Kreashon: Génesis komo Fundeshi, Parti 1

Lesa Génesis 1:1. Ki bèrdatnan profundo ta ser revelá aki?

Beibel ta habri ku e palabranan di mas sublime i profundo, palabranan ku ta simpel pero ku simultáneamente ta kontené un profundidat ku no por ser midí ora ku bo studia nan kuidadosamente. De echo, e preguntanan di mas grandi di filosifia enkuanto di ken nos ta, dikon nos ta aki, i kon nos a yega aki ta ser kontestá dor di e promé frase di Beibel.

Nos ta eksistí pasobra Dios a krea nos na un tempu definí den pasado. Nos no a evolushoná for di nada; tampoko nos a bin na eksistensha pa kasualidat, sin un propósito final, i sin un direkshon planiá, manera hopi di e modelo sientifiko kontemporáneo di orígennan ta siña awendia. E teoria di evolushon di Darwin ta kontradiktorio na Skritura den tur sentido, i intentonan dor di algun pa harmonisá esaki ku Beibel ta laga Kristiannan parse bobo.

Tambe nos a ser kreá dor di Dios na un momentu apsoluto den tempu: "na prinsipio". Esaki mester nifiká ku Dios tabata eksistí promé ku e prinsipio akí. Es desir, Dios tabata eksistí promé ku tempu a ser kreá i ekspresá den e siklo diario di "atardi i mainta" i den e lunanan i den e añanan, tur marká pa e relashon di e mundu ku e solo i luna. E komienso apsoluto akí ta ser ripití i sostené dor di otro pasashinan di Skritura, kua kontinuamente ta reafirmá e naturalesa i medionan di e obra kreativo di Dios (Juan 1:1-3).

Lesa Juan 1:1-3 i Hebreonan 1:1,2. Ken tabata e agente di kreashon? Pensa riba kiko ta nifiká ku El a muri tambe riba e krus.

Beibel ta siña nos ku Hesus tabata e agente di kreashon. Beibel ta bisa ku "tur kos a ser trahá pa medio di djE, i sin djE nada a ser trahá di loke a ser trahá" (Juan 1:3, NKJV). Pa medio di Hesus "El a traha e mundunan" (Hebr. 1:1,2, NKJV). Pa motibu ku tur kos tin nan orígen den Hesus na prinsipio, nos por tin speransa ku na final E lo kompletá loke El a kuminsá, pasobra E ta e "Alfa i e Omega”, “e Promé i e Último” (Rev. 1:8, Rev. 22:13, NKJV).

Den añanan resien tabatin un tendensia pa mira e siman di Kreashon komo algu ku no ta literal, komo un metáfora, un parabel, òf asta un mito. Esaki a surgi na rais di e teoria di evolushon, kua ta asumí hopi eranan di tempu pa splika e desaroyo di bida riba planeta Tera.

Kiko Beibel ta siña riba e tema akí? Dikon e "dianan" di kreashon den Génesis 1 mester ser komprondé komo dianan literal, i no figurativo?

Lesa Génesis 1:3-5 i Eksodo 20:8-11. Kon e término "dia" ta ser usá den e kontekstonan akí?

E palabra hebreo yôm, òf "dia", ta ser usá konsistentemente a lo largu di henter e relato di kreashon pa un dia literal. Nada den e relato di Kreashon den Génesis ta indiká ku nan tabata kier men algu otro for di un dia literal, manera nos ta komprondé un dia awe. De echo, algun erodito ku no ta kere ku e dianan tabata literal lo atmití, sinembargo, ku e intenshon di e outor tabata pa representá dianan literal.

Ta interesante pa mira ku Dios Mes a designá e nòmber akí pa e promé unidat di tempu (Gen. 1: 5). Yôm, òf dia, ta ser definí ku e frase "i tabata atardi i tabata mainta" (Gen. 1: 5,8, etc, NASB). E palabra ta ser usá den e forma singular, no den plural, ku ta nifiká un dia so.

Por lo tantu, e shete dianan di Kreashon mester ser komprondé komo un unidat kompletu di tempu, introdusí pa e number kardinal 'echad ("unu") siguí pa numbernan ordinal (di dos, di tres, di kuater, etc). E patronchi akí ta indiká un sekuensia konsekutivo di dianan, ku ta kulminá na e di shete dia. No tin indikashon den e uso di palabranan òf den e forma mes di e relato ku mester tin kualke buraku entre e dianan akí. E shete dianan di kreashon ta, en realidat, shete dia manera nos ta definí e dianan awendia.

Tambe, e naturalesa literal di e dia ta ser neglishá ora Dios a skirbi e di kuater mandamentu ku Su propio dede, indikando ku e base pa e Sabat di e di shete dia ta basá riba e sekuensia di un siman literal di e shete dianan di kreashon.

Aktualmente, e Sabat di e di shete dia ta fuertemente bou di atake den sosiedat sekular i den komunidatnan religioso. E echo akí por ser mirá den e skemanan di trabou di korporashonnan global; den e intento pa kambio di e kalènder di hopi pais europeo ku ta denominá djaluna komo e promé dia di siman i djadumingu komo e di shete dia; i dor di e karta papal resien riba kambio klimátiko ku ta yama e Sabat di e di shete dia "e Sabat hudiu" i ta enkurashá mundu pa warda un dia di sosiego pa aliviá e kalentamentu global (Pope Francis, Laudato Si', Vatican City: Vatican Press, 2015, p. 172, 173).

Lesa Génesis 2:1-3, Eksodo 20:8-11, Marko 2:27, i Revelashon 14:7. Kon e komprondementu di e siman di kreashon ta mará na e di kuater mandamentu? Kon e ta mará na e Mensahe di e Tres Angelnan?

Beibel ta bisa: "I riba e di shete dia Dios a terminá Su trabou kua El a hasi" (Gen. 2:2, NKJV). “Despues di a sosegá riba e di shete dia, Dios a santifik’é, òf a apart’é, komo un dia di sosiegu pa hende”. — Ellen G. White, Patriarchs and Prophets, p. 47. Esaki ta e motibu pa kua Hesus por bisa: " 'Sabat a ser trahá pa hende, i no hende pa Sabat"(Marko 2:27, NKJV). Hesus por a hasi e deklarashon outoritativo akí pasobra El a traha òf krea e Sabat komo e señal i seyo eterno di e pakto di Dios ku Su pueblo. E Sabat no tabata pa e pueblo hudiu so, sino pa henter humanidat.

Génesis ta indiká tres kos ku Hesus a hasi despues ku El a krea e dia di Sabat. Na promé lugá, El "a sosegá" (Gen. 2:2), dunando nos un ehèmpel divino di Su deseo pa sosegá huntu ku nos. Na di dos lugá, El "a bendishoná" e di shete dia (Gen. 2:3). Den e relato di kreashon, bestianan a ser bendishoná (Gen. 1:22), i Adam i Eva a ser bendishoná (Gen. 1:28), pero e úniko dia spesífikamente bendishoná tabata e di shete dia. Na di tres lugá, Dios "a santifik'é" (Gen. 2: 3) òf "a hasié santu".

Ningun otro dia den Beibel ta risibí e tres klasifikashonnan akí. E tres akshonnan akí ta ser ripití den e di kuater mandamentu, sinembargo, ora Dios ta skirbi ku Su propio dede i ta mustra bèk na Kreashon komo e fundeshi pa e Sabat (Eks. 20:11).

E último dékada a testiguá kambionan enorme den e forma ku sosiedat i gobièrnunan ta definí matrimonio. Hopi nashon di mundu a aprobá matrimonio di mesun sekso, violando leinan anterior ku tabata protehá e struktura di famia ku ta konsistí di un hòmber i un muhé komo base. Esaki ta un desaroyo sin presedente den hopi aspekto, i e ta lanta kuestionnan nobo tokante e institushon di matrimonio, e relashon di iglesia i estado i tambe e santidat di matrimonio i famia manera ta ser definí den Skritura.

Lesa Génesis 1:26-28; i Génesis 2:18,21-24. Kiko e tèkstnan akí ta siña nos tokante e ideal di Dios pa matrimonio?

Riba e di seis dia, Dios ta yega na e klímaks di e kreashon, e kreashon di humanidat. Ta fasinante ku plural ta ser usá pa Dios den Génesis 1:26: "Laga Nos traha hende den Nos imágen”. Tur persona di e Trinidat den relashon di amor ku otro awor ta krea e relashon humano di matrimonio divinamente instituí aki riba tera.

"Den imágen di Dios El a kre’é; hòmber i muhé El a krea nan" (Gen. 1:27, NKJV). Adam ta deklará: "Esaki ta awor wesu di mi wesunan, i karni di mi karni"(Gen. 2:23, NKJV) i Adam ta yam'é "Muhé". Matrimonio ta rekerí ku "un hòmber lo bandoná su tata i mama i lo uni ku su esposa, i nan lo bira un karni" (Gen. 2:24, NKJV).

Skritura ta eksplísito ku e relashon akí mester tuma lugá entre un hòmber i un muhé, ku na nan turno a originá di nan tata i mama, ku tambe ta un hòmber i un muhé. E konsepto akí ta ser klarifiká mas aleu den e instrukshon duná na e promé mayornan di tera: "E ora ei Dios a bendishoná nan, i Dios a bisa nan: 'Sea fruktífero i multipliká; yena e tera i domin’é’” (Gen. 1:28, NKJV). Den e di sinku mandamentu, yunan (desendientenan) mester honra nan tata i nan mama (Eks. 20:12). E interrelashon akí no por ser kumplí denter di nada otro ku no ta un aliansa heteroseksual.

Beibel ta proveé un konekshon inkebrantabel entre e Kreashon perfekto, e Kaida, e Mesias primintí, i e redenshon final. E eventonan grandi akí ta bira e base di e tema di historia di salbashon pa e rasa humano.

Read Génesis 1:31, Génesis 2:15-17, Génesis 3:1-7. Kiko a sosodé ku kreashon perfekto di Dios?

Dios a deklará Su kreashon "masha bon" (Gen. 1:31). "E kreashon awor tabata kompletu. ... Eden tabata floresé riba tera. Adam i Eva tabatin akseso liber na e palu di bida. Niun mancha di piká òf sombra di morto tabata daña e bunita kreashon." - Ellen G. White, Patriarchs and Prophets, p. 47. Dios a spièrta Adam i Eva ku si nan a kome for di e palu prohibí, siguramente nan lo a muri (Gen. 2:15-17). E kolebra a kuminsá su diskurso ku un pregunta i despues el a kompletamente kontradesí loke Dios a bisa: "Boso lo no muri siguramente" (Gen. 3:4, NKJV). Satanas a primintí Eva gran konosementu i ku e lo tabata manera Dios. Opviamente, el a ker’é.

Kon Pablo ta konfirmá deklarashon di Dios den Génesis 2:15-17? Lesa Romanonan 5:12 i Romanonan 6:23. Kon e siñansanan akí ta relashoná ku evolushon teista?

Den Skritura nos por mira kaminda e eskritornan bíbliko posterior a konfirmá deklarashonnan bíbliko anterior i a proveé persepshonnan adishonal. Den Romanonan 5-8, Pablo ta skirbi tokante piká i e beyesa di salbashon: "Piká a drenta den mundu dor di ún hende, i morto dor di piká, i asina morto a yega na tur hende" (Rom. 5:12, NIV). Pero un perspektiva evolushonario lo a presentá morto miónes di aña promé ku humanidat. E idea akí tin implikashonnan serio pa e siñansa bíbliko di e orígen di piká, e morto sustituto di Kristu riba e krus, i e plan di salbashon. Si morto no ta relashoná ku piká, e ora ei e pago di piká no ta morto (Rom. 6:23), i Kristu lo no tabatin motibu pa muri pa nos pikánan. Por lo tantu, Kreashon, e Kaida, i e Krus ta inseparablemente konektá. E promé Adam ta ligá na e último Adam (1 Kor. 15:45,47). Un kreensia den evolushon darwiniano, asta si algun konsepto di Dios ser hinká den e proseso, lo a destruí e base mes di Kristianismo.