E Beibel i Profesia

E método fundamental ku Atventistanan di e di Shete dia ta apliká pa studia e profesianan di Beibel ta ser yamá historisismo. E ta e idea di ku hopi di e profesianan mas importante den Beibel ta sigui un fluho linial di historia ku no ta ser interumpí, for di pasado na presente, i te den futuro. E ta similar na e manera ku lo bo ta studia historia na skol. Nos ta hasié di e manera akí pasobra ta asina Beibel mes ta interpretá e profesianan akí pa nos.

Lesa Daniel 2:27-45. Ki aspektonan di e soño ta indiká un suseshon kontinuo i no interumpí di poder a lo largu di historia? Den ki manera nos tin Beibel mes ku ta mustra nos kon pa interpretá profesia apokalíptiko (di tempu di fin)?

Nota ku e reino di Nabukodonosor ta ser rekonosé komo e kabes di oro. Asina, Daniel ta identifiká Babilonia komo e promé reino (Dan. 2:38). E ora ei Daniel ta bisa: "Pero despues di bo lo lanta un otro reino ... despues un otro, un di tres reino" (Dan. 2:39, NKJV) i despues un di kuater (Dan. 2:40). Ku esakinan ta den suseshon un tras di otro sin niun espasio tambe ta impliká den e imágen mes, pasobra kada un di e reinonan ta ser representá den partinan di un kurpa mas grandi ku ta move for di e kabes te abou na e dedenan di pia. Nan ta konektá, meskos ku tempu i historia ta konektá.

Den Daniel 7 i 8, na lugá di un imágen, símbolonan di bestia spesífiko ta ser usá, pero ta mesun kos ta ser siñá. Nos a haña un sekuensia sin interupshon di kuater reino terenal (tres den Daniel 8). Nan ta kuminsá den antigwedat, i ta bai a traves di historia, te na presente i den futuro, ora ku Kristu regresá i Dios establesé Su reino eterno.

Asina, e imágen di Daniel 2 i e vishonnan susesivo di Daniel 7 i 8 ta proveé e base pa e interpretashon di profesia historisista protestant, ku Atventistanan di e di Shete dia te ainda ta mantené aktualmente.

Lesa Juan 14:29. Kiko Hesus ta bisa ku ta yuda nos komprondé kon profesia por funshoná?

Un di e klavenan interpretativo di historisismo ta e prinsipio di dia pa aña. Hopi erudito a lo largu di siglonan a apliká e prinsipio akí na e profesianan di tempu di Daniel i Revelashon. Nan a derivá e prinsipio for di vários teksto klave i for di e konteksto inmediato di e profesianan mes.

Lesa Numbernan 14:34 i Ezekiel 4:6. Kon Dios ta splika e prinsipio di dia pa aña den e tekstonan spesífiko akí?

Den e tekstonan akí, nos por mira hopi klaramente e idea di e prinsipio di dia pa aña. Pero kon nos ta hustifiká e uso di e prinsipio akí ku algun di e profesianan di tempu, manera den Daniel 7:25, i Daniel 8:14, i tambe Revelashon 11:2,3; Revelashon 12:6,14 i Revelashon 13:5?

Tres otro elemento ta sostené e prinsipio di dia pa aña den e profesianan akí di Daniel i Revelashon: e uso di símbolonan, periodonan largu di tempu, i ekspreshonnan pekuliar.

Na promé lugá, e naturalesa simbóliko di e bestia- i kachunan representando reinonan ta sugerí ku e ekspreshonnan di tempu mester ser komprondé tambe komo simbóliko. E bestia- i kachunan no mester ser tumá literalmente. Nan ta símbolonan pa algu otro. Por lo tantu, pasobra e restu di e profesia ta simbóliko, no literal, dikon nos mester tuma e profesianan di tempu so komo literal? E kontesta ta, naturalmente, ku nos no mester hasié.

Na di dos lugá, hopi di e eventonan i reinonan representá den e profesianan ta kubri un lapso di tempu di hopi siglo, kua lo tabata imposibel si e profesianan di tempu representando nan lo a ser tumá literalmente. Unabes ku e prinsipio di dia pa aña ser apliká, e tempu ta pas den e eventonan na un manera notablemente presis, algu ku lo tabata imposibel si e profesianan di tempu lo a ser tumá literalmente.

Finalmente, e ekspreshon pekuliar usá pa señalá e periodonan di tempu akí ta sugerí un interpretashon simbóliko. Den otro palabra, e formanan den kua tempu ta ser ekspresá den e profesianan akí (por ehèmpel, “2.300 anochi i mainta" di Daniel 8:14, NIV) no ta formanan normal di ekspresá tempu, mustrando nos ku e periodonan di tempu ku ta ser deskribí mester ser tumá simbólikamente, no literalmente.

Pa siglonan, e reformadónan protestant a identifiká e poder di e kachu chikitu den Daniel 7 i den Daniel 8 komo e iglesia romano. Dikon?

Lesa Daniel 7:1-25 i 8:1-13. Kiko ta e karakterístikanan komun di e kachu chikitu den tur dos kapítulo? Kon nos por identifik'é?

Tin shete karakterístika komun entre e kachu chikitu di Daniel 7 i 8:

1. tur dos ta ser deskribí komo un kachu;
2. tur dos ta podernan ku ta persiguí (Dan. 7:21,25; 8:10,24);
3. tur dos ta eksaltá nan mes i ta blasfemá (Dan. 7:8,20,25; 8:10,11,25);
4. tur dos ta ataká e pueblo di Dios (Dan. 7:25; 8:24);
5. tur dos tin aspektonan di nan aktividat deliniá pa tempu profétiko (Dan. 7:25; 8:13,14);
6. tur dos ta ekstendé te na e fin di tempu (Dan. 7:25,26; 8:17,19); i
7. tur dos lo ser destruí di forma sobrenatural (Dan. 7:11,26; 8:25).

Historia ta identifiká e promé reino komo Babilonia (Dan. 2:38), e di dos komo Medo-Persia (Dan. 8:20), i e di tres komo Gresia (Dan. 8:21). Historia no ta kiboká su mes ku despues di e imperionan mundial akí ta bin Roma.

Den Daniel 2, e heru ku ta representá Roma ta sigui den e pianan di heru mesklá ku klei; es desir, te na e fin di tempu. E kachu chikitu di Daniel 7 ta surgi for di e di kuater bestia pero ta keda parti di e di kuater bestia akí.

Ki poder a sali for di Roma i ta sigui ku su influensia polítiko-religioso pa por lo ménos 1.260 aña (wak Dan. 7:25)? Solamente un poder ta pas ku historia i profesia: e papado. E papado a bin na poder entre e dies tribunan bárbaro di Europa i a eliminá tres di nan (Dan. 7:24). E papado tabata "diferente for di esnan anterior" (Dan. 7:24, NASB) indikando su singularidat kompará ku e otro tribunan. E papado a papia “palabranan presumí kontra e Haltísimo" (Dan. 7:25, NKJV) i "a eksaltá su mes pa ta mes haltu ku e Prens di e ehérsito" (Dan. 8:11, NKJV) tumando e ròl di Hesus over i remplasando esaki ku e Papa. E papado a kumplí ku e predikshon di persiguí "e santunan di e Haltísimo" (Dan. 7:25, NKJV) i tirando abou "algun di e ehérsito" (Dan. 8:10, NKJV) durante e Kontra-Reforma ora ku Protestantnan tabata ser masakrá. E papado a purba "kambia tempunan i lei" (Dan. 7:25, NKJV) dor di kita e di dos mandamentu i kambia e Sabat pa djadumingu.

E kuadro profétiko studiá e siman akí a haña hopi sosten abrumador entre historisistanan protestant desde e Reforma. Pero no tabata te na e movementu millerita na prinsipio di siglo 19 ku e 2.300 dianan i e huisio investigativo a ser rekonsiderá i studiá kuidadosamente. Wak e siguiente tabèl:

Daniel 7	Daniel 8
Babilonia (leon)	-----
Media-Persia (ber)	Media-Persia (karné chubatu)
Gresia (leopardo)	Gresia (kabritu chubatu)
Roma pagano (di kuater bestia)	Roma pagano (kachu ta avansá horizontalmente)
Roma papal (kachu chikitu)	Roma papal (kachu ta avansá vertikalmente)

Lesa Daniel 7:9-14; 8:14,26. Kiko ta pasando den shelu manera ta ser deskribí den e versíkulonan akí?

Despues di e periodo di persekushon medieval, kua a terminá den 1798 ku e kaptura i enkarselashon di e papa dor di e general di Napoleon, Berthier, (Rev. 13:3), Daniel 7 i 8 ta papia di huisio. E huisio mester tuma lugá den shelu kaminda "e korte a sinta" (Dan. 7:10, NKJV) i "Un manera e Yu di Hende, biniendo ku e nubianan di shelu ... a bin serka e Ansiano di Dianan"(Dan. 7:13, NKJV). Esaki ta un esena di huisio ku ta tuma lugá despues di 1798 i promé ku e Segundo Binida di Hesus. E esena di huisio akí den Daniel 7 ta direktamente paralelo na e purifikashon di e santuario den Daniel 8:14. Nan ta papiando tokante e mesun kos. Di akuerdo ku Daniel 8:14, e tempu di e "purifikashon di e santuario", ku ta terminologia di e Dia di Ekspiashon, ta 2.300 anochi i mainta, òf dia. Ku e prinsipio di dia pa aña, e dianan akí ta representá 2.300 aña.

E punto di komienso di e 2.300 añanan ta ser hañá den Daniel 9:24, den kua e profesia di 70-siman (490 aña) ta chatak, òf "kòrtá kitá afó", for di e vishon di 2.300 dia (Dan. 9:24). De echo, hopi erudito korektamente ta mira e profesia di 2.300 dia (aña) di Daniel 8:14 i e profesia di 70 siman (490 aña) di Daniel 9:24-27 komo dos partí di un profesia. E siguiente versíkulo den e profesia di 70 siman, Daniel 9:25, ta duna e komienso di e periodo di tempu, "for di e salida di e órden pa restourá i konstruí Herusalèm" (NKJV). E fecha pa e evento akí ta "e di shete aña di Artaherhes e rei" (Esdras 7:7), òf 457 P.K. Kontando 2.300 aña padilanti, nos ta yega na 1844, kua no ta hopi tempu despues di 1798 i promé ku e Segundo Binida di Hesus. Esaki ta ora ku Hesus a drenta den e Lugá Santísimo i a kuminsá Su obra di interseshon, di purifiká e santuario selestial. Wak e tabèl den e estudio di djabièrnè.

E símbolonan di profesianan apokalíptiko, manera esnan hañá den Daniel i Revelashon, tin un solo kumplimentu. Por ehèmpel, e kabritu chubatu a haña su kumplimentu den Gresia, un reino singular (Dan. 8:21). Finalmente, e teksto a menshon'é direktamente pa nos! Kuantu mas kla e por tabata?

Tipologia, sinembargo, ta focus riba personanan, eventonan òf institushonnan di Tèstamènt Bieu ku ta fundá den un realidat históriko pero ku ta mustra padilanti na realidat mas grandi den futuro. E uso di tipologia komo un método di interpretashon ta bai bèk na Hesus i e eskritornan di Tèstamènt Nobo, i ta ser hañá asta den Tèstamènt Bieu mes. E úniko guia pa rekonosé un tipo i antitipo ta ora ku un eskritor inspirá di Skritura identifiká nan.

Lesa 1 Korintionan 10:1-13. Na ki eventonan Pablo ta referí ora e ta amonestá e iglesia na Korinto? Kon esaki ta relashoná ku nos awe?

Pablo ta referí bèk na e realidat históriko di e Eksodo i ta desaroyá un tipología basá riba e eksperensia di e hebreonan antiguo den desierto. Di e forma aki, Pablo ta mustra ku Dios, kende a inspirá Moises pa registrá e eventonan akí, tabata ke pa "e kosnan akí bira ehèmpelnan" (1 Kor. 10:6, NKJV), i asina amonestá Israel spiritual pa soportá tentashon miéntras nos ta biba den e último dianan.

Lesa e versíkulonan akibou i skirbi kada kumplimentu di tipo i antitipo, manera deskribí pa Hesus i e eskritornan di Tèstamènt Nobo.

Mat. 12:40

Juan 19:36

Juan 3:14, 15

Rom. 5:14

Juan 1:29

Den kada kaso, Hesus i e eskritornan di Tèstamènt Nobo ta apliká e interpretashon di tipo i antitipo ku ta permití e nifikashon profétiko resaltá. Di e manera akí, nan ta mustra na un kumplimentu mas grandi di e realidat históriko.