Di Yerusalèm pa Babilonia

Na promé bista e buki di Daniel ta kuminsá ku un nota tristu di derota. Juda a rindi su mes na Nabukodonosor i e kopanan di e tèmpel a ser hibá for di Yerusalèm na e tera di Sinar. E palabra Sinar ta aparesé den Beibel den Génesis 11:2 komo e lugá di e toren di Babel. Sinar ta un señal menasante, komo ku e ta referí na un proyekto ankrá den desafio habrí di Dios. Pero asta si e konstruktornan di Babel a faya den nan intento pa alkansá e shelunan, aparensianan eksterno a sugerí ku Nabukodonosor i su diosnan, situá den e tera di Sinar, a vense e Dios di pakto di Israel.

Ketu bai, e promé liñanan di Daniel ta mustra kla ku e derota di Yerusalèm no ta akreditá na e poder superior di e rei di Babilonia; mas bien, el a sosodé pasobra “Señor a duna Joakim rei di Juda den su [Nabukodonosor] man” (Dan. 1:2, NKJV). Mas promé, Dios ta anunsiá ku si Su pueblo mester lubid’E i kibra e pakto, E lo a manda nan komo koutivonan na un tera straño. Asina, Daniel sa ku tras i mas aya di e poder militar di Babilonia, e Dios di shelu ta guiando e marcha di historia. Ta e bista kla akí di e soberania di Dios ku ta sostené e hóbennan akí i ta duna nan forsa i kurashi pa afrontá e tentashon i preshon di e imperio babilóniko.

Lesa Reinan 21:10-16, 2 Reinan 24:18-20, i Jeremias 3:13. Dikon Dios ta duna Juda i Yerusalèm den man di e Babilonianan?

Ora nos ta afrontá e desafionan di siglo bintiun, nos mester rekobrá e persepshon di Dios ku ta ser reflehá asina bibu den e buki di Daniel. Di akuerdo ku e buki akí, e Dios kende nos ta sirbi no solamente ta stür e forsanan di historia a traves di Su soberania sino tambe ta intervení yen di miserikòrdia den bida di Su pueblo pa proveé nan ku yudansa krusial den momentunan di nesesidat. I manera nos lo mira mas despues, loke Dios a hasi pa e koutivonan hebreo E lo hasi pa Su pueblo den e tempu di fin, apesar di e vários atakenan riba nan i nan fe.

Lesa Daniel 1. Ki preshonnan ta ser poné riba e hóbennan pa konformá?

Na nan yegada na Babilonia, e kuater hóbennan akí tin ku afrontá un desafio di mas serio na nan fe i konvikshonnan: nan ta ser selektá pa pasa dor di un training spesial pa asina sirbi e rei. Reinan antiguo hopi biaha tabata reklutá algun di nan mihó koutivonan pa sirbi den e palasio real, i, di e forma ei, kambia nan lealtat na e rei i e diosnan di e imperio ku a kapturá nan. En realidat, henter e proseso tabata intenshoná pa efektuá algun forma di kombershon i indoktrinashon ku lo a resultá den un kambio di perspektiva. Komo parti di e proseso ei, e nòmber di e koutivonan hebreo ta ser kambiá. Un nòmber nobo ta señalá un kambio di doño i un kambio di destino. Asina, dor di duna e koutivonan un nòmber nobo, e Babilonianan ta intentá di afirmá outoridat riba nan i fòrsa nan pa asimilá e balornan i kultura di Babilonia. Nan nòmbernan original, kua ta mustra na e Dios di Israel, ta ser remplasá ku nòmbernan ku ta honra deidatnan strañero. Ademas, e rei ta determiná ku e hóbennan mester kome for di su mesa. Kome for di kuminda di e rei tabatin implikashonnan profundo den antigwedat. E tabata nifiká lealtat apsoluto na e rei i tabata reflehá dependensia riba dje. I komo ku e kuminda generalmente tabata ser ofresé na e dios òf diosnan di e imperio, kome tambe tabatin un nifikashon religioso profundo. Opviamente e tabata nifiká aseptashon di i partisipashon den e sistema di adorashon di e rei.

Asina, Daniel i su kompañeronan ta haña nan mes den sirkunstansianan desafiante. Pa nan keda leal na Dios i sobrebibí e poder aplastante di e sistema imperial ta demandá nada ménos ku un milager. Pa kompliká asuntunan mas aleu, e siudat di Babilonia mes tambe tabata para komo un ekspreshon ekstenso di logro humano. E bunitesa di arkitektura di e tèmpelnan Babilóniko, e hardinnan ku ta kologá, i e Riu Eufrates ku ta krusa a traves di e siudat ta transmití un imágen di poder i gloria inmehorabel. Asina, Daniel i su amigunan ta ser ofresé un oportunidat pa promoshon i e chèns pa disfrutá di e benefishinan i prosperidat di e sistema akí. Nan por stòp di ta koutivonan hebreo i bira ofisialnan real. Nan lo komprometé nan prinsipionan pa pisa e kaminda fásil na gloria?

Lesa Daniel 1:7-20. Nos ta mira dos faktor envolví aki: e boluntat liber di Daniel i e intervenshon di Dios. Ki prinsipio importante tambe ta eksistí aki?

Ta parse ku e kuater koutivonan hebreo no ta oponé nan nòmbernan babilóniko. Mas probablemente no tin nada ku nan por hasi tokante esaki, eksepto di uza nan nòmbernan hebreo entre nan mes. Pero respekto e kuminda i biña for di e mesa di e rei, esei siguramente ta den nan poder pa konsumié òf nò. Pues, e eskoho liber di e kuater hòmbernan ta hopi importante aki.

Sinembargo, si un ofisial por kambia nan nòmbernan, e por kambia e menú tambe. Tin dos probabel motibu dikon e kuater no ke kome for di mesa di e rei.

Di promé, e kumindanan di e mesa di e rei por kontené karninan impuru (Levítiko 11). Di dos, kuminda ta ser ofresé promé komo un kuminda na e imágen di e dios i despues mandá na e rei pa su konsumo. Asina, ora Daniel ta ekspresá, sin rekurí na intriga òf engaño, ku su petishon tin un motivashon religioso, es desir, e kuminda na e palasio lo kontaminá e i su amigunan (Dan. 1:8), e ta siendo hopi balente.

Ora nos wak den e interakshon entre Daniel i e ofisial Babilóniko, un par di punto importante ta resaltá. Di promé, Daniel ta parse di komprondé e posishon difísil di e ofisial bon, asina e ta proponé un prueba. Dies dia di kome e alimentonan alternativa mester ta sufisiente pa demostrá e benefishinan di e dieta i asina suprimí e temornan di e ofisial. Di dos, e siguransa di Daniel ku e resultado lo tabata asina positivo denter di un lapso di tempu asina kòrtiku ta originá di apsoluto konfiansa den Dios. Di tres, e eskoho di un dieta di berdura i awa ta mustra bèk na e kuminda ku Dios a duna humanidat na Kreashon (lesa Gen. 1:29), un echo ku kisas ta influensiá e eskoho di Daniel tambe. Despues di tur kos, kiko lo tabata un mihó dieta ku esun ku Dios a duna nos originalmente?

Daniel i su kompañeronan ta ser skohé pa sirbishi real pasobra nan ta pas denter di e profil establesé dor di Nabukodonosor. Di akuerdo ku e rei, ofisialnan di palasio mester tin “niun defekto” i ta “di bon aparensia” (Dan. 1:4, NKJV). Ta interesante pa bisa ku sakrifisionan i hendenan ku ta sirbi den e santuario no mester tin “defekto” (Lev. 22:17-25, Lev. 21:16-24). E rei babilóniko parse ta kompará su mes ku e Dios di Israel te na e ekstremo ku e ta demandá kualifikashonnan similar pa esnan ku ta sirbi den su palasio. Na otro banda, kualifikashonnan asina por sugerí inkonsientemente ku Daniel i su kompatriotanan tabata sakrifisionan bibu pa Dios miéntras nan tabata afrontá e desafionan di e imperio babilóniko.

Lesa Galationan 2:19,20; Mateo 16:24-26; i 2 Korintionan 4:17. Kiko e versíkulonan akí ta bisa nos tokante kon nos por keda fiel meimei di kualke tentashonnan ku nos ta afrontá?

Dios ta honra e lealtat di e kuater koutivonan hebreo, i na final di nan periodo di prueba di dies dia nan tabata mustra mas salú i mihó nutrí ku e otro studiantenan ku a kome for di e mesa real. Asina, Dios ta duna Su kuater sirbidónan “konosementu i abilidat den tur literatura i sabiduria”, i na Daniel so Dios ta duna “komprondementu den tur vishon- i soñonan” (Dan. 1:17, NKJV). E don akí lo hunga un ròl signifikante den e ministerio profétiko di Daniel.

Meskos ku Dios ta honra e fe di Su sirbidónan den e korte babilóniko, E ta duna nos sabiduria segun ku nos ta afrontá e desafionan di e mundu. For di e eksperensia di Daniel i su kompañeronan, nos ta siña ku ta enbèrdat posibel pa permanesé sin mancha dor di e elementonan korupto di nos sosiedat. Nos ta siña tambe ku nos no mester isolá nos mes for di sosiedat i su bida kultural pa asina sirbi Dios. Daniel i su kompañeronan no solamente ta biba meimei di un kultura konstruí riba mentira- i eror- i mitonan, sino ta ser eduká riba e mentira- i eror- i mitonan ei. I tòg, nan ta keda fiel.

Lesa Daniel 1:17-21. Kiko ta e klave na e éksito di e kuater hòmbernan? (Lesa tambe Job 38:36, Prov. 2:6, Santiago 1:5)

Despues di tres aña di entrenamentu den e “Universidat Babilóniko”, e kuater Hebreonan ta ser tresé dilanti di e rei pa e eksámen final. Nan no ta solamente mas salú ku e otro studiantenan, nan ta surpasá nan den konosementu i sabiduria. E kuater ta ser di hür inmediatamente pa sirbi e rei. Nos no mester lubidá ku e “konosementu i sabiduria” akí ta konsistí sin duda di hopi paganismo. Sinembargo, nan ta siñ’é en todo kaso, i opviamente nan ta siñ’é bon tambe, asta si nan no ta ker’é.

Nabukodonosor lo por pensa ku un logro asina lo tabatin algu di aber ku e dieta di e palasio i e programa di entrenamentu ku e kuater studiantenan a partisipá na dje. Sin embargo, Daniel i su kompañeronan sa, i e narativo ta mustra klaramente, ku nan funshonamentu superior no debe nada na e sistema babilóniko. Tur kos ta bin di Dios. Ki un ehèmpel poderoso di loke Dios por hasi pa esnan ku ta konfi’E. Nos no mester tin miedu di e poder aplastante di media, gobièrnunan, i otro institushonnan ku por menasá di destruí nos identidat komo yunan di Dios. Ora nos pone nos konfiansa den Dios, nos por ta sigur ku E por sostené nos den momentunan difísil i preservá nos kontra tur kontratempu. E klave ta pa nos hasi e eskohonan korekto ora nos ser konfrontá ku desafionan na nos fe.

Ora nos wak Daniel 1, nos ta siña algun lès masha importante tokante Dios:

1. Dios ta den kontròl di historia.
2. Dios ta duna sabiduria pa nos por pasa dor di e medioambiente hostil di nos kultura i sosiedat.
3. Dios ta honra esnan ku ta konfia den djE pa medio di konvikshon interno i estilo di bida.

E kapítulo ta konkluí dor di señalá ku “Daniel a kontinuá te na e promé aña di Rei Siro” (Dan. 1:21, NKJV). Menshon di Siro aki ta signifikante: e ta proveé un bista chikitu di speransa meimei di un eksperensia di eksilio. Siro ta esun skohé dor di Dios pa liberá Su pueblo i permití nan bai bèk Yerusalèm. Aunke e kapítulo ta kuminsá ku aparensia di derota i eksilio, e ta konkluí ku un bista chikitu di speransa i un regreso na kas. Esaki ta nos Dios: asta meimei di e momentunan di mas difísil di nos bida, semper E ta habri un bentana di speransa pa asina nos por mira e gloria i goso ku tin mas aya di sufrimentu i doló.