Un Paso den Fe

Apòstel Pablo ta enkurashá nos pa "laga" òf "permití" e mente di Kristu biba den nos. Esaki ta hiba nos na algun pregunta fasinante. Kon e mente di Kristu tabata? Kiko tabata goberná Su patronchinan di pensamentu? Kiko tabata e esensia di Su pensamentu?

Lesa Filipensenan 2:5-11. Kon e versíkulonan akí ta revelá e kurason di e pensamentu di Kristu i e patronchi ku tabata goberná henter Su bida?

For di tur eternidat Hesus tabata igual ku Dios. Pablo ta deklará e bèrdat eterno akí den e palabranan akí: "Kende, siendo den forma di Dios, no a konsider’é robo pa ta igual ku Dios" (Fil. 2:6). E palabra tradusí "forma" ta e palabra griego morphē. E ta nifiká e esensia mes di un kos. E ta konektá dos kos ku ta di mesun balor. E SDA Bible Commentary ta pon'é asin’aki: "Esaki ta pone Hesus den igualdat ku e Tata, i ta pon’E hopi mas ariba di tur otro poder. Pablo ta enfatisá esaki pa asina deskribí di forma mas bibu e profundidatnan di e humiashon boluntario di Kristu". - Tomo 7, p. 154. Papiando di Su naturalesa eterno, Ellen G. White ta añadí: "Den Kristu tin bida, original, no fiá, no derivá". - The Desire of Ages, p. 530.

Hesus. kende tabata un ku e Tata for di tur eternidat, "no a duna krédito na Su mes" (Fil. 2:7, NKJV). Esaki tambe ta un ekspreshon fasinante Griego. E por ser tradusí literalmente "hasi bashí". Hesus boluntariamente "a hasi Su Mes bashí" di Su privilegionan i derechonan komo e igual di Dios pa tuma e forma di un hende i bira un sirbidó humilde di humanidat. Komo sirbidó, El a revelá e lei di amor di shelu na henter e universo i, finalmente, a realisá e último akto di amor riba e krus. El a duna Su bida pa salba esun di nos, eternamente.

E esensia di e pensamentu di Hesus tabata amor apnegá. Sigui Hesus ta nifiká ku nos ta stima manera El a stima, sirbi manera El a sirbi, i ministrá manera El a ministrá. Permití Hesus, a traves di Su Spiritu Santu, hasi nos bashí di ambishon egoista, lo kosta nos algu. El a kosta Hesus tur kos. Pero Skritura ta bisa di Hesus: "P'esei Dios tambe a eksalt'E i a dun'E e nòmber ku ta riba tur nòmber" (Fil. 2:9, NKJV).

Shelu lo ta digno di kualke sakrifisio ku nos hasi riba tera. Lo tin sakrifisionan riba e kaminda, pero e gosonan di servisio lo superá nan awe, i e goso eterno di biba ku Kristu pa tur eternidat lo hasi kualke sakrifisio ku nos hasi aki parse insignifikante.

Imaginá ku abo ta Simon Pedro i Andres. Solo a kaba di sali riba un bunita mainta na Galilea, koriendo ku e friu di airu di anochi. Bo pensamentunan ta riba un kos: kue piska, hopi di nan. Piskamentu tabata bon resientemente, i bo ta wak padilanti na un otro dia di bon piskamentu. Despues, den lus di mainta tempran bo ta mir'E ta aserkando, ta Hesus di Názarèt. Poko bo sa ku den algun momentu henter bo bida lo kambia. Nunka lo bo ta meskos atrobe.

Lesa Mateo 4:18-20. Dikon bo ta kere ku Simon Pedro i Andres tabata dispuesto pa hasi un kompromiso asina radikal pa sigui Kristu? Kiko den e teksto ta indiká ku Kristu tabata yamando nan na un propósito mas haltu ku kue piská?

For di e Evangelio di Juan nos ta haña sa ku e hòmbernan akí ya tabata sa algu kaba tokante Hesus pa mas ku un aña, sinembargo no a hasi un kompromiso kompletu na djE. Asina, mester tabatin un kondukta divino tokante Kristu, algu den Su aparensia, palabranan, i akshonnan ku tabata indiká na e piskadónan galileo akí ku E tabata invitando nan na un yamada divino. E rason ku nan a bandoná nan botonan, okupashon, i ambiente familiar pa siguiE tabata ku nan a sinti e yamada na un propósito mas haltu. E piskadónan komun akí a rekonosé ku nan a ser yamá pa un propósito ekstraordinario. Dios kisas no ta yamando bo pa laga bo profeshon awe, pero E ta yamando bo na un propósito ekstraordinario, i esei ta pa kompartí Su amor i pa testifiká di Su bèrdat pa gloria di Su nòmber.

Konsiderá e yamada di Mateo, e kobradó di belasting, den Mateo 9:9. Kiko bo ta mira den e pasashi akí ku ta bastante remarkabel?

Kobradónan di belasting den e mundu romano tabata hopi biaha ekstorshonistanan ku tabata usa nan poder ofisial pa oprimí e hendenan komun. Nan tabata algun di e personahenan di mas odiá i despresiá den henter Israel. E invitashon di Kristu: "Sigui Mi", ta presuponé ku Mateo a tende di Hesus i den su kurason e tabatin un anhelo pa siguiE. Ora e invitashon a yega, e tabata kla. E tabata sorprendí ku Hesus lo a asept'é i invit'é pa ta un di Su disipelnan.

Profundo den nos tur su kurason tin un anhelo pa algu mas den bida. Nos tambe ke biba pa algu ku ta bale la pena, pa un propósito mas grandi i mas nobel. Por lo tantu, Kristu ta yama nos, meskos ku Mateo, pa siguiE.

Ora Pablo a aseptá Kristu, henter su bida a ser kambiá radikalmente. Kristu a dun'é un futuro kompletamente nobo. El a sak'é for di su zona di komodidat na eksperensianan ku apénas e por a imaginá. A traves di guia di Spiritu Santu, apòstel Pablo a proklamá e Palabra di Dios na míles di hende a lo largu di e mundu mediteráneo. Su testimonio a kambia historia di kristianismo i di mundu.

Lesa Echonan 9:3-6, 10-20. Kon e versíkulonan akí ta revelá ku Hesus tabatin un propósito divino pa bida di Pablo?

Hopi biaha Hesus ta skohe e kandidatonan di mas improbabel pa duna testimonio na Su nòmber. Pensa riba e demoniakonan, e muhé Samaritano, un prostituta, un kobradó di belasting, piskadónan di Galilea, i awor un persiguidó feros di kristianismo. Nan tur a ser kambiá pa grasia i despues mandá bai ku goso den nan kurason pa konta e historia di kiko Hesus a hasi den nan bida. Kada un nunka a kansa di konta e historia. Loke Kristu a hasi pa nan tabata asina maravioso ku nan mester a kompartié. Nan no por a keda ketu.

Kompará Echonan 28:28-31 i 2 Timoteo 4:5-8. Ki indikashonnan nos tin den e versíkulonan akí ku Pablo nunka a flakia den su kompromiso di duna henter su bida na Kristu den un ministerio ganadó di alma?

Na final di su bida, miéntras e tabata bou di aresto domisiliario na Roma, Pablo a afirmá ku "e salbashon di Dios ser mandá na e paganonan, i ku nan lo tend’é!" (Echonan 28:28, NKJV). E registro ta bisa ku e tabata risibí tur ku tabata bishit’é i e tabata prediká e Palabra na nan (Echonan 28:30, 31). Na final di su bida, el a urgi Timoteo pa hasi e trabou di un evangelista, i Pablo por a bisa di su mes: "Mi a lucha e bon bataya, mi a terminá e kareda, mi a mantené e fe" (2 Tim. 4:7, NKJV).

Ounke nos yamada kisas no ta mes dramátiko ku esun di Pablo, Dios ta yamando kada un di nos pa partisipá huntu kunE den Su obra di kambia e mundu. Ta opvio ku apesar di tur e difikultatnan ku el a konfrontá a traves di e añanan (lesa 2 Kor. 11:25-30), Pablo a keda fiel na su yamada den Señor. E historia di kon e eks persiguidó e siguidónan di Hesus a bira e defensor di mas influyente i konsekuente di e fe kristian (ku eksepshon di Hesus) ta keda un testimonio poderoso di loke Señor por hasi a traves di un hende ku dediká su bida na e obra di Señor.

Amor semper ta manifestá su mes den akshon. Nos amor pa Kristu ta obligá nos pa hasi algu pa humanidat pèrdí. Pablo a deklará esaki klaramente ora el a bisa na e iglesia na Korinto: "Pasobra e amor di Kristu ta obligá nos" (2 Kor. 5:14, NKJV). Kristianismo no ta nifiká bandoná primeramente kosnan malu pa asina nos por ser salbá. Hesus no a "renunsiá" kosnan malu den shelu pa asina E por a ser salbá. El a renunsiá bon kosnan pa asina otronan por a ser salbá. Hesus no ta invitá nos pa simplemente duna nos tempu, talento i tesoronan na Su kousa; E ta invitá nos pa duna nos bida.

Den un reunion di mainta ku e disipelnan kantu di laman di Galilea, Hesus a deskribí e demandanan di amor divino di forma briante.

Lesa Juan 21:15-19. Ki pregunta Hesus a hasi Pedro tres biaha, i kiko tabata e kontesta di Pedro? Dikon Hesus a hasi Pedro e pregunta partikular aki tres biaha?

Pedro a nenga su Señor tres biaha, i Hesus a optené un kontesta di amor for di e propio lepnan di Pedro tres biaha. Den presensia di e disipelnan, Hesus tabata konstruyendo e konfiansa di Pedro nobo ku el a ser pordoná pa amor divino i ku ainda Hesus tabatin trabou pa e hasi den Su kousa.

Lesa Juan 21:15-19 atrobe, e biaha aki spesialmente opservando e kontesta di Hesus riba e afirmashon di Pedro di su amor pa Kristu. Kiko Hesus a bis'é hasi komo kontesta?

Amor divino ta aktivo, no pasivo. Amor genuino ta mas ku un sintimentu kaluroso, mas ku un idea bunita. E ta envolví kompromiso. Amor ta obligá nos pa aktua. E ta hiba nos na alkansá un mundu pèrdí di e yunan di Dios ku ta den nesesidat desesperá. Ora Hesus a bisa Pedro: "Alimentá Mi lamchinan", esaki tabata tantu un mandato komo un alivio di konsuelo. E Maestro a pidi un reakshon na amor, i tambe El a enkurashá Pedro ku ainda E tabatin un trabou pa e hasi, apesar di e akshon berdaderamente bergonsoso di Pedro ora Hesus a ser arestá, i Pedro no solamente a nenga di tabata konosé Hesus, sino el a hasi esei ku maldishon tambe, eksaktamente manera Kristu a bis’é ku e lo a hasi.

E punto? Kisas bo por a faya bo Señor desesperadamente. Bo por a neng'E pa medio di bo akshonnan mas ku un biaha. E bon notisia ta ku grasia ta disponibel ainda, i Dios no ta kla ku bo ainda. Ainda tin un lugá den Su obra pa bo, si bo ta dispuesto.

Na final di e kombersashon entre Pedro i Hesus, nos ta mira dos hòmber kanando riba playa. Segun e olanan ta dal na e kosta, Hesus ta konta Pedro tokante e kosto di disipulado. E ke pa Pedro sa klaramente kiko e lo bai enfrentá si e aseptá e invitashon di Hesus pa "alimentá Mi karnénan".

Lesa Juan 21:18, 19. Kiko Hesus a bisa Pedro tokante e kosto di disipulado? Dikon bo ta kere ku Hesus a revelá algu asina asombroso na Pedro na e punto aki den su bida?

Den e palabranan akí, Kristu a predesí e martirio ku un dia Pedro lo a eksperensiá. Su mannan lo tabata ekstendé riba un krus. Den e revelashon akí, Kristu a ofresé Pedro un eskoho. El a ofresé e goso di mas grandi di bida: mira almanan ganá pa e reino di Dios. Riba dia di Pentekòste e lo a mira míles bin na Kristu. E lo a hasi milagernan den nòmber di Hesus i glorifik'E dilanti di hopi míles mas. E lo tabatin e goso eterno di kompañerismo ku Kristu den Su mishon.

Pero e privilegio ei lo a bin ku un preis. E lo a demandá un sakrifisio, e sakrifisio supremo. Pedro a ser pidí pa hasi e kompromiso ku su wowonan hanchu habrí. pasobra Pedro tabata sa awor ku ningun sakrifisio tabata muchu grandi pa uni ku Hesus den Su mishon na e mundu.

Lesa 1 Juan 3:16-18. Pa Juan, amor ta mas ku un apstrakshon vago. Kon Juan ta definí e sakrifisio supremo di amor?

Den eternidat, nada ku nos a yega di hasi lo parse manera un sakrifisio. Nos invershon di tempu i esfuerso, e invershon di nos bida, lo parse enormemente rekompensá. Ki un goso ta pa kambia amor den akshon, pa kambia intenshonnan den kompromiso. Ora nos respondé na amor divino sin tene nada atras ora nos ta dediká nos mes den servisio pa testifiká na otronan komo embahadornan di Kristu, nos ta kumpli ku e propósito di nos bida i eksperensiá e goso di mas grandi di bida. Hesus a pon’é asina korektamente: "Si boso sa e kosnan akí, bendishoná boso ta si boso hasi nan " (Juan 13:17, NKJV). E goso di mas grandi di bida i felisidat duradero ta bin ora nos ta kumpliendo ku e nifikashon di nos eksistensia dor di glorifiká Dios a traves e forma ku nos ta biba i kompartí Su amor i bèrdat ku e mundu.