Tempunan di Pèrdida

Nos ta miles di aña for di e palu di bida; i nos ta sinti esei tambe, spesialmente ora ta trata di nos salú físiko. Tardi òf trempan, a ménos ku nos ser matá ora nos ta yòn pa motibu di trouma, nos tur ta yega na e realidat duru di pèrdida di salú.

I pa difísil ku e pèrdida di salú ta, kuantu mas doloroso e ta ora e dal, no solamente nos so, sino un hende den nos propio famia? Kuantu mayor, spesialmente ora nan a atendé ku un yu malu, a deseá ku tabata nan, e mayor, ku tabata malu na lugá di e yu? Desafortunadamente, nos no ser duná e eskoho ei.

Kiko tur e relatonan akí tin en komun? Marko 5:22-24,35-43; Mat. 15:22-28; Lukas 4:38,39; Juan 4:46-54.

Den kada un di e kasonan akí, i sin duda den asina tantu mas, tabata un miembro di famia ku tabata supliká yudansa di Hesus pa un otro miembro di famia.

No tin duda, nos ta rekonosé ku nos ta sufri pasobra nos ta biba den un mundu kaí. Ora piká a drenta mundu, no ta solamente morto a drenta, sino tambe doló króniko i malesa. Ora nos ser afrontá ku un malesa króniko òf terminal, nos por eksperensiá shòk, rabia, desesperashon i por asta sinti gana di grita: "Mi Dios, mi Dios, pakiko Bo a desampará mi? Dikon Bo ta asina leu? Lo Bo no skucha mi kehamentunan i bin na mi reskate?" (Salmo 22:1, CEV). Manera David a hasi, nos lo a hasi bon di hiba nos preguntanan, rabia i doló serka Dios.

Den hopi forma, malesa i sufrimentu lo permanesé un misterio te ora morto finalmente ser derotá na e regreso di Hesus. Na mes momentu, nos por optené bèrdatnan importante for di e Palabra di Dios. Miéntras Jòb tabata soportá doló indeskriptibel, el a eksperensiá un intimidat mas profundo ku Dios. E ta splika: "Mi a tende di Bo for di otronan; awor mi a mira Bo ku mi propio wowonan" (Job 42:5, CEV). Pablo tabatin un sorto di malesa króniko, i e manera kon el a trata ku esaki ta bisa nos ku sufrimentu por ekipá nos pa konsolá otronan, e por duna nos kompashon pa otronan ku ta sufriendo, i e por kapasitá nos pa ministrá mas efektivamente (2 Kor. 1:3-5), es desir, si nos no permitié kibra nos.

Nos ta hendenan pekaminoso i disfunshonal ku na sierto momentu lo proba ku nos ta inkonfiabel na un hende ku a konfia nos. I ken no a yega di ta víktima di un otro hende su traishon di nos konfiansa? I, pa duru ku un pèrdida di konfiansa asina por ta, semper e ta muchu mas pió ora nos traishoná, òf nos ser traishoná pa un miembro di famia.

Tin biaha por parse mas fásil pa kòrta nos pèrdidanan i kore ora nos disidí ku e relashon no ta bal e esfuerso pa rekonstruy'é. Naturalmente, no ta asina fásil ora ta un miembro di famia, manera un kasá. Bo por asta bisa ku un di e propósitonan di matrimonio ta pa siña nos e lès di kon pa rekonstruí konfiansa ora esaki ser kibrá.

Ora konfiansa den un relashon a ser komprometé, kon tantu konfiansa i e relashon por ser drechá i salbá? 1 Pe. 5:6,7; 1 Juan 4:18; Santiago 5:16; Mat. 6:14.15.

Pa rekonstruí konfiansa kibrá ta manera un biahe; bo mester tum’é gradualmente. E biahe ta kuminsá ku un rekonosimentu sinsero di e doló i konfeshon di e bèrdat, loke sea e òfensa tabata i ken sea ta e ofensor.

Ora adulterio tabata e kousa di e kiebro, rekuperashon ta kuminsá ora ku e traidor konfesá. Komo parti di e proseso di rekuperashon, konfeshon mester bai kompañá ku transparensia kompleto di parti di e traidor. No por tin nada ku ta keda skondí, sino, ora e ser deskubrí (i lo e ser deskubrí), lo e destruí e konfiansa ku a ser restablesé. I e di dos biaha ku konfiansa ser kibrá, e ta bira ainda mas difísil pa rekuperá ku e promé kiebro.

Rekonstruí konfiansa ta tuma tempu i pasenshi. Mas serio e ofensa ta, mas tempu lo e tuma pa ser rekuperá. Aseptá e echo ku tin biaha bo ta bai sinti manera kos ku bo ta dal dos paso dilanti i tres paso patras. Un dia ta parse manera tin speransa pa mañan, i e siguiente dia, bo ta sinti gana di kore bai. Hopi, sinembargo, a yega di ta kapas pa rekonstruí nan relashon kibrá i a desaroyá un matrimonio mas profundo, mas íntimo, mas satisfaktorio i mas felis.

Un otro manera ku konfiansa ta ser perdí ta pa medio di violensia familiar. Pa inkreibel ku e ta, investigashon ta revelá ku e hogar ta esun lugá di mas violento den sosiedat. Violensia familiar ta toka tur tipo di famia, inkluso hogaman Kristian. Violensia ta un atake di kualkier forma—verbal, físiko, emoshonal, seksual, òf negligensia aktivo òf pasivo—ku ta ser kometé dor di un òf mas persona kontra un otro den famia.

Beibel ta inkluí relatonan di violensia familiar, asta entre e pueblo di Dios. Kiko ta bo pensamentu- i sintimentunan segun ku bo ta lesa e versíkulonan akí? Dikon bo ta pensa ku e storianan akí a ser preservá den Skritura?

Gen. 37:17-28

2 Sam. 13:1-22

2 Reinan 16:3, 17:17, 21:6

Komportashon abusivo ta e eskoho konsiente di un persona pa ehersé poder i kontrol riba un otro. E no por ser spliká òf dispensá pa alkoholismo, strès, e nesesidat di kumpli ku deseonan seksual, e nesesidat pa mihó kontròl di rabia, òf kualke komportashon di e víktima. Víktimanan no ta responsabel pa a pone e abusador pa abusá. Abusadornan ta trose i korumpí amor, pasobra "amor no ta hasi daño" (Rom. 13:10, NIV). Tratamentu pròfeshonal por fasilitá kambio den e komportashon di e abusador, pero solamente si e persona tuma responsabilidat pa e komportashon i ta buska yudansa asina. Na esnan ku lo habri nan mes pa Su presensia, Dios ta kapas pa hasi kosnan sumamente hopi pa yuda abusadornan stòp di abusá, pa repentí di nan aktitut i komportashon, pa hasi restitushon den tur forma posibel, i pa adoptá e kualidatnan di amor ágape pa sana nan propio kurason i pa stima otronan (kompará Efe. 3:20).

Dios so sa kuantu mion, asta bion, hende ta lucha ku algun forma di adikshon. Te na e dia di awe, sientifikonan ainda no ta komprondé eksaktamente kiko ta kousa esaki, aunke den algun kaso nan por mira realmente e parti di nos serebro den kua e anhelonan i deseonan ta situá.

Desafortunadamente, haña e alokashon di e adikshonnan ei no ta e mesun kos, sinembargo, ku libra nos di e adikshonnan. Adikshon ta difisil pa tur hende, no solamente e adikto. Miembronan di famia—mayoman, kasánan, yunan—tur ta sufrí masha hopi mes ora kualke miembro di famia ta bou di gara di un poder ku simplemente ta parse ku nan no por libra for di dje.

Droga, alkohòl, tabaku, wega di plaka, pornografía, sèks, asta kuminda—loke ta hasi e kosnan aki adikshonnan ta e naturalesa kontinuo i progresivo di nan uso òf abuso. Bo ta inkapas pa stòp asta ora bo sa ku e ta hasiendo bo daño. Miéntras bo ta disfrutando di bo libertat di eskoho, bo ta bira un esklabo di loke sea bo ta adikto na dje, i asina realmente bo ta pèrdè bo libertat. Pedro tin un splikashon simpel di kiko un adikshon ta i su resultadonan: "Nan ta primintí libertat na tur hende. Pero nan ta meramente esklabonan di bida sushi, pasobra hende ta esklabo di loke sea ta kontrolá nan” (2 Pe. 2:19, CEV).

Kiko ta e kosnan ku por hiba hende den adikshon? Lukas 16:13; Rom. 6:16; Santiago 1:13-15; 1 Juan 2:16.

Piká i adikshon no nesesariamente ta e mesun kos. Bo por kometé un piká ku bo no ta adikto na dje, aunke asina tantu biaha e por kambia bira un adikshon. Kuantu mas mihó, pa medio di e poder di Dios, pa para e piká promé ku e kambia bira un adikshon. I, naturalmente, e úniko solushon duradero pa e problema di piká i adikshon ta dor di risibí un kurason nobo. "Pasobra nos ta pertenesé na Kristu Hesus, nos a mata nos sintimentu- i deseonan egoista" (Gal. 5:24, CEV). Pablo tambe ta splika e Romanonan kiko ta nifiká pa muri na e naturalesa pekaminoso i adiktivo ei, pa nos por biba pa Kristu (Rom. 6:8-13), i despues e ta añadí: "Laga Señor Hesukristu ta mes serka di boso ku e pañanan ku boso ta bisti. E ora ei boso lo no trata na satisfasé boso deseonan egoista" (Rom. 13:14, CEV).

Komo sernan humano, nos konosé e realidat di morto. Nos ta lesa tokante di dje, nos ta mir'é, i kisas asta nos a yega serka di afront’é nos mes.

Lesa 1 Korintionan 15:26. Kon morto ta ser deskribí, i dikon e ta ser deskribí di e forma akí?

Ken, despues di a pèrdè un ser kerí, no ta eksperensíá pa nan mes presis kon gran enemigu morto ta? Na otro banda, e mortonan ta "bon". Si, den Señor, nan sera nan wowo i den loke ta parse manera un instante pa nan, nan ta ser lantá pa inmortalidat. "Pa e kreyente, morto ta djis un asuntu chikitu ... Pa e Kristian, morto ta djis un soño, un momentu di silensio i skuridat. E bida ta skondí ku Kristu den Dios, i "ora ku Kristu, Kende ta nos bida, lo aparesé, e ora ei bo tambe lo aparesé kunE den gloria."- Ellen G. White, The Desire of Ages, p. 787.

Nò, ta e bibunan, spesialmente e amigunan òf miembronan di famia ku keda, ku konosé e berdadero doló i tristesa despues di un morto. Echo ta ku tristesa ta un kontesta natural i normal riba pèrdida. Ta e sufrimentu emoshonal ku nos ta eksperensiá ora algu òf un hende ku nos ta stima ser kitá for di nos.

E proseso di rou no ta meskos pa tur hende, pero en general mayoria hende ta pasa dor di diferente fase. E promé reakshon, i esun di mas komun, riba morto di un ser kerí ta shòk i ningamentu, asta ora e morto tabata algu ku a spera. Shòk ta bo protekshon emoshonal for di ser aplastá diripiente pa e pèrdida, i e por dura di dos pa tres luna. Bo por pasa tambe dor di un tempu kaminda bo ta ser apsorbé konstantemente pa pensamentunan di bo ser kerí, asta durante tareanan diario komun. Hopi biaha kombersashonnan ta bira na bo pèrdida òf ser kerí. E periodo akí por dura di seis luna pa un aña.

E etapa di desesperashon i depreshon ta un periodo largu di tristesa, probablemente e etapa di mas doloroso i prolongá pa esun den tristesa, durante kua gradualmente bo ta yega na aseptá e realidat di bo pèrdida. Durante di e etapa akí, bo por eksperensiá un variedat di emoshonnan, manera rabia, kulpa, remordimentu, tristesa, i ansiedat. E meta di tristesa no ta pa eliminá tur bo doló òf e rekuerdonan di bo pèrdida. Den e etapa final di rekuperashon, bo ta kuminsá haña un interes nobo den aktividatnan diario i ta funshoná normalmente dia tras dia.

Hopi a sufri komo resultado di nan adikshonnan. Nan a bira katibunan di nan propio deseonan i a pèrdè nan plaka, nan trabou, nan salú, i nan libertat. Pero Hesus a bin pa duna nos e libertat for di nos piká i for di tur nos adikshonnan, i "si e Yu hasi boso liber, boso lo ta liber di bèrdat" (Juan 8:36, NKJV). Hesus a primintí tambe ku semper lo E tabata ku nos (Mat. 28:20; Isa. 43:2); pues, nos no tin mester di bai e guera akí nos so. De echo, nos mester kòrda ku e bataya ta di Señor (1 Sam. 17:47), i E ta primintí viktoria (1 Ped. 1:3-9). Awe bo por kuminsá riba e kaminda pa viktoria riba kualke adikshon i risibí e libertat ku bo ta deseá i loke Dios ke pa bo. Esaki no ta nifiká ku lo bo no lucha, i e no ta nifiká ku, tin biaha, kisas bo por asta faya. Pero e bon notisia ta ku tanten bo no bandoná Señor, E lo no bandoná bo. I sí, no tin nada malu ku buska yudansa pròfeshonal tambe. Meskos ku Señor por usa un profeshonal médiko pa yuda bo ku problemanan di salú, E por usa un konsehero profeshonal pa yuda ku adikshon tambe.

"Ora difikultat- i pruebanan rondoná nos, nos mester kore bai serka Dios, i konfiadamente spera yudansa for di djE kende ta poderoso pa salba i fuerte pa libra. Nos mester pidi e bendishon di Dios si nos ke risibí esaki. Orashon ta un deber i un nesesidat; pero nos no ta neglishá alabansa? Nos no mester duna gradisimentu mas tantu biaha na e Dunador di tur nos bendishonnan? Nos mester kultivá gratitut. Nos mester kontemplá frekuentemente i bolbe konta e miserikòrdianan di Dios, i alabá i glorifiká Su nòmber santu, asta ora nos ta pasando dor di tristesa i aflikshon".-Ellen G. White, Selected Messages, buki 2, p. 268.