Tratando ku Pasashinan Difísil

Lesa 2 Timoteo 2:10-15. Pablo ta amonestá Timoteo pa ta diligente i pa "trata e palabra di bèrdat di forma eksakto" (NASB). Ki mensahe importante e ta dunando nos tur aki?

Niun studiante atento i honesto di Skritura lo ninga e echo ku tin kos den Beibel ku ta difísil pa komprondé. E situashon akí no mester molestiá nos. De echo, den un sentido e difikultatnan ei ta di spera. Despues di tur kos, nos ta sernan imperfekto i finito, i niun persona tin un konosementu komprensivo di tur área di siñamentu, muchu ménos di kosnan divino. Por lo tantu, ora sernan humano ignorante i finito purba komprondé e sabiduria di e Dios infinito di Skritura, ta probabel ku tin algun difikultat. Difikultat asina pa komprondé siñansanan bíbliko, sinembargo, di niun manera no ta prueba ku loke Beibel ta afirmá ta falsu.

Esnan ku deskartá e siñansa bíbliko di revelashon i inspirashon divino, hopi bia ta deklará ku e difikultatnan ei ta kontradikshon- i erornan. Pasobra pa nan e Beibel ta masoménos djis un buki humano, nan ta kere ku Beibel mester ta kontené imperfekshon- i erornan. Ku un mentalidat asina, hopi biaha no tin un intento serio pa buska un splikashon ku ta tuma e unidat i konfiabilidat di Skritura na konsiderashon ku ta resultá for di su inspirashon divino. Hende ku kuminsá kuestioná e promé páginanan di Skritura, e relato di kreashon (por ehèmpel), pronto por ser hibá na pone mayoria di e restu di Skritura tambe den duda i insertidumbre.

Algun diskrepansianan den Skritura lo por ta pa motibu di erornan menor di kopiadó- òf traduktornan. Ellen White a deklará: "Algun ta wak nos serio i ta bisa, 'Bo no ta kere ku kisas por tin algun eror den e kopiadó òf den e traduktornan?' Tur esaki ta probabel, i e mente ku ta asina smal di tal manera ku lo e duda i trompeká riba e posibilidat òf probabilidat akí lo ta mesun kla pa trompeká riba e misterionan di e Palabra Inspirá, pasobra nan mentenan débil no por diserní e propósitonan di Dios. Sí, mesun fásil nan lo trompeká riba echonan kla ku e mente komun lo aseptá, i diserní loke ta Divino, i pa kua e ekspreshon di Dios ta kla i bunita, yen di tuti i vèt. Tur e erornan lo no kousa problema na un alma, òf pone kualke pia trompeká, ku lo no elaborá difikultatnan for di e bèrdat revelá di mas simpel". - Selected Messages, tomo 1, p. 16.

Bo a yega di tin e eksperensia di topa un teksto òf set di teksto ku bo no a komprondé, òf a haña difísil pa harmonisá ku otro tekstonan òf realidat en general? Ta difísil pa imaginá ku na un momentu òf otro bo no a enfrentá e problema akí. E pregunta ta, Kon bo a respondé? Òf, mas importante ainda, Kon bo mester respondé?

Lesa 1 Krónikanan 29:17, Proverbionan 2:7, 1 Timoteo 4:16. Kiko e tèkstnan akí ta bisando ku por apliká na e pregunta di kon nos ta trata ku pasashinan difísil?

Solamente ora nos ta honesto nos por afrontá difikultatnan adekuadamente. Honestidat ta salbaguardiá nos pa asina nos no evitá niun difikultat òf purba skonde nan. Honestidat lo impedí nos tambe di duna kontestanan superfisial ku no ta soportá realmente e prueba di èksamen profundo. Dios ta keda agradá ku honestidat i integridat. Por lo tantu, nos mester imitá Su karakter den tur loke nos ta hasi, asta den nos estudio di e Beibel.

Hende honesto lo trata ku difikultatnan di Beibel di tal manera ku nan ta kuidadoso pa no presentá informashon fuera di konteksto, falsifiká e bèrdat ku lenguahe kargá, òf despistá otronan pa medio di evidensia manipuladó. Ta muchu mas mihó pa warda riba un kontesta hustifikabel pa un difikultat ku intentá na proveé un solushon kiboká òf ku no ta satisfaktorio. Un efekto sekundario positivo di ta honesto den nos estudio di Beibel ta ku e ta generá konfiansa, i konfiansa ta e base di tur relashonnan personal sano. E ta konvensé hende muchu mas ku kontestanan débil. Ta mihó bisa ku simplemente bo no sa kon pa kontestá e pregunta òf splika e teksto ku presishon, ku purba lag’é bisa loke bo ke pa e bisa ora, kisas, realmente e no ta bisa asina.

Hendenan kuidadoso sinseramente ke konosé e bèrdat di e Palabra di Dios i, por lo tantu, nan ta sigurá konsistentemente ku nan no ta pura pa yega na konklushonnan den purá ku ta basá riba konosementu limitá òf evidensia suak. Hendenan kuidadoso ta determiná pa no pasa niun aspekto òf detaye por alto ku por ta importante. Nan no ta purá den nan pensamentu sino nan ta minusioso i diligente den nan estudio di e Palabra di Dios i tur informashon relashoná ku esaki.

Lesa Santiago 4:6-10; 2 Krónikanan 7:14; i Sofonias 3:12. Dikon humildat ta importante ora nos ta purba atendé ku pasashinan difísil den Skritura?

Hopi hende a yega na e maravioso realisashon i persepshon humilde ku nan ta dependé riba algu i un hende fuera di nan mes. Nan a realisá ku nan no ta e midí di tur kos. E hendenan akí ta balorá bèrdat riba e nesesidat di nan ego di tin rason, i nan ta konsiente ku bèrdat no ta nan kreashon sino, mas bien, loke nan ta konfrontá. Kisas e bèrdat di mas grandi ku e hendenan akí ta komprondé ta simplemente kon tiki nan sa realmente di e bèrdat. Nan sa, manera Pablo a skirbi, ku nan " ta mira dor di un spil, skur asina" (1 Kor. 13:12).

E benefishinan di e humildat di pensamentu akí ta diverso: e kustumber di preguntanan humilde ta e fundeshi di tur kresementu den konosementu, pasobra e ta generá un libertat ku naturalmente ta produsí un spiritu ku por ser siñá. Esaki no ta nifiká ku hende humilde hopi biaha nesesariamente ta robes, òf ku semper nan lo kambia di pensamentu i ku nunka nan lo tin un konvikshon firme. E ta nifiká solamente ku nan ta sumiso na bèrdat bíbliko. Nan ta konsiente di e limitashonnan di nan konosementu i, por lo tantu, ta kapas di ekspandé nan konosementu i komprondementu di e Palabra di Dios den un forma ku e persona intelektual, arogante i orguyoso, lo no hasi.

"Tur ku lo bin na e Palabra di Dios pa guia, ku mente humilde i inkieto, determiná pa konosé e términonan di salbashon, lo komprondé loke e Skritura ta bisa. Pero esnan trese na e investigashon di e Palabra un spiritu ku e no a aprobá, lo saka un spiritu for di e estudio ku e no a impartí. Señor lo no papia na un mente ku no tin interes. E no ta gasta Su instrukshon riba un hende ku boluntariamente ta ireverente i polushoná. Pero e tentadó ta eduká tur mente ku ta someté su mes na su sugerensianan i ta boluntario pa hasi ku e lei santu di Dios no tin ningun efekto.

"Nos mester humiliá nos kurason, i ku sinseridat i reverensia skudriñá e Palabra di bida; pasobra solamente e mente ku ta humilde i arepentí por mira lus". - The Advent Review and Sabbath Herald, 22 di ougùstùs 1907.

Lesa Galationan 6:9. Miéntras Pablo ta papia aki tokante di nos persistensia pa hasi bon na otronan, e mesun aktitut ta nesesario ora nos ta trata ku preguntanan difísil. Dikon determinashon i pasenshi ta importante pa resolvé problema?

Logro real semper ta rekerí kurashi. Loke nos haña di forma demasiado fásil, hopi biaha nos ta konsiderá ku muchu liheresa. E difikultatnan den Beibel ta duna nos un oportunidat pa pone nos mente funshoná, i e determinashon i persistensia ku kua nos ta buska un solushon ta revelá kon importante e asuntu ta pa nos. Ki ora ku nos pasa studiando e Beibel pa purba deskubrí mas tokante su nifikashon i mensahe, ta tempu bon usá. Kisas e eksperensia di skudriñá diligentemente e Skrituranan pa un kontesta, asta pa un tempu largu, lo ta un bendishon mas grandi ku e solushon di e problema si nos haña esaki finalmente. Despues di tur kos, ora ku nos haña un solushon pa un problema difísil, e ta bira hopi presioso pa nos.

E echo ku bo no por solushoná un difikultat rápidamente no ta prueba ku e no por ser resolvé. Ta remarkabel kuantu biaha nos ta pasa e echo evidente akí por alto. Tin hopi hende ku, ora nan topa un difikultat den Beibel, i pensa djis un tiki riba dje i no por mira un posibel solushon, mesora ta yega na e konklushon ku e problema no por ser resolvé. Algun ta kuminsá kuestioná e kredibilidat di e Beibel. Pero nos no mester lubidá ku por tin un solushon masha fásil asta si nos den nos sabiduria humano limitá, òf ignoransia, no ta mir’é. Kiko nos lo a pensa di un prinsipiante den álgebra ku, despues di a purba en bano pa mei ora pa resolvé un problema difísil, deklará ku no tin un posibel solushon pa e problema pasobra e no por a haña niun? Mesun kos ta bèrdat pa nos den nos estudio di e Beibel.

Ora algun difikultat desafiá asta bo esfuersonan di mas fuerte pa resolvé nan, pone nan un banda pa un tempu, i mientrastantu, praktiká loke Dios a mustra bo klaramente. Algun persepshon spiritual ta ser hañá solamente despues ku nos tabata dispuesto pa sigui loke Dios ya a bisa nos pa hasi. Pues sea persistente i ku pasenshi den bo estudio di Beibel. Despues di tur kos, pasenshi ta un birtut di e kreyentenan di e tempu di fin (lesa Rev. 14:12).

Lesa Echonan 17:11, Echonan 8:35, i Echonan 15:15,16. Kiko e apòstelnan i miembronan di e promé iglesia a hasi ora nan a ser konfrontá ku preguntanan difísil? Dikon Skritura ainda ta e mihó fuente pa su propio interpretashon?

E mihó solushon pa difikultatnan di Beibel ainda ta ser hañá den Beibel mes. Problemanan den Beibel ta ser atendé mihó ora nan ser studiá den lus di henter Skritura na lugá di djis atendé ku un teksto so den isolashon for di otronan òf for di henter Skritura. Nos mester, en realidat, usa e Beibel pa yuda nos komprondé e Beibel. Siña saka e bèrdatnan grandi hañá den Skritura, ta un di e kosnan di mas importante ku nos por hasi.

Si bo no ta komprondé un pasashi di Skritura, purba haña algu di lus for di otro pasashinan bíbliko ku ta trata ku e mesun tema. Semper purba haña deklarashonnan kla di Skritura pa tira lus riba e pasashinan ei ku ta ménos kla. Ta hopi importante tambe pa nunka skuresé i nubla deklarashon kla di Skritura dor di pone den nan e pasashinan ku ta difísil pa komprondé. Mas bien ku laga fuentenan pafó di Beibel òf filosofia, òf siensia splika nifikashon di e Beibel, nos mester permití e teksto di Skritura mes revelá su nifikashon na nos.

A ser bisá ku riba nos rudianan, literalmente nos ta wak difikultatnan for di un perspektiva nobo. Pasobra ora nos ta hasi orashon nos ta señalá ku nos ta den nesesidat di yudansa divino pa interpretá i komprondé Skritura. Ora nos ta hasi orashon, nos ta buska e iluminashon di nos mente a traves di e mesun Spiritu Santu ku a inspirá e eskritornan bíbliko pa skirbi loke nan a skirbi.

Ora nos ta hasi orashon, nos motibunan ta ser eksponé, i nos por bisa Dios dikon nos ke komprondé loke nos ta lesa. Ora nos ta hasi orashon, nos ta pidi Dios pa habri nos wowonan na Su Palabra i pa duna nos un spiritu boluntario pa sigui i praktiká Su bèrdat. (Esaki ta krusial!) Ora ku Dios ta guia nos pa medio di Su Spiritu Santu komo kontesta riba nos orashonnan, E no ta kontradesí loke El a revelá den e Beibel. Dios semper lo ta den harmonia ku Beibel, i ta konfirmá i konstruí riba loke E a inspirá e eskritornan bíbliko pa komuniká na nos.