Di e Laman Turbulento pa e Nubianan di Shelu

Lesa Daniel 7. Kiko ta e esensia di loke a ser mustrá na Daniel, i di kiko e vishon ta trata?

Kada animal mustrá na Daniel ta korespondé na un sekshon di e estatua mustrá na Nabukodonosor, pero awor mas detaye tokante kada reino ta ser duná. Kon interesante ta ku e kriaturanan, ku ta simbolisá nashonnan pagano, tur ta bestianan impuro. Tambe, eksepto pa e di kuater bestia, Daniel ta deskribí e animalnan komo semehante na algun kriatura konosí. Asina, e animalnan no ta símbolonan arbitrario, ya ku kada un tin algun karakterístika òf ta mustra na algun aspekto di e reino ku e ta representá.

Leon: Un leon ta un representashon mas adekuá di Babilonia. Leonnan ku ala tabata dekorá murayanan di palasio i otro obranan di arte babilóniko. E leon deskribí den e vishon finalmente su alanan ta ser ranká, a ser poné pará stret manera hende, i ta risibí un kurason humano. E proseso akí ta simbolisá e imperio Babilóniko bou di su reinan.

Ber: E ber ta representá e Imperio Medo-Persa. E echo ku e tabata di banda ta indiká e superioridat di e Personan riba e Medonan. E tres repchi entre su djentenan ta para pa e tres konkistanan prinsipal di e Imperio Medo-Persa: Lidia, Babilonia, i Egipto.

Leopardo: E leopardo rápido ta representá e imperio Griego establesé dor di Alexander e Grandi. E kuater alanan ta hasi e bestia akí ainda mas rápido, un representashon apto di Alexander, ku den un par di aña a trese henter e mundu konosí bou di su dominio.

E animal spantoso i teribel: Miéntras ku e entidatnan anterior solamente tabata parse e animalnan menshoná, esun aki ta un entidat riba su mes. Es desir, esnan promé ta ser deskribí komo "manera" un leon òf "manera" un ber, pero esun aki no ta ser deskribí manera nada. E bestia akí ku hopi kachu ta parse tambe hopi mas kruel i feros ku esnan anterior. Komo tal, e ta un representashon adekuá di Roma pagano, kua a konkista, a goberná, i a trapa riba e mundu ku su pianan.

Lesa Daniel 7:7,8, 19-25. Ken ta e poder di e kachu chikitu ku ta lanta direktamente for, i ta keda parti di, e di kuater bestia?

Ayera nos a siña ku e animal feroso ku dies kachu ku ta goberná e mundu ku krueldat ekstremo ta representá Roma pagano. Awor nos mester konsiderá e kachu chikitu i e poder ku e ta representá. Manera a ser deskribí den e vishon, e di kuater animal tin dies kachu, di kua tres kachu a ser ranká saká pa traha lugá pa un kachu chikitu. E kachu akí tin wowonan humano i ta papia "palabranan arogante" (Dan. 7:8, NKJV). Ta evidente ku e kachu chikitu ta surgi for di e entidat representá dor di e animal teribel, kua ta Roma pagano. Den un forma, e kachu ta ekstendé òf ta kontinuá ku algun karakterístikanan di Roma pagano. E ta solamente un fase despues di e mesun poder.

Daniel ta mira e otro kachu akí ta hasi guera kontra e santunan. E angel ta splik'é ku e kachu akí ta un rei ku lo realisá tres akshon ilegal:

1. papia palabranan arogante kontra e Haltísimo,
2. persiguí e santunan di e Haltísimo,
3. trata na kambia tempunan i lei.

I komo konsekuensia, e santunan lo ser entregá den su man. Despues, e angel ta duna e kuadro di tempu pa e aktividatnan di e kachu chikitu: un tempu i tempunan i mitar di un tempu. Den e ehèmpel aki di lenguahe profétiko, e palabra tempu ta nifiká "aña", i asina e ekspreshon tempunan ta nifiká añanan, un forma dual: "dos aña". Por lo tantu, esaki ta un periodo di tres aña i mei profétiko, kua, di akuerdo ku e prinsipio di aña-dia, ta indiká un periodo di 1260 aña. Durante e tempu akí e kachu chikitu lo organisá un atake kontra Dios, persiguí e santunan, i intentá na kambia e lei di Dios.

Lesa 2 Tesalonisensenan 2:1-12. Ki similaridatnan tin entre e hòmber di piká i e kachu chikitu? Kua poder nos ta kere ku esaki ta papiando di dje, i dikon? Kua ta e úniko poder ku a surgi di Roma pagano, pero ta keda parti di Roma, un poder ku ta ekstendé for di e tempu di Roma pagano te na e fin di mundu, kua ta nifiká ku awe ainda e ta eksistí?

Despues di e vishon di e kuater animalnan i e aktividatnan di e kachu chikitu, e profeta ta mira un esena di huisio den shelu (Dan. 7: 9,10,13,14). Ora e korte ta reuní, trononan ta ser poné na lugá i e Ansiano di Dianan ta tuma Su asiento. Manera e esena selestial ta mustra, míles i míles di sernan selestial ta ministrá dilanti e Ansiano di Dianan, e korte ta sinta, i e bukinan ta ser habrí.

Loke ta importante pa nota tokante e huisio akí ta ku e ta tuma lugá despues di e periodo di 1260 aña di e aktividat di e kachu chikitu (A.D. 538-1798; wak e lès di djabièrnè) pero promé ku e establesimentu di e reino final di Dios. De echo, tres biaha den e vishon e siguiente sekuensia ta aparesé:

1. Fase di kachu chikitu (538-1798)
2. Huisio selestial
3. E reino eterno di Dios

Lesa Daniel 7:13,14,21,22,26,27. Den ki forma e huisio ta benefisiá e pueblo di Dios?

Tèstamènt Bieu ta deskribí vários akto di huisio for di e tabernakel i tèmpel, pero e huisio referí na dje aki ta diferente. Esaki ta e huisio kósmiko ku ta afektá no solamente e kachu chikitu sino tambe e santunan di e Haltísimo, ku finalmente lo risibí e reino.

Daniel 7 no ta deskribí e huisio òf ta duna detayenan tokante su komienso i fin. Pero e ta impliká ku e huisio ta ser ehersé despues di e ataka di e kachu chikitu kontra Dios i Su pueblo. E punto aki ta, anto, ta pa enfatisá e komienso di un huisio di proporshonnan kósmiko. For di Daniel 8 i 9 (wak e siguiente simannan), nos lo siña tokante e tempu di kuminsamentu di e huisio i e echo ku e huisio akí ta relashoná ku e purifikashon di e santuario selestial riba e Dia di Ekspiashon selestial. E lès aki ta ku klaramente nos lo tin un huisio pre-Atvènt den shelu ku lo ta na fabor di e pueblo di Dios (Dan. 7:22).

Lesa Daniel 7:13. Ken ta e Yu di hende aki, i kon bo ta identifik'E? (Lesa tambe Marko 13:26, Mat. 8:20, Mat. 9:6, Lukas 9:26, Lukas 12:8.)

Segun ku e huisio ta desaroyá, un figura di mas importante ta drenta e esena: e Yu di Hende. Ken E ta? Na promé lugá, e Yu di Hende ta aparesé komo un figura selestial individual. Pero, manera e título ta impliká, e ta mustra tambe karakterístikanan humano. Den otro palabra, E ta un persona divino-humano ku ta bini pa hunga un ròl aktivo den e huisio. Na di dos lugá, e Yu di Hende ku ta bin den e nubianan ta un imágen komun di e Segundo Binida den Tèstamènt Nobo. Sinembargo, den Daniel 7:13 spesífikamente, e Yu di hende no ta ser deskribí komo biniendo for di shelu na tera, sino komo moviendo horizontalmente for di un lugá den shelu na un otro pa asina aparesé dilanti di e Ansiano di dianan. Na di tres lugá, e representashon di e Yu di hende biniendo den e nubianan di shelu ta sugerí un manifestashon visibel di Señor. Pero e imágen akí tambe ta kòrda nos riba e sumosaserdote ku, rondoná dor di un nubia di sensia, ta drenta e lugá Santísimo riba e Dia di Ekspiashon pa ehekutá e purifikashon di e santuario.

E Yu di hende ta tambe un figura real. E ta risibí "dominio i gloria i un reino" i " tur pueblo, nashon, i lenga mester sirbiE" (Dan. 7:14, NKJV). E verbo "sirbi" por ser tradusí tambe komo "adorá". E ta aparesé nuebe biaha den kapítulonan 1-7 (Dan. 3:12,14,17,18,28; Dan. 6:16,20; Dan. 7:14,27) i ta transmití e idea di rindi homenahe na un deidat. Asina, komo konsekuensia di e intento pa kambia e lei di Dios, e sistema religioso representá dor di e kachu chikitu ta korumpí e adorashon debí na Dios. E huisio deskribí aki ta mustra ku berdadero adorashon finalmente ta ser restourá. E sistema di adorashon establesé dor di e sistema papal, entre otro elementonan, ta pone un ser humano kaí komo un mediador entre Dios i humanidat. Daniel ta mustra ku e úniko mediador kapas di representá humanidat dilanti di Dios ta e Yu di Hende. Manera Beibel ta bisa: "Pasobra tin un Dios i un Mediador entre Dios i hende, e Hende Kristu Hesus" (1 Tim. 2:5, NKJV).

Kiko ta sosodé ku e pueblo di Dios di akuerdo ku e siguiente tèkstnan? Dan. 7:18,21,22,25,27.

“Esnan santu di e Haltísimo" (NKJV) ta un designashon di e pueblo di Dios. Nan ta ser ataká dor di e poder representá dor di e kachu chikitu. Pasobra nan ta insistí riba permanesé fiel na e Palabra di Dios, nan ta ser persiguí durante e tempunan di gobièrnu papal. Kristiannan a ser persiguí durante e tempu di e Imperio Roma pagano tambe (e di kuater bestia mes), pero e persekushon menshoná den Daniel 7:25 ta un persekushon di e santunan dor di e kachu chikitu, kua ta surgi solamente despues ku e fase pagano di Roma terminá.

Sinembargo, e pueblo di Dios lo no ser someté na opreshon dor di poder mundial pa semper. E reino di Dios lo remplasá e reinonan di e mundu. Kuriosamente, den e vishon aktual, na e Yu di hende “a ser duna dominio i gloria i un reino" (Dan. 7:14, NKJV). Pero den e interpretashon ofresé dor di e angel, ta "esnan santu" ku ta risibí e reino (Dan. 7:18, NRSV). No tin kontradikshon aki. Pasobra e Yu di Hende ta relashoná na Dios i humanidat, Su viktoria ta e viktoria di esnan ku E ta representá.

Ora e sumosaserdote puntra si Hesus ta e Mesías, e Yu di Dios, Hesus ta mustra bèk na Salmo 110:1 i Daniel 7:13,14 i ta bisa: "Ami ta. I boso lo mira e Yu di Hende sintá na man drechi di e Poder, i biniendo den e nubianan di shelu" (Marko 14:62, NKJV). Por lo tantu, Hesus ta Esun ku ta representá nos den e tribunal selestial. Ya El a derotá e podernan di skuridat i ta kompartí Su triunfo ku esnan ku ta bini serka di djE. P'esei, no tin motibu pa teme. Manera apòstel Pablo ta deklará asina ábilmente: "Sinembargo, den tur e kosnan akí nos ta mas ku vensedó dor di Esun ku a stima nos. Pasobra mi ta konvensí ku ni morto ni bida, ni angelnan ni prinsipadonan ni podernan, ni kosnan presente ni kosnan ku tin ku bin, ni haltura ni profundidat, ni ningun otro kos kreá, lo ta kapas di separá nos for di e amor di Dios kua ta den Kristu Hesus nos Señor" (Rom. 8:37-39, NKJV).