Kambiando Kurasonnan den Tempu di Fin

Kompará e predikshon di e binida di Elias ku referensianan den Testament Nobo na e evento aki. Mal. 4:5,6; Mat. 11:14,15; Mat. 17:10; Marko 6:15; Lukas 1:17.

Den e dianan di Malakias, e apelashon di Dios na e nashon, "Bolbe serka Mi, i lo Mi bolbe serka boso," a topa ku e kontesta arogante: "Den ki forma nos mester bolbe?" (Mal. 3:7, NKJV). E profeta frustrá a anunsiá ku un oportunidat mas lo ser duná pa reavivamentu. Rekordando e reforma di kambiamentu di kurason ku Elias a kuminsá (1 Reinan 18:37), Malakias a predesí su binimentu bèk pa "kambia kurason di e tatanan pa nan yunan, i kurason di e yunan pa nan tatanan" (Mal. 4:6, NKJV).

Un tradishon Hudiu a surgi ku Elias lo a aparesé personalmente komo e mensahero di e Mesias (kompará Mat. 17:10; Marko 6:15). Sinembargo, Tèstamènt Nobo ta presentá Juan Bautista komo un kumplimentu di e profesia (Mat. 11:14,15; Lukas 1:17).

Kiko bo ta kere ku e frase "kambia kurasonnan" ta nifiká?

Vários aplikashon ta posibel pa e versikulonan akí: E ta referí na e rekonsiliashon di e pueblo di Israel ku Señor. Dios komo Tata (Isa. 63:16) a bira for di Su rabia den direkshon di Su yunan (Mik. 7:18,19) i ta yama nan pa bira bèk na djE (Isa. 44:22, Mal. 3:7). E ta referí na e rekonekshon di generashonnan mas despues ku nan antepasadonan fiel a traves di renobashon di pakto. E yamada profétiko pa e pueblo di Dios pa sigui e fe di e patriarkanan a ser duná repetidamente den Tèstamènt Bieu. Si e pais tabata bai sigui komo un lugá di biba bendishoná tabata direktamente relashoná ku e fieldat na e pakto (Deut. 4:29-31). E ta referí na e restorashon i renobashon di relashonnan familiar. Relashonnan entre mayor i yu ta un ekspreshon práktiko di fieldat di pakto ku Dios. Aki tambe, kumplimentu di responsabilidatnan na mayor- i yunan ta konektá djaserka ku herensia kontinuo di e tera i e bendishon di Dios (Prov. 2:21).

E introdukshon di adorashon di Baal den Israel dor di Jezabel, e esposa sidonio di rei Akab, a apurá e kaida moral di e nashon. E siñansanan di Dios ku tabata halsa matrimonio, famia, i seksualidat a ser tapá pa práktikanan manera insosto, prostitushon, i otro pervershonnan seksual. Den e arena aki di konflikto riba adorashon a drenta Elias, kende su nòmber mes, “Jehovah ta mi Dios", a reprendé Baal.

Ki eksperensia di Elias a asosi'é ku anulashon di kreensianan pagano i dunamentu di bida nobo na famianan? 1 Reinan 16:29-17:21; kompará Lukas 4:25, 26.

Elias tabata un hòmber marká despues di a anunsiá e maldishon di sekura riba e tera. Dios a proteh'é den un lugá improbabel—na kas di un biuda pober ku tabata biba na Sarepta di Sidon, serka di e pais siudat natal di Jezabel. Elias a saludá e biuda ku un prueba duru, pa usa su último pida palunan, zeta, i ariña pa aliment' é i pa konfia Dios pa su futuro. Su fe a bira legendario. Hesus Mes lo a enkomend’é despues (Lukas 4:26). Ora su zeta i kuminda a ekstendé pa hopi dianan, e muhé a bin komprondé mas tokante Yehova. Despues, trágikamente, su úniko yu hòmber a bira malu i a muri. Ora el a ekspresá su tristesa na Elias, el a reflehá e religion konosí rondó di dje, e kreensianan pervertí ku awor tabata inundá Israel, den kua un hende su piká por a rekerí sakrifisi o di mucha (1 Reinan 17:18; kompará Jer. 19:5; Mikeas 6:7).

Ki efekto e reunion ku su yu hòmber tabatin riba e eksperensha spiritual di e biuda Fenisia? 1 Reinan 17:24. Kiko nos por siña for di su komentarionan?

E kontesta di e mama ta revelá e efekto di e mensahe di Elias. Fe den Dios i Su Palabra ta surgi den e kurason ora, pa medio di Su poder, bida ta ser restorá i e famia ta ser reuní. Hopi hende awendia por aprobá ora doktrinanan ta ser prediká, pero ta lou den nan eksperensia spiritual. Sinembargo, ora e bèrdatnan di e Palabra di Dios ser eksperensiá personalmente i reavivamentu i restorashon tuma lugá den relashonnan familiar, konvikshon ta yega muchu mas poderoso riba e kurason.

Lesa 1 Reinan 18:20-45. Skirbi riba e liñanan akibou di kiko henter e episodio aki ta trata en realidat. Ounke e konteksto ta totalmente diferente, kon e prinsipionan mirá den e storia akí por apliká na bida familiar?

Riba Seru Karmelo, Elias a anhelá pa renobashon di pakto di parti di su nashon, un regreso na e fe di nan tatanan ku lo a trese sanashon na nan bida, nan hogarnan i nan tera.

E ora di e sakrifisio di anochi. Despues di e frakaso di e saserdotenan pagano ku nan sakrifisio, Elias a tuma su turno. E tabata deliberá. E ora di dia a hala atenshon na e plan di redenshon di Dios revelá den e sirbishi di santuario (kompará Eks. 29:41). E invitashon "Hala serka mi" (1 Reinan 18:30, NKJV) ta kòrda nos riba e Salbador ku ta duna pekadornan bonbiní (kompará Mat. 11:28). Mayornan ku ta lamentá pa e desvio di nan yu por ta sigur ku Dios ta stim'é mes tantu ku E tabata stima e Israelitanan. Dios ta traha insesantemente pa hala esnan ku desviá na djE.

E enfoke di Elias riba e altar di Yehova ta haña su ekivalente den nos tempu ora Hesus i Su grasia salbador ser elevá den famianan. Adorashon familiar ta un oportunidat pa papia kunÉ den orashon, pa papia di djE ku otro, pa bolbe risibí Su don gratuito di salbashon, i pa duna nos kurason tempu pa reflekshoná riba Su siñansanan.

E kontesta ku Elias a pidi lo a indiká ku Dios a tuma nan bèk serka djE. Promé Reinan 18:37 ta bisa pa "e pueblo akí por sa ... ta Abo a bira nan kurason bèk na Bo atrobe" (NKJV). Nos no por bira nos kurason na Dios; solamente nos por respondé na Su grasia, i esei E ta duna gratuitamente.

E kandela ku tabata konsumí tur kos a kai, no riba esnan kulpabel sino riba e sakrifisio, mustrando padilanti na Hesus, Kende a ser hasí "piká pa nos, pa nos por bira e hustisia di Dios den djE" (2 Kor. 5:21, NKJV). Konfeshon i alabansa a brota for di lepnan di e pueblo. Pasobra nan no a respondé na e yamada di Dios, e saserdotenan falsu a ser ehekutá. E áwaserunan refreskante a kaba ku e maldishon riba e tera.

Huntu ku e predikshon di Gabriel (Lukas 1:17) i e konfirmashon di Hesus di djE komo e Elias predesí (Mat. 11:14; Mat. 17:12,13), e eskritornan di Evangelio ta afirmá ku Juan Boutista tabata e "mensahero” ku lo a prepara e kaminda di Señor (Mat. 11:10; Marko 1:2; Lukas 7:27; kompará Mal. 3:1).

Nota e aspektonan prinsipal di e mensahe di Juan. Den ki forma su mensahe tabata unu di "restourashon di kurason"? Mat. 3:2,8: Mat. 14:4; Lukas 3:3, 8, 9, 11, 13, 14.

Meskos ku un kunukero ku ta plug tera duru pa prepar'é pa risibí simia, Juan a denusia piká i a urgi pekadornan pa repentí. Naturalesa humano ta di tal forma ku, sin saminashon propio, sin un konsiensia di un hende su bèrdadero kondishon, ningun nesesidat ta ser sintí pa algu mihó. Su mensahe a bira hende bèk den direkshon di e santidat di e rekerimentunan di Dios i nan nesesidat di Su hustisia perfekto. Arepentimentu genuino semper ta ser marká pa humildat i wak na Dios pa yudansa pa kambia e komportashon. Dor di eksponé e hipokresía superfisial i egoísta di esnan ku ta proklamá Abraham komo nan tata, el a trata na habri un nifikashon mas profundo di e fe di nan tatanan.

Kon e mensahe di Juan Boutista a prepará e kaminda pa Hesus? Juan 1:35-37, 3: 27-30.

Juan a ser mustrá ku Hesus tabata e Lamchi di Dios. Ora el a intrudusí Hesus di e manera aki (Juan 1:29, 36), literalmente el a bira hende na Señor. Andres i un otro di e disipelnan di Juan, Juan, e eskritor di evangelio ku a skirbi e relato di e dia ei, a bandoná e Boutista i a bira disipel di Hesus. No solamente e mensahe di Elias ta mustra na e nesesidat pa arepentimentu; e ta identifiká Esun ku ta salba for di piká, generá entusiasmo p’E, i ta introdusí hende na djE.

Den un sentido, nos komo Atventistanan ta mira nos mes den e ròl di Juan Boutista. E mensahero di reforma i arepentimentu a trata na prepará e kaminda pa e promé binida di Hesus; nos, komo un movementu, ta mira nos hasiendo meskos pa e Segundo Binida.

Lesa ku orashon Lukas 1:17. Kon e palabranan akí ta kapta nos mensahe?

Nos Tata selestial a bira e kurason di Su yunan na djE bèk i a bira e kurason di Su yunan na otro pa medio di e Krus di Kristu. E mensahe di Elias ta roga famianan pa kere e bon i inkrehibel notisia akí (2 Kor. 5:18-21; kompará Efe. 2:11-18) i pa ta hendenan yená ku grasia mientras Su Spiritu ta produsí un kosecha di amor den nan.

E mundu desesperadamente tin mester di un demostrashon di kuido apnegá, kompromiso duradero, i devoshon inkebrantabel na Dios. Pa e grasia di Dios, famianan Kristian por proveé un demostrashon asina. Sinembargo, nos mester kòrda ku e mensahe ku nos tin pa e mundu ta pa nos mes tambe. Te ora e prinsipionan di evangelio, di unidat, di amor, di apnegashon ser manifestá entre nos, spesialmente den nos propio famianan, nos lo ta sin poder pa kompartí e mensahe akí ku otronan. Tur e sermonnan elokuente, tur e presentashonnan lógiko i bíbliko no ta sufisiente: E mundu mester mira manifestá den nos bida, spesialmente den nos bida familiar, e arepentimentu, e kurasonnan restourá, e amor, i e kompromiso ku nos ta prediká di dje. Meskos ku Juan Boutista tabatin un poder ku tabata kambia bidanan i a hasi su predikamentu efektivo, nos por hasi meskos pa medio di e grasia di Dios, pero solamente te na e grado ku nos ta dispuesto na koperá.

Nos ta, a traves di Hesus, parti di e famia den shelu (Efe. 3:15). Asina, sea nos ta un famia di un òf mas, nos ta ser yamá pa ta testigunan pa e Dios ku nos ta profesá di ta sirbi, i nada por hasi nos testimonio mas efektivo ku mustra e mundu kon un famia, no importá su grandura, por ta pa medio di e poder di e evangelio.

Ellen G. White, “Carmel”, p. 143-154, den Prophets and Kings; “The Voice in the Wilderness”, p. 97-108, den The Desire of Ages.

"Nos mensahe mester ta mes direkto ku esun di Juan tabata. E tabata reprendé reinan pa nan inikidat. Apesar di e peliger ku su bida tabata aden, nunka el a permití e bèrdat por deteriorá riba su lepnan. Nos trabou den e époka akí mester ser hasí ku mesun fieldat."- Ellen G. White Comments, The SDA Bible Commentary, tomo 4, p. 1184.