E Orígen i Naturalesa di Beibel

Lesa 2 Pedro 1:19-21. Kon Pedro ta ekspresá su konvikshon tokante e orígen di e mensahe profétiko bíbliko?

E Beibel no ta manera niun otro buki. Di akuerdo ku apòstel Pedro, e profetanan a ser mové pa Spiritu Santu den tal forma ku e kontenido di nan mensahe a bin for di Dios. Nan no a invent’é nan mes. Mas bien ku ser “fábulanan trahá ku astusia” (2 Pe. 1:16), e mensahe profétiko di Beibel ta di orígen divino, i pues e ta konfiabel i digno di konfiansa. “Hòmbernan santu di Dios a papia segun ku nan tabata ser mové pa Spiritu Santu” (2 Pe. 1:21, NKJV). Dios tabata obrando den e proseso di revelashon, kaminda El a hasi Su boluntat konosí na sernan humano selektá.

Komunikashon verbal direkto entre Dios i sernan humano partikular ta un echo inevitabel di e Skrituranan. Ta p’esei e Beibel tin outoridat divino i spesial, i nos mester tuma e elemento divino den konsiderashon den nos interpretashon di e Skrituranan. Ya ku nan tin nos Dios santu komo nan outor final, e bukinan bíbliko, di forma apropiá, ta ser yamá “Skrituranan santu” (Rom. 1:2, 2 Tim. 3:15).

Nan a ser duná pa propósitonan práktiko tambe. Nan ta “útil pa siñansa, reprendementu, korekshon i entrenamentu den hustisia, pa asina henter e pueblo di Dios por ser ekipá a fondo pa tur bon obra” (2 Tim. 3:16, 17, TNIV).

Nos mester di yudansa di Spiritu Santu tambe pa apliká na nos bida loke Dios a revelá den Su Palabra. Di akuerdo ku apòstel Pedro, e interpretashon di e Palabra di Dios divinamente revelá no ta un asuntu di nos propio opinionnan. Nos tin mester di e Palabra di Dios i Spiritu Santu pa komprondé su nifikashon korektamente.

Skritura ta bisa tambe: “Siguramente Señor Dios no ta hasi nada, a ménos ku E revelá Su sekreto na Su sirbidónan, e profetanan” (Amos 3:7, NKJV). E palabranan bíbliko pa “revelashon” (den su vários formanan) ta ekspresá e idea ku algu ku anteriormente tabata skondí a ser revelá òf desvelá awor i pues a bira konosí i hasí manifesto. Komo sernan humano, nos mester di un deskubrimentu òf revelashon asina, pasobra nos ta sernan pekaminoso, separá for di Dios pa motibu di nos piká i, por lo tantu, dependiente riba djE pa konosé Su boluntat.

Pasobra Dios ta usa e medio di lenguahe pa revelá Su boluntat na hende, revelashon divino ta kapas pa ser skirbí. Sinembargo, manera nos a mira kaba, Beibel ta resultado di e bèrdat reveladó di Dios na nos a traves di e obra di Spiritu Santu, kende ta transmití i garantisá Su mensahe a traves di instrumèntnan humano. Esaki ta e motibu dikon nos por spera e unidat fundamental ku ta ser mirá den henter Skritura, for di Génesis te na Revelashon (por ehèmpel, kompará Génesis 3:14, 15 te na Revelashon 12:17).

Lesa 2 Pedro 1:21; 2 Timoteo 3:16,17; and Deuteronomio 18:18. Kiko e tèkstnan akí ta bisa tokante e inspirashon di Skritura?

Tur Skritura ta divinamente inspirá, asta si no tur parti ta igualmente inspirador pa lesa òf asta nesesariamente aplikabel pa nos awe (por ehèmpel, e sekshonnan tokante e fiestanan hebreo tabata inspirá aunke nos no ta ser rekerí pa warda nan awendia). Sinembargo, nos mester siña for di tur Skritura, asta for di e partinan ei ku no ta asina fásil pa lesa i komprondé òf ku no ta spesífikamente aplikabel pa nos awor.

Tambe, no ta tur kos den Beibel a ser revelá direktamente òf di forma sobrenatural. Tin biaha Dios a usa eskritornan bíbliko ku kuidadosamente a investigá kosnan òf a usa otro dokumentonan eksistente (lesa Jos. 10:13, Lukas 1:1-3) pa komuniká Su mensahe.

Asta asina, tur Skritura ta inspirá (2 Tim. 3:16). Esaki ta e motibu dikon Pablo ta deklará ku “loke sea” a ser skirbí, a ser skirbí pa nos instrukshon, pa asina a traves di “e enkurashamentu di e Skrituranan nos lo por tin speransa” (Rom. 15:4, NASB).

“Beibel ta mustra na Dios komo su outor; sinembargo el a se skirbí dor di mannan humano; i den e estilo variá di su diferente bukinan e ta presentá e karakterístikanan di e diferente eskritornan. E bèrdatnan revelá tur ta ‘duná pa medio di inspirashon di Dios’ (2 Tim. 3:16); sinembargo, nan ta ser ekspresá den e palabranan di hende”. — Ellen G. White, The Great Controversy, p. 7.

“E ora ei Señor a bisa Moises: ‘Skirbi e palabranan akí, pasobra di akuerdo ku e karakter di e palabranan akí Mi a hasi un pakto ku bo i ku Israel’” (Eks. 34:27, NKJV). Dikon Señor lo a laga Moises skirbi e palabranan akí kontrali na laga Moises resitá nan na e pueblo so? Kiko ta e bentaha opvio di e Palabra Skirbí?

E Dios kende a papia i kende a krea lenguahe humano ta kapasitá hendenan skohí pa komuniká e bèrdatnan divinamente revelá i pensamentunan divinamente inspirá den un forma digno di konfiansa i sigur. Por lo tantu, no ta un sorpresa pa deskubrí ku Dios a ordená eskritornan bíbliko mas promé pa skirbi Su instrukshon i revelashon.

Kiko e siguiente tèkstnan ta siña tokante Revelashon skirbí?

Eks. 17:14; 24:4

Jos. 24:26

Jer. 30:2

Rev. 1:11,19; 21:5; 22:18,19

Dikon Dios a ordená pa Su revelashon i mensahenan inspirá ser skirbí? E kontesta opvio ta pa asina nos lo no lubidá nan asina fásilmente. E palabranan skirbí di Beibel ta un punto di referensia konstante ku ta dirigí nos na Dios i Su boluntat. Un dokumento skirbí generalmente por ser preservá mihó i ta mas sigur ku mensahenan oral, kua mester ser bisá bes tras bes. E Palabra Skirbí, kua por ser kopiá bes tras bes, tambe por ser hasí aksesibel pa hopi mas hende ku si el a ser papiá solamente. Por último, nos por papia ku un kantidat limitá di hende pareu na un lugá, pero loke a ser skirbí por ser lesá dor di inkontabel lesadónan den hopi diferente lugá i kontinente, i asta ta un bendishon numeroso generashon mas despues. De echo, si hende no por lesa nan mes, otronan por lesa un dokumento skirbí pa nan na bos haltu.

Lesa Juan 1:14; Juan 2:22; Juan 8:31,32; i Juan 17:17. Ki paralelonan bo ta mira entre Hesus, e Palabra di Dios hasí karni, i Skritura, e Palabra Skirbí di Dios?

Tin un paralelo entre e Palabra di Dios, kende a bira karni (es desir, Hesukristu), i e Palabra Skirbí di Dios (es desir, Skritura). Meskos ku Hesus a ser konsebí di forma sobrenatural dor di Spiritu Santu i sinembargo a nase di un muhé, Skritura Santu tambe ta di orígen sobrenatural i sinembargo duná a traves di sernan humano.

Hesukristu a bira un hende den tempu i espasio. El a biba durante un tempu spesífiko i na un lugá spesífiko. Sinembargo, e echo aki o a nulifiká Su divinidat, ni a hasi Hesus histórikamente relativo. E ta e úniko Redentor pa tur hende, riba henter mundu, a lo largu di tur tempu (lesa Echonan 4:12). Di mes manera, e Palabra Skirbí di Dios, e Beibel, tambe a ser duná na un tempu spesífiko i den un kultura partikular. Meskos ku Hesukristu, e Beibel no ta kondishoná na tempu, es desir, limitá na un tempu i lugá spesífiko; en kambio, e ta keda obligatorio pa tur hende, riba henter mundu.

Ora Dios a revelá Su mes, El a baha na nivel humano. E naturalesa humano di Hesus a mustra tur e señalnan di enfermedatnan humano i e efektonan di algun 4.000 aña di degenerashon. Sinembargo, E tabata sin piká. Di forma similar, e lenguahe di Skritura ta lenguahe humano, no algun lenguahe “sobrehumano perfekto” ku niun hende ta papia òf ta kapas pa komprondé. Miéntras kualke lenguahe tin su limitashonnan, e Kreador di humanidat, kende ta e Kreador di lenguahe humano, ta prefektamente kapas di komuniká Su boluntat na sernan humano den un forma digno di konfiansa sin despistá nos.

Naturalmente, tur komparashon tin su límitenan. Hesukristu i Skritura Santu no ta idéntiko. Beibel no ta un enkarnashon di Dios. Dios no ta un buki. Dios den Hesukristu a bira hende. Nos ta stima e Beibel pasobra nos ta adorá e Salbador proklamá den su páginanan.

E Beibel ta un union divino-humano úniko i inseparabel. Ellen G. White a mira esaki klaramente ora el a skirbi: “E Beibel, ku su bèrdatnan duná di Dios ekspresá den e lenguahe di hende, ta presentá un union di lo divino i lo humano. Un union asina tabata eksistí den e naturalesa di Kristu, kende tabata e Yu di Dios i e Yu di hende. Pues ta bèrdat di e Beibel, manera e tabata di Kristu, ku ‘e Palabra a ser hasí karni, i a biba meimei di nos. ’ Juan 1:14”. — Ellen G. White, The Great Controversy, p. 8.

Lesa Hebreonan 11:3, 6. Dikon fe ta asina esensial pa komprondé Dios i Su Palabra? Dikon ta imposibel pa agradá Dios sin fe?

Tur berdadero siñansa ta tuma lugá den konteksto di fe. Ta e fe implísito di e mucha pa ku su mayornan ku ta kapasitá e mucha pa siña kosnan nobo. E ta un relashon di konfiansa ku ta guia e mucha pa siña e aspektonan básiko i fundamental di bida i amor. Konosementu i komprondementu, por lo tantu, ta krese for di un relashon amoroso i di konfiansa.

Den forma similar, un bon músiko ta toka un piesa di músika bon ora e no solamente ta dominá e abilidatnan tékniko ku ta yud’é toka un instrumènt, sino ora e ta ekshibí un amor pa e músika, e kompositor, i e instrumènt. Den un forma similar, nos no ta komprondé e Beibel korektamente ora nos ta aserk’é ku un aktitut di deskonfiansa òf duda metodológiko, sino den un spiritu di amor i fe. Apòstel Pablo a skirbi: “Sin fe ta imposibel pa agradá Dios” (Hebr. 11:6, NIV). Pues, ta indispensabel pa aserká e Beibel ku fe, rekonosiendo su orígen sobrenatural, mas bien ku mira e Beibel djis komo un buki humano.

Atventistanan di e di Shete dia, di forma kla, a ekspresá e persepshon akí den e orígen sobrenatural di Skritura den e promé Kreensia Fundamental di Iglesia Atventista di e di Shete dia, kua ta deklará: “E Skrituranan Santu, Tèstamènt Bieu i Nobo, ta e Palabra skirbí di Dios, duná pa medio di inspirashon divino. E outornan inspirá a papia i a skirbi segun ku nan tabata ser mové dor di Spiritu Santu. Den e Palabra akí, Dios a konsedé na humanidat e konosementu nesesario pa salbashon. E Skrituranan Santu ta e revelashon supremo, outoritativo, i infalibel di Su boluntat. Nan ta e norma di karakter, e prueba di eksperensia, e reveladó definitivo di doktrinanan, i e registro fidedigno di e aktonan di Dios den historia. (Salmo 119:105; Prov. 30:5,6; Isa. 8:20; Jun 17:17; 1 Tes. 2:13; 2 Tim. 3:16,17; Hebr. 4:12; 2 Pedro 1:20,21.)”