Miserikòrdia i Hustisia den Salmo- i Proverbionan

Manera nos a nota kaba, Dios ta mira i ta tende hendenan ku ta den aflikshon i problema. Mayoria biaha den Salmonan nos ta tende e gritunan ei for di hendenan ku a konfia den Dios pero no ta mira hustisia ta ser hasí. E afirmashonnan di e bondat, hustisia, i poder di Dios por parse devastador dor di e inhustisia i opreshon ku e bosnan den e kantikanan akí ta eksperensiá òf opservá.

Sinembargo, esakinan ta e kantikanan di esnan ku ainda ta kanta. Ni nan bida ni nan fe a paga. Ainda tin speransa; i e urgensia ta pa Dios aktua promé ku ta muchu lat, promé ku maldat triunfá, promé ku esnan oprimí keda destruí dor di e peso di e maldat hasí kontra nan. Di e forma akí, e eskritornan di e Salmonan ta purba uni e abismo entre e afirmashonnan di nan fe i e prueba- i tragedianan di bida.

Lesa Salmo 9:7-9, 13-20. Bo por imaginá bo mes e sirkunstansianan den kua David, e eskritor di e Salmo, tabata? Bo por sinti e tenshon entre su fe den e bondat di Dios i su eksperensia na e momentu ei? Kon bo a yega di atendé ku e lucha di fe den Dios meimei di momentu di prueba severo?

A lo largu di Salmonan, e kontesta konstante riba e tenshon akí ta e speransa i promesa di e huisio bon i hustu di Dios. Maldat i inhustisia por parse triunfante pa awor, pero Dios lo huzga e hasidónan di maldat i esnan inhustu. Nan lo ser kastigá miéntras esnan ku nan a hasi daño i a oprimí lo ser restourá i renobá.

Den Reflections on the Psalms, C. S. Lewis ta deskribí su sorpresa inisial riba e emoshon i anhelo pa e huisio di Dios manera ta ser ekspresá kada bes di nobo den Salmonan. Opservando ku hopi lesadó di Beibel awendia ta konsiderá huisio komo algu temibel, e ta konsiderá e perspektiva hudiu original i ta skirbi “míles di hende ku a ser despohá di tur loke nan ta poseé i ku tin hustisia kompletamente na nan banda, finalmente lo ser skuchá. Naturalmente nan no tin miedu di huisio. Nan sa ku nan kaso ta irefutabel, si solamente e por ser tendé. Ora Dios bin pa huzga, porfin e lo ser tendé”. – C. S. Lewis, Reflections on the Psalms (New York: Harcourt, Brace and Company, 1958), p. 11.

Den Salmonan nos ta mira speransa pa esnan oprimí, asta awor, asta meimei di nan sufrimentu- i desepshonnan aktual.

Lesa Salmo 82. Kiko ta e mensahe pa nos aki?

Apesar di e òrden i reglanan di sosiedat ku Dios a duna nan, na vários momentu den nan historia e nashon israelita a faya di kumpli ku e plan akí. Muchu fásil nan a bira meskos ku e nashonnan rondó di nan, bibando segun un patronchi di inhustisia i opreshon. Lider- i huesnan tabata preokupá solamente pa nan mes, i nan fabor por a ser kumprá ku soborno. Sin kortenan pa protehá nan, hendenan komun, i esnan pober spesialmente, tabata suheto na eksplotashon.

Salmo 82 ta un kontesta riba un situashon asina. E ta deskribí e ròl di Dios komo Hues Supremo, i e ta deskribí un esena den kua E ta huzga e lidernan i asta e huesnan di e pueblo. E salmo akí ta enfatisá ku esnan ku ta yena ròlnan asina den sosiedat “ta designá pa aktua komo huesnan bou di djE”. – Ellen G. White, Prophets and Kings, p. 198. Nan ta okupá nan posishon i ta ehekutá nan trabou komo representante- i ayudantenan di Dios. Den bista di e salmista e hustisia di Dios ta un modelo pa kon hustisia terenal mester funshoná, i e ta proveé tambe e midí kontra kua un hustisia òf inhustisia asina, i esnan ku ta kometé, lo ser huzgá.

E salmo ta konkluí ku un yamada spesífiko pa Dios aktua (Salmo 82:8), pa intervení i pa para e inhustisia ku ta prevalesé asina den e nashon. Manera hopi di e salmonan, esun aki ta duna un bos na esnan ku no tin bos i na esnan oprimí, esnan ku nan bos a ser silensiá pa e sistemanan inhustu den kua nan ta biba i traha.

Salmo 82 ta hasi un apelashon na Dios den Su posishon di Hues Supremo i Gobernante Soberano di e universo i di tur e nashon. No tin un korte òf outoridat mas haltu na kua un apelashon asina por a ser hasí. E siguridat ta bin ku ora kortenan terenal no ta tende òf duna balor na e gritunan di esnan pober i esnan oprimí, kua asina tanta biaha ta e kaso aki, ainda tin un oportunidat inegabel pa yama pa yudansa.

Na diferente momentu den nos bida kisas nos por haña nos mes komo víktimanan di inhustisia, pero na otro momentunan kisas nos por ta esun ku ta kometé òf ta benefisiá di inhustisia. Den pasashinan manera Salmo 82 nos por topa disernimentu i sabiduria, sea nos ta esun oprimí òf e opresor. Dios ta preokupá pa e huesnan inhustu tambe, deskribiendo nan komo Su yunan i ke pa nan skohe pa biba mihó (Lesa Salmo 82:6). Por lo tantu, tin speransa asta pa esnan riba e banda robes di opreshon, si nan permití nan mes pa ser kambiá.

Lesa Salmo 101. Aunke el a ser skirbí pa lidernan, ki konseho importante nos por saka for di dje pa nos mes, loke sea nos posishon den bida ta?

Salmo 101 ta un teksto pa lidernan. Ta ser pensá ku e versíkulonan akí a ser komponé pa David den e promé dianan di su reinado komo rei di Israel. Nan por a asta ser adaptá for di votonan ku el a hasi na momentu ku el a bira rei. Den su eksperensianan komo un guerero pa Saul i despues un fugitivo for di dje, el a testiguá pa su mes kon un rei ku pèrdè su kaminda por a perhudiká e nashon i su famia. David a determiná ku e tabata bai ta un tipo di lider diferente.

Poko di nos lo por ta lidernan polítiko òf nashonal, pero nos tur tin ròlnan den bida den kua nos tin e oportunidat pa influensiá i kurashá otronan. Esaki lo por ta den nos bida laboral, envolvimentu komunitario, famia, òf iglesia. Manera Ellen G. White ta komentá riba un di e senarionan akí di liderazgo, “e votonan di David, registrá den Salmo 101, mester ta e votonan di tur esnan riba ken e responsabilidatnan di kuida e influensianan di e hogar ta kai”. – Counsels to Parents, Teachers, and Students, p. 119.

Segun ku nos tin oportunidat, nos mester ta prepará pa sugerí i konfirmá e prinsipionan akí na esnan ku ta yena posishonnan di liderazgo riba nos. I nos tur, den nos liderazgo i lugánan di influensia, tin e oportunidat pa apliká e prinsipionan di liderazgo di David pa asina yuda nos pa ta un bendishon pa otronan.

E punto di salida pa David ta honra Dios pa Su miserikòrdia i hustisia (Salmo 101:1), kua a bira e fundeshi pa tur kos ku David a purba defendé pa medio di su liderazgo. El a purba siña i praktiká e mesun karakterístikanan akí den su bida i trabou. Pa hasi esaki, e mester resistí e tentashonnan pa ku hasimentu di malu, korupshon, i deshonestidat, di kua tur ta trampanan partikular pa esnan den posishonnan di poder i liderazgo.

Sabiendo kon importante bon konseheronan tabata pa yud’é hasi lo korekto, David ta komprometé pa buska asesornan konfiabel i pa apuntá ofisialnan honesto. Hustisia i miserikòrdia lo a marka su liderazgo, asta entre esnan ku a traha kuné i p’e. Kisas nos no ta den un posishon pa tin asesor- i funshonarionan, pero kon nos por yena nos bida ku influensianan ku ta yuda nos biba i guia (kaminda nos por) ku hustisia i miserikòrdia pa esnan ku tin mester di dje?

Segun ku nos ta aserká final di e buki di Salmonan, e sklamashonnna di alabansa parse ta krese bira mas i mas duru. E último sinku salmonan ta kuminsá ku e mandato simpel i direkto pa “Alabá Señor!” pero e pomé di esakinan, Salmo 146, tin un enfoke partikular riba e preokupashon di Dios pa esnan pober i esnan oprimí komo un rason prinsipal pa un alabansa asina.

Lesa Salmo 146. Kiko ta e mensahe aki pa nos? Kiko Dios ta bisando, spesialmente den Salmo 146:5-9?

Mes siguramente ku Dios ta Kreador di e mundu aki (lesa Salmo 146:6), e Salmo akí ta deskribí e trabou kontinuo di Dios den e mundu komo Hues, Proveedor, Libertador, Sanadó, Yudadó, i Defensor, tur esakinan ta enfoká riba hendenan den nesesidat spesífiko di e tiponan di yudansa akí. E ta un vishon inspiradó di loke Dios ta hasi i ta buska pa hasi den nos bida, den nos komunidatnan, i den nos mundu.

Tin biaha nos ta pensa riba kuida esnan den nesesidat komo algu ku nos mester hasi pasobra Dios a bisa asina. Pero Salmo 146 ta bisa ku esaki ta algu ku ya Dios ta hasi, i nos ta ser invitá pa uni kunE. Ora nos ta traha kontra pobresa, opreshon, i enfermedat, realmente nos ta traha ku Dios i Su propósitonan. Ki privilegio mas grandi por tin ku asosiá nos mes ku Dios pa logra algu asina insipirador manera Salmo 146?

Pero tin benefishinan tambe pa nos. Kristiannan hopi biaha ta papia tokante nan búskeda di Dios i nan deseo di tin un relashon mas djaserka kunE. Sinembargo, versíkulonan manera Salmo 146:7-9, i asina tantu otronan den henter Beibel, ta indiká na nos ku un manera pa haña Dios ta pa uni kunE den loke E ta hasi. Por lo tantu, si E ta traha pa animá esnan pober, malu, i oprimí, manera Salmo 146 ta bisa ku E ta hasi, nos mester ta trahando huntu kunE tambe. “Kristu a bin na e tera akí pa kana i traha meimei di esnan pober i esnan ku ta sufri. Nan a risibí e parti di mas grandi di Su atenshon. I awe, den persona di Su yunan, E ta bishitá esnan pober i esnan den nesesidat, suavisando miseria i aliviando sufrimentu.

“Kita sufrimentu i nesesidat, i nos lo no tin niun manera di komprondé e miserikòrdia i amor di Dios, niun forma di konosé e Tata selestial yen di kompashon i simpatia. Nunka e evangelio ta bisti un aspekto di bunitesa mas grandi ku ora e ser hibá na e regionnan di mas nesesidat i mas deprivá”. – Ellen White, Testimonies for the Church, tomo 7, p. 226.

Komo un kolekshon di dichonan di sabiduria, e buki di Proverbionan ta abordá un ekstenshon amplio di tópiko i eksperensianan di bida. Entre esakinan tin reflekshonnan riba pobresa, rikesa, kontentamentu, hustisia, i inhustisia, i tin biaha for di diferente ángulo. Bida no ta semper simpel i fásil, i Proverbionan ta spièrta nos di e diferente sirkunstansia- i eskohonan ku ta influensiá e manera kon bida ta ser bibá, asta entre esnan ku ta fiel na Dios.

Lesa i kompará Proverbionan 10:4; 13:23, 25; 14:31; 15:15, 16; 19:15, 17; i 30:7-9. Kiko e tèkstnan akí ta bisando ku ta relevante pa rikesa, pobresa, i yuda esnan den nesesidat?

Proverbionan ta enfatisá e preokupashon i atenshon ku Dios tin pa esnan pober i vulnerabel. Tin biaha hende ta pober pa motibu di sirkunstansianan, eskohonan pober, òf eksplotashon, pero loke sea ta e kousanan di nan situashon, Señor ainda ta ser deskribí komo nan Kreador (lesa Prov. 22:2) i Defensor (lesa Prov. 22:22, 23). E hendenan akí no mester ser oprimí òf probechá di dje, loke sea ta nan erornan.

Miéntras Proverbionan ta ofresé un mihó bida ora hende skohe sabiduria i obedesé Dios, rikesanan no semper ta resultado di e bendishon di Dios. Fieldat na Dios semper ta ser mirá komo mas importante i finalmente mas gratifikante ku ganashi material: “Mihó un poko ku hustisia ku hopi ganashi ku inhustisia” (Prov. 16:8, NIV).

Un otro preokupashon den Proverbionan ta honestidat i trato hustu den negoshi, gobièrnu, i den atministrashon di hustisia (lesa Prov. 14:5, 25; 16:11-13; 17:15; 20:23; 21:28; 28:14-16). Proverbionan no ta solamente preokupá ku bida di hende sino tambe ta ofresé persepshonnan riba kon sosiedat komo un totalidat mester funshoná pa benefishi di tur hende, partikularmente pa esnan ku tin mester di protekshon. Nos ta ser rekordá atrobe ku, den e mihó kaso, esnan ku ta goberná i guia ta hasi esei ku yudansa di Dios (lesa Prov. 8:15, 16), i mester aktua komo agentenan di Su grasia i kompashon pa ku esnan den nesesidat.