Lès 2 * 4 – 10 di yüli

Testimonionan Atraktivo: E Poder di Testimonio Personal

Sabat Atardi

Lesa pa e siman aki:

Marko 5:15-20; Marko 16:1-11; Echonan 4:1-20; 1 Juan 1:1-3; Gal. 2:20; Echonan 26:1-32.

Versíkulo di Memoria:

“Pasobra nos no por papia sino e kosnan kua nos a mira i a tende” (Echonan 4:20, NKJV).

Tin poder eksepshonal den un testimonio personal. Ora nos kurason ser keintá pa e amor di Kristu i nos ta ser kambiá pa Su grasia, nos tin algu signifikante pa papia tokante E. Ta un kos pa kompartí loke Hesus a hasi pa un otro hende. Ta totalmente un otro pa kompartí loke El a hasi pa nos, personalmente.

Ta difísil pa argumentá kontra eksperensia personal. Hende por debatí bo teologia òf bo interpretashon di un teksto òf asta chèrcha ku religion en general. Pero ora un hende por bisa: “Un tempu mi tabata sin speransa pero awor mi tin speransa; mi tabata yená ku kulpa pero awor mi tin pas; mi tabata inútil pero awor mi tin propósito”, asta sképtikonan ta ser impaktá pa e poder di e evangelio.

Aunke algun hende por eksperensiá kombershonnan di ripiente i dramátiko manera esun di apòstel Pablo riba kaminda di Damasko, mas tantu bia kombershon ta tuma lugá ora un hende tin un rekonosementu kresiente di e presiosidat di Hesus, un apresio profundo pa Su grasia maravioso, i un sentido supremo di gratitut pa e salbashon ku E ta ofresé pòrnada. Kristu radikalmente ta duna nos bida otro enfoke. Ta e testimonio akí ku e mundu tin mester asina desesperadamente i ta anhelá p’e.

Djadumingu5 di yüli

Testigunan Improbabel

Lesa Marko 5:15-20. Dikon bo ta kere ku Hesus a manda e hòmber Dekápolis pa testifiká na su famia i amigunan mas bien ku nutr’é den su fe nobo dor di tené serka djE?

E palabra Dekápolis ta bin di dos palabra: deca ku ta nifiká dies, i polis ku ta nifiká siudat. E region di Dekápolis tabata un área di dies siudat djis banda di e kostanan di e Laman di Galilea den siglo 1. E siudatnan akí tabata mará huntu pa un idioma i kultura komun. E demoniako tabata konosí pa hopi hende den e region ei. El a hinka miedu den nan kurashon dor di su komportashon imprevisto i violento. Hesus a mira den dje un ku tabata anhelá pa algu mihó, i asina El a libra e hòmber milagrosamente for di e demoñonan ku tabata torment’é.

Ora e hendenan di e siudat a tende ku Hesus a permití e demoñonan pa poseé nan tou di porko, i ku e porkonan a kore baha for di e baranka bai den laman, nan a sali pafó pa mira kiko tabata tumando lugá. E evangelio di Marko ta registrá “E ora ei nan a bin seka Hesus, i a mira esun ku tabata poseí pa demoño i tabatin e legion, sintá i bistí i bon na su tinu. I nan tabatin miedu” (Marko 5:15, NKJV). E hòmber tabata kompleto atrobe, físikamente, mentalmente, emoshonalmente i spiritualmente. E esensia di e evangelio ta pa restourá hende kibrá pa piká na e integridat pa kua Kristu a krea nan.

Ki mihó persona pa alkansá e dies siudatnan di Dekápolis ku un demoniako transformá ku por a kompartí su testimonio ku henter e region? Ellen G. White ta deklar’é bon: “Komo testigunan pa Kristu, nos mester konta loke nos sa, kiko nos mes a mira i tende i sinti. Si nos tabata sigui Hesus paso a paso, nos mester tin algu outéntiko pa konta enkuanto di e forma den kua El a guia nos. Nos por konta kon nos a tèst Su promesa, i a haña e promesa bèrdat. Nos por karga testimonio di loke nos a konosé di e grasia di Kristu. Esaki ta e testimonio pa kua nos Señor ta yama, i pa deseo di kua e mundu ta peresiendo”. — The Desire of Ages, p. 340. Hopi bia Dios ta usa testigunan improbabel ku a ser kambiá pa medio di Su grasia pa hasi un diferensia den nos mundu.

Djaluna 6 di yüli

Proklamando e Kristu Resusitá

Tabata djadumingu mainta trempan, i e dos Maria a bai rápidamente den direkshon di e graf di Kristu. Nan no tabata bai pa pidiE nada. Kiko un hòmber morto posiblemente por a duna nan? E último bia ku nan a mir’E, Su kurpa tabata sangrá, batí i kibrá. E esenanan di e krus tabata grabá profundamente den nan mente. Awor simplemente nan tabata hasiendo nan deber. Yen di tristesa nan tabata bai den direkshon di e graf pa balsemá Su kurpa. E sombranan melankóliko di desánimo a inundá nan bida den e skuridat di desesperashon. E futuro tabata insigur i tabata ofresé tiki speransa.

Ora nan a yega na e graf, nan tabata sorprendí di hañ’é bashí. Mateo ta registrá e eventonan di e mainta di resurekshon ei den e palabranan akí: “Ma e angel a kontestá i a bisa e muhénan: ‘No tene miedu, pasobra mi sa ku boso ta buska Hesus kende a ser krusifiká. E no ta aki; pasobra El a resusitá’ ” (Mat. 28:5,6, NKJV).

E muhénan awor tabata inundá ku goso. E nubianan skur di tristesa a disparsé den e lus di solo di e mardugá di e mainta di resurekshon. Nan nochi di tristesa a pasa. Felisidat a dòrna nan kara, i kantonan di regosiho a remplasá nan lágrimanan di lamento.

Lesa Marko 16:1-11. Kiko tabata e reakshon di Maria ora el a deskubrí ku Kristu a resusitá for di morto?

Despues ku Maria a topa ku e Kristu resusitá, el a kore pa konta e historia. Bon notisia ta pa kompartí, i e no por a keda ketu. Kristu tabata bibu! Su graf tabata bashí, i mundu mester a sa esei. Despues ku nos tambe topa ku e Kristu resusitá a lo largu di e kaminda di bida, nos tambe mester kore pa konta e storia, pasobra bon notisia ta pa kompartí.

Ki fasinante ta tambe ku, apesar di tur e biahanan ku Hesus a bisa nan kiko lo a sosodé, ku E lo a ser matá i despues resusitá, e disipelnan, esnan ku Hesus a skohe spesífikamente, a nenga di kere e testimonio di Maria. “I ora nan a tende ku E tabata bibu i a ser mirá dor di dje, nan no a kere” (Marko 16:11, NKJV). Asina, si asta e disipelnan mes di Hesus no a keré inmediatamente, nos no mester ta sorprendí si otronan no aseptá nos palabranan inmediatamente tampoko.

Djamars 7 di yüli

Bidanan Kambiá ta Hasi un Diferensia

“Awor, ora nan a mira e kurashi di Pedro i Juan, i a persibí ku nan no tabata ni eduká ni siñá, nan a keda straño. I nan a realisá ku nan tabata ku Hesus” (Echonan 4:13, NKJV).

E iglesia di Tèstamènt Nobo a eksplotá den kresementu. Tabatin 3.000 ku a ser batisá riba dia di Pentekòster (Echonan 2:41). Míles mas a ser añadí na e iglesia un par di siman despues (Echonan 4:4). Pronto e outoridatnan a rekonosé loke tabata pasando. E kreyentenan akí di Tèstamènt Nobo tabata ku Kristu. Nan bida a ser kambiá. Nan a ser transformá pa Su grasia, i nan no por a keda ketu.

Lesa Echonan 4:1-20. Kiko a sosodé aki? Kiko a sosodé ora e outoridatnan a purba silensiá Pedro i Juan? Kiko tabata nan reakshon?

E kreyentenan akí tabata nobo den Kristu, i nan mester a konta nan storia. Pedro, un piskadó ku boka grandi, a ser transformá pa e grasia di Dios. Santiago i Juan, e yunan di bos ku tabatin difikultat pa kontrolá nan temperamentu, a ser transformá pa e grasia di Dios. Thomas, e skèptiko, a ser transformá pa e grasia di Dios. E disipelnan i miembronan di e iglesia primitivo kada un tabatin nan propio storianan pa konta, i nan no por a keda ketu. Nota e deklarashon poderoso akí dor di Ellen White den e buki Kaminda na Kristu: “Asina un hende bin serka Kristu, den su kurason ta nase un deseo pa hasi konosí na otronan ki un presioso amigu el a haña den Hesus; e bèrdat salbador i santifikadó no por ser será den su kurason”. — Página 78.

Nota tambe loke e lidernan religioso a bisa den Echonan 4:16. Abiertamente nan a rekonosé e realidat di e milager ku a ser realisá, e hòmber kurá ku tabata pará ei nan dilanti. Asta ku tur esaki, nan a nenga di kambia nan aktitut. I tòg, apesar di e desafio habrí akí, Pedro i Juan no tabata bai hala nan testimonio atras.

Djárason8 di yüli

Kompartiendo Nos Eksperensia

Den Echonan 26 nos ta haña apòstel Pablo pará komo un prizonero dilanti di Rei Agripa. Aki, papiando direktamente na e rei, Pablo a duna su propio testimonio personal, papiando tokante su bida no solamente komo un persiguidó di e siguidónan di Hesus; sino despues, despues di su kombershon, su bida komo un testigu di Hesus i e promesa di resurekshon for di morto (Echonan 26:8).

Ora Pablo a ser kombertí riba e kaminda di Damasko, Señor a papia kuné i a bisa: “Mi a aparesé na bo pa e propósito akí, pa hasi bo un minister i un testigu tantu di e kosnan ku bo a mira komo di e kosnan kua lo Mi revelá na bo” (Echonan 26:16, NKJV). Kompartí nos fe semper ta un eksperensia dinámiko. E ta konta e storia di loke Kristu a hasi pa nos den pasado, loke e ta hasiendo den nos bida awe, i loke E lo realisá pa nos den futuro.

Testifikashon nunka ta tokante nos. E ta semper tokante E. E ta e Dios kende ta pordoná nos inikidatnan, ta kura nos malesanan, ta koroná nos ku miserikòrdia, i ta satisfasé nos ku kosnan bon (Salmo 103:3-5). Testifiká ta simplemente kompartí nos storia di Su grasia maravioso. E ta un testimonio di nos enkuentro personal ku e Dios akí di e maravioso grasia.

Lesa 1 Juan 1:1-3 i kompar’é ku Galationan 2:20. Ki similaridatnan bo ta mira? Kon e eksperensia di Juan ta similar na esun di Pablo?

Aunke Juan i Pablo tabatin eksperensianan di bida diferente, nan tur dos tabatin un enkuentro personal ku Hesus. Nan eksperensianan ku Hesus no tabata esnan ku a tuma lugá na un momentu partikular den pasado i despues a kaba. E tabata un eksperensia diario, konstante di regosihá den Su amor i kana den e lus di Su bèrdat.

Kombershon hamas ta un kos di pasado so? Wak e deklarashon di Ellen White tokante esnan ku tabata pensa ku nan eksperensia di kombershon di pasado ta tur loke ta importá: “Komo si fuera, si nan tabata sa algu tokante religion un tempu, nan no mester a ser kombertí diariamente; pero tur dia nos, kada un di nos, mester ser kombertí”. — Manuscript Releases, tomo 4, p. 46.

Djaweps9 di yüli

E Poder di un Testimonio Personal

Laga nos wak Pablo dilanti di Agripa atrobe. Apòstel Pablo ta para dilanti di e hòmber akí, e último den e liña di reinan hudiu, e Makabeonan, i di e kas di Herodes. Agripa a profesá di ta un Hudiu, pero di kurason e tabata un Romano. (Lesa The SDA Bible Commentary, tomo 6, p. 436). E apòstel di edat, kansá di su biahenan i bataya mishonero, marká den e konflikto entre bon i malu, ta para aki, su kurason yená ku e amor di Dios i su kara radiante ku e bondat di Dios. Loke sea a pasa den su bida, loke sea tabata e persekushon- i difikultatnan ku el a eksperensiá, e por deklará ku Dios ta bon.

Agripa ta síniko, dudoso, enduresé, i realmente indiferente na kualke étika genuino. Kontrali na esei, Pablo ta yená ku fe, komprometé na e bèrdat, i leal den defensa di hustisia. E kontraste entre e dos hòmbernan no por tabata muchu mas evidente. Na su huisio Pablo ta pidi pa papia i ta risibí pèrmit di Agripa.

Lesa Echonan 26:1-32. Kon Pablo a testifiká na Agripa? Kiko nos por siña di su palabranan?

Amabilidat ta habri kurasonnan kaminda brutalidat ta sera nan. Pablo ta inkreiblemente kortes na Agripa aki. E ta yam’é un “eksperto den tur kustumber- i asuntunan ku tin di aber ku e Hudiunan” (Echonan 26:3, NKJV). Despues e ta drenta den un diskushon di su kombershon.

Lesa e storia di kombershon di Pablo den Echonan 26:12-18 i despues, kuidadosamente, nota su efekto riba Agripa den Echonan 26:26-28. Dikon bo ta kere ku Agripa a reakshoná manera el a hasi? Kiko a impreshon’é tokante e testimonio di Pablo?

E testimonio di Pablo di kon Hesus a kambia su bida tabatin un impakto poderoso riba un rei ateo. No tin un testimonio asina efektivo manera un bida kambiá. E testimonio di un bida genuinamente kombertí tin un influensia asombroso riba otronan. Asta reinan ateo ta ser mové dor di bidanan transformá pa grasia. Asta si nos no tin un historia mes dramátiko manera Pablo, nos tur mester ta kapas pa konta otronan tokante loke ta nifiká pa konosé Hesus i pa ser redimí pa medio di Su sanger.

Djabièrnè10 di yüli

Pa mas Estudio:

Lesa Ellen G. White, “Almost Thou Persuadest Me”, p. 433-438, den The Acts of the Apostles.

E esensia di e bida Kristian ta un relashon ku Hesus ku ta asina riku i yen ku nos ta anhelá pa kompartié. Pa importante i korekto ku doktrina ta, e no por supstituí pa un bida transformá pa grasia i kambiá p amor. Ellen G. White ta splik’é bon kla ora e ta deklará: “E Salbador tabata sa ku niun argumento, aunke kon lógiko, lo a dirti kurasonnan duru òf kibra e kaska di mundanalidat i egoismo. E tabata sa ku Su disipelnan mester a haña e don selestial; ku e evangelio lo tabata efektivo solamente si el a ser proklamá pa kurasonnan hasí kayente i lepnan hasí elokuente pa medio di un konosementu bibu di djE kende ta e kaminda, e bèrdat, i e bida”. — The Acts of the Apostles, p. 31. Den e buki The Desire of Ages, e ta añadí e pensamentu poderoso akí: “E amor maravioso di Kristu lo dirti i konkistá kurasonnan, ora e mero reiterashon di doktrinanan lo no a logra nada”. — Página 826.

Tin esnan ku tin e idea ku duna nan testimonio personal ta tokante purba konvensé otronan di e bèrdatnan ku nan a deskubrí den e Palabra di Dios. Aunke ta importante na e momentu apropiá pa kompartí e bèrdatnan di e palabra di Dios, nos testimonio personal tin muchu mas di aber ku e libertat for di kulpa, e pas, e miserikòrdia, e pordon, e forsa, speransa, i goso ku nos a haña den e don di bida eterno ku Hesus ta ofresé asina gratuitamente.