Pueblo Apóstata

Nehemias 13 ta kuminsá ku un preokupashon tokante e strañero/idólatranan amonita i moabita meimei di nan (Neh. 13:1-3). E versíkulonan akí no ta papia tokante kore ku hendenan di un nashon òf rasa diferente ku tabata sigui Dios, sino mas bien nan ta referí na ekspulsá esnan ku tabata di un fe diferente, no konversonan, sino idólatranan. (Lesa tambe Deut. 23:3-6).

Lesa Nehemias 13:1-9. Ken tabata Eliasib i Tobias? Dikon loke nan a hasi ta inaseptabel? Wak Neh. 2:10,19; 3:1; 12:10, 22; 13:28.

Tantu Eliasib komo Tobias ta figuranan konosí den e buki di Nehemias. Eliasib tabata e sumosaserdote di e nashon, i e tabata tambe na enkargo di e tèmpel. Tobias ta ser menshoná komo e enemigu amonita di Nehemias, kende a oponé su trabou na Jerusalem intensamente. E aliansa di Eliasib i Tobias ta sugerí un relashon establesé a traves di matrimonio.

Aunke e registronan di e konekshon matrimonial no a ser preservá, nos sa ku Tobias tabatin un nòmber hudiu (ku ta nifiká "Señor ta bon"), i pues mas probablemente a bin di un trasfondo hudiu. Famia di su esposa, e desendientenan di Ara, aunke no identifiká, ta parse di tabata relashoná ku e famia di Eliasib. Ademas, Sanbalat e horonita, e otro oponente di Nehemias, tabatin un yu muhé ku tabata kasá ku ñetu di Eliasib. Por lo tantu, e sirkulo di intriga rondó di Nehemias mester tabata intenso ya ku e ofisialnan di rango di mas haltu den e tera tabata relatá na otro i den un aliansa kontra e liderazgo di Nehemias.

Durante ousensia di e gobernador, e sumosaserdote a duna Tobias un di e kambernan den e tèmpel ku tabata designá pa warda e diesmo, regalo-, i ofrendanan. Tobias a ser duná residensia permanente den e tèmpel, un forma di estables’é komo un di e lidernan di e nashon. Finalmente e enemigunan di Tobias a logra loke nan tabata ke semper: desplasá Nehemias i nan mes keda na enkargo. Afortunadamente, Nehemias no tabata bai keda sinta ketu sin hasi nada.

Lesa Nehemias 13:10-14. Kiko Nehemias ta tratando na remediá aki?

E kantadónan, e guardiannan di porta, i otro sirbidónan di tèmpel mester a bai traha bèk den nan propio kunukunan pa asina alimentá nan famia, pasobra e obra di Dios no tabata ser sostené. Henter e sistema di diesmo i ofrenda ku a ser establesé ku asina tantu kuidou awor tabata den ruina. Nehemias mester a kuminsá di nobo. E akto di tira tur kos for di den e kamber ta mustra desesperashon.

"No solamente e tèmpel a ser profaná, sino e ofrendanan no a ser apliká korektamente. Esaki tabatin tendensia di deskurashá e generosidat di e pueblo. Nan a pèrdè nan selo i fervor, i no tabata dispuesto pa debolbé nan diesmo. E tesorerianan den e kas di Señor no tabata ser bon suplí; hopi di e kantadónan i otronan ku tabata traha den servisio di tèmpel, ora nan no tabata haña sufisiente sosten, a bandoná e obra di Dios pa traha otro kaminda" - Ellen G. White, Prophets and Kings, p. 670.

Ta fasinante pa mira ku henter Juda a bin huntu atrobe i a rekonstruí loke a ser destruí. E pueblo tabata na banda di Nehemias kontra Tobias i Eliasib, pasobra nan mester a realisá ku Nehemias a hasi tur loke e tabata por pa benefisio di e pueblo. Ademas, Nehemias a konfia e posishonnan di supervisor di e terenonan di tèmpel na hòmbernan ku el a konsiderá fiel i digno di konfiansa. Nan a ser duná e tarea di kolektá e diesmo- i ofrendanan, sigurá ku e merkansianan tabata ser wardá korektamente, i distribuí e rekursonan na e partinan korekto. Ku otro palabra, Nehemias a drenta i a ranka ku rais e sistema korupto di liderazgo, aparentemente den un solo biaha.

Aunke Nehemias a apuntá hòmbernan fiel riba organisashon di e tèmpel, e Sumosaserdote korupto Eliasib, no a pèrdè su posishon, pasobra el a ser transmití a traves di desendensia di Aaron. Su trabou den tèmpel kisas a ser paralisá dor di medidanan di Nehemias di asigná otronan pa algun di e responsabilidatnan di e Sumosaserdote, pero ainda el a keda e Sumosaserdote.

E reforma di Nehemias di e servisionan di tèmpel tabata inkluí e implementashon di diesmo- i ofrendanan.

Lesa Numbernan 18:21-24; Malakias 3:10; Mateo 23:23; 1 Korintionan 9:7-14; 2 Korintionan 9:6-8; i Hebreonan 7:1, 2. Kiko e tèkstnan akí ta siña nos tokante e importansia di diesmo- i ofrendanan, no solamente den servisio di tèmpel, sino tambe pa awendia?

Sin kolèkt di diesmo i ofrenda e tèmpel no por a funshoná. Ora debolbementu di diesmo a stòp, e servisionan di tèmpel a kai den otro, i henter e sistema di adorashon tabata na peliger. Komo ku e personal di tèmpel tabata bai buska otro trabou pa alimentá nan famianan, nan no por a focus riba kuida e tèmpel. Konsekuentemente, e adorashon di Dios a disminuí.

"E sistema di diesmo ta bunita den su simplesa. Su balor ta ser revelá den su demanda proporshonal riba esnan riku i riba esnan pober. Den proporshon di e manera ku Dios a duna nos e uso di Su propiedat, asina nos mester debolbé un diesmo na djE.

"Ora Dios yama pa e diesmo (Mal. 3:10), E no ta hasi apelashon na gratitut òf generosidat. Aunke gratitut mester ta un parti di tur nos ekspreshonnan na Dios, nos ta debolbé diesmo pasobra Dios a ordená esaki. E diesmo ta pertenesé na Señor, i E ta pidi pa nos debolb’é na djE" - Seventh-day Adventists Believe . . . (2dºed). (Boise, Idaho: Pacific Press® Publishing Association, 2005), p. 304.

Meskos ku a pasa ku e tèmpel israelita, nos iglesia lo a kai den otro sin e sosten di e diesmo- i ofrendanan di e miembronan. Nos servisionan di iglesia lo no a funshoná sin hendenan ku ta ser pagá pa pone tempu den ministerio di kalidat, planifikashon, i maneho di e iglesia pa Dios. Adorashon di Dios tambe lo a baha na kalidat. Mas importante ainda, sin diesmo i ofrenda evangelismo lo no tabata eksistí.

Ademas, nos ta duna diesmo pasobra Dios a establesé e sistema den Su palabra. Tin biaha Dios no tin ku splika dikon El a establesé algu. E ta ferwagt ku nos ta konfia ku E ta den kontròl. Nos mester buska pa sa i ta informá kon e sistema ta funshoná, pero despues konfi’é den Su mannan.

Lesa Nehemias 13:15,16. Kiko ta e problema ku Nehemias ta trata aki?

No ta fásil pa para pa Dios ora bo ta den minoria. Pasobra Dios a bisa ku Sabat mester tabata un dia santu riba kua ningun hende mester a hasi ningun trabou, Nehemias tabatin intenshon di sigurá ku e mandato akí tabata ser siguí na Yerusalèm. Sin duda e tabata sinti un obligashon moral pa tuma e posishon ku el a tuma i despues aktua riba dje.

Sabat a ser kreá komo e kulminashon di e siman di Kreashon pasobra e tabata un dia spesial riba kua hende mester a ser renobá i rekreá dor di pasa tempu ku Dios den formanan ku nan no por ora nan ta enbolbí den nan okupashonnan òf otro aktividatnan mundano.

A ser bisá ku "Mas ku Israel tabata warda e Sabat, e Sabat tabata warda Israel”. E punto ta ku e Sabat di e di shete dia tabata, i ta keda, un medio poderoso di yuda mantené fe bibu den esnan ku, pa grasia di Dios, ta trata na ward’é i ta disfrutá di e benefishinan físiko i spiritual ku e ta ofresé nos.

Lesa Nehemias 13:17-22. Kiko Nehemias ta hasi pa stòp e "kumpramentu i bendementu” riba Sabat?

Komo ku Nehemias ta gobernador di Juda, e ta mira su ròl komo esun ku tin ku pone e hendenan kumpli ku e reglanan. Dor ku e reglanan di Juda tabata basá riba e lei di Dios, e ta bira un guardian di e lei ei, inkluyende e Sabat. Kisas si e nobelnan di Juda a lanta kontra e korupshon provoká dor di e Sumosaserdote, Nehemias lo no a haña su mes den e situashon akí. Sinembargo, e gobernante- i nobelnan kisas ya kaba tabata molestiá ku Nehemias pa a pone nan duna bèk na e pobernan anteriormente; por lo tantu, parse ku nan no a oponé kontra e kambionan ku Eliashib i Tobias a trese tampoko.

Nehemias ta reprendé e nobelnan promé i despues ta ordená pa e portanan ser será i ta pone sirbidónan na e portanan pa warda nan. Ora e marshe simplemente ta muda di parti paden di e siudat na esun pafó, e ta tuma medidanan ainda mas drástiko i ta menasá di pone man riba e komersiantenan e siguiente Sabat. Nehemias mester tabata un hòmber di palabra, pasobra e komersiantenan a komprondé i for di e momentu ei no a bin mas.

E selo di Nehemias pa e dia di Sabat ta atmirabel. Nehemias tabata asina pashoná tokante warda Sabat korektamente ku el a asta primintí di "pone man" riba e komersiantenan di otro nashonnan. Ku otro palabra, e lo a intervení personalmente si el a gara nan den e siudat òf na e portanan riba Sabat atrobe. Komo gobernador e tabatin responsabilidatnan ofisial pa sigurá ku e mandamentu akí tabata ser wardá korektamente.

"Sin miedu Nehemias a reprendé nan pa nan negligensia di deber. 'Kiko e kos malu akí ta ku boso ta hasi, i profaná e dia di Sabat?' el a demandá ku bos severo. ‘Boso tatanan no a hasi asina, i nos Dios no a trese tur e maldat akí riba nos, i riba e stat akí? Tòg boso ta trese mas furia riba Israel dor di profaná e Sabat’. Despues el a duna mandato ku 'ora e portanan di Yerusalèm kuminsá bira skur promé ku Sabat', nan mester ser será, i no ta ser habrí te ora ku Sabat pasa; i teniendo mas konfiansa den su propio sirbidónan ku den esnan ku e magistradonan di Yerusalèm lo por a apuntá, el a stashoná nan na portanan pa mira ku su òrdunan tabata ser kumplí" - Ellen G. White, Prophets and Kings, p. 671,672.

E spièrtamentu di Nehemias tokante sakrilegio di e Sabat huntu ku otro spièrtamentunan tokante su violashon, aparentemente a eko a traves di siglonan asta te na e tempu di Hesus. Nos sa esaki, pasobra bes tras bes e Evangelionan ta duna un kuadro di Hesus luchando ku e lidernan religioso tokante wardamentu di Sabat.

Lesa Mateo 12:1-8, Marko 3:1-6, Lukas 6:6-11, i Juan 5:5-16. Kiko tabata e problema aki, i kon un komprendementu di e historia di Israel antiguo ta yuda splika dikon e kontroversia a surgi?

Den nan entusiasmo, aunke ekiboká, pa sigurá ku e Sabat no tabata ser "profaná", e lidernan religioso akí tabata asina fanátiko ku nan a akusá Hesus, e "Señor di Sabat" (Lukas 6:5 NKJV), di a viol’é. Papia di hiba un kos bon demasiado leu! E ironia ta ku, miéntras hopi di e hòmbernan akí tabata ekspresá un gran preokupashon pa e lei, nan a lubidá e "asuntunan di mas peso" di e lei ei: "hustisia i miserikòrdia i fe" (Mat. 23:23, NKJV).