Di Konfeshon pa Konsolashon

Lesa Daniel 9:1,2. Daniel ta bisa ku el "a komprondé pa medio di bukinan" e profesia ku e ta studiando asina kuidadosamente. Ki buki òf bukinan di Beibel e ke men?

Ora nos wak e orashon akí, ta bira evidente ku e ta surgi di un estudio profundo di e revelashon previo di Dios na Moises i e profetanan. Ora el a siña for di e ròl di Jeremias ku su periodo di koutiverio lo dura setenta aña (lesa Jer. 25:11,12; Jer. 29:10), Daniel ta komprondé e importansia di e momentu históriko den kua e ta bibando.

Laga nos tene den mente ku Daniel ta ofresé e orashon akí na 539 P.K., e aña ku e Imperio Persa ta remplasá Babilonia. Asina ku kasi setenta aña a pasa desde ku Nabukodonosor a konkistá Yerusalèm i a destruí e tèmpel. P'esei, di akuerdo ku e profesia di Jeremias, e pueblo di Dios pronto lo regresá na nan pais natal. Konfiando e Palabra di Dios, Daniel sa ku algu transedental ta na punto di sosodé ku su pueblo i ku, manera Dios a primintí den Su Palabra, e eksilio den Babilonia pronto lo terminá i e Hudiunan lo regresá na nan kas.

For di su estudio di e Skrituranan disponibel p’e, Daniel ta realisá tambe kon serio e pikánan di su pueblo ta. Pasobra nan a kibra e pakto, nan a daña nan relashon ku Dios; p’esei e konsekuensia inevitabel ta, e eksilio (Lev. 26:14-45). Por lo tantu, ta e estudio di e revelashon di Dios ku ta proveé Daniel ku un komprondementu di e tempunan i ku ta dun'é un sentido di urgensia pa implorá na Dios na fabor di e pueblo.

Segun ku nos ta aserká e último dianan di historia di mundu, nos mester studia mas ku nunka i biba di akuerdo ku e Palabra di Dios. Solamente Skritura por proveé nos ku un splikashon outoritativo di e mundu den kua nos ta biba. Despues di tur kos, Skritura ta konta e storia di e gran kontroversia entre bon i malu, i asina ta revelá ku historia humano lo sera ku e anikilashon di maldat i e establesimentu di e reino eterno di Dios. Mas nos studia e Skrituranan, mihó nos por komprondé e situashon kontemporáneo di e mundu i nos lugá den dje, komo tambe nos motibunan pa speransa meimei di un mundu ku no ta ofresé ningun.

Lesa Daniel 9:3-19. Riba ki base Daniel ta hasi su súplika pa miserikòrdia?

Nos mester señalá spesialmente algun punto den e orashon akí. Na promé lugá, niun kaminda den e orashon di Daniel e ta pidiendo niun klase di splikashon pa e kalamidatnan ku a sosodé ku e pueblo hudiu. E konosé e motibu. En realidat, e dimenshon di e orashon ta konsistí di Daniel mes relatando e rason: "Nos no a obedesé e bos di Señor nos Dios, pa kana den Su leinan, kua El a pone nos dilanti pa medio di Su sirbidónan, e profetanan" (Dan. 9:10, NKJV). E último biaha ku nos a laga Daniel teniendo un nesesidat pa komprondé algu tabata na final di Daniel 8, ora e ta bisa ku e no ta komprondé e vishon di e 2300 atardi i mainta (lesa Dan. 8:27).

E di dos punto ta ku e orashon akí ta un apelashon na e grasia di Dios, pa e disponibilidat di Dios pa pordoná Su pueblo aunke ku nan a peka i a hasi maldat. Den un sentido, nos ta mira aki un ilustrashon poderoso di e evangelio, di hendenan pekaminoso ku no tin mérito di nan mes, sinembargo buskando grasia ku nan no ta meresé i pa pordon ku nan no a gana. Esaki no ta un ehèmpel di unda kada unu di nos ta, individualmente, dilanti di Dios?

Lesa Daniel 9:18,19. Ki otro motibu Daniel ta duna pa Señor kontestá su orashon?

Un otro aspekto di e orashon di Daniel ta meresé menshon: e apelashon na e honor di e nòmber di Dios. Es desir, e orashon no ta motivá dor di e kumbiniensia personal di Daniel òf esun di su pueblo, sino pa Dios Su propio kousa (Dan. 9:17-19). Den otro palabra, e petishon mester ser konsedé pasombra e nòmber di Dios lo ser honrá.

Lesa 2 Reinan 19:15-19. Den ki forma e orashon di Ezekias ta parse esun di Daniel? Kiko Mateo 5:16 ta bisa tokante kon nos, tambe, por glorifiká Dios?

Lesa *Daniel 9:5-13. Kiko ta signifikante tokante e echo ku Daniel ta sigui bisa ku "nos" a hasi malu, ku esei inkluyendo su mes den e pikánan ku finalmente a trese un kalamidat asina riba e nashon?

E orashon di Daniel ta djis unu entre otro orashonnan di interseshon signifikante ku Beibel ta kontené. Orashonnan asina ta toka kurason di Dios, evitando huisio i tresiendo liberashon for di enemigunan en kambio. Ora Dios ta kla pa destruí henter e nashon hudiu, e interseshon di Moises a wanta Su man (Eks. 32:7-14, Num. 14:10-25). Asta ora sekura severo ta na punto di konsumí e tera, Dios ta kontestá e orashon di Elias i ta basha áwaseru pa rebibá e tera (1 Reinan 18).

Ora nos ta hasi orashon pa miembronan di famia, amigunan, i otro hendenan òf situashonnan, Dios ta tende nos orashonnan i por intervení. Tin biaha e por tuma mas tempu pa un orashon ser kontestá, pero nos por ta sigur ku Dios nunka ta lubidá e nesesidatnan di Su yunan (lesa Santiago 5:16).

Den e kaso akí, Daniel ta hunga e ròl di un intersesor, òf mediadó, entre Dios i e pueblo. For di su estudio di e Skrituranan, e profeta ta realisá kon pekaminoso e pueblo a bira segun ku nan ta transgresá e lei di Dios i ta ninga di skucha e spièrtamentunan di Dios. Asina, rekonosiendo nan kondishon spiritual desesperá, Daniel ta hasi orashon pa sanashon i pordon. Pero e profeta tambe ta identifiká su mes ku su pueblo. Den algun aspekto Daniel ta ilustrá e ròl di Kristu komo nos intersesor (Juan 17). Sinembargo, tin un diferensia radikal: Kristu ta "sin piká" (Hebr. 4:15) i por lo tantu no tin nesesidat pa konfesá piká personal òf pa ofresé sakrifisionan pa pordon personal (Hebr. 7:26,27). Pero E ta identifiká Su Mes den un forma úniko ku pekadornan: "Dios a hasi E Kende no tabatin piká bira piká pa nos, pa asina den djE nos lo por a bira e hustisia di Dios" (2 Kor. 5:21, NIV).

E orashon intersesor di Daniel ta abordá dos preokupashon prinsipal: e pikánan di e pueblo i e desolashon di Yerusalèm. Por lo tantu, e kontesta di Dios ta atendé e dos petishonnan akí. A traves di e obra di e Mesias e pueblo lo ser redimí i e santuario lo ser ungí. E dos petishonnan spesífiko, sinembargo, ta ser kontestá den formanan ku ta transendé e horizonte históriko inmediato di Daniel: e obra di e Mesías lo benefisiá henter e rasa humano.

Lesa Daniel 9:21-27. Ki obra mester a ser hasí denter di e periodo di 70 siman? Dikon ta solamente Hesus por logr'é?

1. "Pa terminá e transgreshon". E palabra hebreo pa "transgreshon" (pesha') ta sugerí e violashonnan boluntario dor di un inferior kontra un superior (por ehèmpel, Prov. 28:24). E palabra akí ta aparesé tambe den Beibel den relashon ku desafio habrí di Dios dor di hende (Ezek. 2:3). A traves di e sanger di Hesus, sinembargo, rebelion kontra Dios ta ser anulá i hende ta ser ofresé e méritonan ku ta kore for di Kalvario.
2. "Pone un fin na pikánan". E verbo ta hiba e nifikashon di "seya", i aki e ta nifiká ku piká ta pordoná. Desde e kaida, e rasa humano tabata inkapas pa kumpli ku e stándartnan di Dios, pero e Mesias lo enkargá Su mes di nos frakasonan.
3. "Hasi rekonsiliashon pa inikidat". Manera Pablo ta bisa: " Pasobra a agradá e Tata pa den djE henter e plenitut lo a biba, i dor di djE rekonsiliá tur kos kunE mes, dor di djE, sea kosnan riba tera òf kosnan den shelu, hasiendo pas pa medio di e sanger di Su krus" (Kol. 1:19,20, NKJV). Aki, tambe, solamente Hesus por logra e realidat aki.
4. "Pa trese hustisia eterno". Kristu a tuma nos lugá riba e krus i por lo tantu a drama riba nos e kondishon bendishoná di "ta bon" ku Dios. Solamente pa medio di fe nos por risibí e hustisia akí ku ta bini di Dios.
5. "Seya vishon i profesia". Ora Kristu a ofresé Su Mes den sakrifisio, e profesianan di Tèstamènt Bieu ku tabata señalá Su obra ekspiatorio a ser seyá den sentido ku nan a ser kumplí.
6. "I pa ungí e Santísimo". E Santísimo menshoná aki no ta un persona sino un lugá. Asina ku e deklarashon ta referí na e unshon di e santuario selestial ora Kristu a ser inougurá aya komo nos gran Sumosaserdote (Hebr. 8:1).

Na final di e vishon di e 2300 atardi i mainta, e profeta ta keda asombrá pasobra e no por komprond’é (Dan. 8:27, NKJV). Dies aña despues, Gabriel ta bin pa yuda Daniel "komprondé" e vishon (Dan. 9:23). E último revelashon akí ta supli e informashon ku tabata falta i ta revelá ku e obra di e Mesías ta bai ser realisá te na final di un periodo di setenta siman. Di akuerdo ku e prinsipio di aña-dia i e kurso di e eventonan pronositká, e setenta siman mester ser komprondé komo 490 aña. I e punto di komienso pa e periodo akí ta e mandato pa restourá i rekonstruí Yerusalèm (Dan. 9:25). E mandato akí ta ser emití dor di e Rei Artaherhes na 457 P.K. E ta permití e Hudiunan bou di liderazgo di Esdras pa rekonstruí Yerusalèm (Esdras 7). Di akuerdo ku e tèkst bíbliko, e setenta siman ta ser "determiná" òf "kòrtá kitá afó". Esaki ta indiká ku e periodo di tempu di 490 aña a ser kòrtá for di un periodo di tempu mas largu, es desir, for di e 2300 aña designá den e vishon di kapítulo 8. For di esaki ta konkluí ku e 2300 aña i e 490 aña mester tin e mesun punto di komienso, es desir, 457 P.K.

E profesia di e setenta siman ta ser dividí den tres sekshon: shete siman, sesentidos siman, i e di setenta siman.

E shete siman (49 aña) mas probablemente ta referí na e tempu durante kua Yerusalèm lo ser rekonstruí. Despues di e shete simannan akí, lo tin sesentidos siman (434 aña) ku ta hiba na "Mesías e Prens" (Dan. 9:25). Asina, 483 aña despues di e dekreto di Artaherhes, es desir, den aña A.D. 27, Hesus e Mesías ta ser batisá i ungí dor di Spiritu Santu pa Su mishon mesiániko.

Durante e di setenta siman, otro eventonan krusial lo tuma lugá:

1. "Mesías lo ser kòrtá kitá afó" (Dan. 9:26, NKJV), kua ta referí na e morto di Kristu.
2. E Mesías “lo konfirmá un aliansa ku hopi hende pa un siman" (Dan. 9:27, NKJV). Esaki ta e mishon spesial di Hesus i e apòstelnan na e nashon hudiu. E ta ser realisá durante e último "siman", for di A.D. 27 te 34.
3. "Ma meimei di e siman E lo pone un fin na sakrifisio i ofrenda" (Dan. 9:27, NKJV). Tres aña i mei despues di Su boutismo (es desir, meimei di e siman), Hesus ta trese e sistema sakrifisial na un fin, den e sentido ku ya e no tin niun nifikashon profétiko mas, dor di ofresé Su Mes komo e sakrifisio final i perfekto di e Pakto Nobo, i asina anulá e nesesidat pa mas sakrifisionan animal. E último siman di e profesia di 70-siman ta terminá na A.D. 34, ora Esteban ta ser martirisá i e mensahe di evangelio kuminsá alkansá no solamente e Hudiunan sino e Paganonan tambe.