Di e Kueba di Leon pa e Kueba di Angel

Asta den shelu, un medioambiente perfekto, Lucifer ta sinti yalurs riba Kristu. “Lucifer tabata envidioso i yalurs riba Hesukristu. Sinembargo, ora tur e angelnan tabata bùig pa Hesus pa rekonosé Su soberania i outoridat haltu i gobièrnu hustu, e tabata bùig huntu ku nan; pero su kurason tabata yená ku envidia i odio”. — Ellen G. White, The Story of Redemption, p. 14. Yalursheit ta un sintimentu asina peligroso pa karga ku den e Dies Mandamentunan mes, huntu ku e prohibishon di asesinato i ladronisia, tin e mandamentu kontra kudishi (Lesa Eks. 20:17).

Lesa Daniel 6:1-5, huntu ku Génesis 37:11 i 1 Samuel 18:6-9. Ki ròl yalursheit ta hunga den tur e storianan akí?

E abilidatnan atministrativo di Daniel ta impreshoná e rei ma ta provoká e yalursheit di otro ofisialnan. Por lo tantu, nan a konspirá pa deshasí di dje dor di akus’é di korupshon. Pero pa mas ku nan buska, nan no ta haña niun fayo den e atministrashon di Daniel. “Nan no por a haña niun akusashon òf fayo, pasobra e tabata fiel; tampoko tabatin niun eror òf fayo den dje” (Dan. 6:4, NKJV). E palabra arameo tradusí komo “fiel” por ser tradusí tambe komo “digno di konfiansa”.

Daniel ta ireprochabel; no tin nada ku e ofisialnan por hasi pa lanta un akusashon kontra dje. Sinembargo, nan ta persibí tambe kon fiel Daniel ta na su Dios i kon obediente e ta na e lei di su Dios. Asina nan ta realisá pronto ku pa enredá Daniel, nan lo tin ku produsí un situashon den kua Daniel lo ser afrontá ku e dilema di obedesé sea e lei di Dios òf e lei di e imperio. Di loke e ofisialnan a siña tokante Daniel, nan ta apsolutamente konvensí ku bou e kondishonnan korekto e lo sigui e lei di su Dios riba esun di e imperio. Ki un testimonio pa e fieldat di Daniel!

Lesa Daniel 6:6-9. Kiko ta e pensamentu tras di e dekreto akí? Kon e ta hunga riba banidat di e rei?

Darío por parse kèns dor di publiká un dekreto ku pronto e ta deseá di revoká. E ta kai den un trampa poné dor di e ofisialnan, ku ta sufisiente inteligente pa hunga ku e sirkunstansianan polítiko di e reino establesé resientemente. Darío a desentralisá e gobièrnu i a establesé shentibinti sátrapa pa asina hasi e atministrashon mas efisiente. Sinembargo, un akshon asina ta enserá algun riesgo finalmente. Un gobernador di influensia fásilmente por fomentá un rebelion i splet e reino. Por lo tantu, un lei ku ta fòrsa tur hende na petishon solamente na e rei pa trinta dia parse un bon strategia pa fomentá lealtat na e rei i, asina, prevení kualke tipo di agitashon. Pero e ofisialnan a despistá e rei dor di afirmá ku un proposishon asina tin e sosten di “tur” e gobernadónan, atministradónan, sátrapanan, konseheronan, i tutornan, un eror opvio, ya ku Daniel no ta inkluí. Ademas, e prospekto di ser tratá komo un dios por tabata apelá na e rei.

No tin evidensia ku reinan persa hamas a reklamá status divino. Sinembargo, e dekreto por tabata intenshoná pa hasi e rei e úniko representante di e diosnan pa trinta dia; es desir, orashonnan na e diosnan mester ser ofresé a traves di dje. Desafortunadamente, e rei no ta investigá e motivashonnan tras di e proposishon. Por lo tantu, e ta faya di persibí ku e lei ku supuestamente lo a prevení konspirashon mes tabata un konspirashon pa hasi Daniel daño.

Dos aspekto di e lei aki meresé atenshon. Di promé, e kastigu pa transgreshon ta pa ser tirá den e kueba di leonnan. Ya ku e tipo di kastigu akí no ta ser konfirmá otro kaminda, e por tabata un sugerensia na lastu momentu di e enemigunan di Daniel. Monarkanan di Oriente Serkano antiguo tabata pone leonnan den kouchinan pa asina laga nan lòs na sierto okashonnan pa yag. Asina no tabatin eskases di leonnan pa maltratá ken sea ku a riska violá e dekreto di e rei. Di dos, e dekreto no por ser kambiá. E naturalesa inkambiabel di e “lei di e Persa- i Medonan” ta ser menshoná tambe den Esther 1:19 i Esther 8:8. Diodorus Siculus, un historiadó griego antiguo, ta menshoná un okashon ora Darío III (pa no ser konfundí ku Darío menshoná den Daniel) a kambia di opinion pero no por a revoká un sentensia di morto ku el a pasa riba un hòmber inosente mas.

“Ma abo, or abo ta hasi orashon, bai den bo kamber, i ora bo a sera bo porta, hasi orashon na bo Tata kende ta den e lugá sekreto; i bo Tata ku ta mira den sekreto lo rekompensá bo abiertamente” (Mat. 6:6, NKJV).

Lesa Daniel 6:10. Dikon Daniel no ta simplemente hasi orashon den silensio sin niun hende mir’é?

Daniel ta un polítiko eksperensiá, pero riba tur kos, e ta un sirbidó di Dios. Komo tal, e ta e úniko miembro di e gobièrnu ku por komprondé kiko tin tras di e dekreto di e rei. Pa Darío e dekreto ta agregá na un oportunidat pa fortifiká e unidat di e reino, pero pa e konspiradónan e ta un strategia pa deshasí di Daniel.

Naturalmente, e kousa- i motibunan real tras di e konspirashon ta den e bataya kósmiko entre Dios i e forsanan di maldat. Na e momentu ei (539 P.K.) ya Daniel a risibí e vishonnan registrá den Daniel 7 (553 P.K.) i 8 (551 P.K.). Pues e por komprondé e dekreto real, no komo un asuntu di simplemente polítika humano sino komo un ehèmpel di e guera kósmiko akí. E vishon di e Yu di Hende ku ta entregá e reino na e pueblo di e Haltísimo i e asistensia konsolador di e angel intérprete (Daniel 7) por a trese e kurashi p’e pa afrontá e krísis de frente. Tambe e por a reflekshoná riba e eksperensia di su kompañeronan, ku tabata sufisiente balente ta desafiá e dekreto di Nabukodonosor (Daniel 3).

Asina, e no ta kambia su kustumbernan devoshonal ma ta sigui su práktika kustumbrá di hasi orashon tres biaha pa dia den direkshon di Yerusalèm. Apesar di e prohibishon di hasi petishon na kualke hende òf dios sino na e rei, Daniel no ta tuma prekoushon pa skonde òf kamuflá su bida di orashon durante e trinta dia krítiko ei tambe. E ta un minoria apsoluto ya ku e ta e úniko, entre dozeinnan di gobernantenan i otro ofisialnan, riba un konflikto ku e dekreto real. Pa medio di su bida di orashon habrí, sinembargo, e ta demostrá ku e lealtat ku e debe Dios ta bin promé ku su lealtat na e rei i su dekreto irevokabel.

Lesa Daniel 6:11-23. Kiko e rei ta bisa Daniel ku ta revelá kon poderoso Daniel ta komo testigu fiel di Dios?

E konspiradónan pronto a detektá Daniel hasiendo orashon, es desir, hasiendo eksaktamente loke e dekreto a prohibí. I ora nan ta trese e akusashon dilanti di e rei, nan ta referí na Daniel den un forma denigrante: “e Daniel ei, ku ta un di e koutivonan for di Juda” (Dan. 6:13, NKJV). Den nan bista, un di e ofisialnan prinsipal di e imperio, e faborito di e rei, no ta nada mas ku “un koutivo”. Ademas, nan ta pone Daniel kontra e rei dor di bisa ku Daniel “no ta demostrá rèspèt pa bo, o rei, òf pa e dekreto ku bo a firma” (NKJV). Awor e rei ta realisá ku el a kai den un trampa dor di firma e dekreto. E tèkst ta bisa ku “el a traha te na bahada di solo pa libr’é” (Dan. 6:14, NKJV). Pero no tin nada ku e por hasi pa salba e profeta for di e kastigu preskribí. E lei irevokabel di e Medo- i Persanan mester ser apliká estriktamente. Asina e rei, aunke di mal gana, ta emití e mandato pa tira Daniel pa e leonnan. Pero hasiendo esei, Darío ta ekspresá un chispa di speransa, kua ta zona manera un orashon: “Bo Dios, kende bo ta sirbi kontinuamente, E lo librá bo” (Dan. 6:16, NKJV).

E tèkst bíbliko no ta bisa kiko Daniel ta hasi meimei di e leonnan, pero nos por asumí ku e ta hasiendo orashon. I Dios ta honra e fe di Daniel dor di manda Su angel pa proteh’é. Mainta, Daniel ta keda sano i salvo i kla pa reanudá su aktividatnan den gobièrnu. Komentando riba e episodio akí, Ellen G. White ta bisa: “Dios no a prevení e enemigunan di Daniel di tir’é den e kueba di e leonnan; El a permití angelnan malu i hòmbernan malbado te asina leu pa kumpli ku nan propósito; pero tabata pa E por a hasi e liberashon di Su sirbidó mas notabel, i e derota di e enemigunan di bèrdat i hustisia mas kompletu”. — Prophets and Kings, p. 543, 544.

Lesa Daniel 6:24-28. Ki testimonio e rei ta duna tokante Dios?

Un punto importante di e relato ta e echo ku Darío ta alabá Dios i ta rekonosé Su soberania. Esaki ta un kulminashon, asta un klímaks, di e alabansanan òf ekspreshonnan di rekonosementu ofresé na di Dios den e kapítulonan anterior (Dan. 2:20-23; Dan. 3:28,29; Dan. 4:1-3, 34-37). Meskos ku Nabukodonosor, Darío ta respondé riba e liberashon di Daniel alabando Dios. Pero e ta hasi mas tambe: e ta revoká su dekreto anterior i ta ordená tur hende pa “teme dilanti di e Dios di Daniel” (Dan. 6:26).

Sí, Daniel ta ser salbá milagrosamente, su fieldat rekompensá, maldat kastigá, i e honor i poder di Dios vindiká. Pero loke nos ta mira aki ta un mini-ehèmpel di loke lo sosodé riba un eskala universal: e pueblo di Dios liberá, maldat kastigá, e Señor vindiká dilanti di e kósmos.

Lesa Daniel 6:24. Kiko nos lo por haña mas bien problemátiko tokante e versíkulo akí, i dikon?

Tin, sinembargo, un problema preokupante, i esei ta e esposanan i e yunan ku te asina leu ku nos sa, ta inosente, i sinembargo ta sufri e mesun destino ku esnan kulpabel. Kon nos por splika loke ta parse un mal maneho di hustisia?

Na promé lugá, nos mester tuma nota ku e akshon ta ser disidí i implementá dor di e rei di akuerdo ku lei persa, kua ta inkluí e famia den e kastigu di e kulpabel. Di akuerdo ku un prinsipio antiguo, henter e famia ta karga responsabilidat di e ofensa di un miembro di famia. Esaki no ta nifiká ku e ta korekto; e ta nifiká solamente ku e historia akí ta pas ku loke nos sa tokante lei persa.

Na di dos lugá, nos mester tuma nota ku e relato bíbliko ta reportá e evento pero no ta respaldá e akshon di e rei. De echo, Beibel klaramente ta prohibí pa yunan ser kondená na morto pa motibu di e pikánan di e mayornan (Deut. 24:16).