E Evangelio Eterno di Dios

Djis promé ku e fin, Dios ta manda Su mensahenan di spièrtamentu, simbólikamente deskribí den términonan di tres angelnan vokal bulando den shelu. E palabra Griego pa angel (angelos) ta nifiká "mensahero". Evidensia for di Revelashon ta sugerí ku e tres angelnan ta para pa e pueblo di Dios ku ta ser konfiá ku e mensahe di tempu di fin pa kompartí ku e mundu.

Lesa Revelashon 14:6 huntu ku Mateo 24:14. E mensahe di e promé angel ta ser referí na dje komo e "evangelio eterno" (Rev. 14:6). Kiko deskribiendo e proklamashon aki komo "e evangelio eterno" ta bisa nos tokante e kontenido i propósito di e mensahe di e promé angel? Dikon e mensahe aki ta sentral na tur loke nos ta kere?

E promé mensahe di tempu di fin aki ta e proklamashon di evangelio den konteksto di e ora di e huisio di Dios ku a bini riba mundu. E evangelio ta bon nobo tokante Dios, ku ta salba sernan humano riba base di fe den Hesukristu i Su obra pa nan. E evangelio ta "eterno" pasobra Dios nunka ta kambia. Su plan a ser establesé asta promé ku nos a eksistí (2 Tim. 1:9, Tito 1:2). E mensahe di e promé angel ta inkluí tantu salbashon komo huisio. E ta bon nobo pa esnan ku ta duna gloria na Dios i ta ador'E komo nan Kreador, pero e ta tambe un spièrtamentu di huisio pa esnan ku rechasá e Kreador i e señal di e berdadero adorashon ku E a duna, e Sabat di e di shete dia.

E tres angelnan ta ser deskribí komo proklamando e mensahe ku “un bos duru” (Rev. 14:7, 9). E mensahenan aki ta urgente i importante; nan mester ser tendé dor di tur hende pasobra e ta konserní nan destino eterno. Komo tal, nan mester ser proklamá na tur nashon, tribu, lenga, i pueblo. E proklamashon aki ta partikularmente signifikante pasobra, na e tempu di fin, e bestia lo ehersé outoridat riba "tur tribu, lenga, i nashon" (Rev. 13:7, NKJV). E aktividatnan engañoso di Satanas, di alkanse mundial, ta ser kontrarestá ku e proklamashon di e evangelio mundial.

E mensahenan di e tres angelnan ta ser proklamá dor di e pueblo di Dios pa kontrarestá Satanas i su aliadonan di tempu di fin, e dragon, un símbolo di paganismo/spiritualismo; e bestia ku ta sali for di laman, ku ta simbolisá Katolisismo Romano; i e profeta falsu, òf bestia manera lamchi, ku ta representá Protestantismo apóstata (Revelashon 13). Nan ta operá te ku, i durante e tempu di e di seis plaga (Rev. 16:13, 14). Por lo tantu, e mundu ta ser presentá ku dos mensahe rival, kada unu ku e meta pa gana lealtat di e hendenan riba tera.

Lesa Revelashon 14:7 huntu ku Eklesiastés 12:13-14. Kiko ta nifiká pa "teme Dios"? Kon e konsepto di teme Dios ta relashoná ku e evangelio, i kiko e evangelio tin di haber ku warda e mandamentunan di Dios? (Lesa tambe Rom. 7:7-13.) Kiko ta e konekshon entre teme Dios i glorifik'E?

E yamada pa "teme Dios i duna gloria na djE" (Rev. 14:7, NKJV) ta ser proklamá den konteksto di e "evangelio eterno". Un realisashon di loke Kristu a hasi pa nos salbashon ta resultá den un kontesta positivo na djE.

Den Beibel, teme Dios i duna gloria na djE ta relashoná djaserka (Salmo 22:23, Rev. 15:4). Huntu, nan ta señalá un relashon korekto ku Dios (Job 1:8), i obediensia na djE.

Teme Dios no ta nifiká tin miedu di djE sino tum'E na serio i permití Su presensia den nos bida. E pueblo di Dios di tempu di fin ta esnan ku ta teme Dios (lesa Rev. 11:18, 19:5). Dios ta deseá pa Su pueblo stim'E (Deut. 11:13, Mat. 22:37) obedes'E (Deut. 5:29, Ekl.12:13) i reflehá Su karakter (Gen. 22:12).

Ta importante pa e pueblo di Dios dun'E gloria pasobra "e ora di Su huisio a yega" (Rev. 14:7, NKJV). E huisio en kuestion aki ta e huisio investigador pre-Atvènt, kua ta tuma lugá promé ku e Segundo Binida. E propósito di e huisio aki ta pa revelá sea nos ta sirbi Dios berdaderamente òf nò, un eskoho manifestá atraves di nos obranan (2 Kor. 5:10). Na final di e huisio aki, e destino di kada persona ta ser disidí (Rev. 22:11), i Hesus lo bini pa trese Su rekompensa na kada persona di akuerdo ku su obranan (Rev. 22:12).

Huisio den Revelashon 14 ta un parti di e evangelio. Pa esnan ku ta den un relashon korekto ku Dios, huisio ta bon notisia; e ta nifiká vindikashon, salbashon, libertat, i bida eterno. Sinembargo, e ta mal notisia pa esnan desobediente, a ménos ku nan repentí i bira na Dios dor di aseptá e mensahe aki di e ora di huisio di e tempu di fin. Dios no ke pa ningun hende peresé, ma pa tur bin na arepentimentu (2 Pe. 3:9).

Revelashon ta mustra ku e asuntunan sentral den e último krísis di historia di mundu lo ta adorashon i obediensia na Dios, manera ta ser revelá den warda Su mandamentunan (Rev. 14:12). E hendenan di e mundu lo dividí den dos grupo: esnan ku ta teme i adorá Dios, i esnan ku ta teme i adorá e bestia.

Revisá e promé kuater mandamentunan di e Dekálogo (Eks. 20:2-11). Despues pasa dor di Revelashon 13. Kon e demanda di e bestia pa adorashon (Rev. 13:7, 8), establesimentu di un imágen pa e bestia pa ser adorá (Rev. 13:14, 15), blasfemia di Dios i Su nòmber (Rev. 13:5, 6), i e risibimentu di e marka di e bestia (Rev. 13:16, 17) ta mustra na e atakenan di Satanas riba e promé kuater mandamentunan di e Dekálogo den e krísis final?

E konsepto sentral di e promé kuater mandamentunan di e Dekálogo ta adorashon. Revelashon ta indiká ku e mandamentunan aki lo bira e norma di lealtat na Dios den e krísis final. E konflikto final entre Kristu i Satanas opviamente lo drei rònt di adorashon i e promé kuater mandamentunan.

E asuntu klave den e krísis final ta ser enfatisá den e di dos ekshortashon di e mensahe di e promé angel. E yamada pa “adorá Esun ku a traha shelu i tera, laman i fuentenan di awa” (Rev. 14:7, NKJV) ta kasi un sita eksakto di e di kuater mandamentu di e Dekálogo ( Eks. 20:11). E echo aki ta mustra ku e yamada pa adorá Dios e Kreador ta un yamada na opservansia di Sabat.

Deskanso i adorashon riba e di shete dia, djasabra, ta un señal spesial di nos relashon ku Dios (Eks. 31:13, Ezek. 20:12). E mensahe di e promé angel ta un yamada pa adorá e Kreador.

"Miéntras e opservansia di e sabat falsu den konformidat ku e lei di e estado, kontrali na e di kuater mandamentu, lo ta un deklarashon di fieldat na un poder ku ta den oposishon na Dios, e wardamentu di e berdadero Sabat, den obediensia na e lei di Dios, ta un evidensia di lealtat na e Kreador. Miéntras un klase, dor di aseptá e señal di sumishon na podernan terenal, ta risibí e marka di e bestia, e otro ku skohe e señal di lealtat na outoridat divino, ta risibí e seyo di Dios".- Ellen G. White, The Great Controversy, p. 605.

E mensahe di e di dos angel ta anunsiá e kaida, òf apostasia, di Babilonia i ta identifik'é komo un sistema religioso falsu. Den Revelashon 17:5, "Babilonia ta ser bisá di ta 'e mama di prostitutanan'. Su yunan muhé mester simbolisá iglesianan ku ta tene duru na nan doktrinanan i tradishonnan, i ta sigui su ehèmpel di sakrifiká e bèrdat i e aprobashon di Dios, pa forma un aliansa ilegal ku e mundu".-Ellen G. White, The Great Controversy, p. 382, 383.

Lesa Revelashon 14:8 huntu ku Revelashon 18:2 i Isaias 21:9. E ripitishon dòbel di e palabra "kaí" ta mustra na e apostasia progresivo di Babilonia i ta nifiká e sertesa di su kaida moral kompletu. Babilonia ta ser deskribí komo kaí kaba, pero su kaida ta ser deskribí tambe komo futuro. Ta dikon?

E Babilonia di tempu di fin den Revelashon ta un union di sistemanan religioso falsu ku ta inkluí Katolisismo Romano i Protestantismo apóstata. Esakinan lo pone nan mes den servisio di Satanas kontra e pueblo di Dios (lesa Rev. 13:11-18, Rev. 16:13, Rev. 17:5). E union religioso apóstata aki lo manifestá e arogansia di Babilonia antiguo ora e eksaltá su mes riba Dios i lo trata na tuma Su lugá den e mundu aki. E mensahe di e di dos angel ta spièrta e pueblo di Dios ku e sistema malbado aki lo apartá mas i mas di e bèrdat komo konsekuensia di su rechaso di e lus di e mensahe di evangelio di e tempu d fin. Solamente ora "e union di e iglesia ku e mundu lo ser lográ kompletamente atraves di henter Kristianismo, e kaida di Babilonia lo ta kompletu".-Ellen G. White, The Great Controversy, p. 390.

Lesa atrobe Revelashon 14:8 huntu ku Revelashon 17:2 i Revelashon 18:3. Kon Babilonia ta hasi e mundu bebe di e biña di su fornikashon? Kiko e biña aki ta simbolisá?

Revelashon 17 ta visualisá Babilonia di e tempu di fin komo un prostituta ku ta hasi hendenan riba tera burachi ku su biña di inmoralidat (Rev. 17:2).

E biña di Babilonia ta referí na e siñansanan falsu i evangelio falsu ofresé dor di sistema religioso apóstata aki. Awendia, ora hopi iglesia Protestant, den kumplimentu di profesia di Beibel, rápidamente ta kita e diferensia ku un tempu a separá nan for di Iglesia Katóliko Romano i a bira for di bèrdat bíbliko, nos ta testifiká e influensia koruptivo di e biña di Babilonia entre e kurpa profesá di Kristu: evolushon teista, kua ta kontrastá implísitamente ku e referensia na Kreashon den e mensahe di e promé angel; tradishonnan teológiko ku ta remplasá sola Scriptura; étika revisá ku ta bandoná definishonnan bíbliko di género, matrimonio, etc. Hendenan intoksiká no por pensa klaramente. Segun ku e hendenan ta bira spiritualmente burachi dor di e biña di Babilonia, Babilonia lo sedusí nan pa adorá e bestia ku ta sali for di laman i risibí e marka di e bestia.

Kon Revelashon 14:12 ta deskribí e pueblo fiel di Dios?

Den kontraste ku e pueblo fiel di Dios, Revelashon 14:9, 10 ta spièrta tokante e destino di esnan ku ta afrontá e rabia di Dios. Den Tèstamènt Bieu, e dramamentu di e rabia di Dios ta ser deskribí simbólikamente komo bebe biña for di un kopa (Jer. 25:15, 16). E severidat di e huisio riba e adoradónan di e bestia ta ser ekspresá komo bebe e biña di e rabia di Dios ku ta ser bashá "sin meskla" (Rev. 14:10) den e kopa di Su indignashon. Den tempunan antiguo, hopi biaha hende tabata meskla biña ku awa pa redusí su forsa di intoksikashon. Pero e biña di e rabia di Dios ta der deskribí komo “no mesklá” (akratou). E biña puru i no disolvé ta representá e bashamentu di e rabia di Dios den su forsa kompletu, sin miserikòrdia.

Lesa Revelashon 14:10-11 huntu ku Revelashon 20:10-15. Kon Isaias 34:8-10 i Hudas 7 ta tira lus riba e deklarashon: “I e huma di nan tormento ta subi bai ariba pa semper i semper” (NKJV)?

E deklarashon di e tormento ku kandela i suafel ta referí na destrukshon total. Kandela i suafel ta un medio di huisio (Gen. 19:24, Isa. 34:8-10). E huma di destrukshon ku ta subi ta un imágen bon konosí den Beibel. Isaias a profetisá di e futuro destrukshon di Edom pa medio di kandela i suafel: e lo bira un breu ku ta kima; "e lo no ser pagá anochi ni di dia; su huma lo subi bai ariba pa semper" (Isa. 34:10, NKJV). Hudas ta deskribí e destino di Sodoma i Gomora komo sufriendo e kastigu di "kandela eterno" (Hudas 7). E tèkstnan aki no ta papia tokante kimamentu sin fin, pasobra niun di e siudatnan aki ta kimando awe. E konsekuensianan ta eterno, no e kimamentu mes. E "kandela eterno" den Revelashon ta referí na destrukshon total; e kimamentu lo ta sufisiente largu pa hasi e konsumo kompletu te ora no sobra nada pa kima.

Lesa Ellen G. White, “The Final Warning”, p. 603-612, den The Great Controversy.

Revelashon ta mustra ku na e tempu di fin, e pueblo di Dios ta ser enkargá ku e proklamashon di e evangelio di tempu di fin na e mundu. E obra nos dilanti ta parse difísil, kasi imposibel. Sinembargo, nos tin e promesa di e poder di Dios.

"E gran obra di e evangelio no ta pa sera ku ménos manifestashon di e poder di Dios ku a marka su komienso....

"E mensahe lo ser hibá no asina tantu dor di argumento komo pa medio di e konvikshon profundo di e Spiritu di Dios. E argumentunan a ser presentá. E simia a ser sembrá, i awor e lo brota i duna fruta".- Ellen G. White, The Great Controversy, p. 611, 612.

E konklushon di e proklamashon di e mensahe final di Dios lo resultá den un gran separashon ku ta dividí hende den mundu den dos kampo: esnan ku ta stima i obedesé Dios i esnan ku ta sigui i obedesé e bestia. E separashon aki ta ser deskribí den términonan di dos kosecha: e rekohementu di e trigo den e mangasinanan (Rev. 14:14-16) i e drùifnan pa ser trapá den e baki di pèrs wendrùif (Rev. 14:17-20). E separashon final aki ta e tema di Revelashon 17-18.