Nehemias

E buki di Nehemias ta habri un poko den e mesun forma ku e buki di Daniel (lesa Dan. 1:1,2), i esei tabata ku mal notisia. Sí, hopi a regresá na e patria di nan antepasadonan, pero kosnan no tabata bayendo masha bon pa nan aya.

Lesa Nehemias 1:1-4. Dikon Nehemias tabata asina preokupá? Kiko tabata su kontesta riba e mal notisia ku el a risibí?

Algun hudiu kapturá añanan promé a ser hibá na Susa, un di e kuater sentronan atministrativo di e Imperio Persa, kaminda Nehemias a sirbi den e palasio real komo un kopero. E término uzá pa “Hanani un di mi rumannan hòmber” mas probablemente ta referí na un ruman di sanger, pasobra tin un referensia similar ma ku ta zona mas familiar na Hanani den Nehemias 7:2, aunke e por ta un referensia na djis un kompatriota israelita. E kombersashon ku Hanani mas probablemente a tuma lugá entre meimei di novèmber i meimei di desèmber di 445 P.K., algun 13 aña despues di e regreso di Esdras na Yerusalèm. Hanani ta reportá ku e situashon na Yerusalèm ta grave. E pueblo no tabata kapas pa rekonstruí Yerusalèm, i e enemigu a destruí e murayanan di e siudat, lagando e indefenso i desolá.

Mester menshoná ku Rei Artaherhes a aplastá e speransa di esnan ku a regresá dor di para e progreso di e konstrukshon despues ku e hendenan mas aya di e riu a keha (Esdras 4). Esaki a permití e enemigunan destruí e murayanan di e siudat (Esdras 4:23). Nehemias lo a tende rumornan di tal desaster, ma e no tabatin kontestanan definitivo te na e momentu akí.

Apesar ku e tèmpel a ser rekonstruí, e no tabata funshonando plenamente pasobra e hendenan ku tabata nesesario pa e servisio di tèmpel no por a biba den Yerusalèm. E situashon a hasi Nehemias tristu segun e notisia a penetrá den su alma: e Hudiunan no a glorifiká Dios apesar ku nan a regresá pa e propósito ei. En kambio, nan a neglishá e kas di Dios i e Siudat Santu, debí na nan miedu di e enemigu i opreshon.

Por lo tantu, Nehemias outomátikamente a bira na Dios. E no ta keha ku e pueblo di Juda ta falta fe òf kritiká nan komo kobarde, ni e ta djis aseptá e situashon komo status quo. Nehemias ta simplemente baha riba su rudia i ta kuminsá hasi orashon i yuna.

Lesa e orashon di Nehemias ku ta ser haña den Nehemias 1:5-11. Kiko ta e diferente komponentenan di e orashon? Dikon e ta inkluí su mes den e orashon komo esnan ku ta kulpabel?

1. Dios, Bo ta grandi i tin miserikòrdia (Neh. 1:5).

2. Tende mi (Neh. 1:6).

3. Konfeshon di pikánan (Neh. 1:6, 7).

4. Kòrda riba Bo promesanan (Neh. 1:8, 9).

3. Bo a redimí nos (Neh. 1:10).

2. Tende mi (Neh. 1:11).

1. Dios konsedé prosperidat i miserikòrdia (Neh. 1:11).

E orashon di Nehemias ta un komposishon bunita ku ta konta di e grandesa di Dios, nan propio pekaminosidat, i ta konkluí ku un gritu pa yudansa. E orashon ta parse e orashon di Daniel den Daniel 9, i ta posibel ku Nehemias tabata konosí ku e orashon ei. Ta bon pa nota ku Nehemias no ta kuminsá ku un gritu pa yudansa, sino mas bien promé e ta deklará e bèrdat tokante ken Dios ta; Grandi i Temibel. Tambe e ta señalá ku Dios ta kumpli ku Su pakto i tin miserikòrdia di esnan ku ta stim’E, komo si fuera pa kòrda Dios ku E tabata semper fiel i no por ta niun otro manera awor.

E orashon ta den un struktura spesial (deskribí akiriba) ku ta sentra riba versíkulo 8, kaminda Nehemias ta artikulá e promesanan di Dios. Nehemias ta bisa: “Kòrda!” Den otro palabra: Kòrda, Dios, ku Bo a primintí ku lo Bo plama nos ora nos ta infiel pero ku tambe Bo a primintí di trese nos bèk i restourá tur kos. Ya ku esun promé e tuma lugá, awor ta tempu pa kumpli ku e otro pasobra nos ta bolbiendo bèk na Bo. Nehemias no tin miedu di reklamá e promesanan d Dios i pa kòrd’E riba nan. Naturalmente, no ta ku Dios no sa òf ta kòrda Su promesanan. E ke pa nos kere den nan i por lo tantu ekspresá nan ku bos duru na djE. Dor di verbalisá loke Dios a primintí nos, nos por ser fortalesé den nos propio determinashon pa konfia den e promesanan ei, spesialmente na momentunan ora tur kos ta parse sin speransa.

Nehemias 1:11 ta bisa ku Nehemias ta e kopero di e rei. Pa nos esaki por parse manera un trabou sin importansia, pero koperonan por tabata hòmbernan di influensia poderoso, ya ku nan tabatin un akseso konstante i djaserka ku e rei. Koperonan tabata purba bibidanan pa e rei pa asina evitá enfermedat òf morto di e rei. Herodotus ta mustra ku e Persanan tabatin koperonan den honor haltu, ya ku nan tabata ser konsiderá komo funshonarionan haltu. Por ehèmpel, e kopero di e rei asirio Esarhadon tabata tambe e ministro prinsipal di e reino. Por lo tantu, Nehemias tabata okupá un posishon haltu den e reino, i pa motibu di su akseso na e rei, e ta supliká na Dios pa uz’é pa papia ku e rei tokante e situashon na Juda.

Lesa Nehemias 2:1-8. Kiko a sosodé komo resultado di e orashonnan i ayuno di Nehemias?

E orashon a ser kontestá den luna di Nisan, kua ta aproksimadamente e luna di aprel di 444 P.K. Kuater luna a pasa desde ku Hanani i e Hudiunan a trese e notisia preokupante tokante Yerusalèm pa Nehemias. Pa kuater luna Nehemias a hasi orashon i a yuna, i tur dia e por tabata pars’é manera kos ku Dios no tabata kontestando. Pero e tempu di Dios semper ta perfekto. Dios a prepará e rei pa tende Nehemias i pa kontestá di forma faborabel.

No tabata un kaso di tur dia di laga e kopero ser relevá di su debernan pa un tempu pa ta gobernadó den un tera diferente. Dios a papia a traves di Nehemias i a impreshoná e Rei Persa Artaherhes I pa hasi Nehemias gobernadó riba e teritorio di Juda. E menshon di e reina ta sugerí ku esaki posiblemente tabata un okashon privá, komo ku no tabata kustumber pa e reina ta presente semper pa banketenan formal. Nehemias no ta menshoná Yerusalèm inmediatamente, pa asina evitá e rei di tin ideanan prekonsebí, pero mas bien e ta hasi un apelashon emoshonal na e rei tokante algu personal p’e. Pa momentu ku e lugá spesífiko a ser menshoná, e rei a ser ganá.

E rei a manda kartanan ku Nehemias pa Sanbalat i horonita i pa Tobias e amonita, e funshonarionan haltu di e region mas aya di e riu, pa asina traha e kaminda pa loke Nehemias mester a bai kumpli kuné. Ademas, e rei a ordená Asap, e guardia di e mondi di e rei, pa proveé Nehemias ku tur e palu nesesario pa rekonstruí e siudat, murayanan, i portanan di e tèmpel.

Lesa Nehemias 2:9,10. Kiko e versíkulonan akí ta bisa nos tokante e oposishon ku Nehemias i e hudiunan en general tabata bai afrontá?

Nehemias a yega Yerusalèm algun momento den e di dos parti di aña 444. Oposishon ta parse di ta surgi asta promé ku Nehemias ta intentá kualke akshon, ya ku e petishon entregá na e gobernadónan ta lanta problema. Aunke Tobias ta un nòmber hudiu, kua ta nifiká “Señor ta bon” (su yu hòmber Jehohanan tambe tabata karga un nòmber hudiu, “Señor ta miserikòrdioso”), el a sirbi komo gobernadó di Amon. Por lo tantu, Yerusalèm tabata rondoná pa enemigunan: Sanbalat, gobernadó di Samaria na nort, Tobias gobernadó di Amon na ost, i Gesem e árabe (Neh. 2:18,19) na zùit, ku a apoderá di Edom i Moab. Ta lamentabel ku e liderazgo den e region ei a rechasá Nehemias pa ta preokupá tokante e “bienestar” di esnan oprimí. Tèrdó no ta regosihá riba e bon suerte di esnan ku nan ta intimidá.

Nehemias su “yegada na Yerusalèm, aunke, ku un eskolta militar, mustrando ku el a bin riba un mishon importante, a eksitá e yalursheit di e tribunan pagano ku tabata biba serka di e siudat, ku tantu biaha a manifestá nan enemistat kontra e hudiunan dor di montoná riba nan daño i insulto. Prinsipalmente den e obra di maldat akí tabatin sierto hefenan di e tribunan akí, Sanbalat e horonita, Tobias e amonita, i Gesem e arabir. For di prinsipio e lidernan akí tabata opservá e movementunan di Nehemias ku wowonan krítiko i tabata hasi esfuerso ku tur medio den nan poder pa frustra su plannan i di stroba su trabou” - Ellen G. White, Prophets and Kings, p. 635.

Sin duda, Señor a yama Nehemias pa e tarea akí i lo a proveé tur loke e tabatin mester. Armá ku e konosementu di e promesanan di Dios i e siguransa di e yamada dor di Dios, Nehemias a prosedé. Pero el a move padilanti kuidadosamente i ku orashon. Den otro palabra, aunke e tabata sa ku Dios tabata kuné, e konosementu aki no a strob’é, básikamente, di pensa bon riba loke e lo a hasi.

Lesa Nehemias 2:11-20. Kiko Nehemias ta hasi pa prepará pa e proyekto di rekonstruí e muraya?

Lèsnan di Liderazgo:

Lès 1: Nehemias no ta bisa niun hende kiko e plannan ta ku “Dios a pone den mi kurason pa hasi na Yerusalèm” (Neh. 2:12). No solamente e no ta bisa e enemigu, sino e ta skond’é pa e lidernan hudiu tambe.E ta riba un mishon di eksplorashon pa averiguá kiko mester ser hasí.

Lès 2: Promé ku presentá algu, Nehemias ta hasi su tarea i ta plania tur e trabou ku lo ser rekerí.

Lès 3: Ora e papia di e tarea, Nehemias ta deskribí promé loke Dios a hasi te asina leu pa guia e ekspedishon akí, i despues e ta añadí e palabranan di e rei. E ta enkurashá promé ku e pidi kompromiso. No ta ni mas ni ménos ku un milager ku e hudiunan a respondé di forma asina faborabel i ta disidí di konstruí, apesar di e resistensia ku lo bin. Dios a prepará no solamente e rei a traves di e orashonnan i ayuno di Nehemias, sino tambe e pueblo hudiu, pa asina nan respondé di forma balente i ku kurashi.

Lesa Nehemias 2:19,20. Kiko e versíkulonan akí ta bisa nos tokante e fe di Nehemias? Kon tèkstnan manera Deuteronomio 7:9, Salmo 23:1-6, i Numbernan 23:19 lo por a yuda Nehemias?

Nos kombersashonnan ta demostrá ken nos ta i kiko nos ta kere realmente. Nehemias tin tendensia di papia palabranan edifikante. E no tin miedu di inkluí Dios den tur loke e bisa i glorifik’E tambe, asta ora hende ta hasi chèrchi i ta harié. Apesar ku Nehemias tabata konosé e despresio ku e enemigu ta sinti pa ku nan, e no ta kòrta palabra òf laga Dios for di e kombersashon. Meskos ku Hose na Egipto hopi aña promé, Nehemias no tin miedu di promové su Dios entre hendenan ku no ta kere den djE.