E Kantika di Amor Real

Basá riba e siguiente pasashinan, kon lo bo a karakterisá e punto di bista di Beibel di e kurpa humano? Gen. 2:7; Salmo 63:1; 84:2; 1 Kor. 6:19, 20; 1 Tes. 5:23.

Algun religion ta kere den dualismo, un filosofia ku ta mira e kurpa humano komo un problema pa bida di e spiritu. Es desir, e kurpa ta ser konsiderá malu, miéntras e “spiritu” ta ser konsiderá bon. Den Skritura, sinembargo, e kurpa humano, inkluyendo su karakterístikanan seksual, ta integral na henter e ser. Bida ta “kurpa” i “spiritu” (lesa Gen. 2:7). E salmista ta duna henter su ser den adorashon na Dios (Salmo 63:1, 84:2). Henter e persona mester ta santifiká, konsagrá pa e propósito santu ku Dios a intenshoná.

Un enfoke positivo di e kurpa humano, den konteksto di relashonnan seksual, ta ser reflehá den e Kantika di Salomon. Kon e tèkstnan aki ta revelá e aktitut aki? Kantika di Salomon 1:2, 13; 2:6; 5:10-16; 7:1-9.

A lo largu di henter e teksto sagrado aki e kurpa humano ta ser atmirá. E aspektonan físiko di amor nupsial no ta un bèrgwensa. Un ekstenshon kompletu di emoshonnan ta ser presentá abiertamente.

Tabúnan seksual poderoso ta eksistí normalmente den hopi kultura. Parehanan kasá, por lo tantu, hopi biaha ta haña difísil pa komuniká den formanan saludabel enkuanto di nan bida íntimo. Di forma similar, yunan hopi biaha ta ser deprivá di e oportunidat pa siña tokante seksualidat den e konteksto di un hogar Kristian kaminda balornan piadoso por ser integrá ku informashon korekto. E aktitut habrí di Beibel pa ku seksualidat ta yama Su pueblo na un nivel mas grandi di komodidat ku e tópiko aki pa e aspekto vital aki di bida ser tratá ku e rèspèt i dignidat ku e gran regalo aki di e Kreador meresé.

Deskribí vários aspekto di amor presentá den e Kantika di Salomon. Kantika di Salomon 1:2, 13; 2:10-13, 16; 3:11; 4:1-7; 5:16; 6:6; 7:1-9; 8:6, 7.

E Kantika di Salomon ta mustra kon amigunan ta pasa tempu huntu, ta komuniká abiertamente, i ta preokupá un pa otro. Den e Kantika di Salomon, dos bon amigu ta bira parehanan kasá. E esposa ta deklará: “Esaki ta mi amigu” (Kantika di Sal. 5:16, NKJV). E palabra amigu ta ekspresá kompañerismo i amistat sin e implikashonnan di asosiashon seksual. Felis ta e esposo òf esposa ken su pareha ta un amigu stimá.

Den henter e poema, elogionan íntimo i gestonan amoroso ta reflehá e atrakshon fuerte, e delisia físiko i emoshonal ku e hòmber i e muhé ta haña den otro. E intimidatnan natural di amor romántiko ta un regalo di e Kreador, pa yuda parehanan uni nan mes djaserka na otro den matrimonio. A medida ku parehanan ta habrí pa e obra di amor divino den nan kurason, nan amor humano ta ser “refiná i purifiká, elevá i eksaltá”. – Ellen G. White, The Adventist Home, p. 99.

E versíkulonan aki ta transmití tambe e pensamentunan di mas elevá tokante amor. Amor berdadero, sinembargo, no ta natural pa e kurason humano; e ta un don di Spiritu Santu (Rom. 5:5). Amor asina ta konektá esposo i esposa den un union duradero. E ta e amor komprometí ku ta asina desesperadamente nesesario den e relashon mayor i yu pa konstruí un sentido di konfiansa den e hóbennan. E ta e amor apnegá ku ta uni kreyentenan huntu den e kurpa di Kristu. E Kantika di Salomon ta yama nos pa hasi e amor aki un forsa aktivo den nos relashon ku nos pareha.

Hopi a mira un tema di “regreso na Eden” den e Kantika di Salomon. Ounke e pareha deskribí no ta e promé hòmber i muhé, e poema ta yama e promé hardin na mente. E plan di Dios pa nan ta “un karni” (Gen. 2:24, 25) ta ser deskribí atraves di metáfora- i símbolonan delikado.

Kon e Kantika di Salomon ta representá un kompromiso na resiprosidat den e bida íntimo di e pareha kasá? Kantika di Salomon 4:7-5:1. Kon e instrukshon di Pablo den 1 Korintionan 7:3-5 ta similar?

Salomon ta invit’é: “Ban ku mi” (Kant. di Sal. 4:8). Su brùit ta respondé. Despues e ta invit’é: “Laga mi stimá bin den su hardin” (Kant. di Sal. 4:16). E ta kontestá (Kant. di Sal. 5:1). Aki Skritura ta siña ku no mester tin forsa òf manipulashon den e ambiente íntimo aki. Den e relashon aki tur dos pareha ta drenta libremente i amorosamente. “Mi hardin” ta “su hardin”.

“Salomon” i “Sulamita” ta kompartí nòmbernan ku ta derivá di e shalom Hebreo, “pas”, òf “integridat”. Nan atmirashon ta mutuo (Kant. di Sal.. 4:1-5, 5:10-16). E balansa den nan relashon ta haña evidensia asta den e stail poétiko di liña- i versonan ku ta par. E ekspreshon di pakto “Mi stimá ta di mi, i ami ta di dje” (Kant. di Sal. 2:16) ta eko e lenguahe di Eden: “Esaki ta awor wesu di mi wesu, i karni di mi karni” (Gen. 2:23).

Kon e deskripshon di e union nupsial komo “konosé” ta enrikesé nos komprondementu di nos relashon ku Dios? Gen. 4:1, 25; 1 Sam. 1:19; Lukas 1:34; Juan 17:3; 1 Kor. 8:3.

Beibel ta usa konosé pa e union íntimo di esposo i esposa. Den e “konosementu” amoroso aki, e profundidatnan interior di mas skondí di nan ser ta ser ofresé na e otro. No solamente dos kurpa sino tambe dos kurason ta ser uní den “un karni”. Konosé ta deskribí tambe e relashon entre hende i Dios. Pa e Kristian perseptivo e konosementu úniko i tierno di matrimonio, ku su kompañerismo, kompromiso, i delisia ilimitá, ta proveé un vishon profundo den e misterio di mas sublime i sagrado ku hamas a eksistí, e union di Kristu i e iglesia.

Lesa Kantika di Salomon 4:8-5:1.

Kantika di Salomon 4:16 i 5:1 ta forma e sentro mes di e buki aki i ta deskribí, pa bisa asina, su klímaks segun ku e matrimonio entre Salomon i e Sulamita ta ser konsumí.

Na kiko Salomon ta refiriendo den e siguiente pasashinan? Kantika di Salomon 4:12, 16; 5:1; 8:8-10.

Den e Kantika di Salomon nos ta haña algun di e evidensianan di mas konvisente pa e plan di Dios ku hende ta permanesé seksualmente kasto te na matrimonio. Un di esnan di mas poderoso ta un referensia na e infansia di e Sulamita, ora su rumannan hòmber tabata puntra nan mes si e lo tabata un “muraya” òf un “porta” (Kantika di Salomon 8:8, 9). Den otro palabra, e lo keda kasto te na matrimonio (un muraya), òf ta promiskuo (un porta). Komo un muhé adulto, e ta afirmá ku e a mantené su kastidat i ta bin puru serka su esposo: “Mi ta un muraya” (Kant. di Sal. 8:10). De echo, e ta konfirmá ku ainda e ta un bírgen te na nan nochi di boda dor di bisa ku e ta “un hòfi será … un pos será, un fuente seyá” (Kant. di Sal. 4:12). A base di su propio eksperensia, e por konsehá su amiganan pa tuma e pasonan di amor i matrimonio ku hopi kuidou. Tres biaha den e Kantika di Salomon e Sulamita ta dirigí su mes na un grupo di muhé ku ta ser referí na dje komo e “yunan muhé di Yerusalèm” pa konsehá nan pa no lanta e pashon intenso di amor te na e momentu apropiá (Kant. di Sal. 2:7, 3:5, 8:4), es desir, te ora nan haña nan mes salvo denter di e pakto íntimo di matrimonio, manera e.

Pa di dos biaha den e poema e stimá ta invitá su brùit pa bai kuné (Kant. di Sal. 2:10, 4:8). Promé ku e boda e no por a aseptá su invitashon, pero awor ta e ta invit’é na su hòfi (Kant. di Sal. 4:16), i kontentu e ta aseptá (Kant. di Sal. 5:1). E no ta solamente atraé na su bunitesa; e a hòrta su kurason (Kant. di Sal. 4:9), e ta fuma di su amor (Kant. di Sal. 4:10), i e ta eufóriko ku e ta di dje i di ningun otro awor, i pa semper: “Mi brùit, di mi mes, bo ta un hòfi, un fuente será pa tur otro” (Kant. di Sal. 4:12, CEV). Den su union ku e muhé perfekto aki e ta konsiderá su mes komo alkansando e Tera Primintí: “Bo lepnan ta un panal di miel; lechi i miel ta flui for di bo lenga” (Kant. di Sal. 4:11, CEV).

Ki bon notisia tin pa personanan ku ta lamentá nan eskohonan robes den e ekspreshon di nan seksualidat? 1 Juan 1:9; kompará Salmo 103:12, Isa. 55:7, Juan 8:11.

Dios tabatin un propósito spesial ora E a krea humanidat komo hòmber i muhé (Gen. 1:26-28). Miéntras kada un ta karga Su imágen, e union di géneronan opuesto den e matrimonio di “un karni” ta reflehá e unidat denter di e Deidat den un forma spesial. E union di hòmber i muhé tambe ta proveé pa prokreashon di un bida nobo, un ekspreshon humano original di e imágen divino.

Ki aktitut Skritura ta asumí pa ku práktikanan seksual ku no ta kuadra ku e plan di e Kreador? Lev. 20:7-21, Rom. 1:24-27, 1 Kor. 6:9-20.

Skritura ta desaprobá tur loke ta alterá òf ta destruí e imágen di Dios den humanidat. Dor di pone sierto práktikanan seksual fuera di límitenan, Dios ta guia Su pueblo den direkshon di e propósitonan korekto di seksualidat. Ora eksperensia humano ser konfrontá dor di e preseptonan di Dios, e alma ta ser konvensé di piká.

Ki guiansa ta ser duná na kreyentenan Kristian relashoná ku nan seksualidat i esun di otronan den un mundu kaí? Rom. 8:1-14; 1 Kor. 6:15-20; 2 Kor. 10:5; Gal. 5:24; Kol. 3:3-10; 1 Tes. 5:23, 24.

Kreyentenan ta spera riba liberashon for di e korupshon di piká na e regreso di Kristu. Nan ta warda den fe, konsiderando nan mes morto na piká pa medio di e morto di Kristu riba e krus i bibu den djE pa medio di Su resurekshon. Pa medio di orashon konstante, vigilansia, i poder di e Spiritu, nan ta trata nan naturalesa pekaminoso komo krusifiká i ta trata na obedesé Kristu den nan pensamentunan. Nan ta rekonosé ku nan kurpa i seksualidat ta pertenesé na Dios i ta usa nan di akuerdo ku Su plan divino.

Dios ta pordoná esnan ku arepentí di piká (1 Juan 1:9). E evangelio ta kapasitá personanan ku anteriormente tabata komprometé den promiskuidat i aktividat seksual pekaminoso pa ta parti di e komunidat di kreyentenan. Pa motibu di e magnitut na kua piká a alterá seksualidat den humanidat, algun kisas no ta kapas pa konosé restourashon kompletu den e aspekto aki di eksperensia humano. Algun, por ehèmpel, kisas ta skohe un bida di selibato mas bien ku bira enbolbí den kualke relashon seksual ku ta prohibí pa e Palabra di Dios.

“Matrimonio a risibí e bendishon di Kristu, i e mester ser konsiderá komo un institushon sagrado. Religion berdadero no mester kontrarestá e plannan di Señor. Dios a ordená ku hòmber i muhé mester ser uní den santu matrimonio, pa establesé famianan ku, koroná ku honor, lo tabata símbolonan di e famia den shelu. I na komienso di Su ministerio públiko Kristu a duna Su aprobashon definitivo na e institushon ku a ser aprobá den Eden. Asina E a deklará na tur ku E lo no ninga Su presensia na okashonnan di matrimonio, i ku matrimonio, ora e ser uní ku puresa i santidat, bèrdat i hustisia, ta un di e bendishonnan di mas grandi ku hamas a ser duná na e famia humano”. – Ellen G. White, Daughters of God, pp. 180, 181.

Manera e Kantika di Salomon a mustra, amor seksual por ta un kos maravioso den matrimonio. Pero un relashon duradero no por ta basá simplemente riba e bunitesa eksterior i plasernan físiko. Nos kurpa ta bira bieu i ta dekaí, i ningun kantidat di dieta, ehersisio, òf sirugia plástiko lo laga nos mustra hóben pa semper. E matrimonio di Salomon i e Sulamita ta un relashon komprometé i pa bida largu. Tres biaha nan ta afirmá ku nan ta pertenesé na otro (Kantika di Salomon 2:16, 6:3, 7:10). E promé biaha e ta un rekonosementu di pertenensia mutuo (kompará ku Efe. 5:21, 33). E di dos biaha e ta kambia e órden den e afirmashon di su sumishon (tambe Efe. 5:22, 23). E di tres biaha e ta ekspresá su deseo p’e (Efe. 5:24-32). Amor manera esaki no por ser hogá (Kantika di Salomon 8:7), e ta manera un seyo ku no por ser kibrá (Kantika di Salomon 8:6).