Stima Miserikòrdia

Manera a ser spliká den e siñansanan di Hesus i e eskritornan di Tèstamènt Nobo, esnan ku skohe pa biba komo miembronan di e reino di Dios ta biba mediante un sèt di balor- i prioridatnan diferente ku esnan di mundu.

Lesa Mateo 6:25-33. Kiko ta e siguransa ku ta ser duná na nos den e versíkulonan akí, i kon e siguransa akí mester impaktá nos prioridatnan?

Hesus a siña ku "bida [ta] mas ku kuminda, i e kurpa mas ku paña" (Mat. 6:25, NIV). E kosnan akí ta importante, naturalmente, pero nos mester mira nan den lus di e reino di Dios, kua ta nifiká ku nos mester priorisá nos bida di nobo den formanan real i práktiko, Ora nos rekonosé e yamada den henter Beibel pa elevá i kuida otronan, e yamada akí ta bira tambe un di nos prioridatnan komo nos ku ta trata na kana den e pasonan di Hesus. Ideal ta ku e yamada akí mester yuda nos enfoká ménos riba nos mes i mas riba otronan.

E sèt di prioridat diferente akí ta kambia tambe nos relashon ku esnan ku tin poder riba nos i riba esnan oprimí. Miéntras Beibel ta instruí Kristiannan pa respetá i obedesé nan gobièrnunan, asina leu ku ta posibel (lesa, por ehèmpel, Rom. 13:1-7), ta yega un punto tambe kaminda nos mester eko e palabranan di Pedro: "Nos mester obedesé Dios mas bien ku sernan humano!" (Echonan 5:29, NIV). Hesus ta pone e dos prinsipionan akí den balansa den Su kontesta na esnan ku tabata purba koh’E den trampa riba e asuntu di: "debolbé na Cesar loke ta di Cesar, i na Dios loke ta di Dios" (Mat. 22:21, NIV).

Esnan ku tin poder, sea den gobièrnu òf otro área, hopi biaha ta imponé i mantené e poder ei dor di menasanan òf forsa. Manera nos a mira den bida di Hesus, biba fielmente no semper òf den tur situashon ta rekerí pasividat den bista di maldat. Por ehèmpel, tratando ku sklabitut na Merka, Ellen G. White a skibi: "Ora e leinan di hende ta den konflikto ku e palabra i lei di Dios, nos mester obedesé e último, loke sea e konsekuensia por ta. E lei di nos pais ku ta rekerí di nos pa entregá un katibu na su shon, nos no mester obedesé; i nos mester soportá e konsekuensianan di violá e lei akí. E esklabo no ta propiedat di ningun hende. Dios ta su maestro legítimo, i hende no tin derechi di tuma e obra di Dios den su man, i reklam’é komo di dje”. – Testimonies for the Church, tomo 1, p. 201, 202.

Ora nos ta resistí e posibilidat di laga nos bon intenshonnan ser aplastá dor di "tur e problemanan den mundu”, hopi di nos lo ke hasi mas pa hasi un diferensia den bida di esnan ku ta sufri. Tin un kantidat di aktitut i akshon ku por yuda nos duna reakshonnan positivo na esnan den nesesidat.

Kompashon: Manera nos a mira, rekonosé i tin empatia ku doló di esnan ku ta sufri ta promé pasonan pa ku akshon. Nos mester krese i mantené sensibilidat pa esnan ku ta sufri. Awe, hende ta papia di "kansansio di kompashon", e idea ku nos ta asina eksponé na doló i tragedia ku hopi di nos ta kansa di e hopi kousanan ku ta rekerí nos energia emoshonal i apoyo finansiero. Hesus tabata hopi konsiente di e maldat i doló rondó di djE; sinembargo, El a keda ku kompashon. Asina nos tambe mester hasi.

Edukashon: Dor ku hopi situashon di inhustisia i pobresa ta kompliká, skucha i siña loke nos por tokante e situashonnan akí ta importante. Tabatin hopi ehèmpel den kua hendenan ku bon intenshon a kousa daño na bida di otro hende dor di trata na yuda. Miéntras esaki no ta un esküs pa keda sin tuma akshon, nos mester trata na enbolbí nos mes di formanan ku ta informá i refleksivo.

Orashon: Ora nos mira un problema, nos promé pensamentu ta pa tuma akshon "práktiko". Pero Beibel ta kòrda nos ku orashon ta práktiko. Nos por hasi un diferensia den bida di esnan pober i oprimí dor di nos orashonnan pa nan i pa esnan ku tin poder riba nan (lesa 1 Tim. 2:1,2), komo tambe dor di buska Dios Su guiansa pa kon nos por buska mihó kontesta pa ofresé yudansa (lesa Prov. 2:7,8).

Espektativanan: Un otro elemento importante den traha pa aliviá sufrimentu ta pa tin ekspektativanan korekto, mirando e komplehidat di sirkunstansianan sosial, polítiko i personal. Nos speransa mester ta pa duna hende eskoho i oportunidatnan ku di otro forma nan lo no tabatin. Tin biaha loke hende ta hasi ku e oportunidatnan akí lo desapuntá nos, pero nos mester respetá e eskohonan ei. Den kualke forma ku nos lo por trata na traha na fabor di esnan ku ta sufri, nos prinsipio di guiansa nos mester ta pa "hasi pa otronan loke boso ke pa nan hasi pa boso" (Mat. 7:12, NIV).

"Dios ta stima un dunadó alegre" (2 Kor. 9:7, NIV), i duna ku generosidat ta un aspekto importante di bida Kristian. Miéntras nos mester permití Beibel desafiá nos prioridatnan finansiero i di dunamentu, generosidat ta mas ku solamente duna sèn pa un kousa, no importá ki balor esaki tin.

En kambio, generosidat ta un di e aktitutnan den bida di mas grandi i un kualidat klave di "esnan ku ta teme Señor", manera ta ser menshoná un kantidat di biaha den Salmo 112: "Bon lo bin pa esnan ku ta generoso i ta fia gratuitamente, ku ta dirigí nan asuntunan ku hustisia" (Salmo 112:5, NIV).

Kiko e siguiente versíkulonan ta siña tokante generosidat pa ku esnan den nesesidat? Lev. 25:35-37; Salmo 119:36; 2 Kor. 8:12-15; 1 Juan 3:16-18; 1 Tim. 6:17-19.·

Den su kartanan di Tèstamènt Nobo, Pablo regularmente a sita e generosidat di Dios, ekspresá mas plenamente den Hesus dunando Su bida pa nos, komo e fuente di e speransa Kristian. Susesivamente, Su morto pa nos tabata tambe e motivashon pa nos biba un bida di generosidat pa ku otronan: "Mi ta hasi orashon pa boso asosiashon ku nos den fe por ta efikas pa profundisá boso komprondementu di tur kos bon ku nos ta kompartí pa kousa di Kristu" (Filemon 1:6, NIV).

Generosidat ta un aktitut pa ku bida ku ta grandi, di kurashi i abarkante. Asina hopi den nos bidanan individual, sosiedat- i kulturanan ta pone nos enfoká riba nos mes, pa tene tantu ku nos por pa nos mes. I laga nos ta realista, pa mayoria di nos e moda standart ta semper mes, mes, mes di tur manera.

Si e ta real, nos fe lo pone nos muri na mes i biba mas pa otronan. Nos fe ta yuda nos imaginá e mundu i su hendenan manera Dios ta mira nan, tantu den nan bondat komo nan miseria, i ta obligá nos pa trata na yuda esnan den nesesidat, te na kualke grado posibel.

Komo un kualidat di biba, generosidat ta ser apresiá fásilmente dor di esnan ku ta rekoudá fondo i ta hasi obra di karidat. Un generosidat asina por ser midí i ta direktamente práktiko. Pero donashonnan grandi no nesesariamente ta indiká un bida generoso (lesa Marko 12:41-44). Un bida generoso ta mas grandi i di mas balor ku kualkier donashon. Nos mester apresiá i kultivá mihó un spiritu generoso den tur loke nos ta hasi. Pa mayoria hende, generosidat no ta bini di forma natural; ta grasia ta loke nos mester ekspresá den nos bida di forma proaktivo i deliberá, no importá e influensia di nos humanidat pekaminoso i egoista.

Lesa Mateo 5:9. Den e tipo di mundu ku nos ta biba, kon nos ta hasi loke Hesus ta bisa aki? Finalmente, kon eksitoso nos por ta? Lesa Marko 13:7.

Konflikto violento ta un kousa importante di sufrimentu. Inkluí den e kostonan di guera tin e víktimanan direkto i bidanan destrosá, e atenshon i rekursonan dediká na ekipo militar ku lo a ser destiná mihó pa aliviá otro nesesidatnan humano i e sufrimentunan konstante di sobrebibientenan di guera i veteranonan, asta entre e "viktoriosonan". Despues tin e hopi konfliktonan mas chikitu ku ta marka un kantidat grandi di bida den famia- i komunidatnan. Komo tal, un pashon pa hustisia no por ignorá e mandato pa hasi pas.

Esensial na e evangelio di Hesus, tin e gran akto yen di grasia di Dios di hasi pas, rekonsiliando sernan humano pekaminoso ku nan Kreador (lesa 2 Kor. 5:18-21). I e rekonsiliashon ku nos ta risibí ta bira e patronchi pa nos ta "embahadornan" pa e rekonsiliashon akí pa otronan tambe.

Lesa Isaias 52:7. Kon nos ta praktiká e tèkst akí tambe?

E evangelio di pas ta bira tambe e motivashon, patronchi, i rekurso pa traha pa pas den nos mundu violento: "E kurason ku ta den harmonia ku Dios ta un partisipante di e pas di shelu i lo plama su influensia bendishoná na tur rondó di dje. E spiritu di pas lo baha manera serena riba kurasonnan kansá i inkieto ku e luchanan di mundu". - Ellen G. White, Thoughts From the Mount of Blessing, p. 28.

Den e Sermon di Seru, Hesus a bisa: "Bendishoná ta esnan ku ta hasi pas, pasobra nan lo ser yamá yunan di Dios" (Mat. 5:9). Hibando esaki mas leu, no solamente El a afirmá e mandamentu kontra matamentu, El a bisa ku nos no mester rabia òf warda renkor (lesa Mat. 5:21-26) i ku nos mester stima nos enemigunan i hasi orashon pa esnan ku ta persiguí nos (lesa Mat. 5:43-48), kua ta nifiká ku nos mester tuma pasonan aktivo pa buska nan bon. Tin hopi storia inspiradó di personanan ku a dediká nan bida na hasi pas den lugánan yen di problema, i a trese señalnan di rekonsiliashon i sanashon, i hopi biaha a aliviá hopi di e inhustisia i sufrimentu ku e konfliktonan akí a kousa.

Salomon a skirbi ku tin "un tempu pa ta ketu i un tempu pa papia" (Ekl. 3:7, NIV). E tabatin rason, i pa haña e balansa ei no ta simpel pa nos niun. Sinembargo, ora ta trata di papia pa esnan oprimí i ta un bos pa esun sin bos i trata na vense malu ku bon, ta posibel ku komo iglesia nos a faya dor di demasiado silensio ora nos bos mester a ser tendé?

Hopi biaha Kristiannan a papia tokante ta e man- i pianan di Hesus, refiriendo na e yamada pa servisio práktiko na otronan manera Hesus lo a manda nos hasi. Pero den e ròl profétiko manera ta ser demostrá den Beibel, e promé yamada di Dios ta pa hòmber- i muhénan ta Su bos, i ora nan ta papia den nòmber di Dios, papia tambe na fabor di esnan ku Dios ke defendé (lesa Salmo 146:6-10).

Lesa Isaias 58:1-10. Kiko e mensahe akí, duná den su tempu, lugá i konteksto spesífiko, ta bisa nos awe den un otro tempu, lugá i konteksto diferente? Kuantu a kambia realmente entre e tempu ku Isaias a skirbi esaki i nos mundu awe?

E yamada di e profetanan na hustisia nunka tabata un kaminda na popularidat. Pero motivá pa nan komishon di Dios, komprondiendo e pashon di Dios pa hustisia, simpatisando ku e situashon di esnan pober i oprimí, i buskando lo mihó pa nan sosiedat, e profetanan akí a riska di ta un bos pa esnan sin bos den nan tempu i lugá, apesar di oposishon, inkomodidat, i peliger (lesa 1 Pedro 3:17).

Basá riba nos komprondementu di e evangelio i e yamada pa reflehá Hesus na e mundu, Atventistanan di e di Shete Dia tin tambe hopi kosnan bon di ofresé enkuanto di atendé ku e maldat den mundu.

Manera: "Atventistanan di e di Shete Dia ta kere ku akshonnan pa redusí pobresa i su inhustisianan ku ta kompañ’é ta un parti importante di responsabilidat sosial kristian. Beibel ta revelá klaramente Dios Su interes spesial den esnan pober i Su ekspektativanan pa ku kon Su siguidónan mester reakshoná riba esnan ku ta inkapas pa kuida nan mes. Tur ser humano ta karga e imágen di Dios i ta reseptornan di e bendishonnan di Dios (Lukas 6:20). Ora nos ta traha ku esnan pober nos ta sigui e ehèmpel i siñansa di Hesus (Mateo 25:35,36). Komo un komunidat spiritual Atventistanan di e di Shete Dia ta boga pa hustisia pa esnan pober i ‘ta papia pa esnan ku no por papia pa nan mes' (Proverbionan 31:8, NIV) i kontra esnan ku ta 'priva e pobernan di nan derechinan' (Isaias 10:2). Nos ta partisipá ku Dios ku ‘ta sigurá hustisia pa esnan pober’. (Salmonan 140:12, NIV)”. - Seventh-day Adventist Official Statement on Global Poverty, Yüni 24, 2010.