Kompartí e Palabra

Lesa Salmo 119:105, Jeremias 23:29, Lukas 8:11, i Mateo 4:4. Ki sinku símbolonan ta ser usá pa deskribí e Palabra di Dios den e pasashinan akí? Dikon bo ta kere ku e sinku símbolonan akí a ser skohé pa representá e Palabra di Dios?

E vários símbolonan usá den e pasashinan akí ta deskribí algun di e funshonnan prinsipal di e Palabra di Dios. Ora nos kompartí e Skrituranan ku otronan, e ta manera un lus ku ta iluminá bida. Hesus, “e lus di mundu”, ta kibra e skuridat di nan mal komprondementu tokante ken Dios ta i e naturalesa di Su karakter. Mentenan skuresé ku un mal komprondementu di Dios ta ser iluminá pa Spiritu Santu a traves di e Palabra di Dios.

Di akuerdo ku Jeremias, e Palabra di Dios ta manera un kandela i un martin. E ta konsumí e sushedat di piká den nos bida i ta kibra nos kurasonnan duru. Ora nos yuda hende mira den Skritura e gloria di Hesus, nan kurasonnan duru ta ser kibrá, i e kandela di Su amor ta konsumí e sushedat di egoismo, kudishi, pashon, i egoismo.

E Palabra di Dios ta ser kompará tambe ku simia. E karakterístika klave di un simia ta ku e ta duna bida. Simia ta tuma tempu pa krese. No ta tur simia ta spreit na mes momentu. No ta tur mata ta krese na mesun ritmo. Pero bou di e kondishonnan korekto, e bida den e simia ta baster a traves di e suela den bida nobo. Ora nos planta e simia di e Palabra di Dios den e kurason i mente di otronan, nos lo no mira semper resultadonan inmediato, pero den silensio e simia ta kresiendo, i den e tempu propio di Dios, si nan respondé riba e impulsonan di Spiritu Santu, e lo produsí un kosecha pa e reino di Dios.

Hesus ta kompará Su Palabra ku pan nutritivo. Manera hopi di nos sa, tin poko kos mes satisfaktorio ku un bon kipashi di pan. E Palabra di Dios ta satisfasé e hamber di un alma i ta nutri nos anhelonan spiritual interno. Ora bo ta kompartí e promesanan di e Palabra ku otronan i ta yuda nan deskubrí ku Hesus ta e Palabra, nan bidanan lo ser transformá pa Su bondat, enkantá pa Su amor, asombrá pa Su grasia, i satisfasé den Su presensia.

Kompará Hebreonan 1:1-3, Hebreonan 4:12, i Salmo 33:6,9. Kiko e pasashinan akí ta bisa nos tokante e poder di e Palabra di Dios?

E palabra di Dios ta e Palabra Bibu. E ta hiba kuné e poder pa logra e kosnan ku e ta deklará. Palabranan humano por papia di loke ta, ma Dios ta papia di kosnan ku no a ser hasí ainda i despues E ta krea nan pa medio di e poder di Su palabra. E Palabra di Dios ta un Palabra kreativo. E Palabra oudibel ku ta prosedé di Su boka tin e poder pa krea tur kos ku e ta proklamá.

Den e historia di Kreashon di Génesis 1, e ekspreshon “Dios a bisa” ta ser usá repetidamente (Gen. 1:3,6,11,14,20,24,26,29). E palabranan alegóriko di Dios tabatin asina tantu poder ku ora El a papia, tera seku a aparesé, matanan a spreit, flornan i palunan di fruta a floresé, i animalnan a surgi.

Tin un palabra hebreo fasinante usá den Génesis 1 pa e aktividat kreativo di Dios. Ta e palabra bara. Den e forma partikular akí e ta ser usá pa e aktividat di Dios pa krea algu for di nada. E verbo ta ser usá solamente ora Dios ta e suheto. Es desir, únikamente Dios por bara, i E ta hasi esei a traves di e poder di Su palabra papiá.

Dios no solamente a krea e mundu akí a traves di e poder di Su palabra, sino tambe E ta sostené i manten’é a traves di Su palabra. E mesun poder ku tin den e Palabra papiá di Dios tin den Su Palabra skibí. E mesun Spiritu Santu ku tabata aktivo den Kreashon tabata aktivo den inspirashon di Skritura. E ta presente ora nos ta lesa e Beibel òf kompartié ku otronan. Tin poder kreativo ku ta kambia bida i ta duna bida den e Palabra di Dios. “E energia kreativo ku a yama e mundunan den eksistensia ta den e palabra di Dios. E palabra akí ta duna poder; e ta engendrá bida. Kada mandato ta un promesa; aseptá pa e boluntat, risibí den e alma, e ta trese kuné e bida di Esun Infinito. E ta transformá e naturalesa i ta bolbe krea e alma den e imágen di Dios”. — Ellen G. White, Education, p. 126.

Segun ku nos ta kapta personalmente e promesanan hañá den e Palabra di Dios, nos bida ta ser kambiá, i segun ku nos ta yuda otronan kapta e promesanan maravioso akí, Spiritu Santu lo kambia nan bida tambe.

Tin múltiple benefishinan di studia e Palabra di Dios. Apòstel Pedro ta bisa nos ku a traves di e promesanan di Skritura nos ta bira “partisipantenan di e naturalesa divino” (2 Pe. 1:4). Santiago ta papia di e “palabra implantá, kua ta kapas di salba boso almanan” (Santiago 1:21, NKJV). Pablo ta agregá ku “e palabra di Su grasia ... ta kapas di edifiká boso i duna boso un herensia meimei di tur esnan ku a ser santifiká” (Echonan 20:32, NKJV). Beibel tin un propósito redentor. Mirando Hesus den tur e Skritura, nos ta ser kambiá. Dor di kontempl’E den Su Palabra, nos ta bira manera E (2 Kor. 3:18). “Ta un lei, tantu di e naturalesa intelektual komo di esun spiritual, ku, dor di kontemplá nos ta ser kambiá. E mente ta adaptá su mes gradualmente na e temanan riba kua e ta ser permití pa reflekshoná”. — Ellen G. White, The Great Controversy, p. 555.

Lesa 2 Timoteo 3:14-17 i Juan 17:14-17. Ki benefishinan adishonal ta bin for di studia e Palabra di Dios?

Skibiendo na su kompañero hóben Timoteo, apòstel Pablo ta urgié pa ta fiel na Skritura i ta kompartí e benefishinan di studia e Palabra inspirá. Di akuerdo ku Pablo, e Beibel ta “útil pa doktrina”. E ta revelá bèrdat i ta eksponé eror. E ta deskribí e plan di Dios pa e rasa humano. E ta reprendé nos pikánan, e ta koregí nos pensamentu eróneo, i e ta instruí nos den hustisia. E Skrituranan ta revelá e hustisia di Kristu. Nan ta hiba nos for di e lokura di nos propio pekaminosidat na e bunitesa di Su hustisia. Ora nos mira e amor desinteresá di Hesus den kontraste ku nos egoismo, nos ta keda asombrá. Segun ku nos ta kontemplá den Skritura e profundidat di Su kompashon i kuido, nos bidanan ta ser kambiá. Ora nos kompartí Su Palabra ku otronan, nan tambe ta ser transformá radikalmente. Kontemplando Hesus den Su Palabra, nos ta bira mas manera E. Testifiká no ta trata di kompartí loke nos ta pensa òf asta loke nos ta kere. E ta trata di kompartí e bèrdatnan eterno hañá den e Palabra di Dios. Ora e Palabra di Dios a bendishoná nos bidanan inkreiblemente, nos tin e kredibilidat pa konta otronan kon e por bendishoná nan bidanan tambe.

Un hende a yega di konta mas ku tres mil promesa den e Palabra di Dios. Kada un di e promesanan akí ta bin for di e kurason di un Dios amoroso kende “ta kapas pa hasi tur loke nos pidi òf pensa di forma ekstremadamente muchu mas abundante, di akuerdo ku e poder ku ta obra den nos” (Efe. 3:20, NKJV). E promesanan di Dios ta kompromisonan ku E ta hasi ku kada un di nos. Ora nos reklamá e promesanan akí pa medio di fe i siña otro hendenan pa reklamá nan, e bendishonnan di shelu ta kore drenta den nos bida. Apòstel Pablo ta enfatisá e realidat divino akí den Romanonan 8: “E ku no a spar Su propio Yu, sino a entreg’E pa nos tur, kon E lo no duna nos tambe tur kos libremente kunE?” (Rom. 8:32, NKJV). Apòstel Pedro ta klarifiká e promesa akí, deklarando ku “Su poder divino a duna nos tur kos ku ta pertenesé na bida i piedat” (2 Pe. 1:3, NKJV). A traves di e morto di Kristu riba e krus, i Su viktoria riba Satanas i e gobierno i podernan di fièrnu, El a proveé tur kos nesesario pa nos biba un bida spiritual piadoso. Tambe E ta primintí di proveé pa nos nesesidatnan físiko básiko.

Kompará 1 Juan 1:7-9 i Filipensenan 4:13, 19. Aunke e promesanan akí ta bastante diferente, kiko nan ta siña nos tokante e karakter di Dios? Kon e promesanan akí a hasi impakto riba bo bida?

Kada un di e promesanan ku nos a lesa den e pasashinan akí ta papia di algu diferente, pero e imágen di Dios ku nan ta duna nos ta hopi similar. Nan ta revelá un Dios di pordon amoroso, poder infinito, i preokupashon pa nos nesesidatnan básiko. Nan ta duna nos e seguridat ku Dios ta preokupá profundamente pa nos.

Lesa Hebreonan 3:19; 4:1-3; i Mateo 13:58. Kiko e versíkulonan akí ta bisa nos tokante e nesesidat di fe?

Tin asina tantu promesa maravioso di Dios den Beibel, i ora, pa medio di fe, nos reklamá e promesanan di e Palabra di Dios i kere nan pasobra Kristu a primintí, e bendishonnan di e promesanan ei ta bira di nos. Ta un falta di fe den e abilidat di Dios pa hasi loke El a primintí den Su Palabra ku ta limitá e kumplimentu di e promesanan di Dios den nos bida. Hasi orashon pa Dios guia bo e siman akí na un hende ku tin mester di e promesanan yen di speransa ku ta ser hañá den e Palabra di Dios.

Bon notisia ta pa kompartí. Pensa riba e momentunan den bo bida ku bo a ser deleitá ku bon notisianan. Por tabata e dia ku bo a komprometé pa kasa, e nasementu di un yu, un trabou nobo, òf e kompra di un outo òf kas nobo. Bo tabata asina eksitá ku bo no por a warda pa kompartié.

Ta maravioso pa kompartí nos goso ku otronan, pero e mihó notisia den henter universo ta e storia di Hesus. Ora nos deskubrí persepshonnan nobo den Su Palabra tokante e salbashon ku tin den Kristu, nos kurason ta basha over di goso, i nos ta anhelá pa konta un hende mas. Ora e outoridatnan religioso a purba stòp e predikamentu di e apòstelnan, Pedro a deklará: “Pasobra nos no por laga di papia e kosnan ku nos a mira i tende” (Echonan 4:20).

“Tan pronto ku un hende bin serka Kristu, ta nase den su kurason un deseo di hasi konosí na otronan ki un amigu presioso el a haña den Hesus; e bèrdat salbador i santifikador no por ser será den su kurason. Si nos ser bistí ku e hustisia di Kristu i ser yená ku e goso di e presensia di Su Spiritu, nos lo no ta kapas pa keda ketu”. — Ellen G. White, Steps to Christ, p. 78.

Den Romanonan 1:14-16 Pablo a skibi: “Mi ta un debedó na e griegonan, i na e bárbaronan; tantu na esnan sabí, komo na esnan bobo. Asina, enkuanto ami, mi ta kla pa prediká e evangelio na boso ku ta na Roma tambe. Pasobra mi no tin bèrgwensa di e evangelio di Kristu: pasobra ta e poder di Dios pa salbashon na tur hende ku ta kere; na e hudiu promé, i tambe na e griego”.

Apòstel Pablo nunka a kansa di konta su historia di kombershon. Su kurashon tabata basha over ku goso den Hesus. P’e, bon notisia tabata pa kompartí, i e no por a keda ketu.

Ki prinsipionan vital tokante kompartí e Palabra di Dios Isaias 50:4, Eklesiastés 3:1, i 2 Timoteo 4:2 ta duna nos?

Segun ku nos ta someté nos bida na Kristu i Su servisio, E lo habri portanan di oportunidat pa nos pa “papia un palabra oportuno” òf na e momentu korekto na esnan ku El a habri nan kurason.Den tur nos testimonionan, nos mester tene tres prinsipio bíbliko den mente: kiko nos ta bisa, kon nos ta bis’é, i ki ora nos ta bis’é.