Dios a Krea . . .

E mundu aki i tur bida riba dje, nos propio bida i tur loke nos ta hasi kuné, e bida di tur hende rondó di nos i kon nos ta interaktuá ku otro, bida mes i kon e ta ser bibá mihó, tur esakinan ta kuminsá ku Dios, “pasobra den djE nos ta biba i move i tin nos eksistensia” (Echonan 17:28, NKJV).

Aki ta kaminda e storia di Beibel ta kuminsá: “Na prinsipio Dios a krea e shelunan i e tera” (Gen. 1:1, NKJV). I e echo ku El a papi’é den eksistensia ta mustra na un poder i un proseso ku nos no por ni kuminsá imaginá nos mes.

I tòg, Dios no a krea for di un distansia; E tabata íntimamente enbolbí, spesialmente ora a yega na krea e promé ser humano (lesa Gen. 2:7).

Lesa e storia di kreashon di e promé sernan humano den Génesis 1:26–31. Ki kosnan importante e relato aki ta konta nos tokante Dios? Ki kosnan importante e ta konta nos tokante hende?

A ser bisá hopi biaha ku nos por siña hopi tokante Dios ora nos pasa tempu den naturalesa, ora nos wak Su kreashon, i mira den dje persepshonnan di e karakter di e Kreador Mes. Pero nos por mira tambe persepshonnan di kon Dios a krea e mundu pa ta, dor di eksaminá nos komprondementu di Dios Mes. Por ehèmpel, si Dios ta un Dios di òrdu, nos mester spera di haña òrdu den Su kreashon. Òf si nos ta kere ku Dios ta un Dios di kreatividat, nos no mester keda sorprendí di topa ehèmpelnan inkreibel di e kreatividat ei den e mundu ku El a traha.

Di forma similar, nos ta kere ku Dios ta un Dios di relashonnan, i asina, nos ta haña relashonnan komo un elemento sentral den kon Dios a hinka e mundu den otro. El a krea kada elemento di e mundu den relashon ku restu di e kreashon. El a krea animalnan den harmonia relashonal. El a krea sernan humano den relashon ku E mes, ku otro, i ku restu di e kreashon.

Miéntras nos komprondementu di Dios ta limitá den hopi forma, loke nos por mira di Su karakter mester motivá nos pa rekonsiderá kon e mundu mester ta.

Ta fásil pa sinti nostalgia pa Eden. Tin algu den e deskripshonnan kòrtiku di e Hòfi ku Dios a krea komo e hogar pa Adam i Eva ku ta chispa un nota di anhelo den nos kurason. Nos lo no por komprondé kon un mundu asina lo a funshoná, pero nos ta sinti ku nos lo ke a eksperensi’é.

Ta parse ku e sensashon di satisfakshon i plenitut tabata algu tambe ku Dios a sinti: “Dios a mira tur loke ku El a traha, i e tabata hopi bon” (Gen. 1:31, NIV). Dios a traha algu ku tabata tantu bunita komo funshonal. E tabata ekskisito den su diseño, tantu den forma komo faktibilidat. E tabata vibrante ku bida i koló, pero tambe yená ku tur kos nesesario pa bida floresé. Nada straño ku Dios a keda tuma pouze pa reflekshoná ku e mundu akí ku E tabata trahando tabata bon.

Lesa Génesis 1. Kiko bo ta kere ku e deklarashonnan ripití ku “Dios a mira ku e tabata bon” ta nifiká? Lesa Gen. 1:4, 10, 12, 18, 25, i 31.

Ounke el a ser skibí kompletamente despues di e Kaida, Beibel ta yená ku selebrashonnan di e mundu natural, manera den Job 38 te 41 i Salmo 148. I nos mester kòrda ku esakinan no a ser skibí komo un persepshon ku ta wak bèk na kon e mundu tabata ora el a ser kreá pa promé biaha i promé ku piká; nan ta skibí den tempu presente, selebrando e bondat ku ainda ta evidente den nos mundu.

Hesus tambe a saka ehèmpelnan di e bondat i kuido di Dios for di e mundu natural (lesa, por ehèmpel, Mat. 6:26, 28–30), rekomendando tantu nos dependensia riba Dios i un apresio di e regalonan simpel ku ta rondoná nos ku maravia. Si nos habri nos wowonan i wak e maravianan di kreashon, nos por mira ku nos ta berdaderamente e resipientenan di regalonan maravioso for di nos Kreador. Nos kontesta, asta meimei di pruebanan, mester ta un di gratitut, gradisimentu, i sumishon humilde na e Dunadó di Regalo.

Komo Atventistanan di e di Shete Dia, esnan ku ta tantu selebrá Kreashon komo antisipá e reino benidero di Dios, nos mester realisá ku e bunitesanan, gosonan, i bondat ku nos ta mira i eksperensiá den mundu ta persepshonnan di kiko nos mundu tabata un tempu i kiko e lo ta atrobe.

Di akuerdo ku e registro di Beibel, e Hòfi di Eden i e tera ku a kaba di ser kreá tabata lugánan di abundansia, kreá pa bida floresé i partikularmente pa sernan humano disfrutá.

Pero Dios tambe a duna e promé hòmber i muhé, i restu di nos ku lo a bin despues di nan, un ròl pa hunga den Su kreashon. Rápidamente el a bira opvio, i no djis for di Su método di kreashon, ku Adam i Eva mester tabatin un status spesial den e mundu nobo akí.

Adam a ser duná promé e trabou di nombra e animalnan i paranan (lesa Gen. 2:19). Despues el a ser duná un otro ròl, presentá komo un bendishon di Dios Mes: “Dios a bendishoná nan i a bisa nan: ‘Sea fruktífero i oumentá den kantidat; yena tera i domin’é. Goberná riba e piskánan den laman i e paranan di aire i riba tur kriatura bibu ku ta move riba suela’ ” (Gen. 1:28, NIV).

Lesa i kompará Génesis 1:28 i Génesis 2:15. Kon lo bo a karakterisá e deskripshon di trabou humano den un frase òf dos?

Demasiado biaha den historia Kristian, Génesis 1:28 a ser usá dor di algun hende komo un lisensia pa eksplotá, asta te na e punto di destruí e mundu natural. Sí, e mundu opviamente a ser kreá pa bida, benefishi, i goso humano. Pero e responsabilidat humano ta pa “kultiv’é i kuid’é”, den e palabranan di Génesis 2:15.

Ora nos t papia tokante mayordomia, nos promé pensamentu hopi biaha ta tokante plaka, pero e promé mandato pa mayordomia den Beibel ta pa kuida e tera ku Dios a krea i a konfia na nos. E mandato na Adam i Eva tambe a premirá ku e tera lo a ser kompartí ku nan yunan i ku futuro generashonnan. Den e plan original pa e mundu, e mundu kreá lo a sigui ta un fuente i bida, bondat, i bunitesa pa tur sernan humano, i Adam i Eva lo tabatin un ròl grandi den kuid’é.

E tera ainda ta di Señor (lesa Salmo 24:1), i ainda nos ta ser yamá pa ta mayordomonan di tur loke Dios a duna nos. Kisas nos por a konkluí tambe ku den un mundu kaí nos responsabilidat komo mayordomonan ta ainda mas grandi.

Un kos ku Dios a duna Adam i Eva ku E no a duna nada otro riba tera tabata libertat moral. Nan tabata sernan moral den formanan ku matanan, animalnan, i palunan nunka por tabata. Dios a balorá e libertat moral akí asina tantu ku El a permití e posibilidat ku Su pueblo lo a skohe pa desobedesé. Dor di hasi esaki, El a riska tur loke El a krea pa e meta mas grandi di un relashon ku Su kriaturanan humano basá riba amor i boluntat liber.

Pero tabatin tambe un destruktor (e libertat moral akí tabata eksistí pa angelnan tambe), un ku kier a desorganisá e mundu bon i kompletu ku Dios a krea i a trata na usa e kreashon spesial di Dios riba tera, sernan humano, pa hasi esei. Papiando a traves di e kolebra, diabel a kuestioná e plenitut i sufisiensia di loke Dios a proveé (lesa Gen. 3:1–5). E promé tentashon tabata pa kudishá mas ku loke Dios a duna nan, pa duda di e bondat di Dios, i pa dependé riba nan mes.

Den e eskoho ei i e akto ei, e relashonnan ku tabata integral na e kreashon manera Dios a diseñ’é a ser kibrá. Adam i Eva no tabata gosa mas di e relashon ku nan Kreador ku nan a ser designá p’e (lesa Gen. 3:8–10). E dos sernan humano akí direpente a realisá ku nan tabata sunú i bergonsá, i nan relashon ku otro a ser alterá di forma kasi ireparabel. Nan relashon ku restu di tera tambe a ser deformá i kibrá.

Lesa Génesis 3:16–19. Kiko e versíkulonan akí ta bisa nos tokante e relashonnan kambiá entre sernan humano i e mundu natural?

Pa motibu di e realidat di piká, bida direpente a bira hopi mas difísil pa Adam, Eva, i restu di kreashon. E konsekuensianan di piká ta real, partikularmente komo nan ta afektá humanidat i nos relashonnan, Den un sentido, nos ta leu for di Dios nos Kreador. Nos famianan tambe ta ser afektá den hopi forma, i nos relashonnan ku otronan hopi biaha ta un desafio. Asta nos ta lucha den relashon ku e ambiente natural i e mundu den kua nos ta biba. Tur aspekto di nos bida i nos mundu ta mustra e kiebro kousá dor di piká.

Pero esaki no ta e manera kon Dios a krea e mundu pa ta. E “maldishonnan” di Génesis 3 ta bin tambe ku un promesa ku Dios lo a hasi un manera pa krea nos mundu di nobo i pa drecha e relashonnan ku a ser kibrá dor di piká. Miéntras nos ta sigui lucha ku piká i su efektonan den nos bida, nos ta ser yamá pa mantené e bondat original di e mundu i pa trata na biba den nos bida e plan ku Dios tin pa e mundu akí.

Ku e yegada di piká, no a dura largu pa e mundu sigui desbaratá. Provoká pa yalursheit, mal komprondementu, i rabia, e promé asesinato a enbolbí e promé par di rumannan. Ora Dios a kuestioná Cain tokante su piká, su kontesta tabata iróniko i retóriko: “Mi ta wardadó di mi ruman?” (Gen. 4:9) i e kontesta impliká pa e pregunta inisial di Dios tabata: “Sí, apsolutamente, bo ta wardadó di bo ruman.”

Lesa Proverbionan 22:2. Kiko tin impliká den e deklarashon aparentemente simpel akí? Kiko e ta bisa nos tokante nos relashon ku nos próhimonan?

Tur hende ku nos topa ta un di e kriaturanan di Dios, kreá den Su imágen, i parti di e ret di relashonnan ku ta konektá nos den e kreashon di Dios, ounke kisas e por ta frakturá i kibrá. “Nos tur ta fabriká huntu den e ret di humanidat. E maldat ku kai riba kualke parti di e gran hermandat humano ta trese peliger pa tur hende.”—Ellen G. White, The Ministry of Healing, p. 345. Sea bo ta gusta òf nò, pa motibu di e konekshon komun aki, nos tin un responsabilidat duná dor di Dios, na Dios i un na otro (lesa Mat. 22:37–39).

Den henter Beibel e afirmashon ku Dios ta nos Kreador ta bin bèk kada biaha. Por ehèmpel, e ta un di e rasonnan duná pa rekordá e Sabat (lesa Eks. 20:11) i pa adorá Dios den e tempu di fin (lesa Rev. 14:7). E ta tambe un motivashon básiko duná pa preokupá pa otronan, pa ta preokupá pa esnan ménos fortuná.

Nos tur ta konektá dor di e laso di nos orígen komun den Dios. Ken ku “oprimí esnan pober ta demostrá despresio pa nan Hasidó, ma ken ku ta amabel na esnan den nesesidat ta honra Dios” (Prov. 14:31, NIV).

Dios komo nos Kreador tin un reklamashon riba nos ku ta demandá henter nos bida, inkluyendo nos adorashon i nos sirbishi i kuido pa otronan. Pa difísil i frustrante i inkumbiniente ku kisas e por ta tin biaha, nos ta, en realidat, “wardadó di nos ruman.”