E Singularidat di Beibel

E palabranan di mas importante papiá ta hopi biaha e ultimo ku un persona ta papia. Moises, e eskritor di e promé sinku bukinan fundamental di Beibel, ta kanta un kantika na e pueblo djis promé ku su morto (Deut. 31:30-32:43).

Lesa Deuteronomio 32:45-47. Kon Moises ta deskribí e Palabra di Dios i su poder den bida di e Hebreonan na punto di drenta e Tera Primintí?

Entre e último palabranan di Moises tin un spièrtamentu fuerte. Dor di anhelá e palabranan ku Dios a papia na nan a traves di dje, Moises kier a enfoká na e hendenan ku nan focus mester keda riba Dios i Su boluntat pa nan bida. Dor di siña e palabranan akí na nan yunan, kada generashon lo a pasa e plan di pakto di salbashon. Tuma nota ku nan no mester a piki i skohe kua palabranan, sino mester a warda òf obedesé “tur e palabranan di e lei akí” (Deut. 32:46).

Na final di historia di tera, Dios lo tin un pueblo ku a keda fiel na henter Skritura, kua ta nifiká warda e mandamentunan di Dios i tin e fe di Hesus (Rev. 14:12). E hendenan akí lo keda fiel na e siñansa di e Beibel, pasobra e no solamente ta sigurá un bida mas riku riba tera sino un destino eterno den e hogar ku Hesus ta prepará pa nos (Juan 14:1-3).

Lesa Juan 1:1-5, 14; Juan 14:6. Kiko e tèkstnan akí ta siña nos tokante Hesus i bida eterno? Kon e Palabra hasí karni ta relatá na e revelashon i inspirashon di Skritura?

Hesus ta e focus i ophetivo di tur Skritura. Su binimentu den karni komo e Mesias tabata un kumplimentu di e promesanan di Tèstamènt Bieu. Pasobra El a biba, a muri, i ta biba atrobe, nos tin no solamente e Skrituranan konfirmá sino, mihó ainda, e gran promesa di bida eterno den un eksistensia kompletamente nobo.

E variedat di outornan, nan alokashonnan, i trasfondonan ta proveé un testimonio úniko ku Dios ta obra pa komuniká historia i Su mensahe na hende mes diverso kulturalmente ku su oudiensia intenshoná.

Kiko e siguiente tèkstnan ta bisa nos tokante e eskritornan bíbliko i nan trasfondonan? (Eks. 2:10; Amos 7:14; Jer. 1:1-6; Dan. 6:1-5; Mat. 9:9; Fil. 3:3-6; Rev. 1:9).

E Beibel a ser skirbí dor di hendenan for di hopi diferente tipo di trasfondo i den vários sirkunstansia. Algun tabata skirbiendo for di palasionan, otronan for di prizònnan, algun den eksilio, i ainda otronan durante nan biahenan mishonero pa kompartí e evangelio. E hòmbernan akí tabatin edukashon i okupashonnan diferente. Algun, manera Moises, tabata destiná pa ta reinan òf, manera Daniel, pa sirbi den posishonnan haltu. Otronan tabata simpel wardadónan di karné. Algun tabata hopi hóben i otronan basta bieu. Apesar di e diferensianan akí, nan tur tabatin un kos en komun: nan a ser yamá dor di Dios i inspirá pa Spiritu Santu pa skirbi mensahenan pa Su pueblo, no importá ki ora i unda nan tabata biba.

Tambe, algun di e eskritornan tabata testigunan okular di e eventonan ku nan tabata relatá. Otronan a hasi investigshon personal kuidadoso di eventonan òf uzo kuidadoso di dokumentonan eksistente (Jos. 10:13, Lukas 1:1-3). Pero tur parti di Beibel ta inspirá (2 Tim. 3:16). Esaki ta e motibu dikon Pablo ta deklará ku “loke sea a ser skirbí. . . a ser skirbí pa nos instrukshon, pa asina a traves di. . . e enkurashamentu di e Skrituranan nos lo por tin speransa” (Rom. 15:4, NASB). E Dios kende a krea lenguahe humano ta kapasitá hende skohi pa komuniká pensamentu inspirá den un forma fidedigno i sigur den palabranan humano.

“Dios tabata kontentu pa komuniká Su bèrdat na e mundu pa medio di agensianan humano, i E Mes, pa medio di Spiritu Santu, a kualifiká hòmbernan i a kapasitá nan pa hasi Su obra. El a guia e mente den selekshon di kiko papia i kiko skirbi. E tesoro a ser konfiá na vasonan terenal, sinembargo e ta, no opstante, for di Shelu”. — Ellen G. White, Selected Messages, tomo 1, p. 26.

E Beibel ta úniko entre otro obranan religioso konosí pasobra te ku 30 porshento di su kontenido ta konsistí di profesianan i literature profétiko. E integrashon di profesia i su kumplimentu den tempu ta sentral na e perspektiva bíbliko, pasobra e Dios ku ta aktua den historia konosé tambe e futuro i a revel’é na Su profetanan (Amos 3:7). E Beibel no ta solamente e Palabra bibu, òf e Palabra históriko, e ta e Palabra profétiko.

Kon e siguiente tèkstnan ta revelá e detayenan di e Messias ku ta bini?

Gen. 49:8-12

Salmo 22:12-18

Isa. 53:3-7

Dan. 9:24

Mik. 5:2

Mal. 3:1

Zak. 9:9

Tin por lo ménos sesentisinku predikshonnan mesiániko direkto, di e Mesias den Tèstamènt Bieu, hopi mas si nos añadí tipologia tambe (tipologia ta e estudio di kon ritualnan di Tèstamènt Bieu, manera e sakrifisionan, tabata mini-profesianan di Hesus). E profesianan akí ta reltá na detayenan spesífiko manera “e sèpter lo no kita for di Juda” (Gen. 49:10); ku E lo a nase na Bètlehèm na Juda (Mik. 5:2); ku E lo a ser “despresiá i rechasá pa hende”; batí, akusá falsamente, sinembargo no habri Su boka pa defendé Su mes (Isa. 53:3-7); ku Su man- i pianan lo a ser borá; i ku nan lo a parti Su pañanan entre nan (Salmo 22:12-18).

E echo ku e profesianan akí di Tèstamènt Bieu a ser kumplí ku asina presishon den e bida, morto, i resurekshon di Hesus ta testifiká di nan inspirashon i revelashon divino. Tambe e ta indiká ku Hesus tabata ken E i otronan a profes’E di ta. Hesus a sigui e profetanan di antaño ora El a pronostiká Su morto i resurekshon (Lukas 9:21, 22; Mat. 17:22, 23), e kaida di Yerusalèm (Mat. 24:1, 2), i Su Segundo Binida (Juan 14:1-3). Pues, e enkarnashon, morto, i resurekshon ta ser pronostiká pa medio di e Beibel, i nan kumplimentu ta sigurá su konfiabilidat.

E Beibel ta úniko ora e ser kompará ku otro bukinan “santu” pasobra e ta konstituí den historia. Esaki ta nifiká ku e Beibel no ta meramente e pensamentunan filosófiko di un ser humano (manera Confucius òf Buddha), sino e ta registrá e aktonan di Dios den historia segun ku nan ta progresá den direkshon di un meta spesífiko. Den kaso di e Beibel, e metanan ei ta 1) e promesa di un Mesias i 2) e segundo binida di Hesus. E proreshon akí ta úniko pa e fe Hudeo-Kristian, den kontraste ku e bista síkliko di hopi otro rellgionan mundial for di Egipto antiguo te na religionnan oriental moderno.

Lesa 1 Korintionan 15:3-5, 51-55; Romanonan 8:11; i 1 Tesalonisensenan 4:14. Kiko e pasashinan akí ta siña nos tokante no solamente e bèrdat históriko di e resurekshon di Kristu sino kiko e ta nifiká pa nos personalmente?

E testimonio di e kuater Evangelionan i Pablo ta ku Hesus a muri, a ser derá, a resusitá korporalmente for di morto, i a aparesé na vários sernan humano. Esaki ta ser konfirmá dor di testigunan okular ku a pon’E den e graf i mas despues a mir’é bashí. Testigunan a mishi ku Hesus, i a kome huntu kunE. Maria Magdalena, Maria (mama di Hesus), i otro muhénan a mir’E komo e Kristu resusitá. E disipelnan a papia kunE riba e kaminda pa Emaus. Hesus a aparesé na nan pa e gran Mandato di Evangelio. Pablo ta skirbi ku si e testifikashon di Skritura ser rechasá, e ora ei nos predikamentu i fe ta en “bano” (1 Kor. 15:14). Otro tradukshonnan ta bisa “nulo i inbálido” (REB) òf “inútil” (NIV). E disipelnan ta deklará: “Ta bèrdat! Señor a resusitá” (Lukas 24:34, NIV). E término griego ontos ta referí na algu ku realmente a tuma lugá. E ta ser tradusí, “realmente”, “siguramente”, òf “en realidat”. E disipelnan ta testifiká ku “Señor a resusitá en realidat” (NKJV).

Kristu ta ser representá tambe komo e “promé frutanan” (1 Kor. 15:20) di tur esnan ku a muri. E echo históriko ku Kristu a resusitá korporalmente for di morto i ta biba awe ta e garantia ku nan tambe lo ser resusitá manera El a ser resusitá. Tur e hustunan “lo ser hasí bibu den Kristu” (1 Kor. 15:22, NRSV). E término aki ta impliká un akto di kreashon futuro, ora esnan “ku ta pertenesé na Kristu”, òf ta permanesé leal na djE lo ser resusitá “na Su binida” (1 Kor. 15:23, NKJV) “na e ultimo trompèt” (1 Kor. 15:52, NKJV).

Lesa 2 Reinan 22:3-20. Kiko ta pone Rei Josias sker su pañanan? Kon su deskubrimentu ta kambia no solamente e, sino henter e nashon di Juda?

Na 621 P.K., ora Josias tabata masoménos 25 aña bieu, Hilkias, e sumosaserdote, a deskubrí “e buki di lei”, kua por tabata e promé sinku bukinan di Moises òf, spesífikamente, e buki di Deuterenomio. Durante reinado di su tata Amon, i su welo di mas malbado Manasés, e ròl akí tabata pèrdí meimei di e adorashon di Baal, Asera, i “henter e ehérsito di shelu” (2 Reinan 21:3-9). Ora Josias tende e kondishonnan di e pakto, e ta sker su pañanan den angustia total, pasobra e ta realisá kon leu e i su pueblo a yega for di adorá e Dios berdadero. Inmediatamente e ta kuminsá un reforma a traves di e tera, bashando abou e lugánan haltu i destruyendo imágennan di diosnan straño. Ora e kaba, tin solamente un lugá ku a sobra pa adorá na Juda: e tèmpel di Dios na Yerusalèm. E deskubrimentu di e Palabra di Dios ta hiba na konvikshon, arepentimentu, i e poder pa kambia. E kambio akí ta kuminsá ku Josias i finalmente ta plama na e restu di Juda.

Kon Beibel ta sigurá nos ku e tin e poder pa kambia nos bida i mustra nos e kaminda pa salbashon? Lesa Juan 16:13, Juan 17:17, Hebreonan 4:12, i Romanonan 12:2.

Un di e testimonionan di mas poderoso di Beibel ta e bida kambiá di un persona. Ta e Palabra ku ta kòrta dor di piká i pervershon humano i ta revelá nos berdadero naturalesa humano i nos nesesidat pa un Salbador.

Un buki úniko manera e Beibel, konsituí den historia, saturá ku profesia, i ku e poder pa transformá e bida, mester ser interpretá tambe den un forma úniko. E no por ser interpretá manera kualke otro buki, pasobra e Palabra bibu di Dios mester ser komprondé den lus di un Kristu bibu ku a primintí di manda Su Spiritu pa guia nos “den tur bèrdat” (Juan 16:13). E Beibel, anto, komo un revelashon di e bèrdat di Dios, mester kontené su propio prinsipionan interno di interpretashon. E prinsipionan akí por ser hañá den studia kon e eskritornan di Skritura a uza Skritura i a ser guiá p’e segun ku nan tabata permití Skritura interpretá su mes.