Di Bataya pa Viktoria

Lesa Daniel 10:1-3. Kiko nos ta topa Daniel ta hasiendo atrobe?

Daniel no ta splika e rasonnan pa su periodo di luto prolongá. Pero un interseshon ferviente asina ta ser motivá mas probablemente dor di e situashon di e Hudiunan, ku a kaba di regresá for di Babilonia pa Palestina.

Lesa Esdras 4:1-5. Ki desafionan e Hudiunan ta afrontando na nan regreso?

Nos sa for di Esdras 4:1-5 ku na e momentu akí e Hudiunan ta afrontando oposishon fuerte segun ku nan ta intentá rekonstruí e tèmpel. E Samaritanonan ta manda rapòrtnan falsu na e korte Persa, insitando e rei pa stòp e trabou di rekonstrukshon. Dilanti di krísisnan asina, pa tres siman Daniel ta roga na Dios pa influensiá Siro pa permití e trabou kontinuá.

Na e altura akí, Daniel probablemente ta serka di nobenta aña di edat. E no ta pensa riba su mes sino riba su pueblo i e desafionan ku nan ta afrontá. I e ta persistí den orashon pa tres siman kompletu promé di risibí un kontesta di Dios. Durante e tempu akí, e profeta ta sigui un dieta masha modesto, apstené di delikadesa i asta ungwento. E no tabata preokupá apsolutamente tokante su komodidat i aparensia, sino e ta profundamente preokupá tokante e bienestar di su kompatriotanan hudiu na Yerusalèm na mil mia di distansia.

Ora nos wak den e bida di orashon di Daniel, nos ta siña algun lès balioso. Na promé lugá, nos mester persistí den orashon, asta ora nos petishonnan no ser kontestá inmediatamente. Na di dos lugá, nos mester dediká tempu na hasi orashon pa otronan. Tin algu speshal tokante orashonnan intersesor. Kòrda ku "Señor a restourá e pèrdidanan di Job ora el a hasi orashon pa su amigunan" (Job 42:10, NKJV). Na di tres lugá, orashon ta impulsá Dios pa hasi algu konkreto i real. Asina, laga nos hasi orashon semper, tur tipo di orashon. Frente pruebanan insoportabel, problemanan grandi, i desafionan abrumador, laga nos hiba nos karganan na Dios den orashon (Efe. 6:18).

Lesa Daniel 10:4-9. Kiko ta sosodé ku Daniel aki?

Ora Daniel ta deskribí su eksperensia, apénas nos por imaginá e splendor abrumador di loke e ta mira. E aparensia humano ei (Dan. 10:5,6) ta hiba nos bèk na e "Yu di hende" deskribí den e vishon di e huisio selestial (Dan. 7:13). Su bistí di lino ta kòrda nos riba bistínan saserdotal (Lev. 16:4), un aspekto ku ta similar na e personahe akí di e "Prens di e ehérsito" deskribí den konekshon ku e santuario selestial (Daniel 8, NKJV). Oro tambe ta ser asosiá ku e bistí saserdotal komo un señal di dignidat real.

Por último, e komparashon di e figura akí ku welek, kandela, bròns, i un bos poderoso ta present'é komo un ser sobrenatural. Esaki ta un hende investí ku atributonan saserdotal, real, i militar. E figura akí tambe ta ekshibí similaridatnan interesante ku e ser selestial ku ta aparesé na Josue djis promé ku e bataya kontra Jeriko (Jos. 5:13,14). Den e vishon, Josue ta mira e "Komandante di e ehérsito di Señor" (NKJV). Kuriosamente, e palabra hebreo tradusí komo " komandante" (sar) aki ta e mesun palabra tradusí komo "prens" refiriendo na Miguel den Daniel 10:21. Pero un paralelo mas serka ta sosodé entre Daniel i Juan, ku a risibí un vishon di e Señor resusitá riba dia di Sabat.

Ki similaridatnan nos ta haña entre e vishon di Daniel di e Yu di Dios den Daniel 10 i esnan den Josue 5:13-15 i Revelashon 1:12-18?

Di akuerdo ku Daniel, esnan ku ta huntu kuné ta yena ku spantu, i Daniel mes ta kai débil i frágil na suela. E manifestashon di e presensia di Dios simplemente ta aplast’é. Sinembargo, kual sea su temornan inmediato, e vishon di Daniel ta mustra ku Dios ta den kontròl di historia. Di bèrdat, segun ku e vishon ta desaroyá, nos lo mira ku Dios ta proveé Daniel ku un resúmen di historia humano for di e tempunan di e profeta te na e establesimentu di e reino di Dios (Daniel 11 i 12).

Lesa Daniel 10:10-19. Kiko ta pasa kada biaha ku un angel mishi ku Daniel?

Aplastá ku e resplandor di lus divino, e profeta ta kai. Despues un angel ta aparesé pa mishi kuné i konsol'é. Miéntras nos ta lesa e relato, tuma nota ku e angel ta mishi ku Daniel tres biaha.

E promé toke ta kapasitá e profeta pa para i tende e palabranan di konsuelo biniendo for di shelu: "No tene miedu, Daniel, pasobra for di e promé dia ku bo a pone bo kurason pa komprendé, i pa humiá bo mes dilanti di bo Dios, bo palabranan a ser tendé; i mi a bin pa motibu di bo palabranan” (Dan. 10:12, NKJV). E orashon di Daniel a move e shelunan. Pa nos esaki ta un siguransa ku Dios ta tende nos orashonnan, kua ta un gran konsuelo den tempunan di problema.

E di dos toke ta kapasitá Daniel pa papia. E profeta ta basha su palabranan dilanti di Señor, ekspresando su sintimentunan di temor i emoshon: "Mi Señor, pa motibu di e vishon mi angustia a aplastá mi, i mi no tin forsa mas. Pasobra kon e sirbidó akí di mi señor por papia ku bo, mi señor? Pa loke ta ami, no ta keda forsa mas den mi awor, ni a keda niun rosea den mi' " (Dan. 10:16,17, NKJV). Asina, Dios no solamente ta papia ku nos; E ke pa nos habri nos boka pa asina nos por bis' E tokante nos sintimentunan, nesesidatnan i aspirashonnan.

E di tres toke ta trese forsa p’e. Ora Daniel ta rekonosé su inabilidat, e angel ta mishi kuné i ta konsol'é ku e pas di Dios: "O hòmber grandemente stimá, no tene miedu! Pas sea ku bo; sea fuerte, sí, sea fuerte!" (Dan. 10:19, NKJV). Kòrda ku e angel a ser mandá serka Daniel komo kontesta riba su orashonnan, pa asina dun' é disernimientu i komprondementu. Den otro palabra, e vishon ku ta sigui den kapítulo 11 lo ta unu ku ta intenshoná pa enkurashá Daniel komo kontesta riba su aflikshon i meditashon riba e situashon presente na Yerusalèm. Ku Dios na nos banda, anto, nos por tin pas asta ora nos ta afrontá aflikshon. Su toke amoroso ta kapasitá nos pa mira den futuro ku speransa.

Lesa Daniel 10:20,21. Kiko ta ser revelá na Daniel aki?

E mensahero selestial ta hala e kortina un banda i ta revelá na Daniel e guera kósmiko ku ta tuma lugá tras di e esenanan di historia humano. Tan pronto ku Daniel kuminsá hasi orashon, un bataya spiritual ta kuminsá entre shelu i tera. Sernan selestial ta kuminsá un lucha ku e rei di Persia pa laga e Hudiunan sigui ku e rekonstrukshon di e tèmpel. Nos sa for di e introdukshon di Daniel 10 ku e rei di Persia ta Siro. Sinembargo, un rei humano lagá pa su kuenta no por ofresé oposishon signifikante na un ser selestial. Esaki ta indiká ku tras di e rei humano tin un agente spiritual ku ta instigá Siro pa stòp e Hudiunan di rekonstruí e tèmpel.

Un situashon similar ta tuma lugá den Ezekiel 28, den kua e rei di Tiro ta representá Satanas, e poder spiritual tras di e rei humano di e stat ei. Asina, no mester ta sorprendente ku e reinan di Persia kontra ken Miguel ta bin bringa ta inkluí Satanas i su angelnan. Esaki ta mustra ku e oposishon humano pa e rekonstrukshon di e tèmpel na Yerusalèm tin un kontrapartida den e reino spiritual.

Lesa Daniel 10:13. Ki tipo di bataya ta ser deskribí aki?

"Miéntras Satanas tabata luchando pa influensiá e podernan di mas haltu den e reino di Medo-Persia pa mustra desagrado na e pueblo di Dios, angelnan tabata obra na fabor di e eksiliadonan. E kontroversia tabata unu den kua henter shelu tabata interesá. A traves di profeta Daniel, nos ta ser duná un bista parsial di e lucha poderoso akí entre e forsanan di bon i e forsanan di malu. Pa tres siman Gabriel a lucha ku e podernan di skuridat, tratando di kontrarestá e influensianan obrando den e mente di Siro; i promé ku e kòntèst a terminá, Kristu Mes a bini na yudansa di Gabriel. ‘E prens di e reino di Persia a stroba mi bintiun dia largu', Gabriel ta deklará; ‘pero, mira, Miguel, un di e prensnan prinsipal, a bin yuda mi; i mi a keda aya serka e reinan di Persia'. Daniel 10:13. Tur loke shelu por a hasi na fabor di e pueblo di Dios a ser hasí. E viktoria finalmente a ser ganá; e forsanan di e enemigu a ser mantené bou di kontròl tur e dianan di Siro, i tur e dianan di su yu hòmber Cambises, ku a reina masoménos shete aña i mei".- Ellen G. White, Prophets and Kings, p. 571,572.

E personahe di mas prominente di e buki di Daniel ta e figura inisialmente yamá "Yu di Hende" (Dan. 7:13, NKJV) òf "Prens di e ehérsito" (Dan. 8:11, NKJV). Finalmente nos a haña sa ku su nòmber ta Miguel (Dan. 10:12), kua ta nifiká "Ken ta manera Dios?" E ta bin pa yuda Gabriel den e konflikto ku e rei di Persia (Dan. 10:13). E angel ta referí na e ser selestial akí komo "Miguel bo prens" (Dan. 10:21), es desir, e prens di e pueblo di Dios. Miguel ta aparesé mas despues den e buki di Daniel komo Esun ku ta para pa e pueblo di Dios (Dan. 12:1). For di Hudas 9, nos ta siña ku Miguel, yamá tambe un arkangel, ta bringa kontra Satanas i ta resusitá Moises. Revelashon 12:7 ta revelá ku Miguel ta para komo e lider di e ehérsito selestial, kua ta derotá Satanas i su angelnan kaí. Pues Miguel ta niun otro sino Hesukristu. Meskos ku e Imperio Perso tin un komandante supremo, un forsa spiritual ku ta para tras di su lider humano, asina e pueblo di Dios tin den Miguel nan Komandante-Hefe, ku ta intervení pa bringa i gana e guera kósmiko na nan fabor.

Lesa Kolosensenan 2:15. Kon Hesus a logra viktoria den e konflikto kósmiko?

Ora nos ta afrontá e forsanan di maldat, nos por tin fe den Hesus nos kampion. E ta derotá Satanas na komienso di Su ministerio públiko. Durante Su bida terenal, E ta derotá Satanas den desierto ora El a ser ataká ku tentashonnan, E ta bringa multitutnan demoniako, i E ta liberá hende for di e poder di skuridat. Hesus ta derotá maldat asta ora e ta disfrasá tras di e intento di Pedro pa deskonseh'E di dirigí Su mes pa Kalvario. Den Su último palabranan na e disipelnan, Hesus ta papia di Su morto inminente komo un bataya, kua lo kulminá den un viktoria desisivo riba Satanas: "Awor tin e huisio riba e mundu akí; awor e prens di e mundu akí lo ser tirá pafó. I Ami, si Mi ser halsá for di tera, lo Mi hala tur hende na Mi mes" (Juan 12:31,32, NKJV).

Tin biaha nos ta wak rònt, i kosnan ta parse realmente malu. Violensia, inmoralidat, korupshon, i enfermedatnan ta surgi tur kaminda. Un enemigu, no trahá di karni i sanger, brutalmente ta ataká nos for di tur banda. Pero no importá kon difísil e batayanan ku nos tin ku bringa ta, Hesus ta bringa pa nos i ta para komo nos Prens i Sumosaserdote den e santuario selestial.

Lesa Romanonan 8:37-39. Kon nos por hasi e promesa di ta un konkistador un eksperensia real den nos propio bida Kristian?