Haña Sentido di Historia: Zorobabel i Esdras

Señor a influensiá Siro pa permití e promé regreso, den kumplimentu di e profesia di 70 aña di Jeremias. Jeremias a skirbi ku e tera di Juda lo a keda desolá pa 70 aña bou di Babilonia (esaki a tuma lugá di 606/605 P.K. te 537/536 P.K.), pero e ora ei Dios lo a habri e portanan pa e regreso di e koutivonan. Miéntras Daniel tabata studia e eskritonan di Jeremias, el a realisá ku e momentu a yega pa e regreso primintí ei.

Den Daniel 9, Daniel ta angustiá pasobra e 70 aña tabata kasi yega na un fin sin aparente kambio, i e imperio di Persia nobo a subi awor na poder. El a lamentá i a bira na Dios, suplikando pa miserikòrdia i kumplimentu di Su promesanan. Den e mesun kapítulo (Dan. 9:24-27), Dios a sigurá Daniel ku E ta vigilá riba tur kos i tin un futuro planiá, ku un Libertador ku lo muri pa e pueblo pa ekspiá pa nan pikánan, trese hustisia, i kumpli ku e Sistema di sakrifisio. En realidat, Dios tabata bisando: “Daniel, no preokupá. Ya ku e berdadero Libertador (Hesus) seguramente lo bin, lo Mi manda un libertador pa bo tambe awor”. Poko despues, Dios a move Siro, rei di Persia, pa duna òrdu pa liberá e koutivonan. Dios ta semper fiel na Su promesanan (Lesa Daniel 10 kon Dios a intervení pa sigurá e prosperidat di Su pueblo den nan pais di orígen).

Esdras 1 ta registrá e proklamashon di Rei Siro ku e nashon di Israel tabata liber pa regresá Yerusalèm i pa konstruí e kas di Señor. E òrdu a ser duná algun momentu entre e añanan 539-537 P.K. No solamente Siro ta laga nan bai, sino tambe el a sigurá ku nan ta regresá ku regalo- i ofrendanan, inkluyendo e kopanan original di e tèmpel, ku a ser hòrtá dor di Nabukodonosor. E evento akí ta kòrda nos riba e Israelitanan ku a bandoná Egipto hopi aña promé, ora Dios a toka kurason di e hendenan tambe pa presentá nan ku regalonan di despedida. E promé grupo pa regresá Juda tabata komponé pa masoménos 50.000 hende, ku probablemente tabata inkluí muhé- i muchanan di otro teritorionan.

E promé grupo di esnan ku a regresá a risibí e tarea di rekonstruí e tèmpel di Dios. Nos lo studia tokante e oposishon pa konstrukshon di e tèmpel den un lès mas despues. Awor nos lo diskutí e suseshon di reinan di Persia durante e konstrukshon prolongá i e rekonstrukshon di Yerusalèm. Ta importante pa konosé e historia tras di e storianan di Esdras i Nehemias, ya ku e ta proveé un persepshon mas profundo den nan mensahenan.

Lesa Ezra 4:1-7. Ken tabata e diferente reinan menshoná durante ken su reinado e oposishon pa konstrukshon di e tèmpel a tuma lugá?

Ata e lista di reinan Persa, den nan órden kronológiko, ku ta konektá ku e bukinan di Esdras i Nehemias. E ta kuminsá ku Siro, kende a estables’é e Imperio Persa i a konkistá Babilonia na 539 P.K.:

• Siro II “e Grandi” (559–530 P.K.)
• Cambises II (530–522 P.K.)
• Dario I (522–486 P.K.)
• Xerxes I (485–465 P.K.). (Tambe konosí for di e buki di Ester komo Asuero.)
• Artaherhes I (465-424 P.K.).

Ora nos ta studia e bukinan akí, ta hopi importante pa sa ku e aparensia di e reinan akí no ta ser menshoná den Esdras den órden kronológiko. Por ehèmpel, Esdras 4:6-24 a ser hinká promé ku kapítulo 5, ku ta kontinuá e storia di e oposishon pa konstrukshon di e tèmpel. Konsekuentemente, e kartanan ku ta envolví Xerxex I (Asuero) i Artaherhes I deskribí den Esdras 4 a tuma lugá despues di e eventonan registrá den kapítulonan 5 i 6, ku ta trata ku Dario I. E sekuensia akí por parse konfuso pa lesadónan, i e por konta pa algun di e konfushon ku e hendenan tabatin a lo largu di e siglonan respekto e bukinan. Segun ku nos ta pasa dor di e trimèster, konosé e órden di eventonan lo yuda nos komprondé e mensahenan di Esdras i Nehemias mihó.

Den Esdras 7:1-10 i 8:1-14, nos ta mira ku Rei Artaherhes I ta permití Esdras regresá Yerusalèm (e aña ta 457 P.K.) i pa hiba huntu kuné kualke hende ku lo ke regresá. No sa muchu tokante e relashon entre e rei i Esdras, òf si Esdras a traha pa e korte. Esdras 8 ta menshoná e kabesnan di famia di esnan ku a regresá, kuminsando ku e saserdotenan ku a repatriá, siguí pa e liña real, i terminando ku e pueblo hudiu general. Diesdos famia ta ser menshoná spesífikamente, dunando e impreshon ku esaki ta un rekordatorio deliberá di e diesdos tribunan di Israel.

E pasashi ta menshoná masoménos 1.500 hòmber, kua lo a aproksimá 5.000 pa 6.000 total, kontando hendenan muhé i muchanan. Esaki tabata un kantidat muchu mas chikitu ku e promé grupo ku a regresá huntu ku Zorobabel i Josue.

Lesa Esdras 7:1-10. Kiko e ta siña nos tokante Esdras?/span>

Esdras ta un eskriba ku un herensia saserdotal. Komo un saserdote, e ta un desendiente di Aaron, e ruman hòmber di Moises, ku tabata e promé saserdote di e nashon di Israel. Debí na e relatonan registrá den Esdras, komo tambe den tradishon hudiu, e nòmber di Esdras ta destaká asta awe. Si Esdras a sirbi komo un eskriba den e korte di Rei Artaherhes no ta konosí; por lo tantu, e deskripshon akí di Esdras komo un eskriba sea ta referí na su responsabilidatnan anterior òf na su abilidatnan, kua el a kuminsá usa despues di su regreso na Juda. Sinembargo, Esdras mester a traha pa Artaherhes den algun kargo serkano pa asina e rei mand’é komo lider di e ekspedishon.

Den Esdras 7:6 i 10, Esdras ta ser deskribí komo un eskriba òf maestro “kapasitá” i “dediká”. E palabra “kapasitá” literalmente ta nifiká “rápido”, ku ta sugerí un hende ku ta lihé den komprondementu i maneho mental di informashon. Esdras tabatin un mente rápido, e tabata konosí pa su konosementu i astusia mental respekto e Lei di Dios. Ademas, e echo ku e rei a skohe Esdras pa trese un grupo di Israelita Juda ta un testimonio di e kurashi i abilidatnan di liderazgo di Esdras.

Lesa Esdras 7:11-28. Kiko tabata e komponentenan di e dekreto di e rei? Dikon e instrukshonnan akí tabata importante pa e pueblo di Israel?

E dekreto di Artaherhes ta parse e promé dekreto di Siro. E rei ta konsehá tur hende ku ta dispuesto, spesialmente di e liñanan saserdotal, pa hasi e biahe pa Yerusalèm. Aunke di akuerdo ku e dokumentonan históriko di Murashu, mayoria di e Hudiunan finalmente a keda na Persia (manera demostrá den e storia di Esther), tabatin esnan ku a warda pa e oportunidat pa kuminsá un bida nobo den e tera di nan antepasadonan. E rei a dirigí mayoria di su komentarionan na e tesoreronan di e teritorio Trans-Eufrates. E tesoreronan mester a proveé Esdras ku loke sea e tabatin mester pa restourá e siudat i “pa embeyesé e kas di Señor” (Ezra 7:27, NKJV). Finalmente, e rei a enkargá Esdras pa sigurá e opservansia korekto di e Lei di Dios komo tambe e lei di e pais, dor di establesé e sistema hudisial. E órden i organisashon ku e mandato akí lo a produsí ta aspektonan importante di kualke sosiedat. Ademas, e rei a hasié mas fásil pa Esdras i e Israelitanan restourá nan pais natal.

E preokupashon di e rei pa e rekonstrukshon di e siudat i e tèmpel ta indiká ku el a bira un kreyente den e Dios di Esdras? Artaherhes ta yama Dios e “Dios di Israel, ku ta biba na Yerusalèm” (Esdras 7:15, NKJV). E terminologia ku e rei ta usa tokante e Dios di Israel ta impliká ku e tabata mira Señor komo djis un otro deidat lokal ku mester a ser satisfasé pa medio di regalo. E no tabata ke pa e dios lokal akí rabia kuné i su yunan (Esdras 7:23). Ademas, nos mester nota ku 457 P.K. ta e aña tambe di un revolushon Egipsio kontra e gobièrnu di Persia; por lo tantu, ta probabel ku e akshonnan amabel di e rei tabata designá pa gana lealtat di e provinsia di Juda.

Desafortunadamente, apesar di e interakshon ku e rei tabatin ku tantu Esdras komo Nehemias, esei no a hasié un kreyente den Dios. A lo ménos nada den e tèkstnan ta indiká ku el a bira un, kua ta nifiká ku Señor por usa asta hendenan no kombertí pa hasi Su boluntat riba tera.

Lesa Esdras 7:6 i 10. Kiko e tèkstnan akí ta siña nos tokante e importansia di edukashon religioso adekuá?

E deboshon di henter su kurason di Esdras na Dios i su desishon pa studia, praktiká, i siña e Palabra di Dios (Esdras 7:6,10) a prepar’é pa ministerio mas grandi na Israel. E tèkst bíbliko literalmente ta deklará ku el a dediká su mes na studia, hasi, i siña e Lei di Dios.

Ellen G. White ta proveé un revelashon importante: “Nasé di e yunan hòmber di Aaron, Esdras a ser duná un training saserdotal; i ademas di esaki el a atkerí un familiaridat ku e eskritonan di e magonan, e astrólogonan, i e sabionan di e esfera Medo-Persia. Pero e no tabata satisfecho ku su kondishon spiritual. E tabata anhelá pa ta den total harmonia ku Dios; e tabata anhelá pa sabiduria pa ehersé e boluntat divino. I asina el ‘a prepará su kurason pa buska e lei di Señor,i pa hasié’. Esdras 7:10. Esaki a hib’é na dediká su mes di forma diligente na un estudio di e historia di e pueblo di Dios, manera ta registrá den e eskritonan di profeta- i reinan. El a skrudiñá e bukinan históriko i poétiko di Beibel pa siña dikon Señor a permití Yerusalèm ser destruí i Su pueblo hibá koutivo den un tera pagano” - Prophets and Kings, p. 608.

“E esfuersonan di Esdras pa rebibá un interes den estudio di e Skrituranan a ser duná permanensia pa su obra kuidadoso i di bida largu di preservá i multipliká e Eskritonan Sagrado. El a rekohé tur e kopianan di e lei ku e por a haña i a laga transkribí i distribuí esakinan. E palabra puru, asina multipliká i poné den mannan di hopi hende, a duna konosementu ku tabata di balor inkalkulabel” - Página 609.

Nota ku aunke Esdras a siña di e kustumbernan di e paganonan, el a mira ku nan no tabata korekto; por lo tantu, el a buska pa konosé e bèrdat for di e Fuente di bèrdat, kua tabata e Palabra di Dios i e “lei di Señor”. E mester a deskustumbrá di hopi di loke el a siña na e universidatnan mundial, pasobra, sin duda, hopi di loke nan tabata siña tabata robes. Despues di tur kos, kuantu bon “e eskritonan di e magonan i e astrólogonan” tabata bai hasié?