Lidernan den Israel

A lo largu di henter Beibel, nos por haña ehèmpelnan di liderazgo, tantu bon komo malu, i tin biaha asta un meskla di tur dos. Mal lidernan, tin ora, a hasi algun bon kosnan, miéntras bon lidernan, tin ora, a hasi mal kosnan. Despues di tur kos, tur lider ta sernan humano i, komo tal, ta kapas pa tantu bon komo malu, di hasi loke ta korekto i loke ta robes. Ken no a yega di eksperensiá e realidat akí den nan propio bida?

E problema, sinembargo, ta ora ku bo ta un lider, bo ta ehersé gran influensia, sea pa bon òf malu. Ta malu sufisiente di ta un influensia negativo den bo propio hogar òf lugá di trabou, òf unda sea bo presensia ta ser sintí. Pero ora bo ta den posishon di liderazgo, sea ta spiritual, polítiko, òf tur dos, e influensia ta ser multipliká grandemente. Kon krusial ta anto ku, den kualke ròl ku bo ta, pero espesialmente komo un lider, bo ta reflehá e prinsipionan i siñansanan di Skritura.

Buska e siguiente tèkstnan. Ki tipo di ehèmpelnan di liderazgo nos ta haña einan? Si ta bon, splika dikon e tabata bon. Si ta malu, splika dikon e tabata malu.

Rehoboam (1 Reinan 12:1-16)

Pedro (Echonan 15:7-11)

Josias (2 Reinan 23:1-10)

Debora (Huesnan 4:1-16)

Akab (1 Reinan 21:1-16)

Wak e siguiente tèkstnan. Kiko nan ta bisa nos tokante e lidernan akí i nan influensia riba e pueblo ku nan a goberná?

1 Reinan 15:26, 34

2 Reinan 13:1-3

Juan 11:46-53

Ta un pensamentu serio pa hopi di nos ku tin posishonnan di liderazgo den kualke kapasidat ku nos liderazgo tin e potensial di hala hende abou òf ariba spiritualmente. I, den e tur e kasonan aki, e efekto tabata ekstremadamente negativo.

Mas spesífikamente, nos karakter i dedikashon na Kristu ta hasi un diferensia na esnan ku ken nos ta interaktuá. Lidernan spiritual ta influensiá otronan, sea na fabor di Dios si nan mes ta buskando Dios, òf na fabor di maldat si nan no ta buskando Dios.

Kontrali na loke nos a mira awe, e echo ku Esdras i Nehemias tabatin un relashon fuerte ku Dios ta inkuestionabel. E kantidat di ayuno i orashon ku ta registrá den e bukinan akí tokante Esdras i Nehemias ta surpasá loke Beibel ta informá pa otro gran lidernan. E nashon tabata kana ku Dios bou di nan liderazgo, ounke tur kos no tabata perfekto. Nan direkshon den bida tabata pa ku Dios. Di otro banda, e echo ku tabatin esnan ku no a ser impreshoná òf kambiá dor di e influensia di Esdras i Nehemias ta duna testimonio ku, finalmente, niun otro hende su fe sino di nos mes lo hasi e diferensia pa nos. Despues di tur kos, wak e hendenan ku tabatin chèns di mira Hesus den karni, di tend’E prediká, i asta di testifiká òf tende tokante Su milagernan, i tòg na final a rechas’É. Sí, nos tin un ròl pa hunga, loke sea nos posishon den bida ta, i nos por ta un influensia pa bon òf malu. Pero al final, kada persona lo tin ku kontestá pa su mes dilanti di Dios.

Lesa Nehemias 4:7-23. Den ki forma Nehemias a demostrá kurashi? Kiko a dun’é e kurashi akí?

Nehemias a para kontra nan enemigunan, ku a trata na intimidá e Hudiunan. Nehemias a respondé dor di tuma e inisiativa di prepará e pueblo pa bringa. Nehemias no a djis bisa "Oké Dios, Abo hasi tur kos". En kambio, el a laga e pueblo hasi su parti. Nan a kue spada i otro armanan miéntras na mes momentu nan tabata trahando pa konstruí e muraya. E Hudiunan, bou di liderazgo di Nehemias, no a kobardiá di miedu sino mas bien ku kurashi a kue armanan pa defendé nan mes. Nehemias a kurashá e pueblo, a kere den nan, a traha huntu ku nan, i a duna nan e responsabilidat di aktua. El a empoderá nan pa hasi e trabou ora el a delegá i asigná responsabilidatnan. Sinembargo, Nehemias no a djis bisa e pueblo kiko pa hasi i despues bai skonde den su kamber. El a para huntu ku nan i a hasi e trabou duru ku mester a ser hasí.

Tin momentunan den Beibel ora Dios a bisa hende pa para ketu i wak E bringa, i tambe tin hopi otro kasonan ora Dios a bisa: "Prepará pa aktua, i Ami lo duna boso viktoria". Nos mester hasi nos parti si nos ke mira e liberashon i bendishonnan di Dios.

"Den e deboshon firme di Nehemias na e obra di Dios, i su dependensia igualmente firme riba Dios, tin e motibu di e fayo di su enemigunan pa hal'é den nan poder. E alma ku ta floho ta bira un presa fásil di tentashon; pero den e bida ku tin un meta nobel, un propósito fasinante, maldat ta haña poko pia pa para ariba. Fe di esun ku konstantemente ta avansando no ta debilitá; pasobra ariba, abou, mas ayá, e ta rekonosé Amor Infinito, obrando tur kos pa logra Su bon propósito. E berdadero sirbidónan di Dios ta traha ku un determinashon ku lo no faya pasobra e trono di grasia ta nan konstante dependensia" - Ellen G. White, Prophets and Kings, p. 660.

Al final, Nehemias a saka su kurashi for di su komprendementu di e realidat i poder di Dios. I sinembargo, manera nos a mira, su konosementu di Dios a pon’é aktua di akuerdo ku su fe.

Kiko e siguiente tèkstnan ta siña nos tokante e forsa impulsor den bida di tantu Esdras komo Nehemias? (Neh. 2:1-10, Esdras 7:8-10).

Den tur loke nan a hasi, Esdras i Nehemias tabata buska pa mira e boluntat di Dios hasí den bida di Su pueblo. Sí, e pueblo a traha mal trabou; si, nan a ser kastigá pa esei. Pero Dios, fiel na Su promesanan di restourashon, a habri e kaminda pa Su puebel bolbe na e Tera Primintí i pa kumpli ku e metanan ku El a establesé pa nan, si nan tabata fiel. I Señor, den Su sabiduria, a skohe dos hòmber hopi dediká, hòmbernan un poko den semehansa di Moises, pa hunga un ròl fundamental den e restourashon akí, meskos ku El a usa Moises generashonnan promé tambe pa un tarea spesial.

Gran lidernan manera e dos hòmbernan akí tin un meta. Nan tin un propósito pa biba ku ta impulsá kada un di nan akshonnan. Por ser bisá ku tantu Esdras komo Nehemias tabatin un propósito den bida. Nan tabatin un vishon di unda nan tabata ke pa e pueblo di Dios ta, i despues nan a pone tur di nan parti pa den logra e meta.

Esdras a hasi esaki dor di studia e Skrituranan i siña e pueblo e Palabra. Nehemias a kurashá e pueblo pa hasi loke tabata korekto i pa para ku kurashi pa Dios. Tur dos hòmber tabata ke mira un Yerusalèm restourá, pero no solamente un restourashon material. Tambe nan kier a mira un reavivamentu i reforma den e bida spiritual di su habitantenan. Ta p’esei nan tabata koregí, reprendé, i tin biaha demandá un sierto kurso di akshon. Gran lidernan ta kere den algu mas grandi ku loke ta komun i loke ta mediokre. Esdras i Nehemias tabata kere den un Dios amoroso, poderoso, un Dios ku por a hasi milager, i nan tabata ke pa tur hende tin un konekshon profundo kunE.

Kuminsando ku e promé kapítulo di Nehemias, e lesadó ta ser impreshoná pa e dedikashon di Nehemias na e kousa di Dios i tambe su angustia pa e situashon difísil di su pueblo. Den kapítulo 1, e ta yora ora e ta ser bisá di e difikultatnan di e Israelitanan na Juda. E ta bai riba su rudia i ta primintí di hasi tur loke sea ku Dios yam’é pa hasi. Ta parse ku Nehemias ta ser motivá pa e idea di hasi un diferensia den e mundu. E tabata un hòmber di akshon, akshon pa Dios. No tabata dor di tin un salario di mas haltu òf tin un posishon prominente ku Nehemias a skohe pa hasi un diferensia (aunke e tabatin tur dos na Persia), sino dor di bai Juda, na un nashon no asina próspero, ku oposishon na kada paso. El a avansá pa fe, apesar di e opstákulonan ku tabatin su dilanti.

Lesa Esdras 8:21-23,31,32. Lo bo a konsiderá e desishon di Esdras pa no papia ku e rei komo bobo òf balente? Kon Esdras i e pueblo a mustra humildat?

Poko tempu despues, Nehemias a aseptá e eskolta di e rei pa protekshon. Pero den kaso di Esdras, el a kere ku Dios por a mustra Su Mes mihó si nan no a pidi nada di e rei. P’esei, ora nan a yega Juda sin ningun daño, nan a atribuí esei na nan Dios. Kisas den sierto situashon, nos por dependé demasiado riba otro hende i no sufisiente riba laga Dios mustra Su Mes. Esdras a skohe pa laga Dios hasi e trabou den e situashon akí i a proba e rei ku enbèrdat Dios tabata un Dios poderoso.

Sinembargo, Esdras no a aktua ku presunshon. El a yama e pueblo huntu, i nan a yuna i hasi orashon riba e situashon. Nan no a kuminsá nan biahe sino te ora ku nan a pasa tempu serio ku Dios. Nan a bin humildemente dilanti di Dios, hasiendo petishon pa Su protekshon bira un señal di Su poder, i Dios a kontestá.

Lesa Nehemias 5:14-19. Kon Nehemias a mustra humildat?

Berdadero lidernan mester ta dispuesto na humiá nan mes i ta sirbidónan. Lidernan kompetente no ta rekerí òf tin mester di un "título" pa haña honor. Nehemias tabatin su portanan habrí i e tabata duna generosamente na e pueblo. El a demostrá su fe den Dios, i su dedikashon inkreibel na Dios tabata un ehèmpel pa e pueblo. E tabatin un personalidat fuerte i un temperamento sensato, pero e no a pone su mes riba niun otro hende komo superior. E tabatin e posishon di mas haltu den e nashon hudiu na e momentu ei, i sinembargo e tabata generoso. Di e manera akí, el a reflehá e bida i siñansanan di Hesus, kende a siña nos ku e mihó manera pa guia ta dor di sirbi otronan. Hesus a hasié, i asina nos, no importá nos posishon, mester hasi e mesun kos.