Dios i e Pakto

Lesa Nehemias 10:1-29(i refreská bo memoria dor di lesa Nehemias 9:36-38). Ken ta hasiendo e pakto akí, i dikon nan a drenta den dje?

Ounke ta solamente e lidernan a firma e dokumento, e tèkst ta mustra klaramente ku "e restu di e pueblo" a drenta den "un maldishon i un huramentu pa sigui e Lei di Dios" (Neh. 10:28,29, NIV). Kiko tabata asina signifikante tokante e pakto ku nan tur tabata deseá di drenta un akuerdo ku Dios? Pa kontestá e pregunta akí, nos mester bai bèk te na prinsipio, i komprendé e idea bíbliko di e pakto.

E pakto tabata importante pasobra e tabata parti di e historia di Dios den Su trato ku humanidat pekaminoso, i el a demostrá e anhelo di Dios pa un relashon ku hende. Tambe el a permití hende pa demostrá nan deseo di ta dediká na Dios.

E historia bíbliko di kreashon den Génesis 1 i 2 ta revelá no solamente e kreashon di e promé sernan humano sino e relashon entre nan i Dios, i entre nan mes tambe. Sinembargo, piká a drenta i a kibra tur e relashonnan ei. Piká ta e antítesis di kreashon, tresiendo de-kreashon (morto) a kambio.

E genealogia di Adam ta splet finalmente, ya ku Cain ta skohe maldat (Gen. 4:8-19) i Sèt ta aseptá Dios (Gen. 5:3-24). E genealogia di Cain ta kulminá den Lamech (Gen. 4:17-19), e di shete (inklusivo) for di Adam, kende a introdusí poligamia. Violensia i vengansa di banda di Cain ta para den posishon kontrali na e linahe fiel di Sèt. E genealogia di Sèt tambe ta numerá, pero e di shete den e liña akí ta Enok, kende "a kana ku Dios" (Gen. 5:24) i a ser hibá shelu.

Desafortunadamente, e mundu a tene na maldat mas ku el a tene na Dios, i a yega un momentu ku e linahe di esnan fiel tabata asina chikitu, i pronto lo no a sobra ningun famia a traves di ken Dios lo por a kumpli Su palabra dor di manda e Simia primintí pa salba sernan humano. Na e momentu ei, Dios a intervení ku e diluvio. E diluvio, sinembargo, tabata un de-kreashon mas aleu, un revokashon i destrukshon di bida, i sinembargo Dios a destruí solamente loke sernan humano a ruiná kaba (Gen. 6:11-13).

Despues di e diluvio, Dios a kuminsá di nobo, awor ku Noe i e hendenan ku a bin despues. Ku nan tambe El a buska un relashon, i sentral na e relashon ei tabatin e idea di pakto. Beibel ta identifiká shete pakto prinsipal ku Dios a hasi ku hende:

• Promé Pakto - Adam (Génesis 1-3)
• Di dos Pakto - Noe (Génesis 6-9)
• Di tres Pakto -Abraham (Génesis 12:1-3)
• Di kuater Pakto - Moises i e nashon di Israel (konosí komo e Pakto di Sinaí òf Mosaiko; Eksodo 19-24)
• Di sinku Pakto -Finees (Num. 25:10-13)
• Di seis Pakto - David (2 Sam. 7:5-16)
• Di shete Pakto - Pakto Nobo (Jer. 31:31-34)

Lesa e siguiente tèkstnan. Kiko nan ke men ku e “pakto eterno”? (Gen. 9:16, 17:7, Isa. 55:3, Hebr. 13:20).

Beibel ta inkorporá e término "pakto eterno" diesseis biaha. Di nan, diestres ta ser spesífikamente apliká na e paktonan ku Abraham, Israel na Sinaí, i David. Kada un di e paktonan menshoná akiriba, aunke nan ta úniko, tabata karga e imprenta di "e pakto eterno". Meskos ku e evangelio eterno ta ser menshoná pa promé biaha den Génesis 3:15, pero despues gradualmente ta ser revelá den henter Beibel, mesun kos ta apliká na e pakto eterno. Kada pakto konsekutivo ta sirbi pa eksponé i profundisá nos komprendementu di e pakto di amor eterno, kua ta ser revelá mas plenamente den e plan di salbashon. E Paktonan Nobo i Bieu, manera nan ta ser distinguí hopi biaha, ta kontené e mesun komponentenan.

Eruditonan di Beibel ta rekonosé ku tin un struktura típiko den paktonan bíbliko; esaki asta a ser mirá den paktonan trahá dor di e Hititanan antiguo. Es desir, Dios tabata komuniká ku e pueblo na un manera ku, den nan kultura, nan por komprondé spesialmente.

E paktonan ku tabata komun durante e tempu di Israel antiguo tabatin e siguiente partinan: preámbulo (ken Dios ta); prólogo históriko (relashon di pasado definí); stipulashon- òf leinan; bendishon- i maldishonnan; testigunan, provishon spesial òf señal di e pakto. Por lo tantu, no mester ta un sorpresa ku Dios a usa algu similar pa komuniká ku Su pueblo e tempu ei. El a usa loke tabata konosí pa nan.

Por ehèmpel, henter e buki di Deuteronomio ta skirbí den forma di un pakto, pasobra Moises ta invitá e pueblo di Dios pa drenta un relashon nobo di pakto ku nan Dios. E ta ekspresá e pakto di e siguiente manera:

1. Preámbulo (Deut. 1:1-5);
2. Prólogo históriko (Deut. 1:6-4:43);
3. Stipulashon- òf leinan (Deut. 4:44-26:19);
4. Bendishon- i Maldishonnan (Deut. 27-30);
5. Testigunan (Deut. 30:19); i finalmente,
6. Provishon spesial (Deut. 31:9-13).

Lesa Hosue 24. Kon e patronchi di pakto akí ta ser revelá den e kapítulo ei tambe?

E mesun kos ta bèrdat ku e renobashon di e pakto trahá dor di Hosue.

Na promé lugá, un preámbulo ta ser menshoná kaminda Dios ta presentá Su mes komo "Señor, e Dios di Israel" (Hosue 24:2). Despues ta sigui un prólogo históriko largu kaminda Hosue ta rekordá e pueblo loke Dios a hasi pa nan den pasado (Hosue 24:2-13). Despues di e historia akí, e stipulashon- òf leinan ta ser numerá (Hosue 24:14,15,23), bendishon- i maldishonnan ta ser menshoná (Hosue 24:19,20), testigunan identifiká (Hosue 24:22,27), i provishon spesial deklará (Hosue 24:25,26). Aki tambe e forma básiko di un pakto a ser usá pa komuniká ku Israel i mustra nan, no solamente e guiansa di Dios den nan pasado, sino loke tabata ser rekerí di nan pa sostené nan parti di e pakto.

Lesa Hosue 24:15. Ki prinsipio tin aki ku nos por apliká na nos mes awe?

Lesa Nehemias 10:30-39. Kiko ta kuater kos ku e Israelitanan a primintí pa hasi komo parti di e pakto renobá?

E pueblo a primintí lo siguiente:

1. Nada di matrimonionan miksto (ningun matrimonio ku un persona ku lo por hiba hende na idolatria);
2. Berdadero wardamentu di Sabat (ningun distraishon atraves di transakshonnan di negoshi);
3. Kanselamentu di debe i wardamentu di e aña Sabátiko pa kuida e pobernan i duna nan libertat;
4. Sostené e tèmpel finansieramente, su servisionan, i personal dor di trese e promé frutanan, e primogénito, i e diesmo, i sigurá asina e kontinuashon di berdadero adorashon.

E promé tres promesanan ta relatá na relashonnan ku otronan (matrimonio i kanselamentu di debe) i ku Dios (Sabat), miéntras e último (Neh. 10:32-39) ta trata ku regulashonnan di tèmpel.

E meta di e komunidat tabata pa demostrá ku nan tabata komprometé na e pakto, i por lo tantu nan lo a implementá formanan práktiko di konstruí nan relashon ku Dios i otronan. Asta si nan no tabata mantené e pakto perfektamente, nan a komprondé ku kustumber- i práktikanan korekto lo a influensiá e futuro. Si e nashon israelita tabata bai riba e kaminda korekto, nan mester a establesé práktika- i kustumbernan ku lo a hiba nan kaminda nan kier a bai. Si nan tabata ke tin un relashon djaserka ku Dios, e ora ei hasi e Sabat importante i kuida e tèmpel tabata pasonan importante den e direkshon ei.

Desafortunadamente, nan no a kumpli masha bon ku nan promesanan, manera ta ser demostrá den e último kapítulonan di Nehemias. Sinembargo, asta si tur hende no a kumpli ku nan, algun òf hopi hende a kumpli. Ku yudansa di Dios i manteniendo nos enfoke riba djE, nos por desaroyá e kustumbernan korekto i sigui riba e bon kaminda.

Wak Nehemias 10:32-39 atrobe. Dikon e práktikanan di tèmpel tabata esensial pa e Israelitanan, manera ta ser mustrá pa "nos lo no neglishá e kas di nos Dios" (Neh. 10:39, NKJV)? Dikon e Tèmpel tabata asina importante pa e fe den su totalidat? (Lesa Hebr. 8:1-7 tambe).

E Israelitanan a primintí di kuida e tèmpel. Apesar di ku nan tabata un grupo chikitu ku tabata ser oprimí finansieramente dor di e reinan, nan a disidí ku nan mester duna for di e tiki ku nan tabatin pa asina e tèmpel por a prosperá i no solamente sobrebibí. P’esei, nan a skohe pa duna un tersera parti di un shèkel pa e servisio di tèmpel tur aña, na lugá di solamente ora e senso tuma lugá, manera e lei tabata ordená. E nashon a mira un nesesidat di bai mas ayá di loke tabata ser rekerí. Ademas nan a asigná e responsabilidat pa kima palu pa kandela riba altar na famianan spesífiko, ya ku nan a rekonosé ku sin organisashon e práktika lo a mengua.

Promé fruta-, primogénito-, i diesmo- i ofrendanan tabata aspektonan di e servisio di tèmpel ku tabata proveé pa e ministerio di e saserdotenan i Levitanan. Un désimo parti di tur kos mester a bai pa e Levitanan. Tambe, primogénitonan mester tabata ser redimí pa plaka, agregando na e kantidat ku e Levitanan tabata risibí. Sinembargo, un désimo parti di e diesmo di e Levitanan tabata bai pa e saserdotenan.

E tèmpel tabata sirbi komo e pulso di kurason di e nashon israelita. E tabata asina sentral pa nan fe ku e tragedia di mas grandi a sosodé ora Nabukodonosor a basha e tèmpel abou i a bai ku e ophetonan sagrado.

Ora e tèmpel tabata ser manehá na e manera apropiá, e tabata duna e nashon un bida spiritual vibrante pasobra e tabata mustra e pueblo na e solushon final pa e problema di piká, kua tabata a traves di e morto di un lamchi. Ora Hesus a muri na krus, e solushon ei a ser proveé (Rom. 5:5-10). Ademas, a traves di e servisio anual di e Dia di Ekspiashon, e pueblo a haña sa ku finalmente Dios tin un plan pa kaba ku maldat i piká pa semper. Ku otro palabra, e tèmpel a sirbi komo senario pa revelá henter e plan di salbashon na e pueblo. E lèsnan ku nos por haña ora nos wak e servisionan di tèmpel ta inmenso i nesesario pa duna nos un kuadro mas amplio di e karakter di Dios i pa iluminá e plan di salbashon.