Afrontando Oposishon

Lesa Esdras 4:1-5. Dikon bo ta kere ku e remanente israelita a rechasá e yudansa di otro hendenan den konstrukshon di e tèmpel?

Na promé bista, e petishon tabata parse manera un kos amabel i kordial pa hasi, pues pakiko rechasá e yudansa? Den un sentido, e kontesta ta ser hañá den e tèkst mes. E “atversarionan” a bin pa ofresé nan yudansa. Atversarionan? Esei so ta duna un sugerensia poderoso di pakiko e Israelitanan a reakshoná manera nan a hasi.

Dikon e hendenan a ser yamá “atversarionan”? 2 Reinan 17:24-41 ta splika ku e hendenan aki a ser importá for di otro nashonnan den Samaria i e region den besindario despues ku e Israelitanan di e Reino di Nort a ser deportá. E rei di Asiria a manda saserdotenan pa nan, ku mester a siña nan kon pa adorá e Dios di e tera, es desir, e Dios di Israel. Sinembargo, e religion ku a resultá a inkorporá e diosnan Kananeo tambe. Por lo tantu, e remanente israelita tabatin miedu ku e religion akí lo a ser hibá den nan adorashon di tèmpel. P’esei, e kos mihó i mas sabí pa hasi tabata loke nan a hasi, kua tabata pa bisa: “Nò, danki”.

Nos mester kòrda tambe dikon tur esaki tabata pasando, pa kuminsá. Tabata e kompromiso konstante di nan antepasadonan ku e religionnan pagano rondó di nan ku a hiba na e destrukshon di e tèmpel, komo tambe na nan eksilio. Probablemente, miéntras nan tabata den e proseso mes di konstruí e tèmpel di nobo, e último kos ku nan lo tabata ke lo tabata pa yega muchu serka aliniá ku e pueblonan rondó di nan.

Kiko otro den e tèkstnan akí ta mustra dikon e rechaso akí tabata e kos korekto pa hasi? (Lesa Esdras 4:4,5).

Desafortunadamente, e oposishon ku e Hudiunan a topa kuné di e nashonnan rondó di nan, manera ta ser deskribí den Esdras 4-6, a laga nan ku miedu i no dispuesto pa traha riba e tèmpel. Manera a ser menshoná anteriormente, Esdras 4:6-6:22 no ta skirbí den órden kronológiko. Por lo tantu, nos lo wak kapítulo 5 promé ku kapítulo 4

Lesa Esdras 5:1-5. Dikon Dios ta manda e profetanan Hageo i Zakarias serka e Hudiunan? Kiko ta resultado di nan profesia?

E Hudiunan a stòp di konstruí pasobra nan tabatin miedu. Pero Dios a manda nan na Juda pa rekonstruí e tèmpel i e siudat, i E tabatin un plan. Ya ku nan tabatin miedu, E mester a hasi algu pa asina enkurashá nan. Por lo tantu, El a yama dos profeta pa intervení. Oposishon humano no ta stòp Dios; asta si e Hudiunan a kontribuí na e oposishon akí pa medio di nan propio akshonnan, Dios no a bandoná nan. El a obra a traves di e profetanan pa motivá i push nan den akshon atrobe.

Lesa Hageo 1. Kiko ta e mensahe pa nan, i kiko nos por saka for di esaki pa nos mes?

“E profetanan Hageo i Zakarias a ser lantá pa enfrentá e krísis. Den mensahenan konmovedor e mensaheronan skohé akí a revelá na e pueblo e kousa di nan problemanan. E falta di prosperidat temporal tabata resultado di un negligensia pa pone e interesnan di Dios na promé lugá, e profetanan a deklará. Si e Israelitanan a honra Dios, si nan a mustr’E debido rèspèt i kortesia, dor di hasi e konstrukshon di Su kas nan promé trabou, nan lo a invitá Su presensia i bendishon” - Ellen G. White, Prophets and Kings, p. 573, 574.

Kiko e “enemigunan” a hasi den Esdras 4:6-24 pa asina para e trabou na Yerusalèm?

E “pueblo di e tera” a skirbi kartanan di akusashon kontra e Hudiunan i nan trabou promé na Darío (Esdras 5 i 6), despues na Rei Xerxes (Asuero) komo tambe na Artaherhes. Nan tabata hasiendo tur kos den nan poder pa para e obra na Yerusalèm.

E pueblo di e nashonnan den besindario tabata bisa ku si e siudat a ser rekonstruí, e rei lo a pèrdè su poder riba dje pasobra Yerusalèm tabata semper un lugá di rebelion i problema den pasado. Desafortunadamente, Rei Artaherhes a ser konvensí pa kere ku e Hudiunan tabata konstruyendo solamente pasobra nan tabata ke haña nan independensia i asina insitá konfrontashon. El a ordená pa stòp e trabou, i e pueblo a manda un ehérsito pa prevení konstrukshon di e siudat. E aserkamentu enérgiko akí a trese e obra pa Dios na un paro.

Lesa Esdras 4:23,24. Dikon e Hudiunan a stòp di konstruí? Nan no tabata sa ku Dios tabata ke pa nan rekonstruí e siudat? Kiko a para den kaminda?

Ta evidente ku e Hudiunan a realisá ku Dios a yama nan pa rekonstruí e siudat i e tèmpel, pero pa motibu di e oposishon fuerte nan tabatin miedu. Kisas nan a bin ku èksküsnan manera “Awor lo no ta e momentu korekto”, òf “Si esaki tabata realmente loke Dios tabata ke pa nos hasi, E lo a proveé un manera”, òf “Kisas nos lo no mester a bin bèk aki ètòl”. Ora oposishon bin den kaminda di hasi loke nos ta kere ku Dios a yama nos pa hasi, nos tin e tendensia di kuestioná i duda e guiansa di Dios. Nos por konvensé nos mes fásilmente ku nos a kometé un eror. Miedu por paralisá nos mente, i nos pensamentunan ta kombertí den desesperashon i impotensia na lugá di ta di focus riba e poder di Dios.

Lesa Nehemias 4. Kiko e Hudiunan a hasi bou di liderazgo di Nehemias pa enfrentá oposishon? Dikon tabata importante pa nan prepará nan mes pa bringa, mas bien ku simplemente hasi nada, keriendo ku Dios lo a protehá nan?

Despues di bai i bin, e pueblo a kuminsá traha atrobe. E Hudiunan a hasi orashon, i despues Nehemias a hinka un guardia aktivo den otro. E pueblo tabata kambia warda durante dia i nochi pa asina ta prepará pa kualke atake ku por a surgi. Nehemias tambe a organisá e pueblo rondó di e muraya ku armanan pa asina kada famia tabata kla pa bringa. Ademas, el a parti su sirbidónan den dos grupo, ku unu trahando i e otro kargando armanan. Tabatin tambe provishonnan spesial pa tur esnan ku tabata traha riba e muraya, komo ku nan tabata mas serka di e peliger. Kada un di e konstruktornan tabata tene un spada den un man i ku e otro nan tabata añadí blòki/piedranan i semènt na e muraya. Nan tabata prepará pa afrontá e oposishon. Nan a hasi nan parti; Dios a hasi sobrá. E fe di Nehemias den e protekshon di Dios ta inspiradó. Sinembargo, e no a sinta riba banki i spera pa Dios hasi tur kos. Nan a prepará lo mihó ku nan tabata por.

E dos pasashinan, “No tene miedu di nan. Kòrda Señor, grandi i temibel, i bringa pa boso rumannan, boso yunan hòmber, boso yunan muhé, boso esposanan, i boso kasnan” (lesa Neh. 4:13,14; NKJV), i “Nos Dios lo bringa pa nos” (lesa Neh. 4:19,20; NKJV) ta algun di e deklarashonnan di mas inspiradó ku ta ser hañá den Beibel.

E Hudiunan por a stòp di konstruí atrobe pa motibu di e oposishon persistente, ma, e biaha aki, na lugá di ser vensé pa miedu, nan a tene duru na e promesa ku Dios lo a bringa pa nan. Ora nos topa oposishon pa e nòmber di Dios, pa nos kreensianan, òf pa loke Dios yama nos pa hasi, nos mester kòrda ku “Dios lo bringa pa nos”. Na final, e Hudiunan a realisá ku Señor tabata tras di loke nan tabata hasiendo, i esaki a duna nan e kurashi pa sigui padilanti.

Lesa Nehemias 6:1-13. Dikon Nehemias ta mira e trabou ku e ta hasiendo na Yerusalèm komo un “gran trabou” (Neh. 6:3)? Kiko tabata e intentonan den e kaso akí pa stòp e?

Kapítulo 6 ta deskribí hopi intento riba bida di Nehemias. Sanbalat i Gesem a sigui manda karta pa Nehemias pa asina logra pa e bin serka nan bou di preteksto di un reunion. Sinembargo, e reunion tabata den e vaye di Ono, kua tabata den teritorio enemigu, i asina a revelá e berdadero intenshon di e invitashon. Sanbalat,Tobias, i Gesem ta mira un bentana di oportunidat ku lo dura solamente te ora e muraya ser terminá i e portanan ser será. E Hudiunan tin e protekshon di e rei persa, i por lo tantu nan enemigunan no por konkistá nan a traves di un atake frontal. Pero si nan deshasí di e lider, nan lo detené e progreso òf kisas asta stòp e Hudiunan pa semper. Nan no ta entregá. Asta si Nehemias no ta kontestando, nan ta sigui purba. Mester tabata frustrante pa Nehemias tin ku dil ku oposishon tur momentu. E ta respondé nan dor di deklará: “Mi ta hasiendo un gran trabou” (Neh. 6:3, NKJV)

Segun normanan di mundu, Nehemias tabata hasiendo un gran trabou komo un kopero pa e rei, kua tabata un profeshon prestigioso, un di esnan di mas haltu den e tera kaminda e tabata sirbi komo un konsehero pa e rei. Pero konstruí un siudat ku tabata den ruina, ku no tabatin niun aparente nifikashon pa mundu? Esei ta loke e ta yama un gran trabou? Nehemias tabata konsiderá e trabou pa Señor komo “grandi” i mas importante ainda pasobra el a realisá ku e honor di e nòmber di Dios tabata den wega na Yerusalèm.

Tambe, ora Dios a establesé e sirbishinan di santuario, El a instituí e saserdosio. Pa mantené e santuario santu i spesial den mente di e pueblo, El a permití solamente e saserdotenan realisá e tareanan paden di e tèmpel. Riba nos mes, ta difísil pa nos mira e santidat di Dios; por lo tantu, Dios a hasi provishon pa yuda e Israelitanan bin den presensia di Dios ku reverensia. Nehemias tabata sa ku kortenan di tèmpel tabata pa tur hende, ma no e salanan interior. Segun su palabranan, tokante reuní paden di e tèmpel, Semaias no solamente ta mustra su mes di ta un profeta falsu dor di sugerí algu ku tabata kontrali na e direktiva di Dios, sino tambe el a eksponé su mes komo un traidor.