E Último Shete Plaganan

Hende ya a hasi nan eskoho sea pa Dios òf pa Babilonia. Promé ku Kristu bini, sinembargo, e bientunan destruktivo di e furia di Satanas ku a ser wantá (Rev. 7:1-3) a ser di lòs, sigui pa e shete último plaganan.

Lesa Revelashon 15:1 huntu ku Éksodo 7-11. Kon instruktivo e plaganan Egipsio ta, konsiderá e senario pa e shete último plaganan, respekto nan propósito i nifikashon?

E shete último plaganan ta ser referí na dje komo e "último" plaganan pasobra nan ta bini na e momentu final di historia di tera. Den kontraste, e plaganan di e shete trompètnan ta kubri e periodo di tempu ku ta inkluí henter e era Kristian i ta restringí den nan alkanse. Nan ta ser ehekutá miéntras e evangelio ainda ta ser prediká (Rev. 10:8-11:14) i interseshon ta tumando lugá (Rev. 8:2-5). Nan ta ser mesklá ku miserikòrdia, i nan propósito ta pa trese e enemigunan di e pueblo di Dios na arepentimentu.

Na otro banda, e shete último plaganan ta ser bashá djis promé ku e Segundo Binida. Nan ta ser bashá riba esnan ku, meskos ku Fárao, a hasi nan kurasonnan duru kontra e amor redentor di Dios i lo no a arepentí (Rev. 16:11). Rabia divino ta e huisio hustu di Dios riba e eskohonan ku hende a hasi (Rom. 1:26-28), i na e momentu ei esnan pèrdí ta kosechando e konsekuensianan di nan propio eskohonan.

Lesa Revelashon 15:5-8 huntu ku Éksodo 40:34-35 i 1 Reinan 8:10-11. Kiko e deklarashon ku “ningun hende por a drenta e tèmpel" (Rev. 15:8) ta sugerí tokante e momentu di e shete último plaganan?

E ekspreshon "ningun hende no por a drenta den e tèmpel" (Rev. 15:8, NKJV) ta mustra na e seramentu di probashon (Rev. 22:11). Ora e ministerio intersesor di Kristu den shelu yega na un fin, e porta di oportunidat pa arepentí ta sera pa semper. P'esei, e último plaganan lo no hiba niun hende na arepentimentu, pero solamente lo revelá e duresa di kurason di esnan ku ta skohe pa ta na banda di Babilonia, i insitá nan pa odia Dios ainda mas (Rev. 16:9, 11).

Ku terminashon di e interseshon di Kristu den e santuario selestial, e destino di kada persona ta determiná pa semper. E momentu a yega pa esnan ku a despresiá e evangelio eksperensiá e rabia di Dios den su plenitut.

E shete último plaganan ta reflehá e plaganan bashá riba Egipto (Éksodo 7-11). Meskos ku e plaganan Egipsio a afektá e Egipsionan miéntras e Israelitanan a ser di spar, asina e pueblo di Dios lo ser protehá durante e tempu aki di angustia (Salmo 91:3-10; lesa The Great Controversy, p. 629, 630). E plaganan riba Egipto a revelá e duresa di kurason di Fárao i a mustra e Egipsionan e inkapasidat di nan diosnan pa protehá nan. Di forma similar, e último plaganan mas i mas ta hasi kurason di e adoradónan di e bestia di laman duru i ta revelá e impotensia di Babilonia pa protehá nan for di huisio divino.

Lesa Revelashon 16:1-11. Kiko ta pasando aki, i kon e ta ser deskribí?

E promé kuater plaganan "no ta universal, òf e habitantenan di e tera lo tabata eliminá kompletamente ".- Ellen G. White, The Great Controversy, p. 628. E promé ta kousa yaganan doloroso i detestabel eksklusivamente riba e adoradónan di e bestia. E di dos i di tres plaga ta afektá e laman i e riunan i e fuentenan di awa, kua ta kambia bira sanger. Sin awa pa bebe, humanidat rebelde no por sobrebibí. E di kuater plaga ta afektá e solo asina ku e ta kima hende, kousando doló insoportabel.

E doló insoportabel kousá dor di e plaganan no ta suavisá kurason di humanidat inhustu pa asina kambia nan aktitut rebelde. En kambio, nan ta maldishoná i blasfemá Dios, kende ta ehekutá e plaganan aki. Ni niun di nan ta arepentí.

Den Revelashon 16:10-11 (lesa tambe Eks. 10:21-23) nos por mira ku e di sinku plaga ta dal e trono di e bestia. Tabata Satanas ku a delegá e trono na e bestia (Rev. 13:2). Awor asta e sede di e outoridat di Satanas no por resistí e forsa di e plaganan aki. Segun ku hende ta sufrí den doló, nan ta realisá e inkapasidat di Babilonia pa protehá nan. Sinembargo, nan a pone nan mente kontra Dios, i asta e teror di e plaganan no ta kambia nan kurason.

Lesa Revelashon 16:12 huntu ku Revelashon 17:1 i 15. Kiko e símbolo di Eufrates ta para p’e? Kiko ta nifikashon di e sekamentu di Eufrates den konteksto di e shete último plaganan?

Den Tèstamènt Bieu, Eufrates tabata un medio krítiko di sosten pa e enemigunan di Israel, Asiria i Babilonia. E riu tabata kore atraves di Babilonia i tabata importante pa e siudat pa motibu ku e tabata nutri e kultivonan i tabata proveé awa pa hende. Babilonia no por a sobrebibí sin Eufrates.

Revelashon 17:1 ta deskribí e Babilonia di tempu di fin komo sintá riba hopi awanan, kisas un referensia na Eufrates (Yer. 51:13). Revelashon 17:15 ta splika ku e awanan riba kua e Babilonia di tempu di fin ta sinta ta representá e hendenan ku ta sosten’é; e podernan sivil, sekular, i polítiko mundial tras di e sistema. Sinembargo, e podernan aki finalmente lo hala nan sosten atras.

E esena di e di seis plaga ta reflehá e kaptura di Babilonia antiguo dor di Ciro e Persa (lesa Daniel 5). Di akuerdo ku e historiadó antiguo Herodotus, riba e anochi ku Rei Balsasar i su ofisialnan tabatin un fiesta, e Persanan a desviá Eufrates i a drenta Babilonia pasando den bòm di e riu, i a kapturá e siudat pa sorpresa.

E sekamentu simbóliko di Eufrates den Revelashon 16:12 ta resultá den e kaida di Babilonia den tempu di fin. Dor ku Eufrates den Revelashon ta representá e podernan, sivil, sekular, i polítiko mundial ku ta duna nan sosten na Babilonia, e sekamentu di Eufrates ta simbolisá kitamentu di nan sosten i nan atake posterior kontra Babilonia, i dor di esei a kousa su kaida.

Ora e habitantenan di mundu testiguá e agitashon den naturalesa (Rev. 16:3-9), nan ta bira na Babilonia pa protekshon. Sinembargo, ora e di sinku plaga dal e sede di outoridat di Babilonia (Rev. 16:10-11), nan ta mira e banidat di buska yudansa einan. Sintiendo nan mes engañá, nan ta bira kontra di Babilonia, kousando su kaida (Rev. 17:16). Sinembargo, manera nos a mira, nan kurason ta keda duru kontra Dios i Su pueblo. Komo tal, nan ta bira tera fértil pa e engaño final pa medio di kua Satanas lo hala e mundu pa uni kontra e pueblo di Dios pa kita nan for di kara di e tera.

Revelashon 16:12 ta bisa nos ku e propósito di e sekamentu di Eufrates ta pa prepará e kaminda pa "e reinan di oriente" (NKJV). Den Tèstamènt Bieu, "e reinan di oriente" tabata Ciro i su forsanan ku a bin for di nort, i despues a aserká Babilonia for di ost (Isa. 41:25). Nan konkista di Babilonia a hasi e regreso di e pueblo di Dios na nan patria posibel (Isa. 44:27, 28). Di mes manera, e sekamentu simbóliko di Eufrates ta prepará e kaminda pa e binida di e reinan for di oriente pa proveé liberashon na e pueblo di Dios di tempu di fin.

E reinan di oriente den Revelashon 16:12 ta Kristu i Su ehérsito di angelnan selestial. Na Su segundo binida, Hesus lo aparesé ku Su ehérsito angelikal, "bistí na lino fini, blanku i limpi" (Rev. 19:14, NKJV), kua ta e bistí di angelnan sin piká (Rev. 15:6). Kompañá pa e ehérsito di shelu, manera Revelashon 17:14 ta mustra, Kristu lo vense e forsanan satániko ku ta oprimí Su pueblo (kompará Mat. 24:30, 31). E konflikto final kontra Kristu i Su pueblo ku ta hiba na e Segundo Binida ta konosí komo e bataya di Armagedon.

Lesa Revelashon 16:13-14. Kiko ta ròl di e tres spiritunan impuru den e preparashon pa e bataya di Armagedon? Kon nan ta un falsifikashon satániko di e mensahenan di e tres angelnan den Revelashon 14? (Lesa 1 Tim. 4:1.)

Pa medio di e eventonan final ku ta hiba na e klousura di probashon, kada ser humano lo ser hibá na skohe riba kua di e dos bandanan e lo para den e bataya di Armagedon. Komo un preludio na e guera spiritual aki, Juan ta mira tres spiritu demoniako ku ta parse sapu. E último esfuerso di Satanas pa gaña ta envolví spiritunan demoniako ku ta gaña.

E dragon (paganismo i spiritismo), e bestia ku ta subi sali for di laman (Katolisismo Romano), i e profeta falsu (Protestantismo apóstata) ta uni bou di e mandato di Satanas (Rev. 13:11, 12). Satanas ta kapasitá e bestia manera lamchi pa ehekutá señalnan milagroso (Rev. 13:13-17) ku ta inkluí manifestashonnan di spiritismo. E señalnan aki ta parti di e strategia engañoso di tempu di fin di Satanas pa persuadí e mundu pa siguiE mas bien ku e berdadero Dios.

Siegá pa nan odio di Dios i Su bèrdat, e lidernan di mundu ta kla pa kere e mentiranan di Satanas, kua ta lorá den un disfras religioso komplasiente (2 Tes. 2:9-12). Finalmente, nan lo uni den e bataya final ku ta hiba na e fin di e mundu aki.

Lesa Revelashon 16:16. Kon eksitoso Satanas su engaño di fin di tempu ora e reuní e hendenan di mundu pa e bataya di Armagedon lo ta?

E milagernan demoniako engañoso lo logra éksito mundial. Ora nan rechasá siñansanan di Beibel, hendenan lo kere un mentira ku lo ser kompañá pa milagernan engañoso (2 Tes. 2:9-12). Nan lo uni huntu den propósito, simbolisá pa nan reunion na un "lugá", kua den Hebreo ta ser yamá Armagedon, ku ta nifiká "e seru di Meguido". Meguido no tabata un seru, sino un siudat di fòrti situá den e Vaye di Jezreel (òf e Plano di Esdraelon) na pia di Seru Karmelo. E tabata un sitio stratégiko importante.

E Plano di Esdraelon tabata konosí pa hopi bataya desisivo den historia di Israel (lesa Huesnan 5:19; Huesnan 6:33; 2 Reinan 9:27; 2 Reinan 23:29, 30). Revelashon ta usa e trasfondo históriko aki pa deskribí un gran konflikto final, yamá Armagedon, entre Kristu i e forsanan di maldat. E habitantenan di mundu ta ser deskribí komo un ehérsito unifiká bou di liderazgo di e liga satániko.

E “seru di Meguido” ta un aparente alushon na Seru Karmelo, ku ta sali riba e vaye den kua e siudat antiguo di Meguido tabata situá. Seru Karmelo tabata e sitio di un di e klèshnan di mas grandi den historia di Israel, entre e profeta berdadero di Dios (Elias) i e profetanan falsu di Baal (1 Reinan 18). E konfrontashon aki a kontestá e pregunta, "Ken ta e berdadero Dios?" E kandela ku a bin for di shelu a demostrá ku Señor tabata e úniko Dios berdadero, i e úniko pa ser adorá. Miéntras e asuntu spiritual di e bataya di Armagedon - Nos lo obedesé Dios òf hende? - ta ser disidí promé ku e plaganan kai, esnan ku tuma banda di e dragon, e bestia, i e profeta falsu (Rev. 16:13), e ora ei lo ser kontrolá totalmente dor di e diabel (manera Hudas tabata, kua a hiba na e krusifikashon di Kristu [Lukas 22:31]).

Skohiendo e banda pèrdèdó, nan lo ta entre esnan ku ta yora pa e serunan skonde nan (Rev. 6:16; lesa tambe 2 Tes. 1:7, 8). Promé ku e plaganan kai, sinembargo, Revelashon 13:13, 14 ta ilustrá e bestia ku ta sali for di tera ku ta laga kandela baha for di shelu pa engañá e mundu pa pensa ku e falsifikashon di Satanas, kua lo inkluí reavivamentunan falsu guiá dor di un otro spiritu, ta obra di Dios.

Armagedon no ta un bataya militar entre nashonnan ku lo ser bringá un kaminda den Medio Oriente, sino un konflikto spiritual global den kua Kristu desididamente ta konfrontá e forsanan di skuridat (2 Kor. 10:4). E resultado lo ta manera esun na Karmelo pero riba un eskala mundial, ku triunfo di Dios riba e forsanan di skuridat.

“Solamente esnan ku a fortifiká nan mente ku e bèrdatnan di Beibel lo para den e último gran konflikto. Na tur alma lo yega e prueba di skrudiñamentu: Lo mi obedesé Dios mas bien ku hende? ... Apòstel Pablo a deklará, mirando na e último dianan: ‘E tempu lo yega ku nan lo no soportá doktrina sano'. 2 Timoteo 4:3. E tempu ei a yega plenamente. E multitutnan no ke bèrdat di Beibel, pasobra e ta interferí ku e deseonan di e kurason pekaminoso, stimadó di mundu; i Satanas ta supli e engañonan ku nan ta stima.

"Pero Dios lo tin un pueblo riba tera pa mantené e Beibel, i solamente e Beibel, komo e norma di tur doktrina i e base di tur reforma. E opinionnan di hendenan studiá, e dedukshonnan di siensia, e kredonan òf desishonnan di konsehonan eklesiástiko, mes numeroso i kontradiktorio manera e iglesianan ku nan ta representá ta, e bos di e mayoria, ni un ni tur esakinan mester ser konsiderá komo evidensia pa òf kontra kualke punto di fe religioso. Promé di aseptá kualke doktrina òf presepto, nos mester eksigí un 'Asina Señor ta bisa' kla den su sosten. ...

"Komo e akto di koronashon den e gran drama di engaño, Satanas mes lo personifiká Kristu. E iglesia a profesá pa hopi tempu pa wak e atvènt di e Salbador komo e kumplimentu di su speransanan. Awor e gran gañadó lo laga parse ku Kristu a bini. Den diferente parti di tera, Satanas lo manifestá su mes entre hende komo un ser mahestuoso di brio impreshonante, paresido na e deskripshon di e Yu di Dios duná dor di Juan den e Revelashon. Revelashon 1:13-15. E gloria ku ta rondon'é no por surpasá kualke kos ku wowonan mortal a yega di kontemplá. E gritu di triunfo ta resoná den laira: 'Kristu a bin! Kristu a bin!' E hendenan ta bùig den adorashon Su dilanti. ... Den tononan amabel i yen di kompashon e ta presentá algun di e mesun bèrdatnan selestial i yen di grasia ku e Salbador a pronunsiá; e ta kura e enfermedatnan di e hendenan, i despues, den su karakter fiktisio di Kristu, e ta afirmá di a kambia e Sabat pa djadumingu, i ta manda tur pa santifiká e dia kua e a bendishoná. E ta deklará ku esnan ku persistí den warda e di shete dia santu ta blasfemando su nòmber dor di rechasá na skucha na su angelnan mandá na nan ku lus i bèrdat. Esaki ta e engaño mas poderoso, i ta resultá kasi iresistibel".­ Ellen G. White, The Great Controversy, p. 593-595, 624.