Lektura di e Palabra

Lesa Nehemias 8:1,2. Kiko esaki mester bisa nos tokante kon importante e Palabra di Dios tabata pa e pueblo?

Ora e Hudiunan finalmente a kompletá e konstrukshon di e muraya i a muda pa Yerusalèm, nan tur a reuní riba e plenchi habrí di Yerusalèm den e di shete luna. E di shete luna, e luna di Tishri, tabata kisas e luna di mas importante pa e Israelitanan, komo ku e tabata dediká na e Fiesta di Trompèt (preparashon pa e huisio di Dios, promé dia di luna), e Dia di Ekspiashon (Dia di Huisio, di 10 dia di luna), i Fiesta di Tabernakel (rekordando e liberashon di Dios for di Egipto i Su provishon durante e biahe den desierto, di 15 dia di luna). E reunion a tuma lugá riba e di promé dia di luna, riba kua e Fiesta di Trompèt tabata ser selebrá. E lidernan a yama e hòmber- i muhénan di e nashon huntu pa e asamblea speshal aki pa asina, pa medio di lektura di e Lei, proveé un oportunidat pa nan siña tokante nan Dios i historia.

E pueblo a invitá Esdras pa trese e buki di e Lei di Moises nan dilanti i pa les’é. Asta nan a konstruí un plataforma, un púlpito, pa e okashon. No tabata algu ku e lidernan a imponé riba e kongregashon. Al kontrario, "nan", e pueblo, a bisa Esdras pa trese e Buki. Mas probablemente Esdras a lesa pa e pueblo for di e buki di Moises, kua tabata inkluí e lei ku a ser duná na Moises riba Seru Sinaí.

Lesa Deuteronomio 31:9-13. Kiko Señor a bisa nan aya, i ki lès nos por saka for di esei pa nos mes?

Den Deuteronomio 31:9-13, Moises a bisa e Israelitanan ku, durante e Fiesta di Tabernakel, nan mester a reuní i lesa e Lei di Dios huntu, i e ta menshoná e vários gruponan ku mester reuní: hòmber-, muhé-, mucha-, i strañeronan ku ta bibando denter di nan portanan.

Esdras a "trese e Lei" dilanti di e asamblea pa lesa. Kiko el a lesa pa nan? Solamente e Dies Mandamentunan bes tras bes pa mitar dia? E referensia na e buki di Lei mester ser komprondé komo e sinku bukinan di Moises, Génesis te ku Deuteronomio, konosí komo e Torá Hebreo. E término "lei", por lo tantu, ta kubri solamente un parti di loke a ser inkluí den e lektura; lo tabata mihó pa tradusié komo "instrukshonnan". Nan ta instrukshonnan di Dios pa kapasitá nos pa konosé e kaminda riba kua nos mester kana pa asina no pèrdè e meta. Ora Esdras a lesa, e pueblo a tende tokante nan historia komo e pueblo di Dios, kuminsando ku Kreashon te na e tempu di Josué. A traves di historia-, kantika-, poema-, bendishon-, i leinan, nan a ser rekordá di nan luchanan pa sigui Dios i e fieldat di Dios na nan. E Torá ta inkluí "lei", pero e ta mas ku esei; e ta inkorporá e historia di e pueblo di Dios i spesialmente ta revelá e guiansa di Dios. Konsekuentemente, el a duna e komunidat su raisnan i identidat.

Lesa Nehemias 8:3; Deuteronomio 4:1; 6:3,4; Josue 1:9; Salmo 1:2; Proverbionan 19:20; Ezekiel 37:4; i Mateo 17:5. Kiko e versíkulonan akí ta siña nos tokante kon nos mester interaktuá ku e Palabra di Dios?

Ku e pueblo tabata deseá di tende e Palabra di Dios mas probablemente tabata resultado di Esdras su lektura i siñansa di e Palabra desde ku el a yega Yerusalèm algun 13 aña promé. E tabata dediká na e obra di Dios i a determiná pa hasi un diferensia. E Palabra di Dios a bira real pa e pueblo segun ku nan a sigui tend’é for di Esdras. Komo resultado, nan a tuma un desishon konsiente pa tende i pa skucha pasobra nan tabata interesá den tende di Dios. Pues, na e okashon akí, nan a aserká e Torá ku reverensia i un deseo pa siña.

Saturá nos mes ku e Palabra ta krea un anhelo mas profundo pa Dios den nos bida.

Lesa Nehemias 8:4-8. Kon lektura di e Lei tabata ser hasí?

Tabatin dos grupo di 13 hòmber ku tabata pará huntu ku Esdras durante e lektura. E promé grupo di 13 (Neh. 8:4) tabata yuda lesa e Palabra di Dios, i e di dos grupo di 13 (Neh. 8:7) tabata yuda ku komprondementu di e pasashinan. Nos no tin ningun informashon tokante kon e areglo akí a funshoná riba un plenchi habrí; sinembargo, e hòmbernan ku tabata yuda ku e lektura posiblemente tabata karga e Torá (ròlnan Hebreo tabata pisá i otro hende mester a lora nan habri) komo tambe lesa for di dje susesivamente, i alterná entre e lesadónan. Pa motibu ku nan tabata lesando for di mainta te ku mèrdia, nan a haña un manera pa alkansá tur hende riba e plenchi.

E frasenan "nan a duna e sentido" i "a yuda e pueblo komprondé e lektura" (Neh. 8:8, NKJV) por sea referí na interpretashon òf tradukshon di e pasashinan. Tur dos ta mes probabel den e kaso aki. E pueblo a regresá for di Babilonia, kaminda nan a biba hopi aña, i e idioma prinsipal aya tabata Arameo. P'esei, tende e lektura na Hebreo lo no tabata fásil pa komprondé pa hopi, spesialmente e generashonnan mas hóben. Na mes momentu, lesadónan di Beibel por benefisiá di splikashon òf komentario. Predikashon i splikashon ta laga e teksto haña bida i ta pone skuchadónan apliká e informashon personalmente.

Lesa Echonan 8:26-38. Kiko a sosodé aki ku ta semehante na loke a sosodé na Yerusalèm den e tèkstnan akiriba? Ki lèsnan tin pa nos aki?

Komo Protestantnan, nos ta komprondé ku kreyentenan individual mester konosé e Palabra di Dios pa nan mes, i ku nos no mester aseptá siegamente e palabra di ningun hende relashoná ku bèrdat bíbliko, no importá nan outoridat. Na mes momentu, ken no a ser bendishoná dor di tin un hende ku a yuda splika e nifikashon di tèkstnan? Nos mester, kada un di nos, sa loke nos ta kere pa nos mes, pero esaki no ke men ku, tin biaha, nos no por ser iluminá dor di e siñansanan di otronan

Ora Esdras habri e Palabra di Dios, e Torá Hebreo, e pueblo ta lanta para. Promé ku Esdras lesa, e ta bendishoná Dios. Despues ku e lesa, e pueblo ta kontestá ku "Amèn, Amèn!" (Neh. 8:5,6, NKJV) den unísono miéntras nan ta hisa nan mannan den direkshon di shelu. Despues nan ta bùig nan kabes abou i adorá ku nan kara den direkshon di suela.

Lesa Nehemias 8:9-12. Dikon e lidernan a bisa e pueblo pa no "bira tristu ni yora"?

"Asina, den añanan despues, ora e lei di Dios a ser lesá na Yerusalèm na e koutivonan ku a regresá for di Babilonia, i e pueblo a yora pa motibu di nan transgreshonnan, e palabranan di grasia a ser pronunsiá: 'No tene rou.... Bai, kome e vèt, i bebe e bibida dushi, i manda porshonnan pa esnan ku no tin nada prepará: pasobra e dia akí ta santu na nos Señor: no sea tristu tampoko; pasobra e goso di Señor ta boso fortalesa. Nehemias 8:9,10" - Ellen G. White, The Ministry of Healing, p. 281.

Miéntras e pueblo tabata skucha na e palabranan di Dios, nan a ser impaktá pa nan propio pekaminosidat i a kuminsá yora. Ora Dios revelá Su Mes na nos i nos kuminsá kapta ku Dios ta yen di amor, bondat, miserikòrdia, i fieldat, nos propio defisiensianan i fayo pa ta loke nos mester ta, ta bin dilanti. Mirando e santidat di Dios a traves di Su Palabra ta pone nos mira nos fatalidat den un lus nobo. E realisashon akí a pone e pueblo di Israel yora i bira tristu, pero nan no mester a bira tristu, "pasobra e goso di Señor ta boso fortalesa" (Neh. 8:10). Den otro palabra, apesar di nan fayonan, nan por a konfia den e poder di Dios.

Esaki tabata tambe un dia spesial, un dia santu, e Fiesta di Trompètnan (Rosh Hashanah), riba kua suplánan kòrtiku riba e trompètnan tabata señalá e importansia di preparashon di "kurason" pa e huisio di Señor (Dia di Ekspiashon, ku ta ser selebrá riba e di dies dia di e luna Tishri). E suplamentu di e trompètnan tabata señalá un yamada pa para dilanti di Dios i arepentí. Pasobra e dia tabata designá pa rekordá e pueblo pa bira na Dios, e yoramentu i biramentu tristu ta komprendibel. Pero e lidernan a kòrda nan ku unabes nan a arepentí, Dios a tende nan, i p'esei tabata tempu pa regosihá den e pordon di Dios.

E "goso di Señor ta boso fortalesa" (Neh. 8:10) ta sirbi komo un rekordatorio ku ta boluntat di Dios pa nos regosihá i gosa di bida. Mas ku tur kos, e no ta djis kualke tipo di goso, ma e ta e goso ku ta bin pasobra nos konosé Dios i e realidat di Su amor. Deleitá den Dios, den Su bondat, i regosihá pa motibu di tur kos ku Dios a proveé pa nos ta algu ku nos mester hasi esfuerso pa hasi tur dia. Ademas, tin delisia den Dios ta duna nos e forsa pa afrontá e dia i pa dil ku loke bin den nos kaminda.

Lesa Nehemias 8:13-18. Kiko a sosodé aki, i kiko e ta bisa nos tokante e pueblo i nan lidernan na e momentu akí?

E siguiente dia e lidernan di e pueblo ta bin serka Esdras pa asina siña mas for di e buki di Dios. E inisiativa akí ku a ser demostrá dor di e lidernan a mustra nan deseo pa hiba e komunidat na Dios. Nan a komprondé ku guia e pueblo na e manera korekto lo no a tuma lugá si nan mes no a buska Dios i a buska konosementu di djE.

Lesa Levítiko 23:39-43. Kiko e Israelitanan a ser ordená pa hasi, i dikon?

Nota ku den Nehemias 8:15, e tèkstnan ta referí na e echo ku loke nan tabata hasiendo tabata di akuerdo ku loke ta "skirbí". Nos ta mira aki un otro ehèmpel di kon serio nan ke obedesé e Palabra di Dios awor, posiblemente pasobra despues di dékadanan den koutiverio nan a siña nan lès tokante desobedensia. Tambe, den e tèkstnan di Levítiko nan mester a selebrá e fiesta i "regosihá dilanti di Señor boso Dios pa shete dia" (Lev. 23:40, NKJV). Ku otro palabra, ora nan ta rekordá e aktonan di miserikòrdia i grasia i salbashon di Dios, e pueblo mester a regosihá den loke Señor a hasi pa nan.