E Lei komo Maestro

E buki di Deuteronomio ta kontené e último palabranan di Moises na Israel promé ku un generashon nobo, esun ku finalmente lo drenta e tera Primintí. Pero promé ku nan drenta, e tin algun palabra- i instrukshonnan hopi kla pa nan.

Lesa Deuteronomio 31:9-13. Kiko ta nifiká teme Dios?

Dios tabata intenshonal tokante e maneranan ku El a komuniká Su lei na Israel. El a hasi tur provishon pa asina Su leinan lo no a ser lubidá. Di e manera akí, Dios ta ta un edukadó ku pasenshi. E ta siña i ripití i ta manda profetanan i ta usa Su sirbidónan pa komuniká Su mensahe. I El a hasié bes tras bes. En realidat, hopi di e eskritonan di Tèstamènt Bieu no ta nada otro sino Dios ku ta buska pa siña Su pueblo pa sigui e kaminda di bida?

Nota den e versíkulonan akí kon Moises ta enfatisá e importansia pa futuro generashonnan siña e lei. Moises ta deskribié komo un proseso di dos stap. Promé e muchanan lo tende e lei, i despues nan lo “siña teme Señor boso Dios” (Deut. 31:13).

Promé nan ta tende, i despues nan ta siña teme Dios. Es desir, siña e lei ta impliká ku temor lo no ta un resultado natural di konosé e lei. E proseso di teme Dios mester ser siñá. Moises ta impliká ku konosementu i temor ta un proseso, no un relashon inmediato di kousa i efekto.

Tambe, kiko “teme Dios” ta nifiká ora e pueblo ta ser bisá tambe ku “boso lo stima Señor boso Dios ku henter boso kurason, ku enter boso alma, i ku tur boso forsa” (Deut. 6:5, NKJV)? Kisas nos por kompar’é ku e forma ku un mucha ta stima i teme un bon tata, un tata ku ta revelá su amor i kuido dor di mustra ku e ta bisa loke e ke men i e ke men loke e ta bisa. Ku un tata asina, si bo hasi malu, enbèrdat lo bo sufri e konsekuensianan di e mal kondukta ei. Sí nos por, i mester, stima i teme Dios na mes momentu. Nan no ta ideanan kontradiktorio. Mas nos siña tokante Dios, mas nos yena na stim’E pa motibu di Su bondat; i sinembargo na mes momentu, mas nos yega na konosé Dios, mas nos por tem’E tambe, pasobra nos por mira presis kon santu i hustu E ta i kon pekaminoso i inhustu nos ta al kontrario, i kon ta solamente pa grasia, mérito inmeresí, nos no ta ser destruí.

Ora Moises sa ku e tabata bai muri pronto, e ta profundamente konsiente di e situashon ku e lo laga atras. E sa ku despues di su morto e Israelitanan lo drenta den e Tera Primintí di Kánaan. E sa tambe ku nan lo bira rebelde ora nan alkansá nan destinashon sperá pa hopi tempu.

Lesa Deuteronomio 31:14-27. Ki preparashonnan Moises ta hasi promé ku su morto? Kiko tabata e preokupashonnan prinsipal di Moises, i kon e ta dirigí e preokupashonnan ei?

E tono di Moises aki por parse manera esun di un maestro ku p preparando pa un sustituto. E sa ku su alumnonan a komportá malu den su presensia den klas; e no ta asina engañá pa pensa ku nan lo no rebeldiá den su ousensia. E ta instruí e Levitanan ku a karga e arka di aliansa pa pone e Buki di Lei banda di e arka pa asina e ta un “testimonio”. Moises no ta simplemente pasando un plan di lès pa su sustituto. E ta pasando un testimonio. Moises ta papia di e Buki di Lei komo si fuera e ta un ser bibu ku poder pa reprendé e kurasonnan di hende.

Pensa riba e lei komo un “testimonio kontra” nan. Kon nos ta komprondé e idea akí den Tèstamènt Nobo tambe? Lesa Rom. 3:19-23. Es desir, kon e lei ta mustra nos na nos nesesidat di grasia?

Den Deuteronomio 31 Dios ta instruí Moises pa skibi un kantika ku Señor a siña Moises. Moises, despues, mester a siña e kantika na e Israelitanan pa asina, manera deklará den versíkulo 19, e “por ta un testimonio pa mi kontra e yunan di Israel.” Atrobe nos ta mira e direkshonnan di Dios personifiká. Un kantika, ora e ser kantá, ta ser kompartí i plamá mas fásilmente. I ora un kantika ta un testimonio, e tin e abilidat di pone hende wak nan mes i mira loke e ta bisa tokante nan.

Den henter Beibel nos ta tende di otro resultadonan di sa, i obedesé, e lei di Dios.

Lesa Hosue 1:7, 8. Kiko Señor tabata bisando Hosue, i kon e prinsipionan hañá ei ta apliká na nos awe?

Señor ta bisa Hosue ora e ta drenta den Kánaan: “Solamente sea fuerte i tene hopi kurashi, pa bo por opservá pa hasi di akuerdo ku henter e lei kua Moises Mi sirbidó a ordená bo; no bira for di dje na man drechi òf na man robes, pa bo por prosperá na unda ku bo bai” (Hos. 1:7, NKJV).

E noshon akí di éksito komo un derivado di obediensia por parse kontrali na e forma ku éksito ta ser midí den nos mundu awe. Hopi awendia ta kere ku e markanan di éksito ta inovashon, kreatividat, i dependensia propio. Pa tin éksito den un industria partikular hopi ta rekerí talento ekstraordinario i tumamentu di rísiko.

Sinembargo, den bista di Dios éksito ta rekerí un sèt diferente di rekursonan.

Lesa Revelashon 12:17, Revelashon 14:12, Romanonan 1:5, Romanonan 16:26, Santiago 2:10-12. Kiko e versíkulonan akí ta bisando nos, awe, tokante obediensia na e lei di Dios? Es desir, asta si nos no ta ser salbá dor di obedesé e lei di Dios, dikon ta asina importante ku nos ward’é ainda?

Tèstamènt Bieu, Tèstamènt Nobo, Pakto Bieu, Pakto Nobo, no ta importá:komo kristiannan ku ta kere den e Beibel nos ta ser yamá na obediensia na e lei di Dios. Violashon di e lei, tambe konosí komo piká, por hiba solamente na doló, sufrimentu, i morto eterno. Ken no a siña pa nan mes, òf mira pa nan mes, e resultadonan di piká, e resultadonan di violashon di e lei di Dios? Meskos ku Israel antiguo lo a prosperá dor di obedesé e lei di Dios (aunke nan tabatin mester di grasia tambe), e no ta diferente pa nos awe tampoko. Por lo tantu, komo parti di edukashon kristian nos mester tene e lei di Dios komo un komponente sentral di loke ta nifiká biba pa medio di fe i konfiando den e grasia di Dios.

Tin gran benefishinan pa sigui e lei di Dios, manera a ser demostrá den e hendenan ku Dios a prosperá. Hosue a sigui e preseptonan di Dios djaserka i el a guia e pueblo di Israel bon. Bes tras bes Señor a bisa Israel ku si nan obedesé e lei, nan lo a prosperá.

Lesa 2 Krónikanan 31:20, 21. Kiko tabata e rasonnan klave den e pasashi akí pakiko Hezekias a prosperá?

Kualke senario di edukashon ku nos ta den dje, nos mester enfatisá e importansia di obediensia. Sinembargo, studiantenan no ta kèns. Nan lo ripará, trempan òf lat, e echo duru ku algun hende ta fiel, amoroso, i obediente. I tòg, kiko? Desaster ta dal nan tambe. Kon nos ta splika esaki?

Echo ta, nos no por. Nos ta biba den un mundu di piká, di maldat, un mundu den kua e gran kontroversia ta rabia, i ningun di nos ta imün na dje.

Kiko e tekstonan akí ta siña nos tokante e pregunta difísil akí? Marko 6:25-27; Job 1, 2; 2 Kor. 11:23-29.

Sin duda, hendenan bon i fiel, hendenan ku ta warda lei, no semper a prosperá, a lo ménos manera mundu ta komprondé prosperidat. I aki tambe kisas tin un kontesta parsial riba e pregunta difísil akí, un pregunta ku, segun ku nos ta trata di siña e importansia di e lei, sin duda ta bai lanta. Kiko eksaktamente nos ke men ku “prosperidat”? Kiko e salmista a bisa? “Lo mi ke ta mas bien un wardadó di porta den e kas di mi Dios ku biba den e tèntnan di maldat” (Salmo 84:10, NKJV). No tin duda ku, pa e normanan di mundu, asta esnan fiel na Dios i obediente na Su lei no ta “prosperá” semper, a lo ménos pa awor. Nos ta hasi nos studiantenan un daño pa bisa di otro manera.

Hesukristu, e Yu di Dios, a biba e úniko bida humano den obediensia perfekto na e Tata, den obediensia perfekto na e lei di Dios. El a hasi esaki pa asina E por tabata no solamente nos sustituto, kua E tabata, sino tambe nos ehèmpel, kua E tabata tambe.

Lesa e siguiente pasashinan: Lukas 2:51, 52; Fil. 2:8; Hebr. 5:8; Juan 8:28, 29. Kon nan ta rekordá nos di e obediensia di Kristu a lo largu di Su bida?

Kisas Juan a bis’é mihó ora el a skibi: “Esun ku bisa ku e ta permanesé den djE mester kana e mes tambe manera El a kana” (1 Juan 2:6, NKJV). Ora nos fiha nos bista riba e bida di Kristu i Su ministerio riba tera, ta fásil pa mira kon El a agradá e Tata a traves di Su obediensia. Kristu a kumpli ku profesia, i El a sostené e leinan di Dios a lo largu di henter Su bida.

Meskos ku Dios a bisa Moises pa skibi Su lei pa asina e lo por ta un testimonio na Israel, Kristu tabata e enkarnashon di e testimonio na Su apòstelnan, disipelnan, na pekadornan i santunan. Awor, mas bien ku solamente tin un sèt di reglanan pa sigui, nos tin e ehèmpel di Hesus, un ser humano di karni i sanger, pa sigui tambe.

Komo maestronan, ki mihó ehèmpel nos por presentá na studiantenan ku e modelo di Hesus i kon El a obedesé e Tata?

“E asina yamá fe den Kristu kua ta afirmá di ta libra hende for di e obligashon di obediensia na Dios, no ta fe, sino asunshon. ‘Pa grasia boso ta salbá pa medio di fe.” Ma ‘fe, si e no tin obranan, ta morto.’ Efesionan 2:8; Santiago 2:17. Hesus a bisa di Su mes promé ku El a bin b tera: ‘Mi tin delisia pa hasi Bo boluntat, o Mi Dios: sí, Bo lei ta denter di Mi kurason.’ Salmo 40:8. I djis promé ku El a subi atrobe na shelu El a deklará: ‘Mi a warda e mandamentunan di Mi Tata, i a permanesé den Su amor.’ Juan 15:10. E Skritura ta bisa: ‘Pa medio di esaki nos sa ku nos konos’E, si nos warda Su mandamentunan ... . Esun ku bisa ku e ta permanesé den djE mester kana e mes tambe meskos ku El a kana.’ 1 Juan 2:3-6.” — Ellen G. White, Steps to Christ, p. 61.