Biba pa Medio di e Palabra di Dios

Studia e Palabra di Dios kuidadosamente i ku e método apropiá ta hopi importante. Pero, mes importante, kisas asta mas tantu, ta pa nos pone loke nos a siña den práktika. E meta final di studia e Beibel no ta sinta den atkerí mas konosementu, pa maravioso ku esei por ta. E meta no ta trata di dominá e Palabra di Dios, sino ku e Palabra di Dios ta dominá nos, kambiando nos bida i nos manera di pensa. Esei ta loke realmente ta importá. Pa ta dispuesto pa biba e bèrdat ku nos a siña, ta nifiká pa ta dispuesto na someté na e bèrdat bíbliko ei. E eskoho akí algun bia ta enbolbí un lucha intenso, pasobra nos ta bringando un bataya riba ken lo tin dominio den nos pensamentu i den nos bida. I, na final, tin solamente dos banda for di kua por skohe.

Lesa Filipensenan 2:12-16. Kiko e versíkulonan akí ta bisa tokante kon nos mester biba?

Sí, Dios ta obra den nos, pero e ta hasi esei a traves di Spiritu Santu, kende so ta duna nos e sabiduria pa komprondé e Skrituranan Santu. Ademas, komo sernan humano pekaminoso, hopi bia nos ta oponé na e bèrdat di Dios, i si laga nos pa nos kuenta nos lo no obedesé e Palabra di Dios (Rom. 1:25; Efe. 4:17,18). Sin e Spiritu Santu, no tin apresio pa e mensahe di Dios. No tin speransa, no tin konfiansa, no tin amor komo kontesta. Pa medio di Spiritu Santu, Dios enbèrdat "ta obra den boso, tantu pa ke komo pa hasi, segun Su bon boluntat" (Fil. 2:13, NKJV).

Spiritu Santu ta un maestro ku ta deseá di guia nos den un komprondementu mas profundo di Skritura i na un apresio gososo di e Palabra di Dios. E ta trese e bèrdat di e Palabra di Dios na nos atenshon i ta duna nos persepshonnan fresku den e bèrdatnan ei, pa asina nos bida por ser karakterisá pa fieldat i un obediensia amante na e boluntat di Dios. ''Niun hende por splika e Skrituranan sin e yudansa di Spiritu Santu. Pero ora bo risibí e Palabra di Dios ku un kurason humilde i habrí pa siña, e angelnan di Dios lo ta na bo banda pa impreshoná bo ku evidensianan di e bèrdat". - Ellen G. White, Selected Messages, buki 1, p. 411. Di e forma aki, kosnan spiritual ta ser interpretá spiritualmente (1 Kor. 2: 13, 14) i nos por sigui Dios Su Palabra ku goso "mainta tras mainta" (Isa. 50:4, 5).

No tin un ehèmpel mihó i inspiradó pa sigui ku esun di Hesukristu. E tabata konosí ku e Skrituranan, i tabata dispuesto na sigui e Palabra skirbí di Dios i biba segun esaki.

Lesa Lukas 4:4,8,10-12. Kon Hesus ta usa Skritura pa kontrarestá e tentashonnan di Satanas? Kiko esaki ta bisa nos tokante kon sentral e Skrituranan mester ta pa nos fe, spesialmente den momentunan di tentashon?

Hesus tabata konosé e Skrituranan bon. E tabata asina íntimamente familiarisá ku e Palabra di Dios ku E por a resit’é di memoria. E familiaridat akí ku e Palabra skirbí di Dios mester a resultá for di tempu di kalidat presioso ku Dios ora E tabata studia e Skrituranan.

Si E no tabata sa e palabranan eksakto di Skritura i e konteksto den kua nan tabata aparesé, fásilmente E lo por a ser gañá pa e diabel. Asta diabel a sita Skritura i a us'é pa su propio propósitonan engañoso. Pues, djis ta kapas pa sita Skritura, manera diabel a hasi, no ta sufisiente. E hende mester sa tambe kiko mas Skritura tin di bisa riba un tema i sa su nifikashon korekto. Solamente un familiaridat asina ku e Palabra di Dios lo yuda nos, manera Hesus, pa no ser gañá pa e atversario di Dios, sino pa por resistí e atakenan di Satanas. Bes tras bes nos ta lesa tokante ku Hesus a habri mente di Su siguidónan pa komprondé Skritura dor di referí nan na loke "ta pará skirbí" (Luk. 24:45,46; Mat. 11:10; Juan 6:45; etc). El a asumí ku esnan ku ta lesa e Skrituranan por yega na un komprondementu korekto di su nifikashon: “Kiko ta pará skirbí den e lei? Kiko bo ta lesa den dje?" (Luk. 10:26, NKJV). Pa Hesus, loke tabata pará skirbí den Skritura ta e norma segun kua nos mester biba.

Den Juan 7:38 Hesus, e Palabra di Dios hasí karni, a referí Su siguidónan bèk na loke Skritura a bisa. Ta solamente pa medio di e Beibel nos sa ku Hesus ta e Mesias primintí. Ta e Skrituranan ta esnan ku ta testifiká tokante di djE (Juan 5:39). Hesus Mes tabata dispuesto pa kumpli ku e Skrituranan, e Palabra di Dios ku a ser skirbí. Si E tabata dispuesto pa hasi esei, kiko esaki ta bisa nos tokante loke nos tambe mester hasi?

Lesa Juan 5:45-47. Ki mensahe poderoso Hesus ta duna na nos aki tokante Su relashon ku e Beibel?

Algun hende ta afirmá ku ora Hesus a papia El a pone Su palabranan den kontraste skèrpi ku e palabranan di Skritura, manera nos ta haña nan den Tèstamènt Bieu. Nan ta bisa ku e palabranan di Hesus ta asta elevá ariba e palabranan di Skritura.

Den Tèstamènt Nobo nos ta lesa ku Hesus a bisa: "Boso a tende ku a ser bisá ... ma Ami ta bisa boso ..." (Mat. 5:43, 44; kompará ku Mat. 5:21,22,27,28,33,34,38,39). Ora Hesus a bisa e palabranan famoso akí den e Sermon riba e Seru, e no tabata trata na bandoná òf abolí e Tèstamènt Bieu, manera algun intérprete ta bisa. En kambio, E tabata respondé riba vários interpretashon di Skritura i riba tradishonnan oral ku tabata ser usá pa algun intérprete di Su tempu pa hustifiká komportashon pa ku otro hendenan ku Dios no a tolerá i nunka a ordená, manera odia bo enemigu (lesa Mat. 5:43).

Hesus no a abolí e Tèstamènt Bieu den ningun manera òf den kualke grado a disminuí su outoridat. E kontrali ta bèrdat. Tabata e Tèstamènt Bieu ku, en realidat, ta prueba ken E ta. Na lugá di esei, El a intensifiká e nifikashon di e deklarashonnan di Tèstamènt Bieu mustrando nos na e intenshonnan original di Dios.

Usa e outoridat di Hesus pa desbaratá Skritura Santu òf pa difamá algun partinan di Beibel komo no inspirá ta kisas un di e krítikanan mas sutil i sinembargo mas peligroso di Skritura, pasobra e ta ser hasí den nòmber mes di Hesus. Nos tin e ehèmpel di Hesus di kuantu outoridat El a duna na e Skrituranan, kua, den Su tempu, tabata konsistí di e Tèstamènt Bieu so. Ki evidensia mas nos tin mester tokante kon nos mester mira e Tèstamènt Bieu tambe?

Leu for di debilitá e outoridat di Skritura, Hesus tabata defendé Skritura di forma konsistente komo un guia outéntiko i konfiabel. De echo, di forma inkuestionabel e ta bisa den e mesun Sermon riba e Seru: "No pensa ku Mi a bin pa abolí e Lei òf e Profetanan; Mi no a bin pa abolí, sino pa kumpli" (Mat. 5: 17, NASB). I E ta sigui bisa ku ken ku "anulá un di e mandamentunan di mas chikitu akí, i siña otronan pa hasi mesun kos, lo ser yamá esun di mas chikitu den e reino di shelu" (Mat. 5:19, NASB).

Nos bida tin tendensia di ta hopi agitá i yená ku tenshon i strès. Tin bia nos tin ku traha duru djis pa supsistí, pa sobrebibí i pa pone kuminda riba mesa. Otro biahanan, asta ora nos tin e nesesidatnan básiko di bida, nos ta traha kansa kurpa pasobra nos ke mas i mas. Nos ke e kosnan ku nos ta kere ku lo hasi nos felis i satisfecho. Pero, manera Salomon a atvertí nos den e buki di Eklesiastés, esei no ta pasa semper.

Kualke sea e motibu, nos por ta teriblemente okupá den nos bida, i pues ta hopi fásil, meimei di e okupashon, pa desplasá Dios. No ta ku nos no ta kere, sino solamente nos no ta pasa tempu di kalidat lesando, hasiendo orashon i halando mas serka di Señor, kende tin "bo rosea di bida den Su man" (Dan. 5:23, NKJV). Nos por ta demasiado distraí pa di otro kosnan pa eksperensiá tempu di kalidat ku Dios. Nos tur tin mester di momentunan den kua deliberadamente nos ta baha nos velosidat pa topa ku esun ku ta nos Salbador, Hesus. Kon Spiritu Santu por papia na nos si nos no ta tuma pousa pa skucha? E momentu spesial di kietut ku Dios, den lesa Su Palabra i den e komunikashon di orashon, ta e fuente di nos bida spiritual.

Lesa Salmo 37:7; Salmo 46:10; i Salmo 62:1,2,5. Kiko e tekstonan akí ta siña nos tokante tempu ketu ku Dios? Dikon tempu ketu ku Dios ta asina importante?

Si bo ta stima un hende, bo ta disfrutá pasando tempu bo so ku e persona stimá ei. Skohe un lugá den kua bo por lesa i reflekshoná riba e Palabra di Dios sin interupshon. Den nos bida agitá, esaki por logra solamente si deliberadamente bo reservá un bentana di tempu spesífiko pa e enkuentro akí. Hopi biaha e komienso di dia ta mihó pa e minütnan akí di kietut i reflekshon. Momentunan asina promé ku e dia di trabou kuminsá por bira un bendishon pa henter restu di e dia, pasobra e pensamentunan balioso ku bo ta haña lo kompañá bo pa hopi ora. Pero sea kreativo pa haña e tempu di kalidat korekto ku bo mester pa asina bo topa ku Dios sin interupshon.

Ta konektá ku e Dios bibu di Beibel pa medio di orashon ta afektá bo bida manera nada hamas por hasi. Finalmente, e ta kontribuí pa bo bira mas manera Hesus.

"Bo palabra mi a skonde den mi kurason, pa mi no peka kontra Bo" (Salmo 119:11, NKJV).

Memorisá Skritura ta trese múltiple bendishon. Ora nos konservá pasashinan presioso di e Palabra di Dios den nos mente, nos por hasi bibu loke a bai den nos memoria i aplik’é den sirkunstansianan nobo i ku ta kambia. Di e manera ei e Beibel ta impaktá direktamente nos pensamentu i nos desishonnan, i ta influensiá nos balornan i komportashon. Memorisá Skritura ta trese e Beibel na bida den nos eksperensia diario. Ademas, e ta yuda nos adorá Dios i biba un bida fiel di akuerdo ku e Skrituranan.

Rekordá Skritura palabra pa palabra ta un protekshon tremendo kontra engaño- i interpretashonnan falsu. Siña Skritura di memoria ta kapasitá nos pa sita Skritura, asta ora nos no tin un Beibel disponibel. Esaki por bira un tremendo poder pa bon den situashonnan ora ku tentashonnan surgi, òf ora nos ta ser konfrontá ku desafionan atverso. Rekordá e promesanan di Dios, i pa fiha nos mente riba e Palabra di Dios mas bien ku riba nos problemanan, ta elevá nos pensamentunan na Dios, kende tin mil manera pa yuda ora nos no ta mira niun.

Lesa Efesionan 5:19 i Kolosensenan 3:16. Kon kantamentu di e Palabra di Dios por establesé i fortalesé e Palabra di Dios den nos mente?

Kanta e palabranan di Beibel tambe por ta un manera poderoso pa memorisá e teksto di Skritura. Ora nos ta kanta, e palabranan di Skritura ta ser kòrdá na un manera mas fásil. Kombiná e Palabranan di Skritura ku melodianan bunita lo ankra nan den nos pensamentunan di forma mas firme, i ta un manera efektivo pa aliviá nos estado di ánimo ansioso. Pasashinan di Skritura ku ta konektá ku melodianan simpel pero harmonioso por ser kantá fásilmente i memorisá pa muchanan chikitu i tambe adultonan. Skritura tabata inspirashon pa numeroso oratorionan, sinfonianan i otro músika di fama mundial ku a forma i influensiá kultura kristian a lo largu di siglonan. Komposishonnan ku ta elevá nos mente i ta dirigí nos pensamentunan na Dios i Su Palabra ta un bendishon maravioso i influensia positivo den nos bida.

"Músika ta forma un parti di e adorashon di Dios den e kortenan ariba, i nos mester trata, den nos kantikanan di alabansa, pa aserká mas tantu posibel na e harmonia di e koronan selestial". - Ellen G. White, Patriarchs and Prophets, p. 594.