Prueba-, Tribulashon-, i Listanan

Lesa Esdras 1:9-11 i Daniel 1:1,2. Kon e tèkstnan den Daniel ta yuda nos komprendé loke Esdras tabata referí na dje?

Nota kon den Esdras detayenan ta ser duná, miéntras ku den Daniel e kuadro grandi a ser presentá. Huntu, sinembargo, e tèkstnan akí ta mustra ku Señor ta den kontròl.

"E historia di nashonnan ta papia na nos awe. Na kada nashon i na kada individuo Dios a asigná un lugá den Su gran plan. Awendia hende- i nashonnan ta ser di tèst dor di e chumbu den man di Esun ku no ta kometé eror. Kada un, pa medio di nan propio eskoho, ta disidí nan destino, i Dios ta anulá tur pa kumplimentu di Su propósitonan" -¬ Ellen G. White, Prophets and Kings, p. 536.

Lesa Daniel 5. Kiko e tèkstnan akí ta siña nos tokante e huisio riba Belsasar?

Babilonia a kai na òktober di 539 P.K., ora Siro, rei di e ehérsito di Medo-Persia, a konkist’é. Belsasar, ku tabata dependé eróneamente riba su éksitonan, luho, i fama, tabata asina arogante ku el a organisá un bankete sin moderashon riba e anochi ku lo a terminá ku su morto. E man divino a skirbi riba muraya di e palasio ku su dianan tabata kontá i yegando na un fin. Ounke e tabata sa e destino i historia di kombershon di e poderoso Rei Nabukodonosor, e no a siña su lès. Semper ta trágiko ora ku nos no skucha na e spièrtamentunan di Dios i no ta sigui Su instrukshon.

Profeta Daniel tabata ei semper, pero el a ser ignorá. Ora nos pèrdè sentido di e santidat di Dios i Su presensia den nos bida, nos ta subi un kaminda kompañá ku komplikashon-, problema-, i tragedianan, kual finalmente ta terminá den morto.

Skrudiñá e listanan den Esdras 2 i Nehemias 7. Kiko bo ta ripará tokante nan dos?

E ripitishon di Esdras 2 (e lista di esnan ku a regresá for di e koutiverio babilóniko huntu ku Zorobabel i Hosue) den Nehemias 7 ta deliberá. Atrobe, e listanan akí kisas por ta parse laf pa nos, pero nan ta revelá un punto importante, kua ta ku Dios ta preokupá ku detayenan ku kisas nos no ta preokupá kuné.

E murayanan di Yerusalèm awor tabata kla, i e tèkst bíbliko intenshonalmente ke demostrá ku e generashon di esnan ku a repatriá ku Esdras-Nehemias, tur ta kontribuí pa ku e gran logro aki, aunke ta Dios so a duna nan e éksito akí. E generashon presente a konstruí riba e logronan di esun anterior, aunke e tarea tabata kompliká, yená ku barera, i no kompletá asina lihé manera nan lo tabata ke.

E liderazgo di Esdras i Nehemias a ser balorá, pero e pueblo tambe a hasi su trabou. Kada grupo okupá ku diferente tarea, realisá diferente momentunan, pero e resultado ta impreshonante. E komienso (Esdras 2) ta ligá ku e final (Nehemias 7), i no solamente e di dos tèmpel a ser konstruí, sino tambe Yerusalèm a ser remodelá i bon establesé.

Lesa Nehemias 7:73. Kiko e ta siña nos tokante kon eksitoso nan tabata den nan deseo pa hasi boluntat di Dios?

"E yunan di Israel tabata den nan siudatnan".

Den hopi forma, henter e regreso i rekonstrukshon tabata asombroso. Un pueblo ku hopi aña pasá a haña nan ku nan siudat ruiná, nan tèmpel destruí, i nan tera plamá, awor a regresá na e mesun tera i e mesun siudat i tabata konstruyendo tur kos di nobo, asta e tèmpel. E mester a parse milagroso pa nan i pa esnan rònt di nan tambe. Sinembargo, tur esaki tabata di akuerdo ku e boluntat i e promesanan di Dios.

Sin duda, manera nos a mira ayera, tabata un kumplimentu asombroso di profesia ku a trese e Hudiunan bèk for di Babilonia.

Pero manera ku tur kos ku ta enbolbí sernan humano, tabata eksistí problemanan. I un di e problemanan grandi tabata ku, apesar di tur e promesanan maravioso di restorashon despues di e eksilio, hopi di e Hudiunan no kier a regresá na e pais di nan antepasadonan. Es desir, nan a preferá di keda na Babilonia.

Dikon esei lo tabata?

Lesa Esdras 8:1-15. Focus spesialmente riba versíkulo 15. Kiko tabata e preokupashon grandi aki, i dikon e lo tabata un preokupashon pa un hende ku kier a restablesé e nashon di Israel den su tera natal anterior?

Echo ta, no ta tur e Hudiunan na Babilonia, inkluso algun Levita, kier a regresá. Por tabatin vários faktor enbolbí. Hopi di nan a nase i a ser lantá den e tera nobo, i esei tabata tur loke nan tabata konosé. Hopi kisas no kier a hasi e biahe largu i indudablemente peligroso bèk pa un tera ku, pa kuminsá, nunka nan a konosé. Finalmente, sinembargo, nos sa ku nan a trese sufisiente Levita huntu ku nan pa ministrá den e Tèmpel (wak lès di djaweps), apesar di e desafionan.

"Na e momentu ei, e Hudiunan ku a permanesé den e tera di eksilio tabata einan pa kasi un siglo i mei. Kobamentunan di Nippur a trese na kla numeroso dokumento ku ta mustra ku tabatin hopi Hudiu riku ku tabata biba den e region ei di Mesopotamia durante e reinado di Artaherhes 1. Ta p'esei, e por tabata un tarea difísil pa Esdras i su lidernan kolaboradó pa konvensé mes tantu pa regresá ku esnan ku a kompañá nan. E kolonistanan aki ku a regresá lo por a spera solamente un bida duru di pionero den e patria bieu, ku muchu ménos komodidat ku na Babilonia. Mirando e konsiderashonnan akí ta sorprendente pa mira ku Esdras a logra persuadí kasi 2.000 famia pa purba nan suerte ku nan rumannan den e patria antiguo" - The SDA Bible Commentary, tomo 3, p. 376.

Lesa Deuteronomio 30:1-6. Ki promesa a ser duná aki na e pueblo hebreo? Kiko e promesa akí, entre otronan meskos kuné, mester nifiká pa hòmbernan manera Esdras i Nehemias?

Esdras i Nehemias tabata konosé e profesianan. Nan tabata sa ku Dios tabata bai trese e pueblo bèk for di koutiverio. Nos a mira den Nehemias 9 ku nan a komprendé nan historia i e motibunan pa nan problemanan. Na mes momentu tambe, nan tabata konosé e grasia i guiansa di Dios, apesar di nan pikánan.

Por lo tantu, nan a konfia den Señor, ku E lo a hasi e regreso for di koutiverio eksitoso. E promesanan ei, sinembargo, no tabata nifiká ku nan lo no a afrontá hopi desafio riba kaminda. Den gran partí di e trimèster akí te asina leu, nos a wak e prueba- i tribulashonnan ku nan a afrontá, asta meimei di e promesanan di Dios.

Lesa Esdras 8:16-23. Kiko tabata e desafio aki, i kon nan a respondé riba dje?

Apesar di e promesanan, Esdras tabata sa kon peligroso e biahe tabata. Por lo tantu, e yunamentu i humiá su mes dilanti di Dios tabata maneranan di rekonosé kon dependiente nan tabata di Señor pa nan éksito. Na e momentu akí, ku asina tantu peliger nan dilanti, e idea di pidi rei pa yudansa i protekshon a lo ménos a krusa mente di Esdras. Pero al final, el a skohe pa no hasi esei, kontrali na Nehemias (Neh. 2:9), ku tabatin un eskolta pa proteh’é. Opviamente Esdras a sinti ku si el a pidi, esei lo a trese desonra pa Señor, pasobra ya el a bisa e rei: "E man di nos Dios ta riba tur esnan pa bon ku ta busk'E, ma Su poder i Su rabia ta kontra tur esnan ku bandon'E" (Esdras 8:22, NKJV). Den e kaso aki, el a sali bon pa nan, pasobra despues el a skirbi (Esdras 8:31) ku Señor a protehá nan, i nan a yega nan destinashon seif.

Lesa Nehemias 11:1,2. Kiko ta pasando den e pasashi aki? Dikon nan lo tabatin ku tira lòt pa mira ken lo tabatin ku biba den Yerusalèm kontrali na biba den e otro siudatnan?

Kiko Nehemias 11 ta siña nos? Tabata nesesario pa haña habitantenan nobo pa Yerusalèm for di esnan resien yegá ku a bin bèk na e tera despues di nan eksilio.

Aparentemente tabata mas fásil pa biba den kunuku ku den siudat. Hendenan tabatin nan propio tereno, heredá di nan antepasadonan. Pa bandon’é i bai biba na Yerusalèm tabata un sakrifisio, i hopi por a sinti, ku rason, ku nan lo a ser eradiká si nan a hasi esei. Bida lo tabatin desafionan nobo, i un estilo di bida den stat ta diferente for di biba den un área di kunuku. Muda pa un ambiente nobo i deskonosí semper ta difísil.

Kon desafiante ta pa muda pa un siudat òf pais nobo kaminda e evangelio mester ser plamá? Mishon den e siudatnan ta rekerí disponibilidat pa kuminsá aventura- i difikultatnan nobo.

"Nos obreronan no ta komunikando e mensahe manera nan mester hasi. Nos dirigentenan no ta spièrtá pa e obra ku mester ser realisá. Ora mi kòrda riba e siudatnan den kua asina poko a ser hasí, den kua tin tantu míles ku mester ser spièrtá di e pronto binida di e Salbador, mi ta sinti un intensidat di deseo di mira hòmber- i muhénan sali bai hasi e obra den poder di e Spiritu, yená ku e amor di Kristu pa e almanan ku ta peresé" - ¬ Ellen G. White, Testimonies for the Church, tomo 7, p. 40.

Dikon e lista largu di saserdote- i Levitanan ta ser menshoná den Nehemias 12:1-26? Kiko ta e konekshon entre nan i e dedikashon di e muraya di Yerusalèm ku ta ser deskribí den e di dos parti di e mesun kapítulo (Nehemias 12:27-47)?

Dios ke pa kosnan ser hasí na un manera apropiá. Mester di hendenan dediká i konsagrá promé ku kosnan grandi por ser lográ. E famianan saserdotal akí a yuda Nehemias konstruí e murayanan pa asina nan por a adorá e Dios bibu di forma sigur den e tèmpel sin intervenshon di pafó. Murayanan tabata importante pa seguridat, pero sin saserdotenan deboto adorashon berdadero lo tabata na peliger. P’esei henter e pueblo, den nan vários funshonnan, tabatin nan ròl pa hunga.