Palabranan Sabí pa Famianan

Skibi e problema- i konsekuensianan enbolbí ku un relashon seksual promé ku matrimonio òf un relashon pafó di matrimonio manera deskribí den Proverbionan 5:3-14.

E persona piadoso ta reservá (si e no ta kasá) i ta preservá (si e ta kasá) su afekshonnan di mas profundo i intimidat seksual pa matrimonio. Proverbionan ta dirigí su mes spesífikamente riba hòmbernan, pero e mesun idea ora ta relashoná ku muhé ta ser ekspresá den e Kantika di Salomon (kompará Kantika di Salomon 4:12-15). E atrakshon poderoso di amor ilísito mester ser pisá kontra e konsekuensianan hororoso di e piká aki. Relashonnan amoroso seksual kasual ta falta kompromiso i, pa e motibu ei, ta karesé di berdadero intimidat. Rekursonan material, físiko i emoshonal ta ser malgastá. Mas importante ainda, nos mester respondé na Dios pa e eskohonan ku nos hasi den bida.

Intimidat seksual, un di e donnan di Dios di mas grandi na sernan humano, ta un privilegio di matrimonio so (Mat. 19:5; 1 Kor. 7:3, 4; Hebr. 13:4). Den Proverbionan, e imágen di awa abundante ku ta enrikesé ta ser uzá komo un símbolo delikado di e plaser i satisfakshon ku un pareha kasá lo mester haña den nan amor huntu. Esaki ta kontrastá ku e desperdisio ku ta resultá ora tin infieldat. E ekspreshon “e esposa di bo hubentut” (Prov. 5:18, NKJV) ta indiká ku, asta ora nan dos bira mas bieu, nan kompromiso ta pa sigui. Un esposo ta sigui ta fasiná (“intoksiká” [Prov. 5:19, NIV]) pa e enkantonan di su esposa.

Den e kondishon humano kaí, instintonan seksual por alehá personanan for di e propósito divino pa seksualidat. Sinembargo, Dios a duna humanidat tambe e poder di rasoná i di skohe. E tentashonnan aki, si nan no ser reprimí kontinuamente, por bira abrumador. Un kompromiso firme ku e propósito divino pa seksualidat den matrimonio por prevení e desaroyo di relashonnan seksual ilísito. E eskoho di fieldat di bida largu na e propósito di Dios pa seksualidat den matrimonio no solamente ta prudente sino ta karga su propio rekompensanan abundante.

Nota e kualidatnan di karakter di tatanan, deskribí den Proverbionan ku por tin konsekuensianan riba término largu pa yunan:

Prov. 13:22; 27:23, 24

Prov. 14:26

Prov. 15:1, 18; 16:32

Prov. 15:27

Prov. 29:17

E karakter di mayornan tin un impakto direkto riba nan yunan i e herensia ku nan ta pasa pa nan. Yunan ta buska sosten, afekshon dediká, guiansa, i ehèmpel den nan tata. Proverbionan ta alabá e mayornan ei ku ta proveedornan konfiabel i atministradónan sabí di rekursonan familiar. Hopi ta e formanan den kua “esun ambisioso ta trese ruina riba nan famia” (Prov. 15:27, NIV); tatanan mester ta konsiente di duna prioridat na famia riba trabou. Tatanan piadoso ta trata na tin pasenshi i den kontròl di nan emoshonnan. Nan ta respetá e dependensia di nan yunan riba nan. Nan ta disipliná nan yunan, pero ta kuidadoso pa no abuzá di nan posishon di outoridat. Mas importante ainda, mayornan dediká ke sigui Dios, ser kontrolá pa Su amor i pa siñansa di Su Palabra, pa nan lo por guia e pianan di nan yunan den e kaminda korekto.

Al final, e kos di mas importante ku un tata por hasi pa su yunan ta di stima nan mama. Su fieldat i afekshon kontinuo p’e, òf e falta di esakinan, tin un efekto revelador riba e bienestar di e yunan, asta te den edat adulto.

Den Proverbionan, lealtat na Dios, kompromiso na matrimonio i famia, i integridat den un hende su bida personal i komunitario ta temanan klave. Éksito den tur kos ta dependé riba e kondishon di e kurason individual. E atrakshonnan di piká, sea ta sèks, flohera, rikesa, òf poder, ta abundá, pero e esposo i tata sabí ta buska Dios pa yudansa pa hasi e eskohonan korekto kontinuamente.

Kiko Proverbionan ta siña tokante e importansia di disiplina i korekshon di un mucha? Prov. 10:17; 23:13, 14; 29:1; 29:15.

Mayornan tin biaha ta disipliná nan yunan pa impreshoná riba nan loke ta komportashon sosialmente inaseptabel, pa kastigá nan desobedensia, òf asta pa ekspresá nan disgustu ora nan sinti nan mes bergonsá. Pero kiko ta e intenshon di Dios enkuanto di disiplina pa e miembronan hóben aki di Su famia? Proverbionan ta establesé disiplina den e konteksto di speransa pa futuro (Prov. 19:18). Mayornan piadoso sa ku yunan tin un naturalesa pekaminoso. Solamente un poder por yuda nan ku esaki, i e poder aki ta Kristu (lesa Ellen G. White, Education, p. 29). E mishon di ta mayor Kristian, inkluyendo disiplina, ta pa hiba muchanan na Dios.

Sostené un mata tierno. Pa medio di Kristu disiplina ta ser mirá no komo kastigu, ni un ekspreshon di outoridat, sino komo korekshon redentor. E plan di Dios ta ku mayornan amoroso, konosiendo e forsa di piká, ta guia e pasonan di nan yunan na Kristu. Mayornan kariñoso ta koregí amablemente i firmemente, restringiendo i guiando yunan atraves di e promé añanan, meskos ku un hortikultor ta proveé sosten na un palu resien plantá, te ora kontrol propio manifestá su mes i un hóben yega na konfia den Dios i ta koperá ku e plan divino di salbashon, kresementu, i madures.

Ki mensahe pa mayornan ta ser hañá den Proverbionan 13:24; 23:13, 14?

En total, solamente un par di versíkulo ta menshoná e “bara” (Hebr. shebet) den konteksto di disipliná yunan. Popular denter di literatura di paternidat Kristian tin e noshon ku uso paterno di e bara mester ta manera esun di e Wardadó selestial ku ta us’é pa guia Su tou (Salmo 23:4). Otro kaminda, Skritura ta mustra na siñansa ku pasenshi, ehèmpel konsistente, bon komunikashon, i relashonnan será pa influensiá kambio den muchanan (Deut. 11:18, 19). E sintimentu di e mucha di ser stimá dor di su mayornan ta vital si disiplina mester tin su efekto deseá di ta korektivo i redentor (Prov. 13:24).

Den ki forma e buki di Proverbionan ta stroi humor riba algun di e iritashonnan den bida doméstiko? Prov. 21:9, 19; 27:15, 16. Ki efekto e humor aki tin?

Un kantidat di e proverbionan ta konsiderá e forma ku nos ta trata otro den relashonnan será. Nan ta splika ku un toke suave i un rayo di inteligensia, manera esnan tokante e amigu insensitivo ku ta “kanta kantikanan na un kurason pisá” (Prov. 25:20, NKJV) i e miembro di famia ku ta lanta trempan ku ta “bendishoná” esnan ku ta drumi “ku un bos duru” (Prov. 27:14, NKJV). Esposanan ku ta lesando e versíkulonan akí tokante muhénan polémiko por ke añadí algun “proverbionan” tokante hòmbernan! Nan por kontestá ku dichonan asina ta perpetuá e problema mes di e proverbionan akí dor di dirigí nan mes na solamente muhénan ora esposonan, ku ta kompartí responsabilidat pa e atmósfera di hogar, ta igualmente kapas di komportashon kontroversial. (Imaginá bo kon lo tabata pa biba den kas di Kaifas i Anas!)

.

Un kurason felis ta yuda. Tin un sentido di humor den bida familiar ta un bon kos. Humor ta zeta e mashin di bida, e ta yuda redusí strès i preshonnan. “Un kurason felis ta hasi bon, manera remedi, ma un spiritu kibrá ta seka e wesunan” (Prov. 17:22, NKJV). Proverbionan ta usa algu di su propio remedi atraves di henter e buki i ta duna nos pèrmit pa hari chikí-chikí pa un par di e komportashonnan ku ta molestiá i iritá. Kisas ora nos a smail (òf sinti un tiki bèrgwensa si ta nos ta karga e konsekuensianan), nos ta den mihó kondishon pa papia tokante kustumbernan òf komportashonnan ku ta iritá òf molestiá nos. Na otro banda, humor no mester ser usá pa minimisá òf neglishá asuntunan ku tin mester di atenshon serio.

Un keintura di grado abou por ta sintomátiko di un infekshon króniko. Pleitamentu, molestiamentu, i kehamentu por ta señal di ku tin rabia reprimí den un òf mas miembro di famia, kisas relashoná ku difikultatnan ku resiprosidat òf komunikashon den e relashon. E pareha ku ta keha ta purba kontrarestá e poder, kontròl, i falta di boluntat pa komuniká ku e ta persibí den e otro. Si e infekshon ser resolvé, e síntomanan lo bai. Den famianan, mas bien ku evitá e problema òf evitá otro, miembronan ta konstruí riba nan amor pa Señor i nan kompromiso un na otro pa komuniká nan nesesidat- i sintimentunan, yega na rais di nan rabia, i resolv’é.

E buki di Proverbionan ta sera ku alabansa pa un esposa di karakter nobel. Identifiká e karakterístika- i kualidatnan ku ta ser elogiá. Prov. 31:10-31.

E muhé deskribí ta spesial, i e poesia tambe. Kada un di e versíkulonan kuminsando na Proverbionan 31:10 ta kuminsá ku un di e 22 lèter di e álfabèt Hebreo. Bo ta sinti for di e tributo aki na un esposa digno ku asta henter e álfabèt nashonal apénas ta proveé un kuadro sufisiente pa elogi’é adekuadamente.

E énfasis di Proverbionan riba kasa ku un bon pareha ta ser reflehá den un dicho di e rabinan: “E hogar di un hòmber ta su esposa”. “Un esposa di karakter nobel ta e korona di su esposo, ma un esposa bergonsoso ta manera deterioro den su wesunan” (Prov. 12:4, NIV). Aki, na final di Proverbionan, representá di forma idealístiko den un deskripshon di un, tin hopi abilidatnan variá: trahamentu di paña, kumpramentu di propiedat, agrikultura, maneho di hogar i finansiero. Mientrastantu, e ta kuida su famia bon. Nan ta stim’é i ta alab’é.

E talentonan amplio akí no mester ser sperá den tur muhé, ni nan ta un patronchi ku kua esposonan mester midi nan esposa. Mas bien, ora Proverbionan ta deskribí e kapasidat- i kualidatnan akí, e ta transmití loke ta mas importante i universalmente relevante pa hendenan muhé, komo tambe pa hòmbernan: e rasgonan di integridat, kompashon, konfiabilidat, fieldat, amabilidat, i diligensia. E sekreto di un bida asina, di akuerdo ku Proverbionan 31:30, ta ku e ta “teme Señor” (NKJV).

Den Proverbionan 31:10 e palabra pa “virtuoso”, òf “di karakter nobel” (NIV), ta nifiká “forsa”, “poder”, òf “rikesa”. E ta ser tradusí komo “rikesanan” den Salmo 62:10 i ta deskribí “e hòmbernan balente” di Josue. Boaz ta elogiá Ruth ku e palabra “virtuoso” (Ruth 3:11). Den Proverbionan 31:10 tin un wega di palabra riba e konsepto di “rikesa”. Berdadero rikesa ta sinta den karakter, integridat, i e temor di Señor. Esaki ampliamente ta superá e balor ku ta ser hañá den piedranan presioso.

Mantené e kurason den shelu. “Kristiannan mester ta kuidadoso pa nan warda nan kurason ku tur diligensia. Nan mester kultivá un amor pa meditashon, i tene na un spiritu di deboshon. Hopi ta parse di ta resentí momentunan pasá den meditashon, i e skrudiñamentu di e Skrituranan, i orashon, komo si fuera e tempu dediká asina tabata pèrdí. Ohalá boso tur por a mira e kosnan aki den e lus ku Dios lo tabata ke pa boso mira nan; pasobra e ora ei boso lo a hasi e reino di shelu di promé importansia. Pa mantené boso kurason den shelu, lo duna vigor na tur boso grasianan, i pone bida den tur boso debernan. Disipliná e mente pa meditá riba kosnan selestial, lo pone bida i sinseridat den tur nos esfuersonan. ... Nos ta enanonan den konkistanan spiritual. ... [Efe. 4:13.]”. – Ellen G. White Comments, The SDA Bible Commentary, tomo 3, p. 1157.