Di Stòf pa Streanan

Lesa Daniel 12:1. Ken ta kambia e kurso di historia na e fin di tempu? Kon Romanonan 8:34 i Hebreonan 7:25 ta yuda nos komprondé kiko e tèkst akí ta nifiká?

Kada kapítulo di Daniel te asina leu a kuminsá menshonando e gobernante di un nashon pagano. Daniel 12 di mes manera ta kuminsá ku un gobernante, pero diferente for di tur otro kapítulo e gobernante ta un prens divino ku ta lanta pa libra e pueblo di Dios for di mannan di nan enemigunan.

Manera nos a mira den nos estudio di Daniel 10, Miguel ta e mesun ser selestial poderoso ku ta aparesé na Daniel na Riu Tigris. Einan E ta sali komo e representante selestial di e pueblo di Dios. Tambe e ta aparesé un otro kaminda den Daniel komo e Yu di Hende (Daniel 7), e Prens di e ehérsito (Daniel 8), i Mesias e Prens (Daniel 9). P'esei Miguel, ken su nòmber ta nifiká "ken ta manera Dios?", mester ta niun otro ku Hesus Mes.

Ta importante pa tuma nota di e momentu di e intervenshon di Miguel. Di akuerdo ku Daniel 12:1, e ta sosodé "na e tempu ei" (Dan. 12:1). E ekspreshon akí ta referí na e tempu ku nos a kaba di menshoná den Daniel 11:40-45. Esaki ta e periodo di tempu ku ta ekstendé for di e kaida di e papado na 1798 te na e resurekshon na e fin di tempu (Dan. 12:2).

Dos aspekto importante di e obra di Miguel por ser dedusí for di e verbo "lanta" uzá den Daniel 12:1 pa deskribí Su akshon. Na promé lugá, e verbo "lanta" ta kòrda nos riba e lantamentu di reinan pa konkistá i goberná. E verbo primeramente tambe ta impliká un sentido militar. E ta mustra ku Miguel ta aktua komo un lider militar ku ta protehá Su pueblo i ta guia nan den un forma spesial durante e último etapanan di e gran kontroversia.

Na di dos lugá, e verbo "lanta" tambe ta indiká un senario di huisio. Miguel "ta lanta" pa aktua komo un abogado den e tribunal selestial. Komo e Yu di hende, E ta bini dilanti di e Ansiano di Dianan pa representá e pueblo di Dios durante e huisio investigadó (Dan. 7:9-14). Pues, e echo ku Miguel ta lanta òf para ta kòrda nos riba e aspektonan militar i hudisial di Su obra. Den otro palabra, E ta investí ku e poder pa derotá e enemigunan di Dios i ku e outoridat pa representá e pueblo di Dios den e tribunal selestial.

Daniel 12:1 ta papia tokante esnan ku a "ser hañá skirbí den e buki". Kiko esei ta nifiká?

E momentu di e intervenshon di Miguel ta ser deskribí tambe komo un tempu di angustia sin presedente. Esaki ta korespondé na e momentu ora ku e Spiritu di Dios lo ser kitá for di humanidat rebelde. E ora ei e shete último plaganan, komo ekspreshonnan di e rabia di Dios riba e nashonnan, lo ser bashá riba e Babilonia di e tempu di fin (Revelashon 16; Rev. 18:20-24) i e podernan di skuridat lo ser lagá lòs riba mundu. Ellen G. White ta skirbi di e tempu aki ku "Satanas lo hundí e habitantenan di tera e ora ei den un gran i último tribulashon. Ora e angelnan di Dios stòp di kontené e bientunan feros di pashon humano, tur e elementonan di lucha lo ser lagá los. Henter mundu lo ta envolví den ruina mas teribel ku esun kua a bin riba Yerusalèm di antigwedat".¬ The Great Controversy, p. 614.

Pero e pueblo di Dios lo ser librá durante e tempu teribel akí pasobra, den e huisio investigadó kondusí den e tribunal selestial, nan a ser vindiká dor di Hesus, e Sumosaserdote selestial, i nan nòmbernan a ser skirbí den e buki.

Pa komprondé e nifikashon di e buki akí, nos mester tene den mente ku Beibel ta menshoná dos tipo di buki selestial. Unu ta kontené e nòmbernan di esnan ku ta pertenesé na Señor i tin biaha ta ser yamá e buki di bida (Eks. 32:32, Lukas 10:20, Salmo 69:28, Fil. 4:3, Rev. 17:8).

Ademas di e Buki di Bida, e Skrituranan ta menshoná bukinan ku ta kontené e registronan di obranan humano (Salmo 56:8, Mal. 3:16, Isa. 65:6). Esakinan ta e bukinan ku ta ser uzá den e tribunal selestial pa determiná e kompromiso di kada persona na Señor. Esakinan ta registronan selestial, "basenan di data", ku ta kontené e nòmbernan i obranan di kada ser humano. Algun hende ta desaprobá e idea di tin nan nòmbernan, i spesialmente nan obranan, skirbí den shelu. Pero unabes nos komprometé nos bida na Kristu, nos nòmbernan ta ser inskribí den e buki di bida, i nos mal obranan ta ser kitá den e huisio. E registro selestial akí ta proveé evidensia hudisial pa henter e universo ku nos ta pertenesé na Hesus i, por lo tantu, tin e derechi di ser protehá durante e tempu di angustia.

Lesa Daniel 12:2,3. Di ki evento e ta papiando aki, i dikon, konsiderando loke nos ta komprondé tokante morto, e evento akí ta asina importante pa nos?

Probablemente Daniel ta hasi e referensia di mas eksplísito den Tèstamènt Bieu na e resurekshon binidero. I ora nos ta reflehá riba e pasashi akí, nos por konosé algun bèrdat masha importante. Na promé lugá, manera e metáfora di "soño" ta indiká, niun alma inmortal ta habitá kurpanan humano. Sernan humano ta un unidat inseparabel di kurpa, mente, i spiritu. Na morto, e persona ta stòp di eksistí i ta permanesé inkonsiente te na e resurekshon. Na di dos lugá, nos tèkst ta mustra na e resurekshon binidero komo un revershon di loke ta sosodé komo konsekuensia di piká. De echo, e ekspreshon tradusí komo "stòf di tera" den e idioma original di Daniel 12:2 ta bisa "tera di stòf". E sekuensia di palabra no usual akí ta mustra bèk na Génesis 3:19, e úniko pasashi bíbliko kaminda e palabra "tera" ta presidí e palabra "stòf". Esaki ta impliká ku e deklarashon di morto hasí na e kaida di Adam lo ser halá atras i morto ya lo no prevalesé. Manera Pablo ta bisa: "morto ta ser gulí den viktoria" (1 Kor. 15:54).

Lesa Romanonan 8:18 i Hebreonan 2:14,15. Pa ki rasonnan nos no mester teme morto?

Morto ta ruiná i ta terminá tur kos aki. Pero nos ta ser ofresé un promesa ku morto no tin e último palabra pa kreyentenan fiel. Morto ta un enemigu vensí. Ora Kristu ta kibra e kadenanan di morto i ta sali resusitá for di e graf, El ta duna e gòlpi mortal na morto. Awor nos por wak mas aya di e realidat temporal di morto na e realidat supremo di e bida ku nos ta risibí for di Dios den Kristu. Pa motibu ku Miguel ta "lanta para" (lesa Dan. 12:1), esnan ku ta pertenesé na djE tambe lo lanta. Nan lo lanta for di e "tera di stòf" pa bria manera e streanan pa semper i semper.

Lesa Daniel 12:4 i Juan 14:29. Dikon e buki di Daniel lo ser seyá te na e tempu di fin?

Na konklushon di e último sekshon prinsipal di e buki (Dan. 10:1-12:4), e profeta ta risibí e mandato pa seya e ròl te na e tempu di fin. Den e mesun rosea, e angel ta pronostiká ku "hopi hende lo kore di aki pa aya, i konosementu lo oumentá" (Dan. 12:4, NKJV). Aunke algun studiante di Daniel a tuma e palabranan akí komo un pronóstiko di progreso sientífiko, kua tambe por ser inkluí den e nifikashon, e konteksto parse ta indiká ku korementu "di aki pa aya" ta referí na buska den e buki di Daniel mes. De echo, ora nos mira bèk den historia, nos ta nota ku Daniel a keda un piesa di literatura skur durante siglonan. E por tabata konosí i studiá den algun lugá, pero algun di su siñansanan i profesianan klave a keda misterioso. Por ehèmpel, e mensahenan profétiko relashoná ku e purifikashon di e santuario selestial, e huisio, e identidat i obra di e kachu chikitu, huntu ku e kuadro di tempu relashoná ku e profesianan aki, tabata leu for di ta kla.

Pero for di e Reforma Protestant padilanti, mas i mas hende a kuminsá studia e buki di Daniel. Sinembargo, tabata solamente na e tempu di fin ku e buki finalmente a ser habrí i su kontenido mas kompletamente revelá. Manera Ellen G. White ta nota, "Desde 1798 e buki di Daniel a ser habrí, konosementu di e profesianan a oumentá, i hopi a proklamá e mensahe solèm di e huisio serkano". — The Great Controversy, p. 356. "Na final di siglo 18 i komienso di e di 19, un interes nobo den e profesianan di Daniel i e Revelashon a ser spièrtá den lugánan di tera ampliamente separá. E estudio di e profesianan akí a hiba na un kreensia ekstensivo ku e segundo binida di Kristu tabata serka. Numeroso ekspositor na Inglatera, Joseph Wolff na Medio Oriente, Manuel Lacunza na Zùit Amérika, i William Miller na Estádos Unídos, huntu ku un ehérsito di otro studiantenan di e profesianan, a deklará, riba base di nan estudio di e profesianan di Daniel, ku e segundo atvènt tabata serka. Awe, e konvikshon akí a bira e energia di un movementu mundial". — The Seventh-day Adventist Bible Commentary, tomo 4, p. 879.

Lesa Daniel 12:5-13. Kon e buki ta konkluí?

Kuriosamente, e esena final aki ta tuma lugá na e "riu", òf e Tigris, e lugá di e último gran vishon di Daniel (Dan. 10:4). Sinembargo, e palabra uzá aki no ta e palabra Hebreo komun pa "riu", sino e término ye'or, kua generalmente ta designá "Riu Nilo". Esaki ta rekordá nos di e Eksodo i ta mustra ku meskos ku Señor a redimí Israel for di Egipto, E lo redimí Su pueblo di tempu di fin.

Tres kalendario profétiko ta ser duná. Esun di promé, "un tempu, tempunan, i mitar di un tempu" (NKJV), ta kontestá e pregunta: "Kuantu tempu falta pa kumplimentu di e maravianan akí?" (Dan. 12:6, NKJV). E "maravianan" ta referí na e kosnan deskribí den e vishon di Daniel 11, kua ta un elaborashon di Daniel 7 i 8. Mas spesífikamente, e periodo di tempu akí a ser menshoná den Daniel 7:25 i mas despues den Revelashon 11:3, Revelashon 12:6,14, i Revelashon 13:5. Tambe e ta korespondé ku e 1.260 añanan di supremasia papal, kua a ekstendé for di A.D. 538 te 1798 B.C. I Daniel 11:32-35 ta referí na e mesun persekushon sin menshoná su durashon.

E otro dos periodonan di tempu, 1.290 i 1.335 dia, ta kontestá un pregunta: "kiko lo ta e fin di e kosnan akí?" (NKJV), presentá dor di Daniel mes na e Hòmber bisti na lino. I tur dos ta kuminsá ku e kitamentu di e "diario" i e establesimentu di e "abominashon di desolashon". For di e lèsnan riba Daniel 8, nos a siña ku e “diario" ta referí na e interseshon kontinuo di Kristu, kua a ser remplasá ku un sistema di adorashon falsu. Por lo tantu, e periodo profétiko akí mester kuminsá na A.D. 508, ora Clovis, rei di e Franconan, a kombertí na e fe Katóliko. E evento importante akí a traha e kaminda pa e union entre iglesia i estado, kua a dominá henter Edat Media. Por lo tantu, e 1.290 dianan a terminá na 1798, ora e papa a ser arestá bou di outoridat di e emperador Franses Napoleon. I e 1.335 dianan, e último periodo profétiko menshoná den Daniel, a terminá na 1843. Esaki tabata e tempu di e movementu Milerita i estudio renobá di e profesianan bíbliko. Tabata un tempu di espera i speransa den e binida inminente di Hesus.