Tempunan Chikitu di Problema

Lesa Mateo 7:5 i Proverbionans 19:11. Ki dos prinsipionan importante por yuda nos evitá konflikto ku otronan?

E eskritor di Proverbionan ta hasi un opservashon masha astuto: "E kuminsamentu di un argumentu ta manera un awa ku ta lèk — pues stòp e promé ku berdadero problema kuminsá" (Prov. 17:14, CEV). Unabes e kuminsá, un konflikto por bira inkreiblemente difísil pa stòp. Di akuerdo ku Romanonan 14:19, nos por prevení konflikto dor di sigui dos kos: e loke ta hiba na pas i esun ku kua un hende por edifiká un otro. Kuantu mas e prinsipionan akí ta krusial pa harmonia den famia?

Tin biaha ora bo atmití bo responsabilidat den un konflikto, e por pone e otro parti suavisá. Dal un paso atras i konsiderá si e ta asta un bataya ku ta bale la pena. Proverbionan ta deklará: "Esnan ku bon sentido no ta rabia lihé, i ta nan gloria pa pasa un ofensa por alto" (Prov. 19:11, NRSV). Na mes momentu, konsiderá ki diferensha esaki ta bai hasi den bo bida den tres dia. Mihó ainda, ki impakto lo e tin den sinku òf dies aña? Kuantu matrimonio, por ehèmpèl, a yega di tin tempunan difisil tokante asuntunan ku awe ta parse asina insignifikante?

Na lugá di laga e konflikto sigui bai pa largu tempu, ora bo ta papia ku e otro persona, un kasá, un yu, un amigu, un kolega, lo bo ke definí klaramente e problema òf tema di diskushon i keda riba e tópiko inmediato. Konflikto hopi biaha ta deteriora ora e asuntu ku a kuminsá e konflikto bai pèrdí den palabranan rabiá; mientrastantu, asuntunan di pasado òf heridanan di pasado ta ser tirá den e meskla (esaki por ta mortal, spesialmente pa un matrimonio). Un manera pa por tin un komienso mihó i mas suave pa e diskushon ta pa afirmá bo relashon. Laga e otro persona sa ku bo ta preokupá profundamente p'e i tokante boso relashon. Unabes bo a deklará bo sintimentunan positivo, bo por sigui pa e tema en kuestion; sinembargo, sea kuidadoso pa no usa e palabra pero. Ora bo deklará un pensamentu positivo i despues bisa "pero" bo ta anulá loke bo a kaba di deklará. Unabes bo kompartí bo sintimentunan, skucha e perspektiva di e otro persona, reflehá riba loke el a bisa, i solamente e ora ei proponé un solushon ku ta mantené e mihó interes di tur hende den mente (Fil. 2:4,5).

Matrimonio, meskos ku e Sabat, ta un regalo di Dios pa humanidat ku a kuminsá for di den Eden. I, komo Atventistanan di e di Shete Dia, nos sa kiko e enemigu di alma a hasi, i ta hasi ainda, na tantu e Sabat komo e matrimonio. Asta e mihó matrimonio, tin biaha, ta bai sufri pa motibu di konflikto.

Loke ta sigui ta algun prinsipio ku por yuda parehanan pasa dor di e problemanan akí.

Lesa Efesionan 1:7. Ki prinsipio krusial ta ser hañá aki ku mester ta parti di kualke matrimonio?

Bo mester siña pordoná, spesialmente ora bo kasá no meresé esaki. Kualke hende por pordoná esun ku meresé: de echo, esei apénas ta pordon. Berdadero pordon ta pordoná esnan ku no meres’é, e manera ku Señor ta pordoná nos pa medio di Kristu. Nos mester hasi meskos. Di otro manera, nos matrimonio, si e sobrebibí (kua no ta probabel), lo parse manera purgatorio.

Lesa Romanonan 3:23. Ki prinsipio krusial ta ser hañá aki tambe?

Bo mester aseptá ku bo ta kasá ku un pekador, ku un ser ku a ser dañá te na sierto grado emoshonalmente, físikamente, i spiritualmente. Kustumbrá kuné. Aseptá e fayonan di bo kasá. Pasa dor di nan pa medio di orashon. Kisas lo bo tin ku biba ku e fayonan ei, pero bo no tin ku ta opseshoná ku nan. Si bo hasi esei, nan lo kome bo bibu. Un Dios santu i perfekto, pa medio di Kristu, ta aseptá nos manera nos ta: abo, ku apénas ta santu i perfekto, mester hasi e mesun kos ku bo kasá.

Ken no a yega di eksperensiá rabia na un òf otro momentu? Loke ta hasié mas difísil ta ora e rabia ei ta dirigí riba un miembro di famia. Huntu ku nenga di pordoná, rabia por kombertí su mes den un venenu ku lo kousa gran doló i sufrimentu den e hogar i famia i relashonnan en general.

Lesa Efesionan 4:26, 27 i Eklesiastés 7:9. Kon nos por balansá nos komprondementu di rabia komo un emoshon, i rabia komo un piká? Kiko ta e diferensia?

Kiko Santiago ta bisa den Santigo 1:19, 20 ku nos mester apliká tur ora ku nos por, pero spesialmente ora nos ta trata ku miembronan di familia kende nan akshon- i aktitut- i palabranan ta pone nos rabia?

Si bo ta rabiá pa algu, na lugá di lagu'é zueif manera un nubia skur riba bo bida, kambi'é den algu positivo. Hasi orashon pa esnan ku ta hasi bo doló i ta abusá di bo, pordoná nan i bira un bendishon pa nan. Probablemente lo e no ta fásil na prinsipio, pero ora bo tuma e desishon i tene bo mes na dje, Dios lo enkargá Su mes di sobrá.

Tin biaha e rais di rabia ta bini for di e hogarnan ku nos a krese aden. Hendenan rabiá hopi biaha ta bini for di famianan rabiá pasobra nan ta siña for di nan modelonan i ta sigui ku e mesun komportashon den nan propio bida, i finalmente ta pasa esaki na nan yunan. Tin biaha rabia por ta e resultado di nesesidatnan ku no a ser suplí òf di yalursheit, manera tabata e kaso di Kain, kua a hiba na e asesinato di su ruman hòmber. Bo por tin un bon motibu pa ta rabiá, pero no us’é komo un èksküs pa keda asina. No ignor'é òf purba hustifik'é. En kambio, pidi Dios pa yuda bo atendé kuné den un forma positivo. Apòstel Pablo ta duna nos bon konseho: "No laga malu vense bo, ma vense malu ku bon" (Rom. 12:21, CEV).

Tin biaha konflikto i rabia ku no a ser resolvé por desaroyá den un dinámika hopi negativo i destruktivo, asta un relashon abusivo. Abusu por tuma diferente forma: físiko, verbal, emoshonal, sikológiko, seksual, etcetera. Pero kualke forma di abusu ta kontrali na e prinsipio sentral di e reino di Dios: amor apnegá.

Ki siñansanan krusial tokante relashonnan ta ser hañá den 1 Juan 4:7,8 i Kolosensenan 3:19?

"Esposonan, stima boso esposanan, i no sea brutu ku nan" (Kol. 3:19, NIV). E palabra brutu den e idioma griego original ta referí na un hende ku ta rabiá ku su pareha, kousando doló kontinuo, hostilidat intenso, i ekspreshonnan di odio pa ku e otro. Pablo ta hopi kla, ku un kasá no mester ta hostil òf violento. Abusu emoshonal, seksual, i físiko no ta un komportashon aseptabel pa un esposo òf pareha Kristian. En kambio, loke ta aseptabel ta pa stima bo kasá. Tambe Pablo ta splika bon kla ku amor tin pasenshi i ta amabel i ku amor no ta envidiá, no ta broma, no ta orguyoso, no ta grosero, no ta egoista, no ta rabia lihé, no ta warda renkor, no tin plaser den maldat, ma ta regosihá ku e bèrdat. Amor semper ta protehá, semper ta konfia, semper ta spera, i semper ta perseverá. Niun di e atributonan di amor ni minimalmente ta aprobá òf aseptá abusu den kualke manera, òf forma.

Un relashon saludabel ta unu den kua tur dos pareha ta sinti nan mes protehá i seif, den kua rabia ta ser manehá na un manera saludabel, i den kua un sirbi otro ta e norma. Hopi biaha víktimanan di abusu ta sinti nan mes kulpabel, manera kos ku nan tabata responsabel di provoká nan abusador òf ku kisas di un manera òf otro nan meresé e abusu ku nan ta risibí. Abusadoman por ta basta dominante i hopi biaha nan tin e abilidat pa laga nan víktimanan sinti nan mes responsabel. E bèrdat ta ku niun hende meresé di ser abusá dor un otro, i abusadornan ta responsabel pa nan propio eskoho- i akshonnan. E bon notisia ta ku Beibel ta ofresé konsuelo, no kulpabilidat, pa e víktimanan di abusu. Den algun situashon, den kua e problema ta bira inkontrolabel, hende no mester tin miedu di buska yudansa eksterno.

“Trata otronan manera bo ke pa nan trata bo. Ta di esaki e Lei i e Profetanan ta trata" (Mat. 7:12, CEV). Pensa riba tur e formanan den bo propio eksperensia, paden i pafó di famia, den kua bo mester apliká e prinsipio akí, i, riba e liñanan aki bou, skirbi kua e momentunan ei por ta, i determiná, pa medio di fe, kon bo por hasi presisamente esei.

E eskritor di Hebreonan a konsehá: "Buska pas ku tur hende, i santidat, sin kual ningun hende lo mira Señor" (Hebr. 12:14, NKJV). Asta ora nos tuma tur e pasonan nesesario, algun hende ku a yega di lastimá nos ainda lo no skucha ni kambia. Kisas algun lo ofresé un diskulpa, pero otronan lo no hasié. Di tur manera, ta na nos benefisio, spesialmente ora ta un miembro di famia, ku nos ta tuma e biahe di pordon ku nos a papia di dje anteriormente.

De echo, pordon ta un parti esensial di resolushon di konflikto, spesialmente den famia. Ora ku un persona peka kontra nos, e enemigu di Dios ta gusta pone un muraya entre nos i e persona ei, un barikada ku ta prevení nos di stima e persona ei manera Kristu a stima nos. Pordon ta un eskoho ku nos ta hasi pa evitá e barikada ei.

"Nos no ta ser pordoná pasobra nos ta pordoná, sino manera nos ta pordoná. E fundeshi di tur pordon ta ser hañá den e amor inmeresí di Dios, pero pa medio di nos aktitut pa ku otronan nos ta mustra si nos a hasi e amor ei algu di nos. Pa e motibu ei Kristu ta bisa: ‘Ku e huisio ku boso ta husga, boso lo ser husgá; i ku e midí ku boso midi, lo ser midí pa boso bèk’. Mat. 7:2”. - Ellen G. White, Christ's Object Lessons, p. 251.

Na mes momentu, ora nos ta esnan kulpabel, nos mester purba restourá e relashon kibrá ku un otro persona, kua por enbolbí pa bai serka e otro persona i bis'é ku ta duel bo loke bo a hasi, i pidi pa su pordon. Esei ta loke Hesus a bisa: "Asina, si bo ta na punto di pone bo òfrenda dilanti di altar, i bo kòrda ku un hende ta rabiá ku bo, laga bo òfrenda ayanan dilanti di altar. Hasi pas ku e persona ei, despues bin bèk i presentá bo ofrenda na Dios" (Mat. 5:23,24, CEV). Ta bunita ora ku un hende ku a lastimá nos diskulpá su mes i pidi pordon. Di mes manera, ta bunita ora nos duna otronan e mesun tipo di atenshon.

"Demasiado biaha e mayoman no ta uní den e maneho di nan famia. E tata, ku ta masha tiki ku su yunan, i no konosé nan pekuliaridatnan di disposishon i temperamentu, ta duru i severo. E no ta kontrolá su beis, sino ta koregí den rabia. E mucha sa esaki, i na lugá di ser kontrolá, e kastigu ta yen'é ku rabia. E mama ta permití ofensanan pasa un bia, pa kua e lo kastigá severamente un otro biaha. E muchanan nunka sa kiko pa spera, i ta ser tentá pa mira te kon leu nan por traspasá sin ku nan haña kastigu. Asina simianan di maldat ta ser sembrá ku ta krese i duna fruta”. - Ellen G. White, The Adventist Home, p. 314, 315.

"Hogar mester ta e sentro di e afektonan di mas puru i elevá. Pas, harmonía, afekto, i felisidat mester ser fomentá di forma perseverante kada dia, te ora e kosnan presioso akí ta biba den kurason di esnan ku ta forma e famia. E mata di amor mester ser nutrí kuidadosamente, sino e lo muri. Tur bon prinsipio mester ser kultivá si nos ke pa e floresé den e alma. E loke Satanas ta planta den e kurason, envidia, yalursheit, sospecho maligno, papiamentu malu, sin pasenshi, prehuisio, egoismo, kudishi, i banidat, mester ser eradiká. Si e kosnan malu aki ser permití pa permanesé den e alma, nan lo duna fruta pa kua hopi hende lo ser kontaminá. O, kuantu hende ta kultivá e matanan venenoso ku ta mata e frutanan presioso di amor i ta kontaminá e alma!" - p. 195, 196.