Esnan di Mas Ménos di Esakinan

E sermon di mas largu di Hesus, òf kolekshon di siñansanan, ta e Sermon riba Seru. Su deskripshon di tres kapítulo largu di bida den e reino di Dios ta kuminsá ku un deklarashon di balornan ku a bira konosí komo e Bienaventuransanan.

Lesa Mateo 5:2-16 (lesa tambe Lukas 6:20). Kiko ta e karakterístikanan komun di e nuebe balornan òf tipo di hende akí deskribí pa Hesus komo "bendishoná"?

Huntu ku e aplikashon spiritual pròfundo di e palabranan akí, nos no mester pasa por alto e lektura práktiko di nan. Hesus a papia tokante rekonosé e pobresa den nos mes i den nos mundu. Tambe El a papia tokante hustifikashon (tradusí komo "hustisia" den algun vershon di Beibel), humildat, miserikòrdia, hasi pas, i puresa di kurason. Nos mester tuma nota di e diferensia práktiko ku e kualidatnan akí lo hasi den nos bida i den nos mundu ora nan ser bibá. Un konotashon práktiko asina ta ser enfatisá den e siguiente deklarashonnan di Hesus den kua El a urgi su disipelnan pa ta salu i lus den mundu (Mateo 5:13-16).

Ora nan ser usá di forma apropiá, salu i lus mester hasi un diferensia den e kontekstonan den kua nan ta ser añadí. Salu ta trese sabor, i tambe e ta preservá e alimentonan na kua e ta ser añadí; e ta simbóliko di e bon ku nos mester ta pa esnan rondó di nos. Di forma similar, lus ta pusha skuridat atras, revelando opstákulo- i peligernan, hasiendo un kas òf siudat mas seif i ta proveé un punto pa nabegá riba dje, asta ora e ta un distansia leu. Manera lus riba un anochi skur, Hesus a bisa: "Laga boso lus bria dilanti otronan, pa nan por mira boso bon obranan i glorifiká boso Tata den shelu" (Mat. 5:16, NIV).

Tantu e símbolonan di salu i lus akí ta mustra nos na e responsabilidat di disipelnan pa influensiá i mehorá bida di esnan rondó di nan. Nos ta salu i lus ora nos ta yora di forma apropiá, tin puresa di kurason, praktiká humildat, mustra miserikòrdia, hasi pas, i soportá opreshon. Pues, Hesus ta kuminsá e sermon aki ku e yamada pa manifestá e tin biaha “balornan menospresiá” akí di Su reino

Ora nos konsiderá e siñansa di Hesus, ta bale la pena pa tene den mente e hendenan ku E tabata papiando kuné i e sirkunstansianan den kua nan tabata biba. Hesus a kuminsá atraé multitutnan grandi di hende di e regionnan kaminda El a ministrá (lesa Mat. 4:25, 5:1). Mayoria tabata hendennan komun, ku tabata biba bou di e gobièrnu soberano di e Imperio Romano, pero algun tabata e gobernantenan hudiu i lidernan religioso. E eksistensia di e hendenan komun tabata difísil. Nan tabata tin tiki eskoho pa nan propio bida, kargá pa impuesto pisá i oprimí pa tradishon religioso.

Ora E tabata siña e hendenan aki, Hesus opviamente tabata preokupá pa ofresé na un manera pa biba bon, pa biba ku dignidat i kurashi, loke sea nan sirkunstansianan tabata. Un ehèmpel di esaki ta ser hañá den Mateo 5:38-48. Den e idioma ingles, e instrukshonnan akí, “bira e otro banda di kara”, "duna nan bo mantel tambe”, i “bai e mia èkstra”, ta asina bon konosí te ku nan ta bira klishé. Pero e familiaridat aki ta disimulá e akshon- i aktitutnan radikal ku Hesus ta siñando aki.

E senarionan ku Hesus a deskribí tabata eksperensianan komun pa hopi di Su oyentenan. Hopi biaha nan tabata ser ataká violentemente dor di nan "superiornan" òf shonnan. Hopi biaha nan tabata kai den debe i pèrde nan propiedatnan na e propietarionan i fiadónan. Hopi biaha nan tabata ser obligá pa traha pa e sòldánan romano ku tabata na mando. Hesus a siña e hendenan pa respondé ku integridat, pa trata e opresornan mihó ku nan tabata meresé, i, hasiendo esaki, pa resistí e pèrdida di nan humanidat. Miéntras ku e opresornan aki tabata trata na ehersé nan poder, e hendenan semper tabata tin e libertat pa skohe kon nan lo a reakshoná i, dor di resistí di forma no-violento i respondiendo generosamente, nan tabata eksponé e maldat di e opreshon i inhustisia ku tabata ser hasí.

Kompará Mateo 5:38-48 ku Romanonan 12:20, 21. Kon nos mester praktiká e prinsipionan radikal akí den nos bida?

Lesa Lukas 10:25-27. E eksperto di lei ku a kuestioná Hesus a ofesé un resúmen tradishonal di e mandamentunan di Tèstamènt Bieu pa biba un bida aseptabel dilanti di Dios. Kon e dos mandamentunan aki ta konektá ku otro?

Ora ku Hesus tabata ser kuestioná, hopi biaha E tabata konkluí Su kontestanan ku un resultado bastante diferente for di loke esun ku tabata hasi e pregunta tabata buska. Komo kontesta riba e instrukshon den Levítiko 19:18 pa "stima bo próhimo manera bo mes”, ta parse ku hopi di e hendenan religioso di Su tempu tabata dediká hopi tempu i energia debatiendo e grado i límitenan di e prinsipio di "próhimo" akí.

Hesus ya a purba amplia komprondementu di Su siguidónan di e término aki, urgiendo ku no solamente nan mester stima nan próhimo, sino tambe nan mester hasi bon pa tur hende: "Ma Mi ta bisa boso, stima boso enemigunan i hasi orashon pa esnan ku ta persiguí boso, pa boso por ta yunan di boso Tata den shelu. E ta pone Su solo sali riba esnan malu i esnan bon, i ta manda áwaseru riba esnan hustu i esnan inhustu" (Mat. 5:44,45, NIV).

Pero ora un eksperto den lei religioso a purba pone Hesus na prueba, el a kai bek riba e pregunta tantu debatí: "Ken ta mi próhimo?" (Lukas 10:29). Komo kontesta, Hesus a konta e storia di e bon Samaritano, pero e kontesta final riba e pregunta di e eksperto di lei no tabata pa definí e terminologia "próhimo”. En kambio, Hesus a bisa, en efekto, "Bai i ser un próhimo na kualke hende ku tin mester di bo yudansa" (lesa Lukas 10:36,37).

Lesa Lukas 10:30-37. Kiko ta nifikashon di e kontraste ku Hesus ta hasi entre e tres personahenan ku ta mira e hòmber kantu di e kaminda ku tin mester di yudansa?

Manera tabata komun den e siñansa di Hesus, Su krítika di mas severo tabata dirigí na esnan ku tabata profesá di ta religioso pero tabata demostrá tiki preokupashon pa e sufrimentu di otronan. "Den e storia di e bon Samaritano, Kristu ta ilustrá e naturalesa di religion berdadero. E ta mustra ku e no ta konsistí di sistema-, kredo-, òf ritonan, sino den e ehekushon di aktonan di amor, den hiba e bon di mas grandi na otronan, den bondat geniuno”. - Ellen G. White, The Desire of Ages, p. 497.

Den e siñansa di Hesus, E ta señalá un strañero, un hende ku ta ser konsiderá infiel na Dios, pa demonstrá kiko e yamada di Dios ta na tur ku ta profesá di ta Su siguidónan. Meskos ku Su promé oyentenan, ora nos bin serka Hesus puntrando kiko nos mester hasi pa eredá bida eterno, finalmente E ta instruí nos pa bai i ta un próhimo di kualke hende ku ta den nesesidat.

Den e parabel di e hòmber riku i Lázaro (lesa Lukas 16:19-31), Hesus ta kontrastá e bida di dos hòmber, un riku, un desesperadamente pober. Den ousensia di bienestar sosial, hòspitalnan komunitario, òf kushinanan ku ta parti kuminda na pobernan, tabata un práktika komun pa esnan den nesesidat, desabilitá òf desafortuná di otro forma, pa pidi limosna pafó di kas di esnan riku. Tabata ser sperá ku esnan riku lo tabata generoso dor di kompartí un tiki di nan rikesa pa aliviá e sufrimentu. Pero den e storia aki, e hòmber riku tabata "indiferente di forma egoista na e nesesidatnan di su ruman ku tabata sufri”. - Ellen G. White, Christ's Object Lesson, p. 261. Den bida, nan respektivo sirkunstansianan a keda meskos; pero ora nan a muri, i nan ser husgá dor di Dios, nan posishonnan a ser kambiá dramátikamente.

Kompará Lukas 16:19-31 ku Lukas 12:13-21. Kiko ta e similaridat- i diferensianan entre e dos storianan aki, i huntu, kiko nan ta siña nos?

No tin evidensia den ningun di e historianan akí ku e hòmbernan a bira riku dor di hasi algu robes. Kisas tur dos a traha duru, a manehá kuidadosamente, i a ser bendishoná dor di Dios. Pero ta parse ku algu a bai robes den nan aktitut pa ku bida, Dios, sèn, i otronan, i esaki a kosta nan di forma signifikativo i eternamente.

Saliendo for di imágennan popular di bida despues di morto di tempu di Hesus, e storia di e hòmber riku i Lázaro ta siña ku e eskohonan ku nos hasi den e bida akí ta importá pa e siguiente. E forma kon nos ta respondé na esnan ku ta buska òf tin mester di nos yudansa ta un forma ku nos eskoho- i prioridatnan ta ser demostrá. Meskos ku "Abraham" ta mustra na e hòmber riku ku ta sufri, Beibel ta proveé direkshon mas ku adekuá pa skohe mihó: "Nan tin Moises i e Profetanan; laga nan skucha nan" (Lukas 16:29, NIV).

Hesus a siña ku e tentashonnan di rikesa, sea bo tin e, bo ta konserv’é, òf bo ta busk’é, por alehá nos for di Su reino, for di otronan i hala nos na egosentrismo i dependensia-propio. Hesus a yama nos pa buska Su reino promé i pa kompartí e bendishonnan ku nos ta risibí ku esnan rondó di nos, partikularmente esnan den nesesidat.

Un otro okashon ora un pregunta a ser hasí na Hesus i El a duna un kontesta basta diferente for di loke kisas a ser antisipá ta ser hañá den e sermon registrá den Mateo 24 i 25. E disipelnan a bin serka Hesus i a puntra tokante e destrukshon di e tèmpel na Yerusalèm i e tempu di Hesus Su regreso (lesa Mateo 24:1-3). E konklushon di e kontesta ekstendé di Hesus riba e pregunta akí a referí na alimentá esnan ku tin hamber, duna algu di bebe na esnan ku tin set, duna bonbiní na strañeronan, bisti esnan sunú, kuida esnan enfermo, i bishitá esnan den prizòn. El a sigurá nan: "Ora boso hasi pa, òf nenga di yuda, un di esnan di mas chikitu di e rurnanan akí di Mi, boso a hasié pa Mi” (lesa Mateo 25:40,45).

Esaki ta konektá ku e preguntanan ku a inisiá e siñansa akí komo un kuadro di e huisio final. Den henter Mateo 24, Hesus a presentá kontestanan mas direkto riba e pregunta di e disipelnan, dunando señal- i spièrtamentunan tokante e destrukshon di Yerusalèm i e fin di tempu, pero El a enfatisá e nesesidat di "ta alerta" i biba bon den lus di e promesa di Su segundo binida. Den e promé parti di Mateo 25, e storia di e birgennan sabí i bobo a urgi e nesesidat pa preparashon pa un regreso inesperá òf retrasá; e storia di e tres sirbidónan ta introdusí e nesesidat pa biba bon i di forma produktivo miéntras nos ta warda; despues e parabel di karné i kabritu ta mas spesífiko tokante e tareanan ku e pueblo di Dios mester ta okupá kuné.

Lesa Mateo 25:31-46. Kiko Hesus ta bisando nos aki? Dikon esaki no ta salbashon pa medio di obra? Pero kiko Su palabranan aki ta siña tokante loke bèrdaderamente ta nifiká tin un fe ku ta salba?

E dekalrashon di Hesus, ku ora nos sirbi otronan, nos ta hasiendo eski na djE, mester transformá tur nos relashon- i aktitutnan. Imaginábo si bo por a invitá Hesus pa un komementu òf bishit’E den hòspital òf prizòn. Hesus a bisa ku nos ta hasi esaki ora nos ofresé e servisio ei na hendenan den nos komunidat. Ki un oportunidat inkreibel E ta ofresé nos di e forma aki!