E Sklamashon di e Profetanan

Apesar di e plan divino klaramente detayá pa e nashon israelita, e pueblo israelita masha poko biaha tabata biba na altura di su yamada. No muchu generashon despues ku nan a establesé nan mes den e tera, nan a pidi Samuel, e profeta i hues, pa apuntá un rei pa guia nan nashon, “manera tur e otro nashonnan tin” (1 Sam. 8:5, NIV).

Lesa 1 Samuel 8:10-18. Kiko tabata e spièrtamentu di Samuel na e pueblo komo kontesta riba nan petishon pa un rei?

Samuel a rekonosé esaki komo un paso den direkshon di ta manera e otro nashonnan den otro formanan tambe. Miéntras Samuel a trata na konsehá e promé rei, Saul, no a dura muchu promé ku su profesia a kuminsá bira realidat. Asta na haltura di e reino israelita, David i Salomon no a skapa di e tentashonnan, korupshon, i ekseso di nan poder.

A lo largu di e reinadonan di e reinan di Israel i Hudá, un di e kontestanan di Dios tabata pa manda profetanan pa anunsiá Su boluntat i pa kòrda e lidernan i pueblo israelita riba nan responsabilidatnan duná dor di Dios na e miembronan lubidá di nan sosiedat.

Den e eskritonan di e profetanan hebreo, nos ta mira un yamada kontinuo i reiterá pa biba hustamente i pa hasi hustisia den sosiedat. Ora nan tabata konfrontá e infieldat di Israel i su lidernan, e profetanan tabata un bos regular i urgente pa esnan sin bos, partikularmente esnan ku tabata padesé pa motibu di e fayo di Israel di sigui e boluntat di Dios.

Reflekshonando riba e pashon di e profetanan di Tèstamènt Bieu, Abraham Joshua Heschel ta kontrastá nos satisfakshon ku nan yamadanan urgente pa hustisia: “E kosnan ku tabata spanta e profetanan te asta awor ta tuma lugá diariamente tur kaminda na mundu. ... Nan ansiedat intenso ku inhustisia por zona komo histeria pa nos. Nos mes ta testiguá kontinuamente aktonan di inhustisia, manifestashonnan di hipokresia, falsedat, indignashon, miseria, pero masha poko biaha nos ta bira indigná òf demasiado eksitá. Pa e profetanan asta un inhustisia di mas chikitu ta asumí proporshonnan kósmiko”. – The Prophets (New York: Jewish Publication Society of America, 1962), p. 3, 4.

Loke e profetanan akí ta ofresé nos ta un persepshon den kurason i mente di Dios. papiando den nòmber di Dios, nan por yuda nos mira e inhustisia i sufrimentu di nos mundu a traves di e wowonan yen di lágrima di Dios. Pero e pashon akí tambe ta un yamada pa akshon, pa traha ku Dios pa aliviá i remediá e opreshon i doló di esnan rondó di nos.

“Mi tabata ni profeta ni yu di un profeta, sino mi tabata un wardadó di karné, i tambe mi tabata kuida palunan di figo. Pero Señor a saka mi for di kuida e tou i a bisa mi: ‘Bai, profetisá na mi pueblo Israel’ ” (Amos 7:14, 15, NIV).

Amos tabata bastante habrí pa atmití su falta di kualifikashon pa ta un profeta, ma ora el a presentá su mensahe na e nashon israelita, el ta demostrá un abilidat opvio pa atraé su oyentenan na loke e ke bisa nan.

E ta kuminsá riba un nota popular, numerando e nashonnan den bisindario: Siria, Filistea, Fenisia, Edom, Amòn, i Moab, i detayando nan krímen-, indignashon-, i atrosidatnan pa kua Dios lo kastigá nan (lesa Amos 1:3-2:3). Ta fásil pa imaginá nos e israelitanan ku ta aploudí e akusashonnan di nan enemigunan, partikularmente komo ku hopi di e krímennan di e nashonnan akí a ser dirigí kontra e israelitanan mes.

Despues Amos ta hala un tiki mas serka kas, deklarando e huisio di Dios kontra e pueblo di Huda, e bisiñanan di sùit di Israel den e reinonan ku awor ta separá. Papiando den nòmber di Dios, Amos ta sita nan rechaso di Dios, nan desobedensia na Su mandamentunan, i e kastigunan ku lo a bin riba nan (lesa Amos 2:4, 5). Atrobe nos por imaginá nos mes e pueblo den e reino di nort ku ta aploudí miéntras Amos ta señalá e maldat di esnan rondó di nan.

Pero e ora ei Amos ta dirigí su mes na su oudiensia. Restu di e buki ta focus riba e maldat, idolatria, inhustisia i fayonan ripití di Israel den bista di Dios.

Lesa Amos 3:9-11; 4:1, 2; 5:10-15; i 8:4-6. Kontra ki pikánan e ta spièrtando?

Miéntras Amos no ta diplomátiko den su lenguahe i su spièrtamentunan ta esnan di kondenashon, su mensahe ta sasoná ku súplikanan pa bira bèk na nan Dios. Esaki lo inkluí un renobashon di nan sentido di hustisia i kuido pa e podernan meimei di nan: “Pero laga hustisia kore manera un riu, hustisia manera un koriente di awa ku nunka ta faya!” (Amos 5:24, NIV). E último par di versíkulonan di e profesia di Amos ta mustra na un futuro restourashon pa e pueblo di Dios (lesa Amos 9:11-15): “Den nan ora di apostasia di mas profundo i nesesidat di mas grandi, e mensahe di Dios na nan tabata unu di pordon i speransa”. – Ellen G. White, Prophets and Kings, p. 283.

"El a mustra bo, O hende, loke ta bon; i kiko Señor ta rekerí di bo sino pa hasi hustisia, pa stima miserikòrdia, i pa kana humildemente ku bo Dios?” (Mikeas 6:8, NKJV. Kiko ta maneranan, aworakí, ku bo por biba e palabranan akí?

Mikeas 6:8 ta kisas un di e tekstonan di mas mihó konosí den Skritura. Sinembargo, meskos ku hopi di e versíkulonan ku nos ta kombertí den lema òf traha “poster” di dje, probablemente nos ta ménos konosí ku e konteksto di e versíkulo ku kisas nos por atmití.

Lesa Mikeas 2:8-11 i 3:8-12. Kiko e hendenan tabata hasiendo ku Mikeas a kondená?

E reinado di Akaz komo rei di Huda a mira e pueblo di Dios alkansá un bahada nobo den e historia i spiritualidat di nan nashon. Idolatria i su vários práktikanan di maldat tabata oumentá. Na mes momentu, meskos ku otro profetanan di e tempu ei tambe a nota, esnan pober tabata sigui siendo eksplotá i ataká.

Mikeas no ta un profeta di kondenashon di ménos importansia ku su kontemporáneonan. Mayoria di su promé tres kapítulonan ta ekspresá e rabia i tristesa di Dios pa e maldat ku Su pueblo a hasi, komo tambe e destrukshon ku tabata biniendo den nan direkshon.

Pero Dios no a bandoná Su pueblo. Asta e bosnan skèrpi i mensahenan severo di e profetanan tabata un indikashon di e interes kontinuo di Dios den Su pueblo. El a duna nan spièrtamentunan pa motibu di Su amor i preokupashon pa nan. E tabata anhelá pa pordoná i restourá nan. E lo no a keda rabiá pa semper (lesa Mikeas 7:18-20).

Esaki ta e konteksto di e “fórmula” bon konosí: hasi hustisia, stima miserikòrdia, kana humildemente. Kisas e por ta zona simpel, pero bibando un fe asina den formanan práktiko ta hopi mas desafiante, spesialmente ora ku hasi esei ta parse asina inkonsistente ku e sosiedat rondó di bo. Ora otronan ta probechá di inhustisia, hasi chèrchi di miserikòrdia i ta move yen di orguyo, hasiendo hustisia, stimando miserikòrdia, i kanando humildemente ta rekerí kurashi i perseveransia. Sinembargo, nos no ta hasi esaki nos so; ora nos aktua na e manera aki, nos ta kanando ku nos Dios.

Si nos mester a puntra un grupo di Kristian tokante e "piká di Sodoma”, chèns ta grandi ku hopi lo a kuminsá ku un deskripshon di su vários pikánan seksual i otro formanan di pervershon. Despues di tur kos, Génesis 19:1-13 ta deskribí un sosiedat malu i pervertí mas ku hechu pa destrukshon.

Ta interesante pa bisa, sinembargo, ku e kontesta ta muchu mas kompliká ku djis esei. Konsiderá e deskripshon di Ezekiel: "Awor, esaki tabata e piká di bo ruman muhé Sodoma: E ku su yunan muhé tabatin arogante, obeso i sin preokupashon; nan no tabata yuda esnan pober i esnan den nesesidat" (Ezek. 16:49, NIV). Aunke Señor klaramente no tabata bai pasa por alto e otro formanan di pervershon ku tabata ser hañá den e siudat, e focus di Ezekiel akinan tabata riba inhustisia ekonómiko i un falta di preokupashon pa esnan den nesesidat.

Lo por tabata posibel ku, den bista di Dios, e pikánan ekonómiko akí tabata mes malu ku esnan seksual?

Biniendo despues di e époka di Amos, Mikeas, i Isaias, e promé profesianan di Ezekiel ta duna un tono similar di spièrtamentu di e destrukshon ku ta na kaminda. Sinembargo, despues di e kaida di Yerusalèm den man di e babilonianan i su pueblo a ser hibá den koutiverio, e enfoke di Ezekiel ta kambia bai mas plenamente riba e promesanan di Dios di restourashon.

Lesa Ezekiel 34:2-4, 7-16. Kompará e evaluashon di Dios di e lidernan korupto di Israel ku Su mes tarea komo Wardadó. Kon nan trato di e "karné" di mas debil ta kontrastá ku Su métodonan?

Apesar di kon malu nan tabata, di manera ku nan tabata ser kompará ku Sodoma, ainda Señor tabata aserká nan ku e speransa di bira nan for di nan maldat. Den e plan renobá di Dios pa Su pueblo, nan lo tabata bèk den nan tera, Yerusalèm lo a ser restourá, i e tèmpel lo a ser rekonstruí. E fiestanan ku Dios a duna lo a ser selebrá atrobe i e tera lo a ser repartí atrobe igualmente entre e pueblo komo nan herensia (lesa Ezek. 47:13-48:29). Ta parse opvio ku e intenshon di Dios tabata ku Su plan pa Su pueblo, manera duná promé na Moises i e pueblo di Israel despues di nan reskate for di Egipto, lo a ser reanudá ku e regreso di Su pueblo for di koutiverio. Esaki tabata inkluí preokupashon pa e miembronan di mas débil di sosiedat, komo tambe esnan ku lo por a ser konsiderá strañero.

Lesa Isaias 1:15-23; 3:13-15; i 5:7, 8. Kon lo bo a deskribí e kontesta di e profeta riba loke e ta opservá den e sosiedat rondó di dje?

E sermon inisial di Isaias, e promé sinku kapítulonan, ta un meskla di krítika severo di e tipo di sosiedat ku e pueblo di Dios a bira, spièrtamentunan di huisio inminente komo kontesta riba nan rechaso di Dios i nan iregularidatnan kontinuo, i ofertanan di speransa si e pueblo lo a bira bèk na Dios i reformá nan bida i sosiedat. Pero kisas e emoshon di mas fuerte ku ta bin a traves di su palabranan ta un sensashon di tristesa. Basá riba su komprondementu di ken Dios ta i loke E ke pa Su pueblo, e profeta ta lamentá loke a ser pèrdí, e numeroso hendenan lubidá ku ta ser heridá, i e huisio ku lo bin riba e nashon.

Isaias ta sigui ku e patronchi akí a traves di su ministerio profétiko. E ta urgi e pueblo pa kòrda loke Dios a hasi pa nan. Tambe e ta ofresé e hendenan akí e speransa di loke Dios ke hasi pa nan den futuro. Por lo tantu, nan mester buska Señor awor, pasobra e relashon renobá akí kunE lo inkluí arepentí di nan maldat aktual i kambia e manera ku nan ta trata otronan.

Den kapítulonan 58 i 59, Isaias spesífikamente ta bai bèk na e prekupashon pa hustisia. Atrobe e ta deskribí un sosiedat den kua "derecho ta ser wantá patras i hustisia ta para na un distansia; bèrdat a trompeká den e kayanan, i honestidat no por drenta" (Isaias 59:14, NIV). Pero e ta afirmá tambe ku Dios ta konsiente di dje i ku Dios lo reskatá Su pueblo, e "Redentor lo bin" (Isaias 59:20, NIV).

A lo largu di e buki di lsaias, un parti signifikante di e profeta su atenshon ta ser duná pa proklamá e Mesias benidero, unu ku finalmente lo a restablesé e reino di Dios riba tera i lo a trese hustisia, miserikordia, kurashon, i restourashon kunÉ.