Poder di Orashon: Intersediendo pa Otronan

Kompará Revelashon 12:7-9, Efesionan 6:12, i 2 Korintionan 10:4. Kon e pasashinan akí ta influensiá nos komprondementu di orashon di interseshon?

Beibel ta hisa e velo entre e mundu visibel i esun invisibel. Tin un lucha entre bon i malu, entre e forsanan di hustisia i e forsanan di skuridat, entre Kristu i Satanas. Den e konflikto kósmiko akí, Dios ta respetá libertat humano. Nunka E lo no manipulá e boluntat òf fòrsa e konsenshi. E ta manda E Spiritu Santu pa konvensé hòmber- i muhénan di bèrdat divino (Juan 16:7,8). Angelnan selestial ta drenta e bataya pa influensiá hende pa eternidat (Hebr. 1:14). Dios ta areglá tambe eventonan providensial den bida di hende pa guia nan na djE.

Loke Dios lo no hasi ta fòrsa e konsenshi. Forsa ta kontrali na e reino di Dios. Forsa ta straño na e prinsipio di amor, kua ta e fundeshi di Su gobièrnu. Aki ta kaminda orashon ta asina signifikante. Aunke Dios ta hasiendo tur kos ku E por pa alkansá hende promé ku nos hasi orashon, nos orashonnan ta lòs e poder poderoso di Dios. E ta respetá nos libertat di eskoho ora nos ta hasi orashon pa un otro, i E por hasi mas, den lus di e kontroversia entre bon i malu, ora nos hasi orashon ku ora nos no a hasi esei.

Konsiderá e deklarashon akí kuidadosamente: “Ta parti di e plan di Dios pa duna nos, komo kontesta riba e orashon di fe, e loke E lo no a drama si nos no pidi esei”. — Ellen G. White, The Great Controversy, p. 525. Den e gran kontroversia entre bon i malu, orashon ta hasi un diferensia. Ora nos hasi orashon pa un hende ku no konosé Kristu, e ta habri kanalnan pa bendishon divino kore den nos bidanan. Dios ta honra nos eskoho pa hasi orashon pa nan i ta obra mas poderosamente na nan fabor.

Ora nos ta trata ku e tema di orashon di interseshon, nos mester rekonosé humildemente ku nos no ta komprondé e funshonamentu di Dios kompletamente, pero esaki no mester kita nos for di drenta kontinuamente den e bendishonnan ku orashon ta ofresé pa nos mes i pa otronan.

Lesa Lukas 3:21, Lukas 5:16, i Lukas 9:18. Kiko e tekstonan akí ta bisa nos tokante e relashon entre e bida di orashon di Hesus i Su efektividat den ministerio?

E bida di Hesus tabata un di konstante komunion divino ku Su Tata. Na momentu di Su boutismo ora El a kuminsá Su ministerio Mesiániko, El a hasi orashon pa poder divino pa kumpli ku e propósito di shelu. Spiritu Santu a empoder’E pa hasi boluntat di Su Tata i kumpli ku e tarea Su dilanti. Sea tabata na e alimentashon di e sinku mil, e sanashon di e leproso, òf e liberashon di e demoniako, Hesus a rekonosé ku, den e bataya entre bon i malu, orashon ta un arma poderoso pa bati e forsanan di fièrnu bèk. Orashon ta un forma ordená pa shelu di kombiná nos impotensia i debilidatnan ku e poder omnipotente di Dios. E ta un medio di tin nos mes elevá pa ku Dios, kende so por toka e kurason di esnan pa ken nos ta hasi orashon.

Lesa Lukas 22:31-34 i Hebreonan 7:25. Ki seguridat Hesus a duna Pedro pa prepar’é pa e tentashonnan ku e lo a afrontá den futuro serkano? Ki siguransa E ta duna kada un di nos segun ku nos ta afrontá tentashonnan?

Ganadónan di alma efektivo ta hòmber- i muhénan di orashon. Hesus a hasi orashon pa Pedro na nòmber. El a sigurá Pedro ku na momentu di su tentashon di mas grandi, E lo tabata hasiendo orashon p’e. Satanas a komprondé bastante bon e potensial di Pedro pa e avanse di e reino di Dios. El a plania pa hasi tur kos posibel pa destruí e influensia positivo di Pedro den e iglesia kristian. Pero durante tur su tentashonnan, Hesus tabata hasiendo orashon pa Pedro, i e orashonnan di e Maestro a ser kontestá. Ki un realidat emoshonante pa rekonosé ku e Salbador ta hasiendo orashon pa nos tambe. E ta invitá nos pa uni kunE den e obra akí di orashon di interseshon i elevá otronan na nòmber dilanti di Su trono.

Nos persistensia den orashon ta atmití ku nos ta rekonosé nos dependensia apsoluto i total riba Dios pa alkansá e individuo pa ken nos ta hasiendo orashon.

Orashon di interseshon ta bíbliko. A lo largu di su ministerio, Pablo a hasi orashon pa e konversonan nobo den e iglesianan ku el a establesé a traves di su ministerio evangelístiko. Pablo tabata kere ku algu tabata sosodé ora el a hasi orashon ku lo no a sosodé si e no a hasi orashon. Aunke e tabata separá for di esnan ku e tabata stima, el a rekonosé ku nan por a ser uní den kurason si nan a hasi orashon pa otro.

Lesa Efesionan 1:15-21. Riba e liñanan akibou, skirbi e diferente petishonnan ku Pablo a hasi na Dios pa e Efesionan. Kiko el a pidi Dios spesífikamente pa duna nan?

E orashon di Pablo pa e kreyentenan di Efeso ta remarkabel. El a hasi orashon pa Dios lo a duna nan sabiduria i disernimentu spiritual, pa E lo a iluminá nan mente ku bèrdat divino i duna nan e speransa di bida eterno. Tambe el a hasi orashon pa nan lo a eksperensiá e obra poderoso di e poder di Dios den nan bida. E Dios akí ta asina poderoso, asina formidabel, ku El a lanta Hesus for di morto, un evento ku ta forma e fundeshi di nan speransa di bida eterno den djE. Su orashon ta konkluí rekordando nan di e “rikesanan di e gloria di Kristu” i “Su herensia”. E kristiannan di Efeso mester tabata yená ku ánimo, sabiendo ku Pablo tabata hasiendo orashon pa nan i sabiendo tokante kiko e tabata hasiendo orashon.

Lesa Filipensenan 1:3-11 i nota e tono di e orashon di Pablo. Si bo tabata un miembro di e iglesia filipense i a risibí un karta manera esaki di Pablo, kompartiendo ku bo no solamente ku e tabata hasiendo orashon pa bo sino e kontenido di su orashon, kon lo bo a sinti, i dikon? Ki promesanan ta ser hañá den su palabranan? Na mes momentu, ku atvertensianan tin tambe?

Tin algun di e palabranan di mas alentador i di ánimo den Beibel, yená ku promesanan, komo tambe yamadanan pa ta yená ku e amor i konosementu i disernimentu ku ta bin for di konosé Hesus pa asina nos por ta tur loke Dios ke pa nos ta den djE.

Orashon di interseshon ta un arma poderoso den e bataya akí entre bon i malu ku nos ta yama “e gran kontroversia”. Un di e revelashonnan di mas kla di e lucha ta den Daniel 10.

Lo bo kòrda ku profeta Jeremias a predesí ku e Hudiunan lo tabata den sklabitut na e Babilonianan pa setenta aña. Na final di e bida di Daniel e periodo profétiko di e koutivo hudiu tabata yegando na un fin. Daniel tabata preokupá. E tabata mira tiki evidensia di kumplimentu di e palabranan di Jeremias. Su pueblo ainda tabata den sklabitut.

Babilonia a ser vensé pa e Medo- i Persanan, pero e Hudiunan ketu bai a keda den sklabitut. Daniel a yuna i a hasi orashon pa tres siman. El a intersedé sinseramente pa su pueblo. Na final di e tres siman, un ser angelikal glorioso a aparesé na dje.

Lesa Daniel 10:10-14. Ki ora e orashonnan di Daniel a ser tendé, i kiko a stroba nan temporalmente?

Esaki ta un pasashi fasinante. Pa komprond’é kompletamente, laga nos identifiká algun di e personahenan. Ken ta e prens di e reino di Persia? Siguramente no Siro. E ta e rei di e Imperio Persia. Ta hopi probabel ku e ekspreshon “e prens di e reino di Persia” ta representá Satanas. Hesus a yam’é “e prens di e mundu akí” òf “e gobernadó di e mundu akí (Juan 12:31, Juan 14:30). Pablo a kategoris’é “e prens di e poder di laira” (Efe. 2:2). Si e prens di Persia ta representá Satanas, e ora ei ken ta Miguel? E palabra Miguel ta ser usá sinku bia den Beibel (Rev. 12:7; Judas 9; Dan. 10:13,21; i Dan. 12:1). Un estudio kuidadoso di e pasashinan akí ta revelá ku Miguel (kua ta nifiká “Ken ta manera Dios”) ta un otro palabra pa deskribí Hesus komo e Komandante di tur e angelnan den kombate direkto ku Satanas. Kristu ta e Yu di Dios eterno, preeksistente, todopoderoso. Un di Su funshonnan komo Komandante di tur e angelnan ta pa derotá i finalmente destruí Satanas.

Daniel 10 ta hala e kortina un banda i ta revelá e lucha akí entre bon i malu. Miéntras Daniel ta hasi orashon, Miguel, e Hesus todopoderoso, ta baha for di shelu pa konfrontá e forsanan di fièrnu. Aunke nos no ta mir’é, Hesus ta trahando pa kontestá nos orashonnan di interseshon tambe. E ta un Salbador poderoso. Ni un di nos orashonnan ta pasa sin ser persibí.

A lo largu di Beibel, tin un énfasis riba partikularidat den orashon. Orashon no ta un anhelo vago di e alma. E ta presentá Dios ku petishonnan spesífiko. Hesus a hasi orashon spesífikamente pa Su disipelnan. Apòstel Pablo a hasi orashon hopi spesífikamente pa e kristiannan di Efeso, Filipos i Colosas. El a hasi orashon pa su koleganan hóben manera Timoteo, Tito i Juan Marko.

Lesa 1 Samuel 12:22-24 i Job 16:21. Kiko e dos pasashinan akí tin en komun? Kiko nan ta bisa nos tokante orashon di interseshon?

Tantu Samuel komo Job ta enfatisá e nesesidat pa interseshon ferviente, sinsero i spesífiko. E palabranan di Samuel ta bastante fuerte. E ta sklama: “Laga e ta leu for di mi ku mi mester peka kontra Señor ora mi stòp di hasi orashon pa boso” (1 Sam. 12:23, NKJV). Kasi nos por tende e eko di e orashon di Samuel den e palabranan di Job: “O, ku un hende lo por a roga pa un otro na Dios” (Job 16:21, NJKV). Roga na Dios pa hòmber- i muhénan ku no konosé Kristu ta nos trabou.

Lesa 1 Juan 5:14-16. Kiko ta sosodé ora nos intersedé pa otronan?

Ora nos hasi orashon pa otronan, nos ta bira un kanal di bendishon di Dios pa nan. E ta basha e riu di e awa di bida for di e trono di shelu a traves di nos na nan. Henter e ehérsito di Satanas ta tembla na e zonido di interseshon ferviente. Ellen G. White ta deskribí e poder di orashon den e palabranan signifikante akí: “Satanas no por soportá ku ta apelá na su rival poderoso, pasobra e ta teme i ta tembla dilanti di Su forsa i mahestat. Na e zonido di orashon ferviente, henter e ehérsito di Satanas ta tembla”. — Testimonies for the Church, tomo 1, p. 346. Orashon ta konektá nos ku e Fuente di poder divino den e bataya pa e almanan di hòmber- i muhénan pèrdí.