Tratando ku Mal Desishonnan

Lesa Nehemias 13:23-25. Kiko a pasa aki, i kon nos ta splika e reakshon di Nehemias riba e situashon?

Komo e muchanan no tabata papia arameo (e idioma uzá durante e Eksilio) òf hebreo, nan no por a komprondé e siñansanan di Skritura. Esaki tabata un berdadero problema, pasobra e konosementu di e revelashon di Dios por a ser trosé òf asta disparsé asina. E eskribanan i saserdotenan tabata eksponé e Torá prinsipalmente den arameo pa hasi e predikashon kla pa e pueblo. Sinembargo, dor ku e mamanan tabata di Amon, Asdod, i Moab i tabata generalmente e promé kuidadónan pa e muchanan, no ta sorprendente ku e muchanan no tabata papia e idioma di e tatanan tampoko. E idioma ku nos ta papia ta revelá e manera ku nos ta pensa tokante konseptonan, pasobra nos ta usa e vokabulario di e kultura ei. Pèrdida di e idioma bíbliko lo a nifiká pèrdè nan identidat spiritual. Por lo tantu, pa Nehemias, tabata inkonsebibel ku famianan tabata pèrdiendo kontakto ku e Palabra di Dios i konsekuentemente nan konekshon ku e Dios bibu, e Señor di e Hebreonan.

Eruditonan bíbliko ta señalá ku e akshonnan di Nehemias tabata mas probablemente pa pone e pueblo na bèrgwensa públiko komo parti di e kastigunan preskribí den e tempu ei. Ora e ta bisa ku Nehemias a reprendé i a maldishoná nan, nos no mester pensa ku Nehemias a usa palabra malu i terminologia fuerte, pero mas bien e tabata pronunsiá riba nan e maldishonnan di e Pakto. Deuteronomio 28 ta deskribí e maldishonnan ku lo a sosodé ku esnan ku a kibra e pakto. Ta hopi posibel ku Nehemias a skohe e palabranan di Beibel pa hiba nan na realisashon di nan akshon robes i e konsekuensianan di nan mal eskohonan.

Ademas, ora e tèkst ta bisa ku Nehemias "a bati algun di e hòmbernan i a ranka nan kabei saka" (Neh. 13:25, NIV), na lugá di mira Nehemias den un rabia i reakshonando ku furia, nos mester nota ku gòlpi tabata un forma preskribí di kastigu públiko. E tipo di komportashon akí tabata ser apliká solamente na "algun" di nan, kua ta nifiká na e lidernan ku a kousa òf a promové e komportashon robes akí. E aktonan akí mester a sirbi komo métodonan di humiashon públiko. Nehemias ke a sigurá ku e pueblo a komprondé e gravedat di nan eskohonan i e resultadonan ku lo a sali for di nan.

Lesa Nehemias 13:26,27. Kiko esaki ta mustra nos tokante kon importante historia bíbliko ta pa informá nos tokante e peligernan di desviá for di e kaminda korekto?

Salomon a ser hibá mas profundo den piká dor di e eskohonan ku el a hasi. Lo tabata korekto pa bisa ku Salomon a kousa su propio ruina dor di desobedesé e mandato di Dios pa e reinan di Israel: "Ni e [e rei] lo no tuma hopi esposa pa su mes, pa su kurason no desviá" (Deuteronomio 17:17, NKJV). E bida di Salomon ta ser usá komo un ehèmpel negativo: no solamente el a kasa ku mas ku un esposa, sino evidentemente, manera Nehemias ta señalá, el a skohe muhénan ku no tabata adoradónan di Dios.

Dikon Nehemias tabata korekto den reprendé e nashon pa kasamentu miksto ku paganonan? Gen. 6:1-4; Gen. 24:3,4; Gen. 28:1,2; Deut. 7:3,4; i 2 Kor. 6:14.

E mandato pa no kontraé matrimonio miksto no tabata tokante nashonalismo sino tokante idolatria. Hendenan den Beibel a kasa ku hende ku no tabata Israelita. Moises a kasa ku Zipora, un muhé Midianita; Boaz a kasa ku Ruth, un Moabita. En kambio, e asuntu di matrimonio miksto den e mandatonan akí ta konserní kasa ku un hende ku ta di un fe diferente òf ku no tin ningun fe. E problema tabata ku e pueblo den tempu di Esdras i Nehemias no a skohe pa kasa ku kreyentenan den Dios. Richard M. Davidson, den Flame of Yahweh (Peabody, Mass.: Hendrickson Publishers, 2007), ta deklará: "E plan edéniko pa matrimonio . . . a yama pa un totalidat komplementario di dos kompañero den fe spiritual, komo tambe otro balornan signifikante" - Página 316. E esposanan pagano den e historia akí no a skohe pa renunsiá adorashon idólatra. Konsekuentemente, Nehemias tabata kisas mas tristu ku rabiá pa e eskohonan di e pueblo, ya ku p’e esaki a demostrá di falta di berdadero kompromiso na Dios.

Beibel ta duna nos fórmulanan pa práktikanan ku lo mantené nos ankrá den Dios i ta designá pa maksimisá nos felisidat. Di mes manera, e mandato pa ta uní den yugo igual den matrimonio tabata suponé di yuda nos hiba un mihó bida i pa enkurashá deboshon mutuo na Dios.

Lesa Esdras 9. Kon Esdras ta reakshoná ora e ta tende tokante e matrimonionan miksto di e Israelitanan? Esdras 9:1 i 2 ta deklará ku e pueblo "no a separá nan mes". E palabra "separá" ta ser usá den e siguiente versíkulonan tambe: Lev. 10:10; 11:47; Eks. 26:33; Gen. 1:4, 6,7,14,18. Kiko uso di e palabra aki ta impliká relashoná ku e tema di un kreyente ku ta kasa ku un inkrédulo?

E pueblo mes a aserká Esdras ku e asuntu di matrimonio miksto. E terminologia ku nan a usa pa numerá e nashonnan enbolbí den abominashonnan a demostrá nan konosementu di e Torá, komo ku e lista a ser tumá direktamente for di relatonan bíbliko. Ta interesante pa bisa ku e lidernan sivil a hiba notisia pa Esdras, ya ku asta e lidernan spiritual di e nashon, saserdote- i Levitanan, tabata kulpabel di e transgreshon akí.

"Den su estudio di e kousanan ku a hiba na e koutiverio babilóniko, Esdras a siña ku e apostasia di Israel tabata debí pa gran parti na nan mesklamentu ku nashonnan pagano. El a mira ku si nan a obedesé e mandato di Dios pa keda separá for di e nashonnan alrededor di nan, nan lo a skapa di hopi eksperensia tristu i humiante. Awor ku el a haña sa ku apesar di e lèsnan di pasado, hòmbernan prominente a tribi kibra e leinan ku a ser duná komo un salbaguardia kontra apostasia, su kurason a konmoví. El a pensa riba e bondat di Dios ku El a bolbe duna Su pueblo un otro oportunidat den nan tera natal, i el a keda mové ku indignashon hustu i ku tristesa pa nan ingratitut" - Ellen G. White, Prophets and Kings, p. 620.

E palabra "separá" ta ser usá pa kontrastá entidatnan. De echo, e ta indiká opuestonan total. Ku e deklarashon akí e pueblo a rekonosé un komprendementu previo i konosementu di e mandato di Dios pa keda leu for di religionnan falsu. Nan a komprendé ku ningun hende por a bisa ku e lo kasa ku un persona ku su kreensianan kontrali lo no tin impakto riba e relashon matrimonial òf e manera kon nan ta lanta nan yunan. Nan a realisá kon serio e situashon a bira.

Lesa Esdras 10. Kon Esdras i e lidernan a atendé e tema di matrimonio miksto?

Huntu, henter e asamblea a disidí di manda e esposanan strañero bai. Ta asombroso pa bisa ku, asta esnan ku a kasa ku nan tabata di akuerdo ku e plan, eksepto e kuater hòmbernan ku a ser menshoná na nòmber den Esdras 10:15. E Hudiunan a primintí pa manda nan esposanan bai, i a dura tres luna pa e plan ser ehekutá. Finalmente, 111 hòmber hudiu a manda nan esposanan bai (Esdras 10:18-43). Interesante ta ku, e último versíkulo (Esdras 10:44) ta deklará ku algun di e matrimonionan miksto akí tabatin yu kaba. Manda e mamanan di famianan ku yu bai no ta parse rashonal òf asta korekto pa nos. Sinembargo, nos mester kòrda ku esaki tabata un momentu úniko kaminda Dios tabata kuminsando di nobo ku e nashon hudiu, i, den un sentido, nan kunE. Sigui Dios plenamente tabata rekerí medidanan radikal.

E palabranan spesífiko ku a ser usá den Esdras 10:11,19 pa "separá boso mes" (badal) i "pone un banda" (yatza’) no ta ser usá ningun otro kaminda den e Skrituranan pa divorsio. Esdras lo tabata konosé e terminologia ku regularmente tabata ser usá pa divorsio, pero el a skohe pa no us’é. Pues ta evidente ku Esdras no tabata konsiderá e matrimonionan bálido despues ku a ser deskubrí ku nan tabata den violashon di e mandato di Torá. Ku otro palabra, e matrimonionan a ser anulá pasobra nan tabata kontrali na lei. E proseso tabata disolushon di e matrimonionan inbálido. Sinembargo, nos no a ser duná informashon riba loke a sosodé ku e esposa- i muchanan i ki impakto e akshon akí tabatin riba e komunidat. Di akuerdo ku e kustumber di e tempu ei, e eks esposonan lo a okupá nan mes ku e transferensia di e eks esposa i nan yunan. Normalmente e esposanan lo a bai bèk na kas di nan mayornan.

Ku tempu, sinembargo, algun hòmber hudiu a bolbe kuminsá kasa ku inkrédulonan, i kisas algun a asta bolbe serka e esposanan ku nan a manda bai. E naturalesa transitorio di e solushon por ser atribuí na e naturalesa humano i nos siklo variabel di kompromiso ku Dios. Asta esnan di nos ku ta konsiderá nos mes kreyentenan fuerte tin ku atmití ku nos a pasa dor di periodonan di menor dedikashon na Dios ora nos eksperensia kunE korektamente por a ser deskribí komo insufisiente. Desafortunadamente, humanidat ta lucha ku pone Dios na promé lugá.

For di loke nos a mira den Esdras i Nehemias tokante e tema di matrimonionan miksto, ta evidente ku Dios ta tuma matrimonio na serio, i ku nos tambe mester hasi esei. Nos mester konsiderá ku orashon un potensial kompañero matrimonial, i inkluí Dios den e tumamentu di desishon. I nos mester disidí pa ta fiel na e prinsipionan di Dios, kua por protehá nos for di hopi tristesa i miseria.

Buska kon Pablo tabata dil ku e problema akí ora un Kristian tabatin un pareha no kreyente. Studia 1 Korintionan 7:10-17 kuidadosamente. Kon nos mester aserká matrimonionan ku ta desigual awendia?

Komo ku den Beibel nos no tin un mandato minusioso enkuanto di kiko pa hasi ku matrimonionan miksto, lo ta hopi imprudente i ta kontrali na intenshon di e tèkst i su prinsipionan pa insistí ku separá for di su pareha ku no ta kreyente ta e aktitut korekto i, basá riba e relato akí di Esdras, mester ser rekomendá. E situashon di Esdras i Nehemias tabata un evento di un solo biaha i di akuerdo ku boluntat di Dios (Esdras 10:11), pasobra e futuro i adorashon di henter e komunidat di Israel tabata den wega. Nan tabata pèrdiendo nan identidat komo adoradónan di un Dios bibu.

Nos sa ku den e kolonia hudiu Elefantin na Egipto (kontemporáneo ku Esdras i Nehemias), e lidernan a permití matrimonionan miksto i poko despues a desaroyá un religion miksto ku Yahweh i su konsorsio pagano, e diosa Anat. Ademas, e liña mesiániko tabata na peliger. Por lo tantu, e evento di un solo biaha akí no mester ser tumá komo un resèpt pa kibra matrimonio- i famianan ki ora ku un kreyente kasa ku un no-kreyente. En kambio, e relato ta demostrá e balor haltu ku Dios ta pone riba pareha di yugo igual den matrimonio. Satanas ta felis ora nos terminá kasá ku un persona ku no ta kurashá deboshon na Dios, pasobra e sa ku si tur dos pareha tin e mesun konvikshon, nan lo ta mas fuerte den nan trabou mishonero pa Dios ku si un so ta fiel.

Miéntras Beibel klaramente ta konsehá kontra matrimonionan di yugo desigual (2 Kor. 6:14), nos ta haña tambe pasashinan di grasia ekstendé na esnan ku a hasi un eskoho diferente. Dios ta empoderá esnan ku a kasa ku inkrédulonan pa ta fiel na Dios i nan pareha. Dios no ta bandoná nos asta ora nos hasi eskohonan kontrali na Su boluntat, i si nos pidiE yudansa, E lo prove’é. Esaki no ta nifiká ku nos ta hasi loke sea nos ke i despues ferwagt Dios bendishoná nos tòg, pero mas bien ora nos bin serka djE ku un nesesidat i un kurason humilde, semper E ta tende. Sin e grasia di Dios lo no tin speransa pa ningun di nos, pasobra nos tur ta pekador.