Kiko Nan a Mira den Bo Kas?

Lesa e relato di e kurashon di Ezekias i e bishita di e embahadornan di Babilonia. 2 Kron. 32:25,31; Isa. 38:39.

Skritura ta destaká ku e mensaheronan tabata interesá den e rekuperashon milagroso di rei Ezekias. Sinembargo, Ezekias parse a keda ketu tokante di su eksperensia di kurashon. E no a enfatisá e kosnan ku lo a habri kurason di e embahadornan kurioso akí na e konosementu di e Dios berdadero. E kontraste entre su gratitut pa a ser kurá den kapítulo 38 i su silensio tokante esaki den kapítulo 39 ta alarmante.

"Dios a lag’é, pa pon’é na prueba." E bishita di estado akí tabata un okashon hopi signifikante; sinembargo, no tin niun registro ku Ezekias a buska guiansa spesial den orashon tokante esaki di profetanan òf di saserdotenan. Dios tampoko no a intervení. Su so, for di bista públiko, sin konsulta ku konseheronan spiritual, Ezekias aparentemente a laga e obra di Dios den su bida i den bida di su nashon bai for di su mente. E intenshon di e historiadó den 2 Krónikanan 32:31 por tabata pa mustra kon fásilmente e bendishon di Dios por ser pasá por alto i kon suseptibel e reseptornan di Su miserikòrdia ta pa bira outosufisiente.

Akibou tin algun lès tokante fieldat den bida familiar ku por ser saká for di e eksperensia di Ezekias. Ki otronan bo por pensa riba dje?

Kada bishita na e hogar di Kristiannan ta un oportunidat pa hende topa ku siguidónan di Kristu. Poko bishitante probablemente ta habri kombersashon tokante kosnan spiritual. Kristiannan mester haña formanan ku ta sensitivo i apropiá pa e okashon pa kompartí e bon nobo.

Kristiannan no ta yamá pa broma ku nan prosperidat material òf logronan, aunke nan por rekonosé esakinan komo bendishonnan di Dios. Nan ta yamá pa "proklamá e alabansanan di Esun ku a yama boso for di skuridat den Su lus maravioso" (1 Pe. 2:9, NIV) òf, pa usa e eksperensia di Ezekias komo un símbolo, pa deklará ku nan tabata muriendo, pero Kristu a sana nan; nan tabata morto den piká, i Kristu a resusitá nan i a pone nan sinta den lugánan selestial (Efe. 2:4-6).

E promé reseptornan di mas natural di nos esfuersonan pa kompartí e evangelio ta e hendenan den nos hogarnan. No tin un kampo mishonero mas importante ku esaki.

Ki konklushonnan por ser saká for di Juan 1:40-42 tokante kompartí fe na kas? Wak Deut. 6:6,7 i Ruth 1:14-18 tambe.

Un informe animá. Andres a bai mas ayá di simplemente reportá; e a regla pa su ruman hòmber, Simon, topa ku Hesus. Un informe animá tokante Hesus i un introdukshon na djE komo un persona—ki un fórmula simpel pa kompartí e evangelio ku famianan den nos hogar! Despues di e introdukshon Andres a hala atras. For di e ora ei, Hesus i Pedro tabatin un relashon di nan mes.

Yuda muchanan pa nan tin un lugá di fe. Muchanan den un hogar hopi biaha por ser neglishá komo reseptornan di e esfuersonan pa kompartí e evangelio. Mayornan eróneamente ta asumí ku muchanan lo simplemente apsorbé spiritualidat familiar. Esaki no mester ser pasá por alto. Miéntras mucha- i hóbennan ta siña for di e modelonan ku nan ta opservá, ta bèrdat tambe ku e miembronan mas yòn akí di e famia di Señor tin mester di atenshon individual i oportunidat pa ser introdusí personalmente na djE. Deuteronomio 6 ta persistente riba e punto aki: Atenshon mester ser duná na e tipo di mas efektivo di edukashon religioso. Kustumbernan spiritual regular di adorashon personal i familiar mester ser enkurashá den e hogar. Tempu i esfuersonan sinsero mester ser dediká na bienestar di e mucha- i hóbennan.

Kiko nos por siña di e esfuersonan evangelístiko di Noemí? Ruth 1:8-22.

Ruth a mira Noemí na e momentu di mas difísil: ora e a purba pusha su kuñá fo’i dje i ora, rabiá i deprimí, e a ataká Dios ora e a kòrda riba su pèrdidanan (Ruth 1:15, 20, 21). No por ser duná un testimonio mas elokuente ku esun di Ruth pa mustra ku hóbennan por konosé i hasi un kompromiso ku un Dios perfekto, asta ora nan ser introdusí na djE dor di un mayor imperfekto.

Ki konseho Tèstamènt Nobo tin pa matrimonionan dividí pa religion? 1 Kor. 7:12-15; 1 Pe. 3:1,2.

E bendishon di ta un pareha Kristian. Den 1 Korintionan Pablo ta respondé riba e preokupashonnan di konversonan riba si keda kasá ku un persona inkrédulo kisas por ta ofensivo na Dios òf trese kontaminashon riba nan mes i nan yunan. No ta asina, Pablo ta bisa. E estado sagrado di matrimonio i su intimidatnan mester sigui despues di kombershon di e pareha. E presensia di un kasá Kristian "ta santifiká" e otro pareha i e yunan di e pareha. E palabra "santifiká" mester ser komprondé den sentido ku kasánan inkrédulo ta bini den kontakto ku e bendishonnan di grasia dor ku nan biba ku nan kasá Kristian.

Pa doloroso ku e por ta, e kasá inkrédulo por disidí di bandoná e matrimonio. Aunke e konsekuensianan lo ta serio, e palabra miserikòrdioso di nos Dios—Kende semper ta defendé e libertat humano di skohe—ta "lag’é hasi esei". E kreyente "no ta mará den sirkunstansianan asina " (1 Kor. 7:15, NIV).

Yamá pa biba den pas. E preferensia kla di e Palabra di Dios ta ku apesar di e desafionan di un hogar spiritualmente dividí, kisas un kaminda por ser hañá pa e pas di Kristu reina einan. E speransa ta pa mantené e matrimonio intakto, pa duna evidensia di e triunfo di e evangelio meimei di difikultat, i pa promové e konsuelo ku e pareha ku ken e kreyente ta un karni, aunke e no ta un kreyente.

Kiko kisas por ta e limitashonnan di e responsabilidat di un kasá pa ku e pareha ku no ta kreyente?

Bondat, fieldat ku no ta kibra, servisio humilde, i testimonio fasinante di parti di e kreyente ta krea e posibilidat di mas grandi di gana e kasá ku no ta Kristian. Sumishon den un matrimonio Kristian ta surgi di reverensia na Kristu (kompará Efe. 5:21). Ora un kasá ta relashoná ku sumishon Kristian na un pareha ku no ta kreyente, e promé lealtat semper ta na Kristu. Fieldat na e mandatonan di Dios riba bida di un persona no ta rekerí pa un kasá sufri abusu na man di un pareha violento.

Den e siguiente versíkulonan, analisá e palabranan ku Tèstamènt Nobo ta usa pa “sigui” (KJV) òf "imitá" (NIV). Kiko nan ta bisa nos tokante e proseso di bira i krese komo un Kristian? Kiko bo ta pensa ku nan ta sugerí tokante e relashon entre ser un ehèmpel i testifiká? 1 Kor. 4:16: Efe 5:1; 1 Tes. 1:6; Hebr. 6:12; Hebr. 13:7; 3 Juan 11.

E énfasis di Tèstamènt Nobo riba imitashon ta rekonosé e ròl importante di ser un ehèmpel tin den e proseso di siñansa. Hende tin e tendensia di bira manera esun òf e kos ku nan ta kontemplá. E prinsipio akí ta apliká na relashonnan generalmente i spesialmente den e hogar, kaminda imitashon ta komun. Einan muchanan ta imitá nan mayornan i nan rumannan; parehanan kasá hopi biaha ta imitá otro. E konsepto akí ta proveé un klave importante di kon parehanan i famianan por duna testimonio Kristian na otro pareha- i famianan.

E poder di influensia sosial. Nos ta testifiká for di nos hogarnan ora nos ta proveé oportunidatnan pa otronan opservá nos i kompartí den nos eksperensia di hogar den sierto forma. Hopi hende simplemente no tin un bon ehèmpel di matrimonio òf di relashonnan familiar pa sigui. Den nos hogarnan nan por mira kon e spiritu di Hesus ta hasi un diferensia. “Influensia sosial”, Ellen G. White a skirbi, “ta un poder maravioso. Nos por us’é, si nos ke, komo un medio pa yuda esnan rondó di nos’. - The Ministry of Healing, p. 354.

Komo parehanan kasá, invitá otro parehanan pa kome, kompañerismo, òf estudio di Beibel, òf ora nan asistí na un programa di kresementu matrimonial huntu, e bishitantenan ta mira un modelo. E demostrashon di resiprosidat, afirmashon, komunikashon, resolvementu di konflikto, i akomodashon di diferensianan ta testifiká di bida familiar den Kristu.

Den e konteksto akí, sinembargo, di kiko nos mester ta kuidadoso semper? Jer. 17:9, Juan 2:23, Rom. 3:23.

Sigui kreyentenan ku ta sigui Kristu. Tur ehèmpel humano ta imperfekto; sinembargo, e testimonio di e hogar Kristian no ta trata di un modelo di perfekshon apsoluto. E noshon di imitashon di Tèstamènt Nobo ta un yamada pa hende sigui kreyentenan ku ta sigui Kristu. E idea ta pa hende gara fe Kristian ora nan ta mir'é demostrá den e bida di otronan ku ta mes humano i falibel ku nan.

Kompará referensianan bíbliko riba hospitalidat ku insidentenan aktual den e hogarnan di vários famianan di Beibel skirbí akibou. Isa. 58:6,7,10-12; Rom. 12:13; 1 Pe. 4:9. Nota e atributonan di hospitalidat ku ta ser demostrá.

Abraham i Sara (Gen. 18:1-8)

Rebeka i su famia (Gen. 24:15-20; 31-33)

Zakeo (Luke 19:1-9)

Hospitalidat ta satisfasé nesesidatnan básiko di un otro persona pa sosiegu, kuminda i kompañerismo. E ta un ekspreshon tangibel di amor apnegá. Hesus a atribuí nifikashon teológiko na hospitalidat ora E a siña ku alimentá esnan ku hamber i duna di bebe na esnan ku tin set tabata aktonan di servisio hasí na djE (Mat. 25:34-40). Usa un hende su kas pa ministerio por varia di simplemente invitá bisiñanan bin kome te na e hospitalidat radikal di fia un víktima di abusu un kamber. E por envolví simpel amabilidat, un oportunidat pa ofresé orashon ku un hende, òf duna estudionan bíbliko. Berdadero hospitalidat ta sali for di kurason di esnan ku a ser toká pa e amor di Dios i ke ekspresá nan amor den palabra i akshon.

Famianan tin biaha ta keha ku nan falta e fasilidatnan, e tempu, i/òf e energia pa ofresé hospitalidat. Otronan ta sinti nan mes inkómodo, sin formashon, i insigur tokante bai mas ayá di loke ta konosí pa asina asosiá ku inkrédulonan. Algun ta deseá di evitá e komplikashonnan na nan bida ku por surgi ora nan envolví nan mes ku otronan. Hopi famianan kontemporáneo ta konfundí hospitalidat ku plaser.

Ellen G. White, “A Powerful Christian Witness”, p. 35-39; “Attitude Toward an Unbelieving Companion”, p. 348-352, den The Adventist Home; “Ministry of the Home”, p. 349-355, den The Ministry of Healing; “The Ambassadors From Babylon”, p. 340-348, den Prophets and Kings.

E poder di e hogar den evangelismo. "Muchu mas poderoso ku kualke sermon ku por ser prediká ta e influensia di un berdadero hogar riba kurasonnan i bida humano. ... “Nos esfera di influensia por parse smal, nos abilidat chikitu, nos oportunidatnan tiki, nos atkisishonnan limitá; sinembargo, nos tin posibilidatnan maravioso pa medio di un uso fiel di e oportunidatnan di nos propio hogar”. – Ellen G. White, The Ministry of Healing, p. 352, 355.