E Eskohonan ku Nos ta Hasi

Algun Kristian ta kere ku Dios a skohe, asta promé ku un persona a nase, si e persona lo ser salbá òf nò. Es desir, esnan ku na final ta bai pèrdí eternamente ta pèrdí pasobra Dios, den Su sabiduria (e teologia aki ta afirmá) a hasi e eskoho ei pa e persona aki lo bai pèrdí. Loke ta nifiká anto ku no importa nan eskohonan, e persona ei lo ta kondená.

Afortunadamente, komo Atventistanan di e di Shete dia, nos no ta atribuí na e teologia ei. En kambio, nos ta kere ku Dios a skohe pa nos tur bai salbá, i ku asta promé ku mundu a eksistí, nos a ser skohé den djE pa tin bida eterno.

Lesa Efesionan 1:1-4; Tito 1:1, 2; i 2 Timoteo 1:8, 9. Kiko e versíkulonan aki ta bisa nos tokante ser skohé dor di Dios i ki ora nos a ser skohé?

Ounke kon bon e notisia aki ta, tòg algun hende lo bai pèrdí (Mat. 25:41). I esei ta pasobra, ounke Dios a skohe nos tur, E a duna sernan humano un don di mas sagrado, i esei ta boluntat liber, eskoho liber.

Kiko Mateo 22:35-37 ta siña tokante boluntat liber?

Dios no ta fòrsa nos pa stim’E. Amor, pa ta amor, mester ser duná libremente. Den hopi forma, un hende por argumentá ku Beibel ta e storia di Dios ku ta aserká sernan humano kaí i trata, sin preshon, na gana nan kurason pa Su mes. E realidat aki por ser mirá mihó den e bida i ministerio di Hesus, i kon hende, uzando nan boluntat liber, a reakshoná riba djE. Algun a ser halá na djE; otronan tabata kier E morto.

Sí, Dios a skohe nos pa salbashon, pero, al final, nos mester hasi e eskoho pa aseptá e salbashon ei. No tin duda ku di tur e eskohonan ku nos tin ku hasi, e eskoho pa sirbi Señor ta, pa gran parti, esun di mas transedental pa nos i pa esnan ku ta ser impaktá (manera nos famia inmediato) pa nos bida i e eskohonan ku nos ta hasi den dje.

Nos tur sa masha bon e importansia di e eskohonan ku nos hasi. I nos tur sa tambe kon eskohonan robes por impaktá nos bida i bida di otronan negativamente. E pregunta ta: Kon nos por sa kon pa hasi e eskohonan korekto?

E siguiente versíkulonan ta duna nos algun pasonan general ku por yuda nos den nos búskeda pa hasi e eskohonan korekto. Kiko e pasonan aki ta?

1 Tes. 5:17, Santiago 1:5

Isa. 1:19, Mat 7:24, 25

Salmo 119:105, 2 Tim. 3:16

Prov. 3:5, 6; Isa. 58:11

Prov. 15:22, 24:6

Den kada desishon importante ku nos hasi, kon krusial ta pa nos bai serka Señor den orashon, ku nos ta sigurá ku nos eskoho lo no hiba nos na violá e lei di Dios den ningun forma, òf asta e prinsipionan di Su Palabra. Kon krusial ta pa nos konfia den Dios, pa nos someté nos eskoho na djE; es desir, nos mester hasi orashon pa e eskohonan ku nos hasi lo glorifik’E i ku nos ta kla pa someté nos propio deseonan si nan ta bai kontra Su plan pa nos bida. Hopi biaha tambe konseheronan sabí por ta un gran yudansa ora nos ta trata na hasi eskohonan. Al final, nos por tin gran siguridat sabiendo ku Dios ta stima i ke loke ta mihó pa nos, i ku si nos, den fe i humildat, someté nos bida na djE, nos por avansá ku fe den e eskohonan ku nos ta hasi.

Un di e eskohonan di mas importante ku hamas nos lo hasi ta nos amigunan. Mayoria biaha nos no ta proponé pa sera amistat; hopi biaha amistatnan simplemente ta desaroyá di forma natural ora nos pasa tempu ku hende ku ta disfrutá di algun di e mesun kosnan ku nos.

Ki prinsipionan pa skohe amigunan nos ta haña den e siguiente versíkulonan? Prov. 12:26; 17:17; 18:24; 22:24, 25.

Proverbionan 18:24 ta bisa ku si nos ke tin amigunan, nos mester ta amistoso. Tin biaha hende ta sinti nan mes so, pero nan aktitut negativo i di mal humor ta loke ta alehá otronan. “Asta esnan mihó di nos tin e rasgonan desagradabel aki; i ora nos ta selektá amigunan nos mester skohe esnan ku lo no alehá for di nos ora nan haña sa ku nos no ta perfekto. Ta pidi toleransia mutuo. Nos mester stima i respetá otro apesar di e faltanan i imperfekshonnan ku nos no por yuda di mira; pasobra esaki ta e Spiritu di Kristu. Humildat i deskonfiansa propio mester ser kultivá, i un ternura ku pasenshi pa ku e faltanan di otronan. Esaki lo kaba ku tur egoismo miskiña i hasi nos di kurason grandi i generoso”. – Ellen G. White, Pastoral Ministry, p. 95.

Un di e storianan mihó konosí di amistat ta esun entre David i Jonathan. Si Soulo, e promé rei di Israel i tata di Jonathan, tabata fiel i obediente, su reino kisas lo a dura pa vários generashon, i Jonathan lo por tabata e susesor di su trono. Ora Soulo a proba di ta indigno di su yamada, Dios a skohe David komo e rei nobo di Israel, i asina a deskualifiká Jonathan pa loke di otro forma mester tabata legítimamente di dje. Aki nos tin un ehèmpel poderoso di kon e eskohonan robes di un miembro di famia (Soulo) a impaktá un otro miembro di famia (Jonathan).

Pero Jonathan no tabata rabiá òf yalurs riba David. En kambio, e a skohe pa yuda David dor di proteh’é for di e rabia di su mes tata, Soulo. “E alma di Jonathan tabata mará na e alma di David, i Jonathan tabata stim’é manera su mes alma” (1 Sam. 18:1, NKJV). Ki un ehèmpel poderoso di berdadero amistat.

Si bo ta ser suponé di skohe bo amigunan kuidadosamente, bo mester ta ainda mas kuidadoso ora ta trata di skohe bo futuro kasá. Adam tabata hopi bendishoná ku Dios a diseñá su kompañera di bida ku Su propio mannan i for di denter di dje mes. E eskoho di Adam tabata fásil ya ku Eva no tabata solamente e úniko muhé, sino e muhé perfekto. Sobrá di nos tin e poko mas difísil, ya ku ningun di nos ta perfekto i tin hopi mas hende pa skohe for di dje.

Dor ku e desishon aki ta asina importante, Dios no a laga nos sin guiansa den e área aki di nos bida. Ademas di tur e pasonan importante ku nos a wak den lès di djaluna, tin algun pasonan mas spesífiko pa sigui den henter e kuestion di matrimonio (nos lo wak henter e kuestion di matrimonio mas kuidadosamente den lès 6). En realidat, banda di e eskoho pa sirbi Señor, e kuestion di un pareha kasi semper lo ta e eskoho di mas transedental ku kualke hende ta hasi den su bida.

Ki guiansa hopi general ta ser hañá den e siguiente tèkstnan ku lo por a i mester ser apliká na un hende ku ta buska e partner korekto den matrimonio? Salmo 37:27, 119:97, 1 Kor. 15:33, Santiago 1:23-25.

Ademas di buska e persona korekto pa kasa kuné, sea e persona korekto promé. “P’esei, loke sea bo ke pa hende hasi ku bo, hasi tambe ku nan, pasobra esaki ta e Lei i e Profetanan” (Mat. 7:12, NKJV). Un hende lo por haña un gran potensial kasá ku tin tur e kualidatnan ku un hende lo tabata ke, pero si esun ku ke bon kualidatnan den e otro ta falta nan e mes, lo surgi problemanan.

Esaki no ta nobo, i ta ser mirá siguramente no solamente den matrimonio sino den bida en general. Pablo ta pasa un gran kantidat di tempu den introdukshon di Romanonan papiando na esnan ku ta kondená otronan pa ta hasiendo loke nan, esnan ku ta kondená, tambe ta kulpabel di dje. Òf, manera Hesus a bisa: “I pakiko bo ta wak e flèk den wowo di bo ruman, ma bo no ta konsiderá e balki den bo mes wowo?” (Mat. 7:3, NKJV).

Den algun momentu, nos tin ku hasi un eskoho tokante kiko nos ke hasi ku nos bida, den términonan di un trabou òf karera. A ménos ku nan ta ekonómikamente independiente òf ta traha tempu kompletu na kas kuidando e kas i famia (e okupashon di mas nobel di tur), hopi hende tin ku skohe un forma pa sostené nan mes.

Naturalmente, nos tur ta eksistí den sierto sirkunstansianan ku, te na sierto grado, por limitá nos eskohonan enkuanto di un karera. Pero denter di kualke esfera ku nos ta eksistí, nos por hasi eskohonan enkuanto di nos okupashon ku, spesialmente den konteksto di sa ku nos tin salbashon den Hesukristu, por duna nos bida nifikashon i propósito adishonal. Den poko palabra, loke sea nos hasi, nos por hasié pa gloria di Dios.

Ki eror Salomon a kometé, i kon nos por ta kuidadoso pa no hasi algu similar? Ekl. 2:1-11.

Nos no mester ta riku pa keda atrapá den e mesun trampa ku Salomon. “Pasobra amor pa plaka ta e rais di tur tipo di maldat, pa kua algun a dual for di fe den nan golosidat, i a traspasá nan mes ku hopi tristesa” (1 Tim. 6:10, NKJV). Un hende por ta pober i stima plaka mes tantu ku un hende ku ta riku.

Sí, nos mester gana plaka, pero no importa loke nos hasi òf kuantu nos gana, nos no mester hasi e búskeda di rikesa un ídolo. Hopi famia tambe a sufri pa motibu di un tata ku, opseshoná ku traha plaka, a neglishá e famia pa purba bira riku. Kuantu mucha, òf pareha, lo a preferá un estilo di bida mas humilde riba un relashon di miseria ku nan tata? Den mayoria kaso, hende lo a preferá esun promé riba e último.

Desde Kreashon Dios a plania pa trabou ta parti di bida (Gen. 2:15). E peliger ta ora nos hasi nos trabou e sentro di nos bida, òf e bira un medio solamente pa atkerí rikesa pa nos mes. Esaki ta e eror ku Salomon a kometé. E tabata buska nifikashon den e proyektonan ei, i ounke hopi di nan a trese un grado di satisfakshon p’e, al final e a deskubrí ku nan tabata insignifikante.

A lo largu di henter Skritura, nos ta ser konfrontá ku e realidat di boluntat humano liber. Asta Adam i Eva no kaí (Génesis 3) tabatin boluntat liber, i desafortunadamente nan a hasi e eskoho robes kuné. Si sernan no kaí, den perfekshon, por a hasi mal uzo di boluntat liber, kuantu mas sernan manera nos mes, saturá den piká?

I nos mester kòrda ku boluntat liber ta eksaktamente esei, liber, kua ta nifiká ku, apesar di e preshon riba nos, tantu for di paden komo pafó, nos no tin ku skohe loke ta robes. Nos por, pa medio di e poder di Dios den nos, hasi e eskohonan korekto ku e boluntat liber ku Dios a duna nos. Por lo tantu, kon importante ta pa nos pisa nos desishonnan kuidadosamente, spesialmente pensando tokante kon e desishonnan ei por impaktá nos bida familiar. E eskoho di boluntat liber di Cain pa mata su ruman siguramente a shòk su famia. E desishon di boluntat liber di e rumannan di Hosé pa bend’é komo esklabo a ruiná bida di su tata. “I e a rekonos’é i a bisa: ‘Ta túnika di mi yu. Un bestia feros a devor’é. Sin duda Hosé a ser di sker na pida pida’. E ora ei Jacob a sker su pañanan, pone paña di saku na su hep, i a tene rou pa su yu hopi dia. I tur su yunan hòmber i tur su yunan muhé a lanta pa konsol’é; ma e a nenga di ser konsolá, i e a bisa: ‘Pasobra lo mi baha bai den graf pa mi yu hòmber den rou’. Asina su tata a yora p’e” (Gen. 37:33-35, NKJV).

Den henter Beibel, meskos ku den bida, nos por haña ehèmpelnan di kon e eskohonan liber di miembronan di famia, pa bon òf malu, ta impaktá otronan, manera e eskohonan di Koré, Datan i Abiram (Num. 16:1-32; lesa tambe Dan. 6:23, 24; Gen. 18:19).