Adorando Señor

Lesa Nehemias 12:27-29. Nota algun di e palabranan klave ku ta revelá kon nan adorashon i alabansa tabata. Kon lo bo a deskribié?

E nashon israelita a enkargá un klase spesífiko di e Levitanan pa ta kantadó- i músikonan pa e servisionan di tèmpel. Dios a dirigí e práktika i a duna instrukshonnan pa e servisio, ya ku e adorashon den tèmpel mester tabata bunita i presentá di forma profeshonal.

Rei David a organisá e práktika aki den un sistema mas elaborá i magnífiko ku a ser hasí anteriormente. Por lo tantu, e desendientenan di Asaf, kende David a apuntá komo e lider di adorashon den tèmpel, ainda a ser designá komo "e kantadónan enkargá ku e sirbishi di e kas di Dios" (Neh. 11:22, NKJV).

Buska 1 Krónikanan 25:6-8. Kiko esaki ta siña nos tokante kon sentral i importante músika tabata pa nan adorashon i nan kantamentu di "e kantikanan di Señor"?

E kantadónan tabata Levitanan i, por lo tantu, ofisialmente asigná na e tèmpel. Pues, proveé músika pa e servisionan di tèmpel i tabata nan trabou pagá. Durante e tempu di Rei David, un akademia di músika kompletamente desaroyá a ser organisá, kua el a supervisá. E tabatin maestro- i studiantenan, hóben i bieu, ku tabata traha warda den e tèmpel, proveyendo músika. Algun tabata toka instrumènt, otronan tabata kantadó, i otronan tabata enkargá ku e instrumèntnan i e bistínan ku nan tabata usa pa e servisionan. Kiko tabata e propósito di un organisashon asina profeshonal? E tabata sirbi pa desaroyá talento i e vishon di ekselensia den adorashon. Ekselensia semper mester ta un meta den adorashon. Alabansa mester bin di kurason i ser ekspresá di e mihó manera asina ku hende lo ser elevá spiritualmente. Un hende por asumí ku e músiko- i kantadónan ei ku tabata sirbi den e tèmpel a ser skohé kuidadosamente pa guia e servisio di adorashon.

Despues ku e Skrituranan a papia tokante e dedikashon di e muraya, i despues e reunion di e kantadónan, e siguiente versíkulo, Nehemias 12:30, ta papia tokante purifikashon. "Despues e saserdotenan i e Levitanan a purifiká nan mes, i a purifiká e pueblo, e portanan, i e muraya" (NKJV).

E rais di e palabra hebreo pa "purifiká", thr, ta nifiká ta limpi, ta puru, i e ta ser usá den hopi konteksto den Tèstamènt Bieu, inkluyendo esnan ku e idea di ta moralmente puru i limpi dilanti di Dios.

“Ma si nos ta kana den lus, meskos ku E ta den lus, nos tin komunion un ku otro, i e sanger di Hesus, Su Yu, ta purifiká nos di tur piká. Si nos bisa di ta sin piká, nos ta gaña nos mes i e bèrdat no ta den nos. Si nos konfesá nos pikánan, E ta fiel i hustu i lo pordoná nos nos pikánan i purifiká nos di tur inhustisia" (1 Juan 1:7-9, NIV). Kiko e tèkst aki ta siña nos tokante (1) naturalesa humano, (2) e pordon di Dios, i (3) e poder di Dios den nos bida?

E Tèmpel i su servisionan tabata komponentenan krusial di e religion di Israel antiguo. Pero e Tèmpel i su servisionan tabata un medio pa un fin, no un fin den i di nan mes. I e fin ei, naturalmente, tabata pa hiba e pueblo den un relashon salbador ku nan Dios di pakto, Señor Hesukristu, i pa konosé Su poder purifikadó den nan bida. I ta e konosementu di loke Dios a hasi, loke Señor a salba nos for di dje, ku ta hiba nos na stim’E i ador'E. Esei ta un motibu dikon, bes tras bes, e Israelitanan antiguo tabata bolbe konta loke Dios a hasi den nan pasado. E tabata yuda nan konosé e bondat i amor di Señor, kua tabata fundamental pa e goso i gradisimentu ku mester a penetrá den nan eksperensia di adorashon.

Pa nos awe, e eksperensia i apresio di pordon pa piká mester sali di gratitut na Dios i un sentido di speransa i goso. E ora ei ta fásil pa alabá Señor i ekspresá apresio pa e bunitesa di Su karakter. I ki un revelashon mas grandi di e karakter di Dios nos por tin ku mira Hesus riba e krus, kargando e kastigu pa nos pikánan pa nos mes no tin ku karga e kastigu ei?

Lesa Nehemias 12:31-42. Dikon músika tabata un parti asina importante di e selebrashon akí?

Parti di e servisio di adorashon den tempu di Nehemias tabata pa krea dos koro di akshon di grasia ku tabata kana rònt Yerusalèm kantando, kompañá pa instrumèntnan. Nan tabata kuminsá na mesun kaminda i despues nan tabata separá, kada un bayendo den un direkshon diferente rònt di e murayanan di e siudat. Un grupo tabata ser guiá dor di Esdras, ku tabata bai dilanti, i e otro grupo tabatin Nehemias parti patras. E dos koronan tabata reuní un biaha mas na e Porta di Vaye i for di ei nan tabata prosedé den tèmpel. Saserdotenan ku tabata supla trompèt tabata komplementá kada proseshon. Unabes e koronan a drenta den e tèmpel, nan tabata para un enfrente di otro. Tabata un proseshon i servisio di adorashon ekselentemente organisá.

Pa kontestá dikon músika ta un parti asina importante di e selebrashon i servisio di adorashon, nos mester wak su nifikashon den konteksto di e tèmpel. Músika den tèmpel no tabata un konsierto ku hende tabata bin pa disfrutá, manera bai skucha e di 4 sinfonia di Beethoven presentá den un sala di konsierto. Mas bien, miéntras e músikonan tabata kanta i toka e instrumèntnan, e pueblo tabata baha kabes den orashon. E tabata parti di nan adorashon.

E akto sentral di e tèmpel i adorashon tabata konserní sakrifisionan, ku riba su mes tabata aktonan bastante desagradabel. Despues di tur kos, kiko otro nan tabata hasi sino kòrta garganta di animalnan inosente? E tokamentu di músika asina bunita, den hopi forma, ademas di elevá pensamentu di e pueblo den direkshon di shelu, tabata yuda hasi henter e eksperensia di adorashon mas plasentero.

Buska ehèmpelnan den Beibel kaminda músika tabata un aspekto importante di adorashon. Reflehá spesialmente riba Eksodo 15:1; 2 Krónikanan 20:21,22; i Revelashon 15:2-4.

Tantu riba tera komo den shelu, músika ta parti di e eksperensia di adorashon. Nota ku den e versíkulonan akiriba, e kantamentu ta totalmente tokante loke Señor a hasi pa Su pueblo, inkluyendo duna nan viktoria "riba e bestia" (despues di tur kos, kon otro nan lo a haña e viktoria ei?). Ta alabansa na Dios pa Su aktonan di salbashon.

Lesa Nehemias 12:43. Kiko tabatin spesial tokante ofresé "gran sakrifisionan" komo parti di nan selebrashon di adorashon?

Sakrifisionan tabata e aspekto di mas esensial di adorashon durante e tempu di e tèmpel. Vários sakrifisio tabata ser usá, sea pa e promesa di pordon òf pa ekspresá e goso di kompañerismo i gratitut na Dios. Sakrifisionan tabata proveé e sustansia pa adorashon, ya ku nan ta rekordá e adoradónan di e bèrdat di Dios i ken E ta, i tabata mustra na e Simia Primintí, e Mesias, kende lo a sakrifiká Su bida pa nan, pasobra E ta e Lamchi di Dios.

Lesa Juan 1:29,36; 1 Korintionan 5:7; i Revelashon 5:6,12,13. Kiko nan ta siña nos tokante loke finalmente e sakrifisionan ta señalá? Si e Israelitanan antiguo por a regosihá riba un animal di kunuku morto, un morto ku por a revelá solamente asina tantu bèrdat, kuantu mas motibu nos tin pa regosihá ku nan tabatin?

Nota tambe kuantu biaha e idea di goso i regosiho a paresé den Nehemias 12:43 so. Es desir, meimei di reverensia, i kisas e temor piadoso ku e pueblo a eksperensiá den nan servisio di adorashon (despues di tur kos, matamentu di un animal pa nan pikánan tabata algu solèm), tabatin goso i regosiho tambe. Ora nos ta aserká Dios, mester ta ku maravia i reverensia, komo tambe ku regosiho. Salmo 95 ta demostrá ku e berdadero akto di adorashon ta enbolbí un konvokashon pa kanta, grita ku alegria i hasi músika pa selebrá Dios (Salmo 95:1) komo tambe pa inkliná i hinka rudia dilanti di Señor (Salmo 95:6). Lucha pa alkansá un balanse entre goso i reverensia ta krusial pa adorá, alabá, i adorá nos Kreador.

Lesa Nehemias 12:44-47. Dikon Juda a regosihá "respekto e saserdote- i Levitanan ku tabata ministrá"? Dikon nan tabata importante?

Kiko e trabou di e saserdotenan (ku tabata Levitanan) tabata simbolisá? Lesa Hebreonan 9:1-11.

"E interseshon di Kristu na fabor di hende den e santuario selestial ta mes esensial pa e plan di salbashon ku Su morto riba e krus tabata. Pa medio di Su morto El a kuminsá e obra ei kua despues di Su resurekshon El a subi na shelu pa kompletá. Pa medio di fe nos mester drenta denter di e velo, 'kaminda e prekursor a drenta pa nos'. Hebreonan 6:20" - Ellen G. White, The Great Controversy, p. 489.

Atrobe, aunke e pueblo di e tempu ei siguramente no tabatin e lus ku nos tin awe, nan a komprondé sufisiente pa sa ku e trabou di e Levitanan, kende nan so por a ministrá den e tèmpel, tabata asina importante. Nan tabata entusiasmá ku e obra di Dios por a ser hasí dor di nan.

E nashon tabata pasa tempu ku Dios lesando Su palabra, hasiendo orashon, adorando, i rededikando nan mes na djE. Meimei di tur esaki nan a realisá ku e ministerionan di e tèmpel a ser neglishá i mester a ser restourá. Awor ku esakinan a ser establesé atrobe, e pueblo a regosihá riba e trabou importante ku e Levitanan lo a bai hasi na nan fabor. Dios a impreshoná e nashon ku e ministerionan di e tèmpel tabata parti di Su diseño pa adorashon.

Desafortunadamente, pastornan, maestronan di e Palabra, i músikonan hopi biaha ta ser tumá komo normal. Asta durante tempu di Nehemias, e sosten di e Levitanan tin biaha tabata fuerte i tin biaha hopi suak. E Levitanan hopi biaha mester a bai bèk na otro trabou pa asina proveé pa nan famianan, pasobra e pueblo a stòp di duna diesmo i ofrenda.

Sin diesmo i ofrenda, no tin un iglesia mundial organisá. Si nos ke pa nos ministerionan sigui, nos mester komprometé nos mes na sostené nos pastornan pa medio di kontribushonnan monetario komo tambe apresio verbal. Kisas nunka e iglesia lo ta perfekto, pero esei no mester impedí nos di duna na Dios pa asina Su obra por sigui rònt mundu.