mes komo un poder di iglesia-estado ku a dominá e mundu Oksidental atraves di tempunan di edat media. E eventonan di e Revolushon Franses a kousa riba e bestia e herida mortal den A.D. 1798, tresiendo asina e dominio opresivo di e iglesia i e religion empoderá pa estado na un fin temporario.

Kompará Revelashon 13:5-8 ku Daniel 7:24-25 i 2 Tesalonisensenan 2:2-12. Di ki manera e aktividatnan di e bestia ku ta sali for di laman ta reflehá e deskripshonnan di e kachu chikí i e hòmber di piká?

E aktividatnan di e bestia ku ta sali for di laman durante e 1.260 dianan/añanan profétiko ta ser menshoná den términonan di blasfemianan. Den Tèstamènt Nobo blasfemia por nifiká un pretenshon di igualdat ku Dios (Juan 10:33, Mat. 26:63-65) i e akshon di ekspropiá Su outoridat (Marko 2:7). E blasfemianan di e bestia ku ta sali for di laman ta dirigí "kontra Dios, pa blasfemá Su nòmber, Su tabernakel, i esnan ku ta biba den shelu" (Rev. 13:6, NKJV). E lugá di biba di Dios ta e santuario den shelu, kaminda Kristu ta ministrá na fabor di nos salbashon. E bestia ku ta sali for di laman ta purba ninga e obra mediador di Kristu dor di trata na remplas'é ku un saserdosio humano ku ta pretendé di ta atministrá salbashon i pordon di pikánan. Asumiendo e podernan aki ku ta pertenesé solamente na Dios ta e esensia di blasfemia.

Revelashon 13 ta señalá un tempu di gran apostasia den Kristianismo, kua a ser kumplí ora Katolisismo Romano a reklamá e posishon i outoridat di Dios ku e papa komo su kabes. Esnan ku a rechasá sumishon na Roma a eksperensiá persekushon i martirio. Ounke awe deklarashonnan asina ta ser mirá komo kruel, asta intolerante, e presente no por kita e historia, no importá kuantu algun hende ta deseá ku e lo a hasié.

E promé mitar di Revelashon 13 ta deskribí e poder Katóliko Romano aktivo durante e periodo profétiko di 1.260 dianan/añanan. Ku e eventonan di e Revolushon Franses, e sistema aki religioso-politiko a risibí un herida mortal. Sinembargo, e herida mortal finalmente lo ser kurá, i lo restourá e sistema aki na bida. E di dos mitar di e kapítulo ta deskribí kon e kurashon di e herida mortal di e bestia ku a sali for di laman literalmente lo sosodé.

Lesa Revelashon 13:11. Kiko ta e karakterístikanan di e di dos bestia? Den lus di Revelashon 12:14-16, kiko ta nifikashon di e echo ku e bestia aki ta subi sali for di tera?

Juan ta opservá e aparishon di un otro bestia. Diferente for di e promé bestia, e di dos bestia ta sali for di tera. E di dos bestia tin un poder mundial, ku influensia di e mesun kaliber ku e promé bestia. Sinembargo, den kontraste ku e bestia ku ta sali for di laman, kua tabatin un aparensia spantoso, e bestia ku ta sali for di tera ta parse inosente, a lo ménos na promé bista. E tin "dos kachu manera un lamchi" (Rev.13:11, NKJV). E bestia lamchi aki ta un símbolo pa Kristu. Por lo tatu, e poder aki di tempu di fin ta parse di ta manera Kristu.

E poder aki ta lanta den teritorio ku tabata protehá e muhé, un símbolo di e iglesia berdadero di Dios, for di e fluho persiguidó di e dragon na e konklushon di e 1.260 dianan/añanan profétiko (Rev. 12:14-16). E bestia di tera aki ta opviamente un hungadó nobo riba esenario, ku a lanta komo un poder mundial despues ku e bestia di laman a risibí e herida mortal durante e eventonan di e Revolushon Franses, kua ta nifiká ku e bestia di tera ta eksklusivamente un hungadó di e tempu di fin.

"Ki nashon di e Mundu Nobo tabata lantando den poder na 1798, dunando promesa di fortalesa i grandesa, i atrayendo e atenshon di e mundu? E aplikashon di e símbolo no ta atmití duda. Un nashon, i solamente unu, ta kumpli ku e spesifikashonnan di e profesia aki; e ta mustra eksaktamente na Estádos Unídos di Amérika".- Ellen G. White, The Great Controversy, p. 440.

Revelashon 13:11 ta mustra, sinembargo, ku Merka, prinsipalmente Protestant, finalmente lo kuminsá papia manera e dragon, manera e diabel mes, ku un influensia mundial similar na e Imperio Romano. E poder di tempu di fin lo ta instrumental den hasi henter mundu adorá e promé bestia, kua a risibí e herida mortal. Den otro palabra, Estádos Unídos, kua un tempu a proveé protekshon i un haf pa e iglesia, den algun momentu lo hunga un ròl di persiguidó den eventonan di e último dianan.

Lesa Revelashon 13:12-13. Kon 1 Reinan 18:38 i Echonan 2:3 ta yuda nos komprondé e naturalesa di e aktividatnan engañoso di e bestia semehante na un lamchi, esun di mas grandi kua ta pa baha kandela for di shelu?

Dor di obra milagernan, e bestia manera lamchi lo kombensé hopi ku su palabranan ta bèrdat apesar di no ta den kompletu harmonia ku Skritura. "Atraves di e agensia di spiritualismo, milagernan lo ser hasí, e enfermonan lo ser kurá, i hopi maravianan inegabel lo ser ehekutá."-Ellen G. White, The Great Controversy, p. 588. E milagernan aki lo yuda e bestia manera lamchi persuadí e habitantenan di tera pa traha un imágen pa e bestia di laman ku a risibí e herida mortal.

E kurashon di e herida mortal di e bestia di laman ta referí na e restourashon di e papado Romano komo un poder religioso-polítiko. E bestia manera lamchi tambe lo kuminsá papia manera un dragon i ehersé e poder di e bestia di laman, mustrando ku e lo bira mes intolerante ku e nashonnan representá pa e símbolonan aki.

"Semehante akshon lo tabata direktamente kontrali na e prinsipionan di e gobièrnu aki, na e genio di su institushonnan liber, na e rekonosementunan direkto i solèm di e Deklarashon di Independensia, i na e Konstitushon. ... Pero e inkonsistensia di tal akshon no ta mas grandi ku e ta ser representá den e símbolo. Ta e bestia ku kachunan manera di un lamchi, ku ta profesá di ta puru, suave, i inosente, ku ta papia manera un dragon. . . .

'Bisando na esnan ku ta biba riba tera, ku nan mester traha un imágen pa e bestia'. Aki ta ser presentá klaramente un forma di gobièrnu den kua e poder legislativo ta deskansá ku e pueblo, un evidensia masha sorprendente ku Estádos Unídos ta e nashon señalá den e profesia.

"Pero kiko ta e ' imágen pa e bestia'? I kon e ta bai ser forma? E imágen ta ser trahá dor di e bestia di dos-kachu, i ta un imágen pa e bestia. E ta ser yamá tambe un imágen di e bestia. Anto pa sa kiko e imágen ta i kon e ta bai ser formá, nos mester studia e karakterístikanan di e bestia mes, e papado.

"Ora ku e iglesia primitivo a bira korumpí dor di alehá for di e simplesa di e evangelio i aseptá ritonan i kustumbernan pagano, e a pèrdè e Spiritu i poder di Dios; i pa asina kontrolá e konsenshi di e hendenan, e a buska sosten di e poder sekular. E resultado tabata e papado, un iglesia ku tabata kontrolá e poder di e estado i tabata eksplot'é pa promové su propio finnan, spesialmente pa e kastigu di 'herehia'...

"Ora e iglesianan prinsipal di Estádos Unídos, uní riba puntonan di doktrina manera ta ser sostené dor di nan en komun, lo influensiá e estado pa imponé nan dekretonan i pa sostené nan institushonnan, e ora ei Merka Protestant lo a forma un imágen di e herarkia Romano, i e aflikshon di penanan sivil riba e disidentenan lo resultá inevitabel ...

"E 'imágen di e bestia' ta representá e forma ei di Protestantismo apóstata kua lo ser desaroyá ora e iglesianan Protestant lo buska yudansa di e poder sivil pa imposishon di nan dògma".- Ellen G. White, The Great Controversy, p. 442-445.

Revelashon 13 ta indiká ku e bestia manera lamchi lo tin e papel prinsipal den e krísis final. E poder mundial aki lo establesé un sistema global den un intento pa kontrolá e kreensianan di e hende. E sistema aki lo reflehá Kristianismo medieval bou di kontròl papal.

Lesa Revelashon 13:16-17 huntu ku Deuteronomio 6:4-8. Kiko ponementu di e marka riba man drechi òf frenta tin di haber ku e mandamentunan di Dios?

Hendenan di tur klase sosial lo ser preshoná pa risibí e marka di e bestia riba nan man drechi òf nan frenta. Meskos ku e seyo na e frenta ta identifiká esnan ku Dios ta konsiderá komo di djE (Rev. 7:3, 4; Rev. 14:1), asina e marka di e bestia ta identifiká e adoradónan di e bestia.

E marka di e bestia no ta un señal visibel di ningun forma. Su kolokashon riba e man drechi òf riba e frenta ta falsifiká e instrukshonnan ku Moises a duna e Israelitanan pa mara e lei di Dios komo un señal riba nan mannan òf nan frenta (Deut. 6:8). E man drechi tin di haber ku komportashon, miéntras e frenta tin di haber ku e mente òf konsentimentu mental. Algun lo skohe pa risibí e marka di e bestia pa skapa e menasa di morto, miéntras otronan lo ta totalmente komprometé mentalmente i spiritualmente na e sistema apóstata aki di adorashon.

E kuestionnan sentral den e krísis final lo ta adorashon i obediensia na Dios den wardamentu di Su mandamentunan (Rev. 14:12). E mandamentu di Sabat en partikular lo ta e prueba di fieldat i obediensia na Dios. Meskos ku e Sabat ta e señal distintivo di e obediensia di e pueblo fiel di Dios (Ezek. 20:12, 20), asina e marka di e bestia ta e señal di lealtat na e bestia.

E marka di e bestia ta envolví e sustitushon di un mandamentu humano pa e mandamentu di Dios. E evidensia di mas grandi di e echo aki ta e institushon humanamente establesé di djadumingu. (Dan. 7:25) komo e dia di adorashon na lugá di di e Sabat di e di shete dia, e dia ordená den Skritura dor di nos Kreador. E intento pa kambia e señal di outoridat di Dios pa un otro dia ta un intento pa ekspropiá e ròl i poder di Dios Mes. "E marka di e bestia ta e sabat papal… .Ora e dekreto lo sali imponiendo e sabat falsu, i e gritu duru di e di tres angel lo spièrta hende kontra adorashon di e bestia i su imágen, ... e ora ei esnan ku ainda ta sigui den transgreshon lo risibí e marka di e bestia". -Ellen G. White, Evangelism, p. 234, 235.

Revelashon 13:18 (NKJV) ta bisa: "Aki tin sabiduria. Laga esun ku tin komprendementu kalkulá e number di e bestia, pasobra e ta number di un hende: Su number ta 666". Ken e hòmber aki ta? Pablo ta deskribié komo "e hòmber di piká" (2 Tes. 2:3). E definishon aki ta mustra na e poder papal simbolisá dor di e bestia di laman, ken su nòmber di blasfemia riba su kabesnan ta mustra na e titulo divino ku e ta reklamá pa su mes, supuestamente pará na lugá di e Yu di Dios riba tera.

Revelashon ta mustra ku e Sabat lo ta un señal di obediensia na fin di historia. Nos mester kòrda, sinembargo, ku e opservansia di un persona di djadumingu awor no ta nifiká ku e tin e marka di e bestia. Wardamentu di djadumingu lo bira "e marka di e bestia" solamente ora, despues di a komprondé klaramente e asuntunan envolví den skohe un dia di adorashon, apesar di e engañonan eifó, hende ta hasi nan eskoho sea pa òf kontra Dios. Sinembargo, e tempu ei ainda ta den futuro.

"Niun hende a risibí e marka di e bestia ainda. E tempu di prueba no a yega ainda. Tin berdadero Kristiannan den tur iglesia, sin ekskluí e komunion Katóliko Romano. Niun ta kondená te ora nan a haña e lus i a mira e obligashon di e di kuater mandamentu. Pero ora e dekreto lo sali imponiendo e sabat falsu, i e gritu duru di e di tres angel lo spièrta hende kontra adorashon di e bestia i su imágen, e liña lo ser halá klaramente entre loke ta falsu i loke ta bèrdat. E ora ei esun ku ainda ta sigui den transgreshon lo risibí e marka di e bestia". - Ellen G. White, Evangelism, p. 234, 235.

Laga nos kòrda ku opservansia di djadumingu awe no ta hasi un persona mas pèrdí ku opservansia di Sabat ta hasi un persona salbá. E tempu ta yegando, sinembargo, ora "e marka di e bestia" lo bira e tema sentral i ora ku skohe un dia di adorashon lo ta e prueba di fieldat. Revelashon ta apelá na e pueblo di Dios pa kohe e Beibel i, ku un spiritu di reflekshon, studia e palabra profétiko pa nan mes i hasi tur esfuerso pa alkansá ku e evangelio esnan ku aktualmente ta a ser alkansá pa Kristu.