Ministerio den e Iglesia di Tèstamènt Nobo

Despues di e asenshon di Hesus i e binida di Spiritu Santu na Pentekòste, e grupo di kreyentenan a krese rápidamente i a krea e iglesia primitivo, un tipo nobo di komunidat entre e siguidónan di Hesus, i inisialmente guiá pa Su disipelnan original. Sinembargo, e komunidat nobo akí no ta solamente algu ku nan a inventá pa nan mes; mas bien, e a ser konstruí riba e siñansanan i ministerio di Hesus i a kai bèk riba e historia largu di e Skrituranan Hebreo i nan profetanan.

Lesa Echonan 2:42-47 i 4:32-37. Kiko bo ta identifiká komo e elementonan klave den e deskripshonnan akí di e komunidat di iglesia primitivo?

Miéntras ta parse ku e Isrealitanan a faya pa hamas pone kompletamente na práktika e modelo pa un sosiedat hustu i generoso, e komunidat di e iglesia primitivo a tuma na serio e instrukshon ku "no mester tin hende pober meimei di boso" (Deut. 15:4, NIV). Un die ekspreshonnan práktiko di nan fe tabata kompartí nan rekursonan material, asta bende tera i kontribuí ku e fondo rekoudá (lesa Echonan 4:34-5:2), pa supli e nesesidatnan di nan rumannan kreyente, komo tambe pa ta un bendishon pa esnan pafó di e komunidat prinsipiante, partikularmente pa medio di e ministerio di kurashon (lesa Echonan 3:1-11, 5:12-16).

Sinembargo, e komunidat akí no tabata un sosiedat idealista den ningun área di imaginashon. Segun ku e kantidat di kreyentenan tabata oumentá, tenshon tabata krese tokante atministrashon di e rekursonan akí, partikularmente relashoná ku e distribushon diario di alimento na viudanan (lesa Echonan 6:1). E disipelnan, ku tabata e lideman natural di e grupo, kier a enfoká riba prediká e evangelio. Pa por a dil ku e situashon en kuestion, nan mester a hasi algun reorganisashon.

Por lo tantu, shete hende a ser nombrá pa focus riba e asuntunan práktiko di e komunidat di iglesia. Esaki kisas tabata e prome rekonosementu di diferente ministerio- i abilidatnan pa ser ehersé den iglesia; na mes momentu el a demostrá e importansia di ministerio práktiko pa e bida i testifikashon di e iglesia. "E mesun prinsipionan di piedat i hustisia ku mester a guia e gobernantenanmeimei di e pueblo di Dios den tempu di Moises i David, tambe mester a ser siguí pa esnan ku a ser duná e vigilansia di e iglesia di Dios resien organisa den dispensashon di e evangelio". -Ellen G. White, The Acts of the Apostles, p. 95.

Ora e iglesia a kuminsá ekspandé, manera Hesus a predesí, "na Yerusalèm, i na henter Hudea i Samaria, i te na e finnan di tera" (Echonan 1:8, NIV), kreyentenan nobo a praktiká e fe i e ministerio di Hesus. Entre esakinan tabata tin Dorkas, tambe konosí komo Tabita, den e siudat di Jope. Opviamente el a tuma na serio e instrukshon partikular di Hesus ku ora e tabata bisti esun sunú, e tabata hasiendo esei pa Hesus mes (lesa Mat. 25:38,40).

Lesa e deskripshon di Dorkas i su ministerio den Echonan 9:36. Kon bo bida i ministerio lo por ser deskribí den un formato similar na e versíkulo akí? Kon lo bo ta deseá pa ser deskribí?

Ta parse ku e ministerio di Dorkas tabata asina ku e deskripshon di dje komo un "disipel" (lesa Echonan 9:36) i su fieldat, energia, i enfoke riba otronan tabata ser rekonosé asta mas aya di su siudat natal.

Pedro tabata bishitando e siudat serka di Lida, i e hendenan di Jope a pidié pa bin komo reakshon riba e morto repentino di Dorkas (lesa Echonan 9:37-41). Na su yegada na Jope, Pedro a ser risibí pa hopi di e hendenan ku Dorkas a yuda pa medio di su trabou pa esnan pober. Nan a mustr'é e pañanan ku Dorkas a traha i indudablemente a kont'é hopi storianan di kon el a yuda nan i otronan.

Ku Pedro a hasi orashon pa Dorkas i Dios a tres'é bèk na bida no ta, naturalmente, un garantia ku semper bida lo bai bon pa esnan ku ta dediká nan bida na sirbi otronan. Despues di tur kos, Dorkas ya a sufri malesa i morto, i Esteban, un di e promé diakononan nombrá pa ministrá na e viudanan den iglesia, a bira tambe e promé martir (lesa Echonan 7:54-60). Un bida di servisio no ta kaminda suave; tin biaha e por ta asta e kaminda mas brutu.

Sinembargo, den e storia akí, Dios a usa e rekonosementu di Su amor i poder den tantu e bida komo morto di Dorkas pa hasi un impakto fuerte riba e hendenan di Jope: "Esaki a bira konosí den henter Jope, i hopi hende a kere den Señor” (Echonan 9:42, NIV).

Despues di su kombershon, apòstel Pablo a asumí e mishon pa hiba evangelio na e mundu pagano. E éksito ku Dios a dun'é a lanta preguntanan signifikante tokante e relashon entre e raisnan Hudiu di e fe Kristian ku a lanta i e siguidónan pagano nobo di Hesus. Un konsilio di lidernan Kristian Hudiu i Pagano a reuní na Yerusalèm pa diskutí e asuntu i buska Dios Su guiansa relashoná ku e preguntanan kompliká akí. E reunion i su resultadonan ta registrá den Echonan 15.

Sinembargo, den e informe di Pablo di e reunion akí, hañá den Galationan 2, e ta añadí un otro elemento importante na e instrukshonnan ku el a risibí for di e konsilio di Yerusalèm pa su ministerio kontinuo entre e paganonan: "Tur loke nan a pidi tabata ku nos mester kòrda riba esnan pober, e kos mes ku mi tabata ansioso pa hasi tur e tempu" (Gal. 2:10, NIV).

I Pablo a sigui apliká e enfoke aki personalmente (lesa, por ehèmpel, Echonan 20:35) i a lo largu di henter su ministerio. Meskos ku e iglesia primitivo na Yerusalèm, Pablo a ekspandé e vishon di e komunidat Kristian pa alkansá tur ruman kreyente.

Lesa 2 Korintionan 8:7-15. Kon Pablo ta konektá e evangelio ku dunamentu generosamente?

Tambe Pablo a usa dos referensia di Tèstamènt Bieu pa urgi e kreyentenan na generosidat i kuido pa nan rumannan kreyentenan den sirkunstansianan difísil. El a sita e storia di e provishon generoso di Dios di mana na e Israelitanan den desierto komo un modelo di duna i kompartí entre e komunidat di iglesia mas amplio (lesa 2 Kor. 8:15). Tambe el a sita Salmo 112:9, “Nan a plama gratuitamente nan donnan na e pobernan; nan hustisia ta permanesé pa semper" (2 Kor. 9:9, NIV).

Pablo ta urgi su lesadónan pa ta intenshonal tokante dunamentu, pa pone regularmente un porshon di nan entrada un banda pa e por tabata fásil pa duna ora e òf Tito bishitá nan iglesia pa kolektá nan ofrendanan i entregá nan na e Kristiannan den nesesidat na Yerusalèm. El a usa e ehèmpel di un iglesia pa enkurashá otro iglesianan na generosidat similar. "Pa motibu di e sirbishi pa medio di kua boso a proba boso mes", Pablo a skirbi, "otronan lo alabá Dios pa e obedensia ku ta kompañá boso konfeshon di e evangelio di Kristu, i pa boso generosidat den kompartí ku nan i ku tur otro hende" (2 Kor. 9:13, NIV).

E karta di Pablo na e Romanonan ta mihó konosí pa su splikashonnan detayá di e gran doktrina di salbashon pa medio di fe pa medio di e morto di Kristu. Pero despues di 11 kapítulo di e siñansa akí, tin un kambio di énfasis. Pablo ta ofresé un guia práktiko pa biba i stima korektamente, basá riba e grasia i amor di Dios manera e ta ser revelá den Hesus i e storia di e evangelio: "P’esei mi ta roga boso, rumanan, en bista di e miserikòrdia di Dios, pa ofresé boso kurpanan komo un sakrifisio bibu, santu i agradabel na Dios, esaki ta boso adorashon berdadero i korekto" (Rom. 12:1, NIV). En realidat, Pablo ta bisando ku pa motibu di loke Dios a hasi pa nos den Hesus, ta asin’akí nos mester biba.

Lesa i resumí Romanonan 12, notando partikularmente e instrukshonnan pa stima i kuida otronan, spesialmente esnan den nesesidat.

Den un sentido, Romanonan 12 ta funshoná komo un resúmen di hopi di e tópikonan ku Pablo ta duna atenshon mas detayá na dje den algun di su otro kartanan. E ta papia tokante e diferente ròl- i donnan denter di e kurpa di e iglesia, inkluyendo sirbi i enkurashá otronan, i duna generosamente (lesa v. 3-8). Pero no solamente e kosnan akí mester ser hasí, nan mester ser hasí bon, ku entusiasmo i, riba tur kos, ku amor (lesa v. 9-11).

Pablo ta deskribi den términonan práktiko di kiko e tipo di bida akí ta trata. E ta urgi e kreyentenan pa tin pasenshi den difikultatnan i persekushon, pa kuida esnan den nesesidat, pa ta hasidónan di pas donde sea i ki ora ku ta posibel i, manera nos a mira anteriormente, pa respondé riba maldat i inhustisia ku amabilidat, vensiendo maldat dor di hasi bon (lesa Rom. 12:20, 21).

E kapítulo akí ta deliniá loke ta nifiká pa biba komo un persona nobo, sirbiendo Dios individualmente i komo parti di un komunidat di fe. Pablo a bisa e siguidónan nobo akí di Hesus ku nan bida, prioridatnan, i akshonnan mester ser kambiá pa motibu di nan kontesta riba loke Hesus a hasi pa nan pa medio di Su morto riba e krus i e speransa di bida eterno. Manera nan tabata biba den un sosiedat opresivo i hopi biaha kruel, den kurason di e Imperio Romano, Pablo ta instruí nan pa biba di forma diferente: "No konformá ku e patronchi di e mundu akí, ma sea transformá pa medio di e renobamentu di boso mente" (Rom. 12:2, NIV).

Tradishon Kristian ta sugeri ku Santiago, e ruman hòmber òf ruman di kriansa di Hesus, a bira un lider di e iglesia primitivo na Yerusalèm i tabata e Santiago ku a aktua komo presidente pa e konsilio di Yerusalèm (lesa Echonan 15, komo tambe Galationan 1 i 2). Si ta asina, ta probabel ku e tabata e outor di e karta ku a ser konservá den Beibel komo e buki di Santiago.

Santiago tabata un nòmber komun den e tempu ei, pero si esaki tabata e mesun persona, e por tabata tambe e lider di iglesia konosí komo Santiago "e hustu", kua ta sugerí un lider sabí ku korektamente a duna su trato na otronan prioridat i a preokupá pa esnan ku hopi biaha ta ser lubidá òf oprimí. E buki ku ta karga su nòmber a ser deskribí komo e "e buki di Proverbionan di Tèstamènt Nobo", enfoká riba santidat práktiko i biba di forma sabí komo siguidónan di Dios.

E outor di Santiago tabata ansioso pa rekòrda su lektornan kristian pa "no solamente skucha e palabra, i asina gaña boso mes. Hasi loke e ta bisa" (Santiago 1:22, NIV), i ku e religion ku ta importá, ku ta puru i duradero den bista di Dios, ta enfoká riba kuida esnan den nesesidat i esnan oprimí i resistí e influensianan korupto di e sosiedat rondó di nan (lesa Santiago 1:27).

Lesa Santiago 2:1-9 i 5:1-5. Kon e aktitut di Santiago na esnan ku ta riku ta diferente for di esun ku tin normalmente den mayoria sosiedat? Kiko ta su instrukshonnan partikular respekto e manera kon riku i pober mester ser tratá den e komunidat di iglesia?

Santiago ta argumentá ku deseá un hende bon, asta deseá nan e bendishon di Dios, lo ta di poko konsuelo si nan ta sufriendo di friu i hamber. E provishon di kuminda i paña real lo ta muchu mas útil pa ekspresá i demostrá nos preokupashon pa nan ku tur e sintimentunan nobel i bon deseonan (lesa Santiago 2:14-16). Santiago ta usa esaki komo un ehèmpel di e interakshon entre fe i obranan den e konteksto di nos relashon ku Dios. Tambe e ta ripití (Santiago 2:8). loke Hesus a siña tokante stima bo próhimo manera bo mes, demostrando kon e mandamentu akí mester ser obedesé den bida diario. E ta ser praktiká den servisio na Dios i na otronan, no pa gana salbashon sino pasobra e ta e manifestashon di fe berdadero.