Di Fòrnu pa Palasio

Lesa Daniel 3:1-7. Kiko probablemente ta motivá e rei pa traha e estatua akí?

Algun tempu a pasa entre e soño i e konstrukshon di e imágen. No opstante, ta parse ku e rei no por lubidá e soño mas i e echo ku Babilonia ta kondená na ser remplasá pa otro podernan. No satisfecho ku ser solamente e kabes di oro, e rei ke ser representá pa un imágen kompletu di oro pa asina komuniká na su súpditonan ku su reino lo dura a lo largu di historia.

E aktitut di orguyo akí ta yama na mente e konstruktornan di e Toren di Babel, ku, den nan arogansia, ta purba desafiá Dios Mes. Nabukodonosor no ta ménos arogante aki. El a logra hopi komo gobernante di Babilonia, i e no por biba ku e idea ku su reino lo pasa bai finalmente. Asina, den un esfuerso pa halsa su mes, e ta traha un imágen pa yama atenshon na su poder i asina evaluá e lealtat di su súpditonan. Aunke kisas no ta kla si e imágen ta intenshoná pa representá e rei òf un deidat, nos mester tene den mente ku den antigwedat e liñanan ku tabata separá polítika for di religion hopi biaha tabata konfuso si nan tabata eksistí ètòl.

Nos mester kòrda tambe ku Nabukodonosor tabatin dos oportunidat pa familiarisá su mes ku e Dios berdadero. Na promé lugá, e ta tèst e hóbennan hebreo i ta haña nan dies biaha mas sabí ku e otro sabionan di Babilonia. Despues, despues ku tur otro eksperto a faya di kòrd’é di su soño, Daniel ta reportá na dje e pensamentunan di su mente, e soño, i su interpretashon. Finalmente, e rei ta rekonosé e superioridat di e Dios di Daniel. Pero sorprendentemente, e lèsnan di teologia anterior no ta prevení Nabukodonosor di bira bèk na idolatria. Dikon? Mas probablemente, orguyo. Sernan humano pekaminoso ta resistí di rekonosé e echo ku nan logronan material i intelektual ta banidat i ta kondená na disparsé. Tin biaha nos por aktua manera “Nabukodonosornan” chikitu ora nos ta paga demasiado atenshon na nos logronan i lubidá kon insignifikante nan por ta dilanti di eternidat.

Lesa Daniel 3:8-15 i Revelashon 13:11-18. Ki paralelonan nos por mira entre loke ta sosodé den tempu di Daniel i loke lo sosodé den futuro?

E imágen di oro pará riba e sabana di Dura, ken su nòmber na akadio ta nifiká “lugá rondoná di muraya”, ta duna e impreshon di un santuario inmenso. Komo si fuera no tabata sufisiente, e fòrnu serkano por bien kòrda nos riba un altar. Músika babilóniko mester ta parti di e liturgia. Shete tipo di instrumènt musikal ta ser menshoná, manera pa transmití e integridat i efektividat di e protokòl di adorashon.

Awe, nos ta ser bombardiá for di tur banda ku yamadanan pa adoptá estilonan di bida nobo, ideologianan nobo, i pa bandoná nos kompromiso ku e outoridat di Dios manera ekspresá den Su Palabra i pa someté nos lealtat na susesornan kontemporáneo di e Imperio Babilóniko. E enkanto di mundu tin biaha ta parse aplastante, pero nos mester rekordá nos mes ku nos lealtat ekstremo ta pertenesé na e Kreador Dios.

Di akuerdo ku e kalènder profétiko, nos ta bibando den e último dianan di historia di tera. Revelashon 13 ta anunsiá ku e habitantenan di tera lo ser yamá pa adorá e imágen di e bestia. E entidat ei lo pone “tur, tantu chikitu komo grandi, riku i pober, liber i esklabo, risibí un marka riba nan man drechi òf riba nan frenta” (Rev. 13:16, NKJV).

Seis kategoria di hende ta ser bisa ta duna lealtat na e imágen di e bestia: “chikitu i grandi, riku i pober, liber i esklabo”. E number di e bestia, kua ta 666, tambe ta enfatisá seis. Esaki ta mustra ku e imágen lantá dor di Nabukodonosor ta solamente un ilustrashon di loke e Babilonia eskatológiko lo hasi den e último dianan (lesa Dan. 3:1 pa e imágennan di seis i sesenta). Por lo tantu, nos ta hasi bon di paga hopi atenshon na loke ta sosodé den e relato akí i kon Dios di forma soberano ta dirigí e asuntunan di mundu.

Pa e tres hebreonan, e adorashon di e imágen imponé dor di e rei ta un falsifikashon opvio di e adorashon den e tèmpel na Yerusalèm, kua nan a eksperensiá den nan promé añanan. Aunke nan tin kargonan den e imperio i ta leal na e rei, nan lealtat na Dos ta establesé un límite na nan lealtat humano. Siguramente nan ta dispuesto pa sigui sirbi e rei komo atministradónan fiel; sinembargo, nan no por uni den e seremonia.

Lesa Eksodo 20:3-6 i Deuteronomio 6:4. Kiko e tèkstnan akí ta transmití ku siguramente a influensiá e posishon ku e hòmbernan akí a tuma?

Siguiendo e instrukshonnan proveé pa e rei, tur e hendenan, na zonidu di e instrumèntnan musikal, ta bùig i adorá e imágen di oro. Solamente e tres, Shadrach, Meshach, i Abed-Nego, ta riska desobedesé e rei. Inmediatamente, algun babilonio ta trese e asuntu na atenshon di e rei. E akusadónan ta trata na hasi e rei furioso dor di bisa:

1. tabata e rei mes ku a pone e tres hóbennan akí riba e provinsia di Babilonia;
2. e hòmbernan hudiu no ta sirbi e diosnan di e rei; i
3. nan no ta adorá e imágen di oro ku e rei a lanta (Dan. 3:12).

Pero apesar di su rabia kontra nan, e rei ta ofresé e tres hòmbernan un di dos oportunidat. E rei ta dispuesto pa ripití henter e prosedura pa asina e hòmbernan akí por hala nan posishon bèk i adorá e imágen. Si nan mester ninga, nan lo ser tirá den e fòrnu di kandela. I Nabukodonosor ta klousurá su apelashon ku un afirmashon di mas arogante: “I ken ta e dios ku lo libra boso for di mi mannan?” (Dan. 3:15, NKJV).

Dotá ku kurashi sobrenatural, nan ta kontestá e rei: “Si esei ta e kaso, nos Dios kende nos ta sirbi, ta kapas pa libra nos for di e fòrnu di kandela ardiente, i E lo libra nos for di bo man, o rei. Ma si no, laga ta konosí na bo, o rei, ku nos no ta sirbi bo diosnan, ni nos lo adorá e imágen di oro ku bo a lanta” (Dan. 3:17, 18, NKJV).

Lesa Daniel 3:19-27. Kiko ta sosodé? Ken e otro persona den e kandela ta?

Despues di a tira e Hebreonan fiel den e kandela, Nabukodonosor ta keda konfundí di persibí e presensia di un di kuater persona den e fòrnu. Na su mihó konosementu, e rei ta identifiká e di kuater figura komo “e Yu di Dios” (Dan. 3:25).

E rei no por bisa muchu mas, pero nos sa ken e di kuater persona ei ta. E ta aparesé na Abraham promé ku e destrukshon di Sodoma i Gomora, ta lucha ku Jacob banda di e riu chikí Jabok, i ta revelá Su mes na Moises den un mata ku ta kimando. E ta Hesukristu den un forma preenkarná, ku ta bin pa mustra ku Dios ta ku Su pueblo den nan problemanan.

Ellen G. White ta bisa: “Ma Señor no a lubidá esnan di djE. Ora Su testigunan a ser tirá den e fòrnu, e Salbador a revelá Su mes na nan en persona, i huntu nan a kana meimei di e kandela. Den presensia di e Señor di kayente i friu, e flamnan a pèrdè nan poder di konsumí”. — Prophets and Kings, p. 508, 509.

Manera Dios ta bisa den Isaias: “Ora bo ta pasa dor di e awanan, lo Mi ta ku bo; i dor di e riunan, nan lo no inundá bo. Ora bo ta pasa dor di e kandela, lo bo no ser kimá, ni e flam lo kima bo” (Isa. 43:2, NKJV).

Aunke nos stima storianan manera esakinan, nan ta lanta e pregunta tokante otronan ku no a ser librá milagrosamente di persekushon pa nan fe. E hòmbernan ei siguramente konosé e eksperensia di Isaias i Zakarias, ku a ser matá dor di reinan impio. A lo largu di historia sagrado, te na nos dianan, Kristiannan fiel a soportá sufrimentunan teribel ku a terminá pa nan, a lo ménos aki, no den un liberashon milagroso sino den un morto doloroso. Esaki ta un kaso den kua esnan fiel ta risibí un liberashon milagroso pero, manera nos sa, kosnan asina no ta sosodé generalmente.

Ora nos ta reflekshoná riba e eksperensia di Shadrach, Meshach, i Abed-Nego, nos por puntra nos mes: Kiko ta e sekreto di un fe asina fuerte? Kon nan por tabata dispuesto di kima bibu mas bien ku adorá e imágen? Pensa riba tur e formanan ku nan por a rashonalisá e echo di bùig den sumishon na e òrdunan di e rei. I sinembargo, apesar di ta realisá ku nan por a muri, manera tantu otronan a hasi, nan a para firme.

Lesa Hebreonan 11. Kiko e ta siña nos tokante kiko fe ta?

Pa desaroyá un fe asina, nos mester komprondé kiko fe ta. Algun hende tin un persepshon kuantitativo di fe; nan ta midi nan fe pa e kontestanan ku, parse, nan ta risibí di Dios. Nan ta bai na e sentro komersial i nan ta hasi orashon pa un lugá di stashoná. Si sosodé ku nan haña un espasio na nan yegada, nan ta konkluí ku nan tin un fe fuerte. Si tur e espasionan ta yená, nan por pensa ku nan fe no ta sufisiente fuerte pa Dios skucha nan orashonnan. E komprondementu akí di fe ta bira peligroso pasobra e ta trata na manipulá Dios i no ta tene kuenta ku e soberania i sabiduria di Dios.

De echo, fe berdadero, manera manifestá dor di e amigunan di Daniel, ta ser midí pa e kualidat di nos relashon ku Dios i su konfiansa apsoluto den Dios komo resultado. Fe outéntiko no ta buska pa dobla e boluntat di Dios pa konformá na nos boluntat; mas bien, e ta someté nos boluntat na e boluntat di Dios. Manera nos a mira, e tres hòmbernan hebreo no sa eksaktamente kiko Dios tin reservá pa nan ora nan disidí di desafiá e rei i permanesé fiel na Dios. Nan ta disidí di hasi loke ta korekto apesar di e konsekuensianan. Esaki ta loke realmente ta karakterisá un fe madurá. Nos ta demostrá fe real ora nos hasi orashon na Señor pa loke nos ke, pero ta konfi’E pa hasi loke ta mihó pa nos, asta si na e momentu ei nos no ta komprondé loke ta sosodiendo òf dikon.