Huisio riba Babilonia

Lesa Revelashon 17:1. Yeremias 51:13 ta mustra ku e "hopi awanan" riba kua Babilonia ta sinta ta riu Eufrates. Di akuerdo ku Revelashon 17:15, kiko hopi awanan ta simbolisá?

Un muhé den e Beibel ta un símbolo pa e pueblo di Dios. Den Revelashon, e iglesia berdadero di Dios ta ser presentá komo un muhé puru (Rev. 12:1, Rev. 22:17). Un prostituta pues ta representá un iglesia apóstata falsu. Den Revelashon 17:5 e prostituta aki ta ser identifiká komo Babilonia e Grandi. Meskos ku Babilonia antiguo tabata dependé riba Riu Eufrates pa su eksistensia, asina Babilonia di tempu di fin lo dependé riba e sosten di e masanan pa pone su plannan kumpli.

Lesa Revelashon 17:2 huntu ku Revelashon 14:8 i Revelashon 18:2-3. Ki dos grupo di hende ta ser spesifiká komo ta envolví den un relashon ilísito ku, i siendo sedusí pa, Babilonia di tempu di fin?

E promé grupo ta e reinan di tera, e podernan polítiko ku ta goberná. Nan ta ser deskribí komo impliká den un relashon adúltero ku e prostituta Babilonia. Den Tèstamènt Bieu e lenguahe di fornikashon ta ser usá frekuentemente pa deskribí kon Israel apóstata a bira for di Dios na religionnan falsu (Isa. 1:21, Jer. 3:1-10). E relashon adúltero entre e reinan di tera i e prostituta ta simbolisá un union ilísito entre Babilonia di tempu di fin i e podernan polítiko, un union di iglesia i estado.

E di dos grupo den un relashon ilísito ku e prostituta Babilonia ta e habitantenan di tera, e masanan goberná. Esakinan a ser hasí spiritualmente burachi ku e biña di fornikashon di Babilonia. Den kontraste ku e podernan polítiko ku ta goberná, e poblashon general ta intoksiká dor di e siñansanan i práktikanan falsu di Babilonia, engañá pa pensa ku e por protehá nan. Ora hende ta burachi, nan no ta pensa di forma kla i ta ser kontrolá fásilmente (Isa. 28:7). Henter mundu, ku eksepshon di un remanente fiel, lo ser desviá dor di Babilonia.

Lesa Revelashon 17:3. Un di e shete angelnan ku tabatin e shete kòmchinan yená ku e shete último plaganan ta ofresé pa mustra Juan e huisio di e prostituta ku tabata sinta riba hopi awanan. Ora Juan mir'é, e ta koriendo e bestia skarlata. Den ki formanan e símbolonan di awa i bestia korektamente ta deskribí e sostenedónan di Babilonia?

Segun ku Juan tabata ser hibá den vishon den desierto, e ta mira un muhé riba un bestia skarlata. Miéntras e prostituta ta representá un entidat religioso, e bestia ta simbolisá un poder polítiko. E imágen di religion ku ta kore riba e podernan sekular i polítiko ta indiká dos entidat separá, algu ku no tabata e kaso den pasado, ora religion i polítika tabata integrá. E profesia ta mustra, sinembargo, ku e dos entidatnan aki lo uni huntu na e tempu di fin. E konsepto di kore riba un bestia ta denotá dominio; meskos e koredó di e bestia skarlata, e sistema religioso aki di tempu di fin lo dominá e podernan sekular i polítiko.

Kua karakterístikanan di e prostituta ta mustra na e dragon, e bestia ku a subi sali for di laman, i e bestia ku ta subi sali for di tera den Revelashon 12 i 13?

E prostituta ta ser deskribí komo bistí di forma ekstrabagante den púrpura i skarlata i dòrná ku adornonan di oro i piedranan presioso i pèrlanan; adornonan asina tabata un práktika di prostitutanan den antigwedat pa oumentá nan poder di sedukshon (Yer. 4:30). Meskos ku e koló di sanger, skarlata ta korespondé na e karakter opresivo di e sistema religioso aki.

E bistí di e prostituta ta imitá e bistí di e sumosaserdote den Tèstamènt Bieu, bistínan ku tabata inkluí e kolonan púrpur, skarlata, i oro (Eks. 28:5, 6). E inskripshon di blasfemia riba frenta di e prostituta ta remplasá tambe e inskripshon saserdotal, "SANTIDAT NA SEÑOR" riba e mitra di e sumosaserdote (Eks. 28:36-38). E kopa den su man ta kòrda nos riba e kopanan di e santuario for di kua Belsasar, rei di Babilonia, i su invitadonan a bebe biña (Dan. 5:2-4). E kopa den man di e prostituta ta usa e aparensia di bèrdat pa skonde e biña, e falsedatnan di e sistema religioso di tempu di fin di Satanas, pa asina sedusí e mundu pa apartá for di Dios.

Fuera di esei, e prostituta Babilonia ta ser deskribí komo burachi ku e sanger di e santunan i e mártirnan di Hesus ku a muri komo resultado di nan testimonio di Kristu. E dramamentu di sanger aki ta uni e Babilonia di tempu di fin ku e Kristianismo apóstata medieval, kua tabata ser guiá dor di e papado i responsabel pa morto di miónes di Kristiannan ku a permanesé fiel na e evangelio.

Revelashon 17:3 ta deskribí e bestia skarlata den términonan similar na e bestia ku ta subi sali for di laman di Revelashon 13, kua a hasi guera ku, i a vense e pueblo di Dios (Rev. 13:5-7). Tabata e periodo anterior aki di persekushon ku a pone e muhé puru hui bai den desierto durante e periodo profétiko di 1.260 dianan/añanan, for di A.D. 538-1798 (Rev. 12:13-14). Ounke nos ta bibando den un era di ekumenismo, Protestantnan lo hasi bon di kòrda e persekushon teribel di pasado pasobra, di akuerdo ku profesia, algu similar, ounke pió, lo sosodé atrobe.

Lesa Revelashon 17:8. Kompará e fraseologia di e versíkulo aki ku Revelashon 13:8. Kon Revelashon 13:3 ta klarifiká e tres fasenan di e eksistensia i aktividatnan di e bestia?

E bestia skarlata ta ser identifiká komo esun ku tabata, i no ta, i lo subi sali for di e abismo i bai den perdishon. E frase tripartit aki ta, promé ku tur kos, un falsifikashon di e nòmber divino, Yahweh, "ku ta i ku tabata i ku tin ku bin" (Rev. 1:4, NKJV; lesa tambe Rev. 4:8). Tambe e ta mustra mas aleu na e tres fase di eksistensia atraves di kua e bestia a pasa:

1. E bestia "tabata". E tabata eksistí den pasado. Su aktividatnan anterior a dura pa e periodo profétiko di 42 luna, tambe konosí komo 1.260 dianan/añanan (lesa Rev. 13:5 i Lès 9, djadumingu).
2. "No ta". Ku su herida mortal (Rev. 13:3), e bestia a drenta den su fase di no-eksistensia, a lo ménos, komo un persiguidó, na 1798. E a disparsé pa algun tempu for di e esena mundial; sinembargo, e a sobrebibí.
3. Finalmente, ku e kurashon di e herida mortal, e bestia lo rebibá den rabia satániko total.

Revelashon 17 ta deskribí e bestia di Revelashon 13:1-8 na momentu di e kurashon di su herida mortal. Riba e bestia rebibá aki, e prostituta Babilonia ta sinta. Un biaha mas lo tin un union di durashon kòrtiku di religion i polítika, manera a eksistí den Edat Media, i persekushon lo tuma lugá atrobe.

Lesa Revelashon 17:9-11 huntu ku Revelashon 13:18. E rekerimentu pa komprondé e shete kabesnan ta un mente di sabiduria. Ki tipo di sabiduria ta na bista aki? Kon hende ta optené e sabiduria divinamente impartí aki (Santiago 1:5)?

E angel ta splika ku e shete kabesnan ta shete seru. Algun traduktor ta pensa ku e serunan aki ta aludí na e shete serunan riba kua e siudat di Roma ta situá, i pa e motibu aki nan ta tradusí e palabra Griego oroi ("serunan") komo "serunan chikí". Tambe tin shete rei kua ta ser simbolisá pa e shete serunan. Tambe, e serunan aki ta susesivo, no simultáneo.

E serunan aki no ta simbolisá reinan individual, pasobra Revelashon no ta trata ku personanan individual sino ku sistemanan. Den Beibel, serunan hopi biaha ta simbolisá podernan òf imperionan mundial (Yer. 51:25; Ezek. 35:2, 3). Den profesia bíbliko "reinan" ta representá reinonan (lesa Dan. 2:37-39, 7:17). Pues, e shete serunan ta simbolisá shete imperionan grandi susesivo ku tabata dominá e mundu a lo largu di historia, atraves di kua Satanas tabata oponé Dios i a hasi daño na e pueblo di Dios.

For di Juan su perspektiva di tempu, sinku di e imperionan aki a kai, unu ta, i e otro no a yega ainda. Miéntras no tin niun perspektiva ku tur intérprete Atventista ta di un akuerdo kuné, hopi ta sostené ku e sinku ku a kai ta e reinonan grandi ku den tempunan di Tèstamènt Bieu tabata dominá i (tin biaha) a hasi e pueblo di Dios daño: Egipto, Asiria, Babilonia, Medo-Persia, i Gresia. E reino "unu ta" tabata e Imperio Romano di tempu di Juan.

E di shete reino ku "no a yega ainda" ta e bestia ku a subi sali for di laman di Revelashon 13, e papado, kua tabata dominá i a hasi e pueblo di Dios daño, ku mester bini despues di tempu di Juan i despues di e kaida di Imperio Romano pagano. Historia a testifiká poderosamente pa e bèrdat di e profesia aki, skirbí hopi siglo promé ku e eventonan a tuma lugá.

Ademas, Juan a ser bisá ku e bestia skarlata ta un di ocho poder mundial, ounke e ta unu di e shete kabesnan (podernan mundial). Kua di e shete? Dor ku e kabesnan ta segun sekuensia den tempu, e di ocho mester ta e di shete kabes ku a risibí e herida mortal. Ta den tempu di e ocho poder mundial aki ku e bestia skarlata ta aparesé, kargando i avansando e metanan di e prostituta Babilonia. Awe nos ta biba den tempu di e kurashon di e herida mortal. E di ocho poder mundial lo aparesé riba e esena hustamente promé ku e fin i lo bai na perdishon.

Lesa Revelashon 17:12-15 huntu ku Revelashon 16:14-16. Kiko bo ta siña for di e tèkstnan tokante e "dies reinan"?

Diferente interpretashon a ser ofresé enkuanto di e identidatnan di e dies reinan. Sinembargo, Revelashon no ta bisa nos ken nan ta. Tur loke nos por derivá for di e tèkst ta ku nan ta un federashon polítiko di durashon kòrtiku ku ta aparesé djis promé ku e fin i ta sostené e prostituta. Nan kantidat ta nifiká ku e podernan mundial lo rindi lealtat total i inkebrantabel na e bestia.

Revelashon 17:13, 14 ta reiterá den poko palabra e bataya di Armagedon, introdusí den Revelashon 16:12-16. Instigá pa podernan demoniako ku ta obra milager huntu ku e dragon, e bestia ku ta subi sali for di laman, i e profeta falsu, e federashon polítiko mundial lo hasi guera ku e Lamchi. Den otro palabra, e bataya di Armagedon no ta un bataya militar den Medio Oriente sino e konflikto final di e Segundo Binida den kua Satanas i su federashon ta bringa kontra Kristu i Su ehérsito angelikal.

Lesa Revelashon 17:16-18. For di loke nos a mira den Revelashon 16:2-12, kiko tin tras di e kambio di aktitut di e dies reinan pa ku Babilonia? Ken ta tras di loke ta sosodé ku Babilonia?

Yená ku odia, e dies kachunan, kua ta e podernan susesor na e nashonnan dividí di Europa, yen di odio, diripiente ta bira kontra e prostituta Babilonia (e manifestashon di tempu di fin di e papado), hasiendo e desolá i sunú; simbólikamente nan lo kome su karni i kim'é ku kandela. Ora e ta skirbi tokante kiko lo sosodé ku e prostituta Babilonia, Juan ta usa lenguahe similar na loke Dios a bisa lo a sosodé ku Yerusalèm adúltero (Jer. 4:30). Kima dor di kandela tabata e kastigu pa un yu muhé di e saserdote, ku tabata envolví den inmoralidat seksual (Lev. 21:9). E podernan polítiko engañá a bira desilushoná pa motibu di e inkapasidat di Babilonia pa protehá nan for di plaganan. Nan ta sinti nan mes engañá i, den hostilidat, ta atak’é. E sistema religioso apóstata aki di tempu di fin, huntu ku tur esnan ku a skohe pa identifiká nan mes kuné, ta eksperensiá e plenitut di huisio divino.

Promé ku e kaida moral di Babilonia, un bos for di shelu ta urgi e pueblo di Dios ku ainda ta den Babilonia pa "Sali for di dje, mi pueblo" (Rev. 18:4). Tin hopi adoradó di Dios ku ainda ta den Babilonia pa vários rason. Dios ta usa Su iglesia di tempu di fin pa yama e hendenan aki for di e sistema religioso apóstata aki i pa no partisipá den su pikánan. Nan mester sali for di dje pa skapa di su destinu. Dios no ke pa niun hende peresé (2 Pe. 3:9). Revelashon 19: 1-10 ta mustra ku hopi hende ku ta teme Dios den Babilonia lo respondé na e yamada. Pensa, anto, tokante e responsabilidat tremendo ku ta deskansá riba nos komo e iglesia remanente di Dios. Kiko e responsabilidat aki mester bisa nos tokante nos nesesidat di e bèrdat di Dios den nos kurason i e dramamentu di Spiritu Santu den nos bida?