Famianan di Fe

Segun ku e evangelio ta sirkulá rònt mundu, Kristiannan ta enkontrá diferente kultura- i práktikanan, hopi di kua ta pertenesé na relashonnan familiar i sosial. Un di e gran preguntanan pa mishoneronan Kristian ta tokante kon nan mester relashoná ku vários normanan kultural tokante hopi kos, inkluyendo relashonnan familiar ku kisas personalmente nan lo haña inkonfortabel.

Lesa Echonan 10:1-28, 34, 35. Kiko nos por siña aki tokante nos nesesidat di vense nos propio barera- i prehuisionan ora nos ta trata ku otro kulturanan?

E morto di Kristu tabata pa e pikánan di kada ser humano, tur kaminda. Hopi hende simplemente no konosé e gran bèrdat akí ainda. Pa trese e notisia akí huntu ku un invitashon pa respondé ta e mishon evangelístiko di Kristiannan. Pasobra Dios no ta mustra parsialidat, Kristiannan ta yamá pa trata tur hende ku rèspèt i integridat, dunando nan un chèns pa brasa e bon notisia ku ta pa nan tambe.

Ki konklushonnan e promé mishoneronan Kristian a yega na dje respekto e presentashon di e evangelio na otro kulturanan? Ki prinsipio nos por saka for di e tèkstnan akí? Echonan 15:19, 20, 28, 29; 1 Kor. 2:2; 1 Tes. 5:21, 22.

Aunke kada kultura ta reflehá e kondishon kaí di e hendenan denter di dje, kulturanan tambe por tin kreensianan ku ta kompatibel ku Skritura, asta útil pa e kousa di e evangelio. E balor poné riba relashonnan será den famia i komunidat den hopi partinan di mundu ta un ehèmpel. Kristiannan por mantené i fortalesé e loke ta bon i ku ta den harmonia ku prinsipionan Bíbliko.

Na mes momentu, e bèrdat di Dios no mester ser komprometé. Historia di iglesia lamentablemente ta mustra ku kompromiso i adaptashon na kulturanan a produsí un mosaiko di kreensianan Kristian artifisial ku ta pretendé di ta Kristianismo outéntiko. Satanas ta bisa ku e ta e dios di e mundu akí i felismente e ta plama konfushon, pero Hesus a redimí e mundu akí, i Su Spiritu ta guia Su siguidónan den tur bèrdat (Juan 16:13).

"Pasobra Mi konos’é, ku e lo ordená su yunan i e hendenan di su kas despues di dje, i nan lo warda e kaminda di Señor, pa hasi hustisia i huisio; pa Señor por trese riba Abraham e loke E a papia tokante di dje" (Gen. 18:19).

Aunke kisas nan por bini den vários forma, famianan ta e komponentenan básiko di sosiedat; por lo tantu, hopi rasgo kultural distinto di vários sosiedat ta direktamente vinkulá na famia. Por ehèmpel, den un kultura antiguo tabata ser konsiderá responsabilidat di un hòmber pa kome e kadaver di su mayornan ku a fayesé; den un otro, un hòmber ku tabata ke un kasá mester a trese pa e tata di e mucha muhé un donashon di kabes di krem di un tribu rival. Asta den tempunan moderno, ideanan relashoná ku muchanan, freimentu, divorsio, matrimonio, mayornan etcetera ta varia ampliamente. Ora nos ta plama nos mensahe na e diferente kulturanan akí, nos mester siña kon pa relashoná ku nan den forma ku, miéntras nos no ta komprometé nos kreensianan, nos no ta kousa problemanan innesesario. Na mes momentu, i mas serka di kas, nos mester ta hopi konsiente di ki influensianan kultural ta impaktá nos famianan.

Den ki forma kultura a impaktá bida familiar den e siguiente ehèmpelnan? Ki prinsipionan nos por siña di e ehèmpelnan akí?

Gen. 16:1-3
Gen. 35:1-4
Esdras 10
1 Reinan 11:1

Ningun di nos ta biba den un bashí; nos tur i nos famianan ta ser impaktá pa e kultura den kua nos ta biba. Nos responsabilidat komo Kristiannan ta pa eksistí denter di nos kultura na e mihó manera ku nos por, manteniendo e loke ta den harmonia ku nos fe, miéntras nos ta evitá mas tantu posibel, e loke ta den konflikto kuné.

Kambio ta un suseso inevitabel i alarmante den famianan, no importá den kua kultura nan ta biba. Algun kambio ta relashoná ku pasashi antisipá a traves di e siklo di bida. Hopi biaha kambio ta imprevisto, manera morto, desaster, guera, malesa, mudansa familiar, òf frakaso profeshonal. Hopi famia ta afrontá kambionan ekonómiko i sosial den nan komunidat- i paisnan. Otro kambionan ta direktamente relashoná ku e kultura.

Aki bou tin algun ehèmpel di kambionan grandi, asta troumátiko ku hende a afrontá. Usando bo imaginashon, pone bo mes den nan posishon. Kon e kambionan akí ta impaktá nan bida familiar? Ki mekanismo lo bo tabatin pa yuda bo sobrebibí? Den ki forma kisas lo bo a reakshoná di forma diferente?

Abraham, Sara, i Lot (Gen. 12:1-5)
Hadasa (Esther 2:7-9)
Daniel, Ananias, Misael i Azarias (Daniel 1)

Huntu ku kambio ta bini e eksperensia di pèrdida i e ansiedat di inseguridat pa ku e futuro inmediato di un persona. Dependiendo di e abilidat di un famia pa adaptá na kambio, e eksperensianan akí por stimulá hende pa yega na nivelnan nobo di kresementu i apresio pa kosnan spiritual, òf nan por hiba na strès i ansiedat. Satanas ta eksplotá e disturbio ku kambionan ta trese kuné, sperando di introdusí duda i deskonfiansa den Dios. E promesa di e Palabra di Dios, e rekursonan di famia i amigunan, i e siguransa ku nan tabata den e man di Dios, a yuda hopi héroe i heroina di fe pa dil ku éksito ku un kambio krusial den bida.

Ki krísis di fe a surgi den Israel despues ku Hosue i su kontemporáneonan a muri? Huesnan 2:7-13.

Estudionan di kon balornan i kreensianan den organisashonnan manera iglesianan ta ser transmití na generashonnan posterior ta mustra ku e fundadónan tin nivelnan hopi haltu di kompromiso na e kreensianan. Nan tabata esnan ku a dominá nan promé. Denter di un òf dos generashon, hopi ta pèrdè e prinsipionan tras di e balornan for di bista. Kisas nan ta di akuerdo ku e organisashon, pero hopi bia pa kustumber. Den generashonnan posterior, kustumbernan tin e tendensia di kristalisá den tradishonnan. E pashon di e fundadónan no ta presente mas.

A ser bisá ku Dios no tin ñetu, solamente yu. Kiko bo ta pensa ku esei ta nifiká? Lesa tambe Juan 1:12, 13; 3:7; 1 Juan 5:1.

Un aserkamentu komun pa transmití balornan pa medio di generashonnan largu di Kristianismo tabata pa esnan di edat mas avansá simplemente konta e hóbennan loke nan ta kere. Sinembargo, siñando loke un hende su mayornan ta kere òf loke e iglesia ta kere no ta fe personal. Ser un Kristian ta mas ku pertenesé na un organisashon ku un historia i un dogma. Fe berdadero no ta algu genétiko, e no ta algu ku ta ser pasá na un manera natural di un generashon pa otro. Kada hende mester konosé Kristu pa su mes. Mayornan por hasi solamente te na sierto punto. Iglesia komo un totalidat, i mayornan en partikular, mester hasi tur loke nan por pa krea un ambiente ku lo laga hóbennan deseá di hasi e eskoho korekto, pero, al final, un generashon ta ser salbá òf pèrdí pa e evangelio un persona a la bes.

Den su paráfrasis Bíbliko popular The Message, Eugene Peterson ta usa "mensahe" tur kaminda ku e palabra bíbliko pa "evangelio" ta aparesé. E bon notisia tokante Hesus ta berdaderamente e mensahe ku ainda e mundu tin mester awe. Famianan Kristian ta ser yamá pa eksperensi’é huntu i pa kompartié den kualke kultura ku nan ta biba.

Kon lo bo a resumí “e mensahe” usando e siguiente tèkstnan? Mat. 28:5-7; Juan 3:16; Rom. 1:16, 17; 1 Kor. 2:2; 2 Kor. 5:18-21.

E promé notisia ku e disipelnan tabata bai tur kaminda kuné tabata di e resurekshon di Hesus. Famianan Kristian awendia ta uni ku e fila largu di mensaheronan proklamando: "El a resusitá," manera El a bisa (Mat. 28:7, NKJV). E realidat di Su resurekshon ta hasi kreibel tur otro kos ku Hesus a bisa tokante Su mes, tokante Dios i Su amor pa pekadornan, tokante pordon, i tokante e siguransa di bida eterno pa medio di fe den djE.

Pashoná tokante e evangelio. Skritura ta duna ideanan di e efekto radikal di e evangelio riba bida di e promé siguidónan di Hesus. Nan a habri nan kasnan pa estudio di Beibel; nan tabata hasi orashon i tabata kome huntu, nan tabata kompartí plaka i rekursonan, i nan tabata kuida otro. Hogarnan kompleto tabata brasa e mensahe. Nan tabata hendenan perfekto direpente? Nò. Tabatin algun konflikto i diskordia entre nan? Sí. Pero di un manera òf otro, e siguidónan akí di Kristu tabata diferente. Nan tabata rekonosé nan nesesidatnan pa Dios i pa otro. Nan tabata pone un prioridat riba unidat i harmonia na kas i na iglesia, i tabata hasi esfuerso pa kumpli ku e orashon di Hesus den Getsémani (Juan 17:20-23). Nan tabata testifiká ku firmesa na otro i na no-kreyentenan, asta poniendo nan bida na peliger pa nan kreensianan.

Asina e mester ta pa nos. Asta den e era aktual, ku resentimentu pa loke ta kosnan di Dios, hendenan ku ta entusiasmá tokante algu ainda por haña hende skucha nan. E Spiritu ta anhelá pa yena kurasonnan humano ku eksitashon tokante e evangelio. Ora e bon notisia realmente bira mesun bon den nos kurason manera e ta den e Palabra, kompartí lo ta spontáneo i imposibel pa stòp.

Ellen G. White, “In the Court of Babylon”, p. 479-490, den Prophets and Kings; “Words of Caution”, p. 324, 329; “No Respect of Persons With God”, p. 330, 331, den Gospel Workers; “Rejoicing in the Lord”, p. 115-126, den Steps to Christ.

Dios no ta hasi distinshon di persona. "E religion di Kristu ta halsa e reseptor na un nivel mas haltu di pensamentu i akshon, miéntras na mes momentu e ta presentá henter e rasa humano komo igual komo opheto di e amor di Dios, ku a ser kumprá pa medio di e sakrifisio di Su Yu. Na e pia di Hesus, e riku i e pober, esun studiá i esun ignorante, ta topa otro, sin ningun pensamentu di klase òf superioridat mundano. Tur distinshon terenal ta ser lubidá ora nos wak na E Kende nos pikánan a klaba. E apnegashon, e superioridat, e kompashon infinito di E Kende a ser elevá haltu den shelu, ta pone orguyo humano, estima-propio, i kasta sosial na bèrgwensa. Religion puru i sin mancha ta manifestá su prinsipionan selestial ora e uni tur ku ser santifiká pa medio di e bèrdat. Tur ta topa komo almanan kumprá ku sanger, mes dependiente di Esun ku a redimí nan pa Dios". - Ellen G. White, Gospel Workers, p. 330.