Di Arogansia pa Destrukshon

Lesa Daniel 5:1-4 huntu ku Daniel 1:1,2. Kiko Belsasar ta hasiendo ku ta asina malu? Kon e ta revelá su berdadero karakter? Kompará su akshonnan ku Revelashon 17:4-6. Ku paralelonan bo por haña?

E rei ta manda pa e kèlkinan sagrado di e tèmpel di Yerusalèm ser uzá komo kèlkinan pa bebe for di dje. Nabukodonosor ta apoderá di e kèlkinan di e tèmpel di Yerusalèm, pero e ta pone nan den e kas di su dios, kua ta demostrá ku a lo ménos e ta respetá nan status sagrado. Pero Belsasar ta kombertí e kèlkinan sagrado den kèlkinan den un forma di mas profano.

Miéntras nan tabata bebe for di e kèlkinan sagrado, e dignatarionan di Nabukodonosor “tabata alabá e diosnan di oro i plata, bròns i heru, palu i piedra” (Dan. 5:4, NKJV). Ta bale la pena señalá ku seis material ta ser menshoná. E Babilonionan tabata uza e sistema seksagesimal (un sistema basá riba number 60), kontrali na e sistema desimal ku ta ser uzá awendia (basá riba number 10). Asina, e seis kategorianan di diosnan ta representá e totalidat di e deidatnan babilóniko i, por lo tantu, e plenitut di e sistema religioso babilóniko. Kuriosamente, e órden di e materialnan ta sigui e órden di e komponentenan di e estatua di e soño di Nabukodonosor, eksepto ku palu ta remplasá e klei. Meskos ku den e soño, piedra ta aparesé último; aunke aki e ta indiká e komposishon di material di ídolonan, piedra tambe ta kòrda nos riba e huisio di Dios riba imperionan mundano (lesa Dan. 2:44,45), kua Babilonia ta simbolisá.

E fiesta akí ta sirbi komo un representashon apto di Babilonia di tempu di fin manera ta ser mirá den e buki di Revelashon. Meskos ku Belsasar, e muhé den Babilonia di tempu di fin ta tene un kopa di oro i ta ofresé bibida kontaminá na e nashonnan. Den otro palabra, pa medio di doktrinanan falsu i un sistema di adorashon trosé, Babilonia moderno ta sedusí e mundu den maldat (Rev. 17:4-6), inkonsiente di e huisio ku pronto lo kai riba dje. Un dia huisio lo yega.

Lesa Daniel 5:5-8. Kiko ta sosodé, i dikon e rei ta respondé manera el a hasi? Den ki formanan e relato akí ta paralelo na Daniel 2, i dikon e paralelo ei ta importante? (Lesa Salmo 96:5, Kol. 1:15-17).

Meskos ku Nabukodonosor ta hasi den krísisnan anterior (Dan. 2:2, Dan. 4:7), Belsasar ta yama e astrólogonan, e kaldeonan, i e adivinadónan pa klarifiká e eskrito misterioso. I pa sigurá ku nan ta duna lo mihó di nan, e rei ta primintí nan onornan ekstrabagante:

1. paña púrpura, un koló bistí dor di realesa den tempunan antiguo (Ester 8:15);
2. un kadena di oro, kua tabata un señal di status sosial haltu (Gen. 41:42); i
3. e posishon di terser gobernante den e reino.

E último rekompensa akí ta reflehá ku presishon e sirkunstansianan históriko di Babilonia na e momentu ei. Pa motibu ku Belsasar tabata di dos gobernante komo koregente ku su tata, Nabonido, e ta ofresé e posishon di terser gobernante. Pero apesar di e rekompensanan tentador, e sabionan, un biaha mas, ta faya di proveé un splikashon.

Riba tur su pikánan, anto e rei ta trata na haña sabiduria na e lugá robes. E ekspertonan babilóniko no por detektá e nifikashon di e mensahe. E ta skibí den nan propio idioma, arameo, manera nos lo mira mayan, pero nan no por haña sentido di e palabranan. Esaki kisas lo por kòrda nos riba loke Señor a papia a traves di Isaias: “Pasobra e sabiduria di nan sabionan lo peresé, i e komprondementu di nan hòmbernan prudente lo ser skondé” (Isa. 29:14, NKJV). Despues di sita e versíkulo akí, apòstel Pablo ta deklará: “Unda e hòmber sabí ta? Unda e eskriba ta? Unda e disputadó di e siglo akí ta? Dios no a hasi e sabiduria di e mundu aki bobo? Pasobra ya ku, den e sabiduria di Dios, e mundu a traves di sabiduria no a konosé Dios, a agradá Dios, pa medio di e mensahe prediká, pa salba esnan ku kere” (1 Kor. 1:20, 21, NKJV).

Algun bèrdat ta muchu importante pa ser lagá pa hende trata na deskubrí pa nan mes. Ta p’esei Dios, en kambio, ta revelá e bèrdatnan akí na nos.

Lesa Daniel 5:9-12. Kiko e reina ta bisa tokante Daniel ku e rei mester tabata sa kaba? Kiko e ta bisa tokante dje ku parse e tabata ignorante asta di e eksistensia di Daniel?

Segun ku e sala di bankete ta ser tirá den konfushon pa motibu di e mensahe misterioso riba muraya, e reina ta yega i ta proveé direkshon na e rei konfundí. E ta kòrda e rei riba Daniel, ken su abilidat di interpretá soñonan i resolvé misterionan a ser demostrá durante e époka di Nabukodonosor. Si Belsasar tabata mes inteligente ku su predesesor, e lo tabata sa unda pa bira pa haña e nifikashon di e eskrito misterioso akí. E intervenshon di e reina ta resultá di ta nesesario pa e rei, ku na e punto akí ta parse totalmente pèrdí enkuanto di kiko hasi a kontinuashon. Su palabranan ta zona manera un reprendementu na Belsasar pa a pasa por alto e úniko persona den e reino ku por interpretá e eskrito misterioso. I tambe e ta duna e rei un kuríkulo oral di Daniel: E profeta tin e Spiritu di e Dios Santu, lus i komprondementu i sabiduria divino, spiritu ekselente, konosementu; e ta kapas di komprondé, interpretá soñonan, resolvé charadanan, i splika enigmanan; e tabata hefe di e magonan, astrólogonan, kaldeonan, i adivinadónan den tempu di Nabukodonosor (Dan. 5:11,12).

Na e altura aki, atrobe nos ta puntra nos mes dikon Belsasar a ignorá Daniel. E tèkst no ta ofresé un kontesta direkto riba e pregunta akí, pero nos ta suponé ku na e momentu aki Daniel, despues di a sirbi e rei por lo ménos te na e di tres aña di su reinado (Dan. 8:1,27), no ta den servisio aktivo mas. Un faktor por tabata e edat di Daniel. Probablemente e tin mas òf ménos 80 aña, i e rei por tabata ke remplasá e liderazgo bieu ku un generashon mas hóben. E rei por a disidí tambe di ignorá Daniel pasobra e no kier a komprometé su mes ku e Dios di Daniel. Pero loke sea tabata e motibu òf kombinashon di motibunan, e tabata sigui ta notabel ku un hende ku un trayektoria asina manera esun di Daniel por a ser lubidá asina lihé.

Lesa Daniel 5:13-28. Kiko ta e motibu ku Daniel ta duna pa e pronto kaida di e rei akí?

Fòrsá pa e sirkunstansianan, e rei ta rekurí na konsultá Daniel, pero parse ku e ta hasi esei ku duda. Esaki por bisa mas tokante e aktitut di e rei pa ku e Dios di Daniel ku pa ku Daniel mes.

Na su turno, e kontesta di Daniel riba e oferta di e rei ta bisa hopi tokante e prioridatnan i karakter di Daniel. Ta probabel tambe ku Daniel, konosiendo e nifikashon di e palabranan misterioso, ta realisá kon inútil e rekompensa ta realmente.

E ora ei Daniel ta akusá e rei di tres kargo.

Na promé lugá, Belsasar a ignorá totalmente e eksperensia di Nabukodonosor. Di otro forma e lo a arepentí i humiá su mes manera su predesesor.

Na di dos lugá, Belsasar a uza e kèlkinan di tèmpel pa asina bebe biña i pa alabá su ídolonan. Aki Daniel ta menshoná e seis tiponan di material uzá pa traha ídolonan den e mesun sekuensia señalá anteriormente.

Na di tres lugá, e rei a neglishá di glorifiká Dios, Esun “kende ta tene bo aliento den Su man i ta doño di tur bo kamindanan” (Dan. 5:23, NKJV).

Despues di a papia di e fayonan di e rei, Daniel ta prosedé na e interpretashon. Awor nos ta haña sa ku e grafiti divino ta konsistí di tres verbo arameo (ku esun di promé ripití). Nan nifikashon básiko mester tabata konosí pa e rei i su sabionan: MENE: “kontá”; TEKEL: “pisá”, i PERES: “dividí”.

Ku e ehérsito medopersa na e portanan di Babilonia, e rei i e sabionan mester a sospechá algun nifikashon menasante den e eskrito ei, pero e sabionan no ta riska bisa e rei algu desagradabel. Solamente Daniel ta demostrá di ta kapas di desifrá e berdadero mensahe den un deklarashon signifikativo pa asina transmití su nifikashon kompletu na Belsasar: “MENE: Dios a konta bo reino, i a finalis’é; TEKEL: Bo a ser pisá den e balansa, i a ser hañá falta; PERES: Bo reino a ser dividí, i duná na e Medo- i Persanan” (Dan. 5:26-28, NKJV).

No eksaktamente palabranan di konsuelo i alegria.

Lesa Daniel 5:29-31 huntu ku Revelashon 14:8, Revelashon 16:19, i Revelashon 18:2. Kiko nos por siña tokante e kaida di e kaida di e Babilonia di Belsasar ku ta mustra na e kaida di e Babilonia di tempu di fin?

Loke sea ta su erornan, Belsasar ta un hòmber di palabra. Asina, apesar di e mal notisia, e ta keda satisfecho ku e interpretashon duná dor di Daniel, pa kua motibu e ta otorgá na e profeta e regalonan primintí. Ta parse ku dor di atmití e bèrdat di e mensahe di Daniel, e rei ta rekonosé implísitamente e realidat di e Dios di Daniel. Kuriosamente, Daniel awor ta aseptá e regalonan ku el a rechasá anteriormente, probablemente pasobra e regalonan ei no por influensiá su interpretashon mas. Ademas, na e altura ei regalonan asina ta insignifikante ya ku e imperio ta na punto di kai. Por lo tantu, probablemente komo un asuntu di kortesia, e profeta ta aseptá e rekompensanan, sabiendo tur e tempu ku e lo ta e di tres gobernante di e reino pa solamente un par di ora.

Eksaktamente manera anunsiá dor di e profeta, Babilonia ta kai. I e ta hasié asina rápidamente; miéntras e rei i su konseheronan ta bebe, e siudat ta kai sin un bataya. Di akuerdo ku e historiadó Herodotus, e Persanan a koba un kanal pa desviá Riu Eufrates i a marcha drenta den e siudat riba bòm di e riu. E mesun anochi ei Belsasar ta ser matá. Su tata, Rei Nabonido, ya a bandoná e siudat, entregando su mes mas despues na e gobernantenan nobo. Asina e imperio di mas grandi ku humanidat hamas a konosé te na e momentu ei ta yega na un fin. Babilonia, e kabes di oro, no tei mas.

“Belsasar a ser duná hopi oportunidat pa konosé i hasi e boluntat di Dios. El a mira su abuelo Nabukodonosor ser saká for di e sosiedat di hòmbernan. El a mira e intelekto den kua e monarka orguyoso tabata gloria ser kitá dor di Esun ku a dun’é. El a mira e rei ser ekspulsá for di su reino, i hasí kompañero di e bestianan di sabana. Pero e amor di Belsasar pa dibershon i outo-glorifikashon a kita e lèsnan ku nunka e mester a lubidá; i el a kometé pikánan similar na esnan ku a trese huisionan di señal riba Nabukodonosor. El a desperdisiá e oportunidatnan ku a ser duná na dje yen di miserikòrdia, neglishando di uza e oportunidatnan denter di su alkanse pa bira konosí ku bèrdat”. — Ellen G. White, Bible Echo, April 25, 1898.